مساء المحبه 😘
#ليالي ايار
الجزء 3 .
بقلم ازهار ذابله ..
انتظرنا سجود ومرام مااعرف شعدهم
بس يمكن ساعه يله نزلوا واكتمل العدد
وبدء المحامي يشرح لكل واحد بينه دور الوصيه ولازم تتنفذ لانها هي طلب من الشخص الميت الي يتمنى ان تتحقق وصيته بعد وفاته ..
ام ايار قاطعت كلام المحامي بصوت اشبه بصياح كانت نبرت صوتها حاده جداا ومتخاطب المقابل بأي نوع من انواع الادب والاحترام عبالك يشتغل عدها ..
ام ايار:فضها وكمل شنو المهم بالوصيه
واعرف الوصيه الها بس ثلث من الورث يعني مو كل الورث بهاي الوصيه واذا شي ميعجبني تتغير ...
ايار: ماما شنو دا تحجين ارجوج خلي استاذ اكرم يكمل كلامه و وصيت بابا حتتنفذ لو اعرف من نصيبي اني احقق كل ما يتمنى بابا ....
وضاح :اتفضل استاذ اكرم كمل لو سمحت.
المحامي : اني بس اريد اوصلكم الوصيه وينتهي واجبي بعد تقسيم الاملاك يبقه يمكم وخاصتن عدكم اثنين قصر مرام وسجود لازم يكملون السن القانوني يله اتكدرون تصرفون بالاملاك بس الوصيه مالها علاقه يعني خارج قوس ...
ام ايار : لا هذا من البدايه واضح شغل النصب والاحتيال ..
اكرم : عفووا منو ناصب ع حظرتج غير جاي افهمكم بالقانون وهاي وصيت الاستاذ جراح بعد اني ماادخل انتي شوفي شلون تقسمين وعندج اثنين قصر والوصيه مثل مكلت خارج قوس ..
وضاح: كمل استاذ "مالك شغل وصيت عمي الله يرحمه تتنفذ اي شي يريده يصير قبل وفاته وبعد وفاته هذا اعتبره وعد مني ..
اكرم: اني ابدي بالتفاصيل افضل.
اول شي البيت هذا الي عايشين بي نص البيت لازم يتسجل بأسم وضاح."
والوصي ع سجود ومرام هم وضاح.
يتكفلهم الى ان يتزوجون وينطيهم كل وحده نصيبها .
اداره المصنع والشركه ايضا بتحكم وضاح
بالمختصر كل مايملك ابو ايار تحت حكم وضاح "وهاي الوصيه مو وصيه عاديه بيها توكيل عام موقع من قبل ابو ايار قبل وفاته بسبوع طلب مني اكتب هذه الوصيه واسوي توكيل عام بكل ما يملك لـ استاذ وضاح ...
وما على الرسول الا البلاغ ..
ام ايار : مستحيل اقبل هيج مهزله
كافي شنو دا تحجي انت تعرف شنو يعني زوجي ميذكرني بالوصيه وفوك هذا كله امخلي هذا الراعي وصي على بناتي احجي شي منطقي بربك ..
وضاح : اسف بس مو من حقج تعترضين
واني مااريد شي وحته الي مسجله عمي بأسمي ارجعه ومااسمحلج تحجين بصيغة التصغير دائما اتذكريني راعي نكره وغيرهم اعرف اني اصلي شنو "
وافتخر اني راعي" وعمي هم جان راعي وابد لا تظنين اتكدرين تسفزيني بهذا كلامج اقسم بشنو تردين ماعندي طمع بفلوس او ابيوت او اي شي عندي الصحراء والحلال والابل وحصاني الي اطلع العصر اركض بي بدون هدف ورحلتي لشمس المغرب وماالحك عليها وارجع لـ اهلي هذا اكبر احلامي من الطفوله " ودرست ادارة اعمال واتعلمت كل شي وطورت نفسي بس مااتنكر لـ اصلي وابقه مثل مااني بس حظرتج اتعرفين اصلج .. .?
ايار : ارجوك وضاح لا تزعل من ماما متقصد.
ام ايار : لا اقصد كل كلمه كلتها ومو انت اتعلمني شنو اصلي اصلا غلطت عمري معرفت اختار اصل ونسب لـ عائلتي بس بعد فات الاوان ومستحيل اخلي بناتي ينتمن الكم ولا ينحطن لمستواكم ..
ايار: ماما فدوووه كافي مو وقت هذا كله والله تعبت بعد مااتحمل بابا مصار شهر من فقدناه وبحادث مؤسف اتعرفون بابا انقتل وانتو تتعاركون ع الورث.
اكرم : بلمناسبه المحقق يريد يحقق وياكم لان واصلتهم معلومات جديده ويريد يتأكد من مصداقيتها ..
وانت وضاح ضروري اتكون موجود..
اكيد اني اروح ويه البنات ماخليهن.
اني اسف استاذ اكرم لا تزعل من كلام ام ايار وانت رجل محترم وما عليك اي غبار.
اكرم: لا تعتذر ابني هاي دائما اتصير وياي اقرأه الوصيه ويتعاركون وياي ..
وضاح : الله يصبرك ويعينك علينا.
