اليتيمة😍

part8

قاعد في البيرو تاعو غاطس في الخدمة عيطتلو سكريتيرة تقولو بلي عندو ضيف قالها دخليها عارف علاش جات امو و بلي راح تسرعلو راسو بالأسئلة تاعها دخلت : سلام
مراد : عسلامة يما
قعدت تشوف فيه : دوك يهديك ربي تقولي حكاية البنت لي جابها باباك و لا تخليني نتصرف وحدي
مراد : مكاش حكاية يما لي قالو بابا هذاك هو
مريم : امممم....معليش حابا نعاود نسمع منك
مراد : يما طفلة دخلنا فيها بالطوموبيل و دينها لسبيطار و كي عرف بابا بلي ما عندهاش دار تبقى فيها غاضتو جابها تخدم عندنا هذا مكان
مريم : ما عجبتنيش هذيك الطفلة ما حبيتهاش
مراد : يما عندي خدمة
مريم : اووف فهمت نوض انا عندي شغل في الجمعية لي قايمة عليها نشوفك في العشا
مراد : انشالله
خرجت و بقى يخمم راسو راح يطرطڨ
_________________________________
مروان مشا مع صحابو وقتهم كلو لعب و سهرات و بنات وصل وقت العشا الكل يجرو يوجد في الطابلة و فاطمة تنبه في لينا تعمل كل لي تقولها عليه وجدو كلش و وقفوا جمعت ڤاع العيلة تاكل و لينا تحوس على مروان بعينيها اما هو مكانش موجود كملو و خملو كلش و ساد السكوت في القصر الكل راح يرقد لبست لينا شوميز دونوي لي عطاتهلها فاطمة جاتها كبيرة و عريضة جات تعوم فيها
فاطمة : 😂😂😂 يا بنتي حوايجي مين يجوك راكي ضعيفة ما فيك والوا
لينا : معليش واسعة نرقد بيها نتهوا 😂😂
فاطمة : تصبح بخير بنتي
لينا : تصبحي بخير خالتي
طفاو ضو و لينا ماجهاش نوم بقات تتقلب في بلاصتها و تخمم في مروان زعما جا .. اووف ما نقدرش حتى نشوف
ناضت بلعقل مشات للكوزينة و قعدت فوق البوطاجي تشوف مع التاقة الكوزينة طل من الجنية تشوف في سما الصفيا و نجوم تخمم في حياتها تنهدت تنهيدة طويلة اكيد هذاك الهم مزال يحوس عليها .. قرايتها ضاعت و خدمتها كيف كيف تخاف ترجع يصيبوه رفدت راسها لسما و تدعي : يا ربي فرجها
طاحو دموعها زادت تفكرت مروان لي تحبو و هو مش سامع كامل بيها يكون دوكا في حضان كاش وحدة يتمعشق بكات حتى شبعت حست روحها ريحة شويا شافت مع ساعة صابتها 2 تاع الصباح وقفت باش ترجع لبيتها بلاك تقدر ترقد تمشي مهبطة راسها حتى حست روحها دخلت في حيط طلعت راسها شافتو رجعت تجري زوج خطوات للور كان شعرو مبلول باين بلي هذا وين خرج من الدوش لابس سروال رياضي و من الفوق عريان بدنو مسكل و كتافو عراض بقات تشوف فيه باهتة و حالااا فمها ما حستش على روحها و هو بقى يضحك عليها : اووه باربي هذي انت ... وجديلي سنوديش و جيبيهولي للجنينة
مشا رايح عاود تلفت ليها مزالت بنفس الوضعية ما تحركش هبط راسو و عض على شفتو التحتانية يضحك من بعد شاف فيها : معليش غلقي فمك برك كاش ما يدخل فيه
فاقت مع روحها غلقت فمها و وسعت عينها بلعت ريقها من الموقف لي تحطت فيه
مروان : سمعتيني واش قتلك
لينا ما قدرتش تهدر بسيف تخرج الهدرة عملتلو براسها ايه : دق..دقيقة و نوجدو... لالا خمسة دقايق دقيقة ما تكفيش
مروان : دقيقة و لا خمسة اكتيڤي شوية برك راح نموت بالجوع
لينا : حاضر
تبسم على جنب و خرج و لينا بقات في بلاصتها حطت يدها على قلبها و يد تمروح بيها : يا ربي رااح نموت ما نيش قادرة نتنفس
راحت تجري فتحت التاقة تتنفس قابلها كان قاعد بصح عاطي بالظهر عاودت غلقتها تجري و تلفتت حاس النفس ضاق فيها ضربت روحها على راسها و تحكي مع روحها : حماارة انتي ... بهدلتي روحي معااه.. دوك كاش ما يحسبني 😣... خلي نوجدلو قبل ما يعاود يولي و نهردها كثر
راحت جبدت خبز و بدات تتبسم : يااااا راح ياكل من تحت يدي 😍😍😍
وجدت هذاك سنوديش ضربت نص ساعة دارتو في صحن رجعت كل شيئ لبلاصتو و مشات عند الباب فتحاتها و خذات نفس توجد روحها : لازملك تشدي روحك لينا
طلعت راسها و مشات كان قاعد و مهبط راسو يخدم في التيليفون
لينا : احم
سمعها بدا يتبسم لتحت ما حبش يطلع راسو
لينا تاكل في روحها حايرا كيفاش تتصرف : مسيو السندويش تاعك واجد
تكلم بلا ما يطلع راسو : حطيه فوق الطابلة
حطاتو لينا جات عينها على طبليطة شيكولا عينيها ولاو قلوباا😍 وقفت تجري حست سخانة طلعتلها قلبها خلاص راح يحبس : اذا ما تسحق حتى حاجة نقدر نروح ( قالتها بالزربة )
عمللها براسو لالا

