الحلقة 41
اول ما مشات لينا من الدار رفدت لاميا تيليفون و عيطت لمراد اما ما قدرش يرفد كان في اجتماع لبست حوايجها و راحت ليه لشركة حوست على البيرو تاعو و بقات تسنى فيه يكمل ... ساعة و كمل رفد تيليفون يعاود يعيطلها صابها عند الباب تسنا فيه : لاميا ! غير الخير ؟ لينا مليحة ؟
لاميا : ا.. معليش نحكو الداخل
مراد : اه bien suur ارواحي ندخلو
دخلو للبيرو تاعو هو قعد في بلاصتو و هي قعدت في الكرسي مقابلاتو : باباك حكالك على لينا
مراد : ايه و حكينا مع لعض في هذا السوجي... حكيتيلها
لاميا تلعب بصبعتيها : مزال خايفة من ردة الفعل تاعها ....... تعرف حكاية مروان مزالت جديدة و من جيهة خايفة تسمع من جيهة خرى و نخسرها بعد ما لقيتها
مراد : انا من راي تحكيلها من حقها تعرف
لاميا : ايه علبالي بصح فهمني ماهيش ساهلة كيفاش نقلها
مراد : خلينا نمشيو لبلاصة قبل ... ( وقف ) نوضي
شافت فيه لاميا مستغربة : وين نروحو
مراد : امشي لازم تقوليها نوضي
فتحلها الباب و هي رفدت ساكها و خرجو كيف كيف تبع فيه وين رايحين
_________________
خرجت لينا من عند مروان و قلبها يوجع مسحت دموعها لازمها تكون قوية طلعت في الطوموبيل و عطات لشوفار عنوان دار سلوى قتلو يمشي ليها وصلت عند الباب فتحت عليها الخدامة : نعم !
لينا : سلوى هنا
جاتها سلوى من اللور : شكون يحوس عليا ( شافتها ) انت ! واش جابك عندنا ؟
لينا : ما تخافيش ماراحش ناخذ من وقتك بزاف
وقفت مقابتلها و عملت للخدامة براسها باش تروح ضمت يدها لصدرها : خير
لينا : suur راكي فرحانة وصلتي للي تحبي عليه
سلوى : اممم خلينا نقول راني فرحانة كي دمرتك كثر .... نظرة عينك و انت تشوفي في الفديو تسوي عندي الدنيا
تبسمت لينا و طلعت حاجبها : نحير كيفاش يكونو ناس بهذي القسوة ... كيفاش بنادم يقدر يحمل كامل هذا الكره و الشر في قلبو
ضحكت سلوى : هههههههه ديتيلي الراجل لي نحبو قدام عيني و جاي تحلي فمك واش ندير فيك قليل
لينا : ما تخميش الراجل لي تحبيه راه ليك مانسحقوش ( جات ماشية منبعد تلفت ليها ) تأمني جيت باش نقلك بلي ردي بالك مني اما واش نزيدلك حالتك تغيض تجري مور واحد ماشي كامل سامع بيك و ذلي في روحك تاخذي راي خلي شوية قيمة لروحك جامي شفت وحدة ما عندهاش كرامة كيما انت
مشات و خلاتها تعيط موراها : نصايح تاعك خبيهم ليك ينفعوك يا الطلابة ( طربقت الباب و دخلت )
الوجهة تاع لينا هذي المرة الشركة تاع احمد بابات سلوى لازم تحكي خطرش هو اكثر شخص اذاها ماديا و معنويا وقفت عند شركة تاعو تشوف مع طولها دخلت سقسات على بيروه وروهولها حلت الاسونسار و طلعت لطابق لي فيه صابتو واقف عند الباب و يعيط و معاه لاميا و مراد : اخرجو عليااا
لينا جات تجري : خالتو واش كاين
لاميا وجها صفار و حست الدم نشف فيها : ل...لي..لينا !
مراد : رانا محتارمينك مادبيك تحترمنا
لينا : خالتو واش كاين ؟
لاميا جبدت مراد من يدو لي كان العصب راكبو : ايا نروحو خلاص
لينا : ما عليش تفهموني واش صاير هنا
تلفت ليه احمد : جيتي انت ( مع رما عينو عليها جات على سنسلة لي دايرتها لينا في رقبتها وسع عينيه يثبت معاها منبعد بلا ما يحس خطفهالها ) : ميييين جبتيي هذا السنسلة اهدررري مييين ؟
لينا : اعطيني سنسلاتي دوكاااا
حكمها من ذرعها مراد بعدلو يدو : اهدري مييين حبتيها
لينا : سنسلة تااااع مااامااا واااش دخلك انت تنحيها رجعهالي
احمد : تكذبي مستحييل تعطيهلك .. قولي صح مين جبتيها .... مييين ؟
لينا : مانييش نكذب سنسلة ماما رجعاهلي ( شافت في خالتها لي كانت واقفة جامدة ) خالتو قولو يرجعلي سنسلة ماما
احمد : كيفاااش تعطيك السنسلة لي عطيتهلهااا كيفاااش هذي سنسلة تاعي اناااا ما تلبسها غيير بنتي
لينا : وااش راك تقوول هذي ماشي تاعك تاع ماما
احمد : ماماك انا عطيتهلها و باش نرجعها ما يشرفنيش تحمليها في رقبتك ... ( صوت بدا يرخف بصح عينيه مزالو حمورا ) هذي السنسلة كانت راااح تعطيها لبنتي انا و هيي ماشي لبنتو هوووو فهمتيييي
عيطت لاميا : هذي بنتك .. بنتك انت و هي ماشي بنت عمار ( بابت لينا لي مات )
تلفت احمد لاميا : و...واش..راكي تهدري
لينا بقات واقفة مصدومة تشوف في خالتها و في احمد
لاميا : ايه بنتك نهاار سمحت في اختي كذبت عليه كانت بالحمل عمااار زوج بيه باااش يحميها من هدرة الناااس و يسترها ( مراد عيا يحكم في لاميا باش تسكت اما هي بقات تهدر عادتها هكا ) انت رحت تعيش مع مرتك وخليتهاااا
احمد : ماشي صح هي خدعتني معااه هذااك لي كنت نقولوو خوياااا ... لعبو بيااا كنت راااح نسمح في كلش على جالها
عيطت لاميا : تكذذب طوول عمرك و انت تكذب عليهاااا سمحت فيهااا و خليتهاااا و هي صغيرة و بنتك في كرشهااا كان ماشي عمار بابا راه قتلها و تفضحت بين الناس اماا انت مكفاكش خليتوو يفلس و على جااالك انتحر زاد عذبت بنتك لي رباها و حبهاا و هي في الميتم ( بقات تضرب فيه في صدرو ) انت مستححيل تكووون انسااان
مراد بقا يجبد فيها عليه و احمد مصدوم عينيه تعمرت بالدموع اما لينا لي كانت في عالم وحداخر تسمع و ما هيش تسمع تحاول تفهم لي تقول فيه خالتها و تستوعبو احمد هو باباها حست راسها دار بيها بعدها ما عدت تحس بحتى حاجة
...........
██████████
VOUS LISEZ
اليتيمة😍
Romanceالسلام عليكم 😘😘 جيتكم بكرونيك جديدة ليست من اختراعي (منقولة) 😌اقراوها شابة بزاف و طويلة نوعا ما فيها 70 partie 😆 و كي تقراو مادابيكم جام و كومونتاغ. 😍 بليييز