اكرم : امين يله اني كمل شغلي بعد "بس يوصلكم الاستدعاء حته يحققون وياكم مع السلامه ..
الجزء الاصعب المواجهه بيني وبين ام ايار بعد ما طلع المحامي " وبدت تحجي وتهدد وسجود ومرام وياها وايار ساكته حته ما تخلي عينها بعيني "
يمكن خجلانه من تصرفات امها واخواتها "
بس الواضح عليها الزعل معقوله زعلانه مني ليش اني شنو حجيت غير دافعت عن نفسي ....
حسيت بكلام والدي ع زوجت عمي كله جان صح ولا ظلمها بحرف شكد شايفه نفسها " بس الي خلاني اتحمل وقاحتها وصيت عمي والثقه والامانه الي حملنيها والله يساعدني ع هيج امانه..
طلعت من يمهم وام ايار بعدهي تسب وتغلط واني مليت شنو اجاوبها مو مسألة مااعرف ارد بس هي ما احترمت حته الحزن هي بعدهي استوها خسرت زوجها ولا مهتمه وصوتها شعلوه ..
كعدت بـ باب البيت واتفرج ع الناس ع الرايح والجاي وكلي فضول اعرفهم كلهم فجأه ودفعت الباب سجود "
هااا سجود وين تردين ...?
لك وضاح (سمسم) ضايع صار يوم كامل ادور عليه ..
منو سمسم وين ادورين عليه بهاي الظهريه ..?
اهوووو غير الكلب مالتي ..
هااا سمسم طلع كلب ..!
اي هسه وخر من طريقي اروح لهذا مودي اكيد هو ماخذه يابه اذا طلع عنده والله الا اموته ..
وين طالعه شوفي روحج شنو لابسه ..?
شلابسه ...?
غير انتي شوفي نفسج يعني هاي ملابس ينطلع بيهن ..
اي اني اطلع هيج ملابسه شي غلط وخر عن طريقي تره حيل تعبتني.
استغفر الله هاي شلون بلوه ..
مو كدامك شيطان وتستغفر والله يا الله .
بويه ارجعي لبيت واني ارجع سمسم معزز مكرم ..
لا لا هسه اطلع ..
دفعتني سجود وطلعت واني لحد الان ما مستوعب تطلع بشارع هيج لابسه بجامعه شتويه يعني مينطلع بيها والله عمي مدللهن حرامات مفسدهن ..
رجعت سجود بسرعه وتركض ...
هااا شكو ...?
لك وضاح اني مسويت شي والله بس هو يتعمد يضوجني ...
هو منو مضوجج غير افتهم ...?
مودي اني هذا .....هو ....
احجي ع كيف خلي افتهم ارتاحي واخذي نفس ...
اه لك ضربته وتخربط خاف يسجنوني ..
عفيه بعد اخوج موتي لو بي نفس ..
ظلت تبجي مثل الاطفال وتضرب برجليها بالارض واني صافن عليها شنو اسوي الها مااعرف اواسي بشر خاصتن ع شي مو مهم غير افتهم ليش تبجي ضاربه الولد وتبجي شنو هاي بنات بغداد ما ينعرفن مثل الورده ايعجبك شكلها بس تلزمها اشواكها تنغرس بيدك ..
وضاح ... وضاح ...حنسجن ...
شنو منو ...!!
احجي وياك فدوووه اذا اجو الشرطه كلهم ماعدنه سجود راحت ..
ههههههههه اي وصلت الفكره انتي جبانه ومسويه روحج جاكي شان ..
اوووووه انت تضحك عليه والله هسه اخليك اتنام مستشفى بضربه وحده ..
دخلت سجود تركض وتبجي خايفه
واني اضحك واتذكر حركاتها وشلون تبجي وتهدد واعيونها مليانه دموع"
دخلت وما فكرت بسالفة سجود
احس بيها مثل الطفله المشاغبه
ومستحيل كلامها صح شنو من ولد هذا الي ضربته واتخربط ...
كعدت بالغرفه واني ميت جوع غير ناس هاي محد يكول هذا بشر يجوع عايفيني بدون اكل ولا اكدر اطلع واشتري اكل هاي سجود خوفتني خاف صدك مسويه مصيبه
خلي انتظر يجون اهل الولد يهدون علينا
بله هاي هم عيشه وانوب امهن ماراضيه عليه .....
انهجم الباب لا انشلع من الدك ..
طلعت فتحت الباب واشوف الشرطه
بالباب ..
افتهمت كل شي رجعت اشوف البنات كلهن طلعن ..
سجود لا تحجين شي اني ضربت مودي بس ذكريني وين ضربته .
هي ماقصرت مثلت المشهد لزمت مرام وضربتها كدامي ضربت كصتي وطلعت.
يتبع ....
أنت تقرأ
ليالي ايار
Romanceقصه منقوله للكاتبه ازهار ذابله. لم اكن ذلك الرجل الذي تحلم بهِ كل فتاة لم اكن اعني لهم شيً.. ولا انا ذلك الرحال الاشقر الذي يجول البلدان والمدن بحثاً عن الكمال او الحقيه انا لا اعرف نفسي من يعلم قد اكون حلمها في شهر ايار ... قد اكون فارس احلامها قد...