لينا : اوكي تصبح بخير
جات ماشية و قفها صوتو : انت ما تكليش و لا عاملة رجيم ما تكليش هذا الوقت ؟
تلفتت شافت فيه صابتو طلع راسو يشوف معاها هي ذابت شارت بيدها لروحها : ا..انا !
مروان : وي psk مكان حتى حد من غيري و غيرك سما انت
لينا ( جري ليا يا ماما راح نخرج من عقلي ) ؛ اه .. انا مش جيعانة ... صحا
مروان : معليش ارواحي ريحي معايا ... ما نحبش ناكل وحدي
لينا فرحت و توترت تخلطو عليها الاحاسيس : نجي😍... اه ..قصدي اذا حبيت نريح معاك ..
مروان : انا لي راني حاب ! 😂😂
لينا : نعم ما فهمتش
مروان : والوا ارواحي ريحي معايا راني حاب ايه 😂😂
لينا مشات و جات باش تقعد نطق هو : قوليلي برك شوميز دونوي تاعك مين شريتيها 😂 جايتك شابة اللله يبارك جامي شفت باربي لابسة هكا حاجة جديدة
قعدت يابس في بلاصتها حبطت راسها و خدودها حمارو راح تموت بالحشمة نسات كامل روحها واش لابسة بدات تبكي في قلبها ( يا ربي علاه شافني مبهدلة هكا و بهذي اللبسة )
هو طرطڨ بالضحك عليها و زاد شافها خدودها حمارو : مليح كي بقاو بنات يحشمو دوكا 😂😂
هي ما قدرتش طلع راسها ذابت حابسا دموعها بسيف و هو رفد سودنويش ياكل و يتبنن : اممم صح بقيتي نص ساعة.. قصدي 5 دقايق بصح جا بنين ( يتمسخر بيها )
لينا : ب..بصحتك
ياكل و يضحك عليها و هي خلاص حاسة قلبها باش يخرج من بلاصتو قاعدة معاه في بلاصة وحدة و على طابلة وحدة ريحتو بارفانو خنقتها وقفت تجري
شاف فيه مستغرب : واش بيك
لينا : ن..نقدر نروح ؟ ... نعست
مروان مستغرب : ايه معليش روحي
لينا : ت...تصبح بخير و مشات تجري دخلت ما خلتوش حتى يجاوبها حك راسو مستغرب و طلع حاحبو : واش بيها هذي ! 😂
كمل ياكل و حبط راسو يخرب في تيليفونو و هي دخلت لشومبرة بلعقل باش ما تفيقش فاطمة و رمات روحها في السرير حست النفس رجعت فيها : بقات تسب في روحها : تبهديلة ما يعرفنيش و كي عرفني بهدلت روحي معاه ..اووووف باينة راه يقول هذي لحمارا لبهلولة مين جابها بابا ( غمضت عينيها و زيرتوعليها و غطات وجها تحاول تطرد للفكار قلقوها حتى جاتها بين عينيها تصويرتو و هو يضحك تبسمت ) يا ربي على ضحكتو هذيك و شكلو ( تنهدت شافتو دقيقة خلها تنسى كامل المعناة تاعها بقات تخمم فيه خطرة تتبسم خطرة تزعف ما حستش كيفاش حتى داها نوم و رقدت

فوت+كومونت 😍