#ليالي ايار
الجزء 2
بقلم ازهار ذابله.
اول مدخلن البنات بدن يبجن وامهن اتصبرهن جانت مراه قويه وممبين عليها انكسار او خساره زوجها .
جانت صلبه واتبث لجميع قوه حتى اني حسيت بالقوه منها بس مو من طبعنا احنه البدو هيج احنه عدنا اكثر شي ينكسرن ويحزنن هنه النساء بينما الرجال ميعترفون بالحزن والدموع كانوا اقوياء ..
بس زوجت عمي مختلفه.
دخلن البنات لغرفهن وبقيت ويه ام ايار
الي جانت تخزرني ونظرتها متتفسر
بس اتريد اتوصلي فكره سعيكم مشكور.
احم احم ابني وضاح اريدك بموضوع بس مو تزعل مني ...
اتفضلي ...
انت تعرف الناس شلون اتفكر وميصير تبقه ويانه واحنه بس نسوان.
بس اني اجيتكم حته يكون وياكم رجال وماانسه وصيت عمي هو وصاني بالبنات واني اعتبرهن اخواتي ...
مااعرف بس الوصيه يم المحامي باجر انشوف اذا صدك عمك موصيك علينه ..
يعني اني مثلا اجذب وشنو مصلحتي اتعرفين اني عفت امي تنوح وراي
وابوي رافض جيتي الكم وتعرفين السبب.
اي وليش مسمعت كلام اهلك ...?
هااا يعني لازم ارجع منين مااجيت هيج قصدج موو!
اي ارجع احنه مو بحاجتك ...
ايار : ماما شنو دا تحجين ليش هيج اتعاملين وضاح ..?
انتي لا دخلين نفسج بالموضوع شوفي اخواتج يقبلن او يتقبلن هيج نكره يعيش ويانه اني ايام دراسته بلكوه اتحملته وبس ع مود ابوج مجبوره هسه شنو يجبرني اتحمل ...?
ايار: مستحيل اقبل بهذا كلامج خلص ماما وضاح يبقه وباجر يحظر ويانه لان ممعقوله نفتح الوصيه وهو مموجود.
وضاح : ماكو داعي لكل هذا اني اروح هسه اشوف اي مكان ابات بي وباجر انشوف الوصيه واذا عمي الله يرحمه عافيني من هاي المهمه بعد خير ع خير ارجع لـ دياري ولا كنكم شفتوني ..
ايار: متطلع من البيت وانت مو غريب حتبقه اهنا ..
ام ايار : اي ميخالف تكدر اتنام بالغرفه مال الحارس.
يله اني اروح انام واشوفكم باجر ..
طلعت من يمهم بس طالعه روحي فوك ما عفت اهلي واجيت بس اساعدهم واصير الهم سند وهاي هيج تصرف وياي ..
دخلت لـ الغرفه كلها اتراب متروكه
ومبهذله واني تعبان همزين بيها حمام
غسلت الجراجف وشريتهم ونظفت الارضيه وفتحت الشباك.
دخلت اسبح الجو جان بارد لان شته
والحمام بي بس مي بارد واني تعبان
نزل المي ع جسمي روحي شاغت من البرد ظليت اضحك مثل المجنون كملت بعد ما اتجمددت اصابيعي صارن زرك
لبست ملابس ثكيله وكعدت بالغرفه اريد ادفه ماكو الغرفه مغسوله وبدون فرش
واني فاتح الشباك.
طلعت من الغرفه اريد اشوف شي ادفه بي.
شفت اكو بالترك خشب
رحت سحبت كم خشبه وكسرتهم واني جسمي يرجف ماادري هيج بارده
الصحراء بالليل هم بارده بس يم اهلي مااحس بالبرد ..
مااعرف لان سبحت بمي بارد.
خليت الخشب بنص الحديقه وشعلته
صارت دخانه وبعدين اشتعلن
وكعدت ادفه احس الدم بدء يمشي
بجسمي ..
ايار اني جنت كاعده اقره احظر لـ امتحاني واسمع سجود اتصيح لـ مرام ويتفرجن من البلكون ويضحكن.
رحت وراهن واشوف وضاح مشعل نار وكاعد يدفه ..
بنات شنو الي يضحك بالموضوع ..?
مرام: لج ايو شوفي هذا مفكر حاله بيته ههههه.
سجود : ههههههه لا بعد عوزه بس دله وكهوه.
مرام : وبعد ذكرتيني بعير واحصان ونعجات اهوايه ههههههههه.
ايار: خلص عيب هذا مثل اخوكم ليش تكرهونه هيج ..
