اليتيمة😍

part1

كاس ما بارد حساتو فوق وجها ناضت مفجوعة من بلاصتها
سامية : نوضي يا لالاة راهي الخمسة تاع الصباح راقدة في سابع نومة و قيلا عمبالك راكي في اوتال هنا 😡
نفضت لينا روحها و ناضت : اوووف خلاص نضت
سامية : ايه مليح ايا خفي خملو باش دوك جي مدام رحاب تحب كلش في بلاصتو لبنات كامل ناضو بقيت غير انت خامرا اياا 😡
نسفت لينا في وجها و ناضت راحت غسلت و جها و نشفت شعرها و لبست حوايجها لي غسلتهم البارح عندها تبديلة وحدة تبدل بيها جاتها خلود تجري : لينا خفي جاات مدام رحاب تعرفيها تحبنا كامل نكونو عندها
لينا : ايه علبالي دوك نجو ليها نفرشولها تابي غوج 😒
خلود : اسكتي تسمعك .. اروحي
جبدتها و حبطو تستفت مجموعة من البنات شكلو صف يرحبو بمدام رحاب ( مديرة الميتم ) صمت رهيب كامل يخافوها يسناو فيها تدخل دخلت و بقات تميز فيهم منبعد عيطت : ساااااامية
جاتها تجري : نعم مدام
رحاب : كي نجي نحب تكوني هنا
سامية : كنت جاية ... عطلتني لينا كنت نوض فيها
لينا سمعت اسمها يبست في بلاصتها و بلعت ريقها سامية غطات الغلطة تاعها بلينا
رحاب : و لينااا مزال في عوايدهاااا😡 ..ً.... ليوم ما تعطوها تاكل والوا
لينا : ...م...مدام
رحاب : قطعي حسك عليااا 😡😡 ( شافت في سامية ) كاش وحدة غلطت فيهم من البارح لليوم
عملتلها سامية براسها لالا
رحاب : مليح راني في البيرو تاعي خملتو زبلكم ( حاشكم )
قالو بصوت واحد : نعم
ايا كل وحدة تمشي تقرا ما نحبش يقولو منعتهم من القرايا
قالوا كامل بصوت واحد : حاضر
جات ماشية منبعد تلفتت : لينا انت ما تروحيش
لينا : تعيش يا مدام.... عندي امتحان ما نقدرش نغيب 😢😢
راحت تجري من موراها تترجى فيها قاطعتلها سامية : سمعتي واش قالت ريحي عاقلة و لا نعطيك طريحة كيما تاع البارح نظن جسمك مزال ما براش باش يتحمل... هبطت لينا راسها و تراجعت للور راحت تجري لبيت و رمات روحها على البونك تبكي : علااااش رحتو و خليتنوووني علاااش 😢😢
رجعت بيها الذاكرة تاعها 12 سنة للور تاريخ 20-7-2006 تاريخ لي جامي نساتو و لي جامي راح تنساه ... تفكرت هذيك الليلة و تفكرت حياتها كيفاش كانت مع باباها و يماها malgré كانت صغيرة ما تشفاش مليح اما بقولها كي لخيال لي تصبر بيهم روحها غاصت في ذكرياتها تفكرت باباها لي كانت لحاجة لي تطلبها تحضر تفكرت حنانة يماها كانوا ناس مرفهين كلش متوفرلها حتى جا هذاك النهار كان في عمرها 6 سنوات غمضت عينيها حبطت من بيتها شاد الپوپيا في يدها هبطها صراخ يماها و باباها حبطت صابت باباها موجه سلاح لراسو و يماه تحاول تمنع فيه باش ما يعمل حتى شيئ جات رصاصة في يماها طاحت غارقة في دمها باباه بقى يبكي و يشوف فيها لي هي كانت مدهوشة مش فاهمة لي صاير خزر فيها و قالها : سامحيلي بنتي و قوص على روحو طاح .... فتحت عينيها تجري تكره هذي الذكرى تكره وقت لي تتفكر امها و باباها تختمها بهذي الذكرى ناضت من بلاصتها جاتها خلود : ما تبكيش لينا انا نهدر مع الاستاذة
عملتلها لينا براسها ايه 😢 : قرايتي كامل ضاعت في سبتها
خلود : هذا الشيئ ما سمعتش بلي راكي تخدمي لوكان تسمع ريحة لقرايا ما تزيديش تشميها
لينا : محتاجة لخدمة اذا نجحنا لعام لجاية عندنا جامعة و هي ما تمدش دراهم لازم نطم دراهم على جال قرايتي
خلود : ايه بصح انشالله ما تفيقش ... انا نوض راح الحال
لينا : اصبري نجي معاك
خلود : وين هبلتي مسمعتيش واش قالت ... سامية راهي تعس عليك
لينا : نروح نزور قبر ماما و بابا واش يمنعوني ! .... راح ينحولي لماكلة و يضربوني خليهم
خلود : بقاي يا لينا مكفاش عندك يومين ما كليتيش و لبارح برك ديت طريحة كي خرجتي معايا بلا ما تقولي ( حبطت راسها متحسرة )
عنقتها لينا : نخرج معاك ماعندنا غير بعض انا نعاونك و انت ثاني.... خلاص ديجا نروح وحدي صرعتيني.. 😘
خرجت و خلاتها مشات لقبرا باباها و يماها و قعدت وسطهم قبر باباها قدام قبر يماها سلمت على الحجرة و ربعت دايمن تجي تحكي معاهم واش صرالها
لينا : الطفلة صحبتي خلود لي حكيتلكم عليها شفيتو عليها يااك ! .... الطفلة لي صابوها فوق كياس السميد ... لبارح رحنا نحوسو على العايلة تاعها ... بصح ما قدرناش نصيبوهم .... سقسات ڤاع لي يجوزو عليها في الطريق انت ماما ؟ انت بابا ؟ .... الناس حسبوه مهبولة هربو عليها 😔 ... انا مسكينة كثر منها 😢... هي على الاقل عندها امل 😢...علبالي 😢😢... مانزيدش نشوفك مرة وحدوخرا ....علبالي 😢😢.... و علبالكم واش هو الاسوء .... ما نيش قادرة نتفكر عليكم ذكرى مليحة 😢😢😢... كل ما نغلق عيني ... ماما انت داخل الدم 😢😢... بابا و انت حطيت سلاح على راسك 😢😢😢... و تقولي سامحيني بنتي😢😢 خلاص ما نيش قادرة نحمل 😭😭 .... ماماا 😭...ما نيش قاااادرة نحمل😭....تعيشي ماما ما نيش قادرة نحمل 😭😭....تعيشييي قوليي حاجة 😭😭 تعيشيي ... كيفاش نحمل ؟ 😭😭... كيفاش نعيش باباا ؟ 😭😭... كيفااااااش نعييش 😭😭... ( تكسلت في وسط بين قبر يماها و باباها ) ... كي كنت صغيرة كي نخاف نرقد في وسطكم و تعنقوني 😢😢... تعيشوا..تعيشو..😢😢 عنقوني دوكا ثاني 😢😢😢.. واسوني دوكا .. كونو معايا ...😢😢( بدات تعيط ) ... تعيشواا 😢😢تعيشوااا 😭😭😭... ( بدا صوتها ينقص من البكى ) ما نيش قادرة نحمل 😢
بقات تبكي و مكسلة في وسطهم حتى داتها عينها و رقدت

★+💬