مرام لج هذوله مو من مستوانه شوفي منظره ولبسه شكد مكروه.
سجود لا والحلوه يبيع مثاليات بروسنه.
ايار الله يهديكم والله هذا الشاب ماكو مثلا بالدنيا كلها بس انتو جاهلات وحتشوفون شلون حيكون سند وعزوه النه.
مرام هههههه لج ايوو حنيتي لـ اصلج البدوي وصرتي مثلهم باجر اشتريلج حصان اعور ..
سجود خلص مرام عيب هاي ايار اختنه الكبيره ميصير هيج شنو احصان اعور لج اعرج حته يوكعها بنص الجامعه ويضحكون عليها الطلاب .
ايار كملتن مسرحيتجن الهزليه شبعتن ضحك ولا كنه بابا مصارله اسبوع من اتوفه.
عفتهن وطلعت مااعرف ليش عندي مشاعر اتجاه وضاح احساس يقربني منه شخصيته الخياليه دائما اتخيله هو فارس احلامي من جنت اصغيره واشوفه يحجي هو وبابا.
حافظه كل تفصيل بوجهه
من عيونه الواسعه السود
وشكله العربي سماره طوله
صوته الخشن ونبرت صوته الغريبه
احس كلماته مثل العلاج النفسي لروحي
بس اعرف هو ابد ميحس بشي
احساسي ميوصله بالعكس كل مااريد اتقرب منه يصدني ..
طلعت واخذت بيدي صوبه نفطيه
وبدون مااحجي دخلت الغرفه وشغلتها
وشفت هذا منظف وشايل الفرش
رحت جبت افراش وجراجف وفرشت الغرفه وسديت الشباك وخليتله بطانيه
صارت الغرفه دافيه ميحتاج بعد لـ النار الي عالكها وترس الشارع دخان
وضاح ... وضاح .. تسمعني ..?
هلا بـ ايار اي اسمعج.
تكدر اتفوت لـ الغرفه صارت جاهزه
واني اسفه متفقدتها قبل لا تفوت الها .
لا تعتذرين مصار شي.
هاي النار طفيها او فوت ادفه جوه واني اتخلص منها ..
لا انتي لا تعبين نفسج اني اخمدها.
ليش مطلبت مني انظفلك الغرفه ...?
مااريد اتعبج وادري بحالتج وفقدج لـ الوالدج.
ماكو اي تعب خاصتن اذا اقدم شي الك احس براحه تعرف من شفتك بردان هيج اني انقهرت ..
ارجعي لغرفتج وديري بالج ع اخواتج اني مو بحاجه شي ولا بردان لا تهتمين ..
عفت وضاح ودخلت لبيت والدمع عرف طريقه بوجهي ماادري ليش يصدني بهاي الطريقه شنو ينقصني ليش من اعبرله عن مشاعري يطردني ليش اني كل مره اعرف ردت فعله بس اتعمد اكمل بهذا الحب الغبي وعد هاي اخر ليله ابكي بسببك وضاح اوعدك ..
وضاح دخلت لغرفه بعد ما خمدت النار مو نار وحده لا نارين وحده منهم بالحديقه والثانيه جانت بقلب ايار الي اتريد بس اتوضح حبها ومشاعرها اتجاهي بس اني قلبي وعقلي ويه غيرها ومااريد اجرحها ..
صار الصبح وحته الصبح غريب بهاي المدينه مااكو الروح الي اتحسها بالطبيعه الطبيعه روح كيان ...
افتقد اهلي وافتقد حبي جنت كل يوم اشوفها وهي تنظر الي بنظراتها البسيطه وعيونها الي تشع امل وروحي متحب بس نظرتها جنت اتعمد اروح يم بيتهم بس حته اكحل عيني بشوفتها ..
بسرعه خلص وقت الصباح
وايار اليوم مشفتها مو مثل كل يوم
جانت كل يوم تجي تطمن عليه اليوم ماكو
لحد ما اندكت الباب و وصل المحامي
دخل وانتظر نكتمل حته يفتح الوصيه
وهم عنده اخبار جديده عن قضية الوفاة ..
يتبع. .
أنت تقرأ
ليالي ايار
Romanceقصه منقوله للكاتبه ازهار ذابله. لم اكن ذلك الرجل الذي تحلم بهِ كل فتاة لم اكن اعني لهم شيً.. ولا انا ذلك الرحال الاشقر الذي يجول البلدان والمدن بحثاً عن الكمال او الحقيه انا لا اعرف نفسي من يعلم قد اكون حلمها في شهر ايار ... قد اكون فارس احلامها قد...
