ليالي ايار

البارت الثالث عشر

#ليالي-ايار
الجزء 13
بقلم ازهار ذابله

وصلنا للمختبر وجان صديقي ينتظرني
دخلنا يمه بالمكتب وظل يسال ويسولف ...
وشرحلنا عن اكثر من نوع مواد سامه ومواد تتفاعل ويه ادويه وتتحول سموم وكشفلنا عن شي مجان بالحسبان وهو الماده الي ايخلونها بالكتب او الاقلام وبس يستخدم الضحيه الكتاب او القلم يحس بالاختناق وينتشر السم بسرعه بجسمه الى ان يختنق ويموت ...

طلعنا من المختبر واحنا حايرين واذا مثل ما يكول يعني عرفنا اداة الجريمه بس المشكله منو الي هيج سوه و وين نلكه الدليل .. ?

وضاح فدوووه رجعني للبيت تعبت ..

اسف والله اليوم تعبتج بس جان ضروري تجين وياي.

لا تعتذر واني هم جنت احتاج افتهم اهوايه اشياء بس بعد نحتاج ادله ..

اي نحتاج ادله ومو اشويه اهوايه ..

وصلنا البيت الحمد لله سجود ومرام جان عدهم اخر امتحان وبعدهم مرجعن اتاخرن اهوايه اعرفهن اخر امتحان يعتبرنه فرصه يطلعن ابراحتهن ..
بدلت وبديت احظر غده وماما جانت طالعه البيت بعد موت بابا موحش ومابي اي روح وهاي اول مره ابقه وحدي بالبيت فتت لـ مكتب بابا جان المكتب عباره عن غرفه واسعه و اول متدخل اكو كرسي واسع ومقابيله مكتب عريض لونهم اسود والكتب ع الرفوف "بجانب الغرفه اكو تمثال لـ حصان جان التمثال جداا ضخم ..
بديت انظف المكتب واشوف الكتب" واخير شي فقدت اعصابي اتذكر من جان بابا عايش وجنت ادخل المكتب ويشوفني جان يبتسملي ويصيحني ويخلني اكعد بحظنه جنت استحي منه بس هو جان يجبرني ويضحك يكول لو اتصيرين عجوز هم هذا مكانج ... بابا بعدني ما عجزت بس خسرتك بعد مااشوفك ولا اسمع صوتك ولا تكدر تمسح ادموعي الي من جنت عايش ما جانن ينزل .... بابا مو وعدتني تحظر حفل تخرجي مو كلنا ناخذ صور.. مو كتلي نلبس نفس اللون... بابا ليش عفتني ليش كبرتني قبل لا اكبر بابا ليش احسك عفت كل الهموم براسي بابا مااكدر انام الليل "الليل يمر ع الناس وهمه نيام واني يمر الليل عليه واني ابجي ...
فقدت اعصابي وحظنت الكرسي الي جان يجلس عليه بابا وصوتي عالي بجي وعتب مااحس غير الباب انفتح ودخلن سجود ومرام .... وبدل ميهدوني ظلن يبجن وياي .... مااعرف بس الموت فلسفه غريبه واذا تخسر شخص عزيز متصدك هاي الخساره الا اذا اتفوت فتره تبدي تشتاق لكل شي يخص الافتقدته اهنا تبدي اول صدمه بعد الفاجعه هي تنصدم بشي يخصه اهنا ترجع المسأه كـ انك اليوم خسرته ...
اخر شي وصلت ماما للبيت وسمعت اصواتنا المتعاليه بالبجي والنحيب دخلت وسحبتني وضربتني بكل قوتها مجانت مستوعبه تصرفها ولا فتهمت ليش ضربتني بس احسها طلعتني من عالم ثاني حسيت نفسي رجعت للواقع واتماسكت " ورجعت سحبت سجود ومرام جانن بعدهن بملابس المدرسه ...
طلعنه من المكتب وامي قفلته واخذت المفاتيح يمها ... شكد احسد ماما شخص قوي مثلها مشايفه تكدر تكبح حزنها وتغلفه بهذا الهدوء المصطنع واني اعرف بداخلها بركان يستعر من القهر والضيم ..
سجود : ماما ليش ضربتي ايار.. ?
ام ايار: جانت تحتاج ترجع للواقع وهم عقوبه الها شفتوا منظركم اني مخليتكم يمها مو تبجيكم لازم تصبركم اتقويكم مو تبجي مثل الضعفاء..

ايار : اسفه ماما بس .... بس ما كدرت اتحمل اشوف مكتب بابا هيج فارغ ..

مرام : ماما مو لازم اتعاقبين ايار لان احنه هم مشتاقين لـ بابا ميصير هيج ليش ميصير نبجي ليش منروح لـ قبر بابا ..هذا مو ضعف هاي عاطفه شعور احساس لازم انحس بالحزن حته نعرف نفسنه بشر ..

ام ايار : خلص سدوا الموضوع ..

ايار : يله اني محظره الغده بس بدلوا ملابسكم تلكون الغده حاظر..
سجود : اني مااريد ...
مرام : واني هم مااريد ..
ام ايار : شوفي شلون تلكتيهن بالبجي والصريخ وسديتي نفسهن ...
ايار : لا ماما متغديات لان منشوكت خلص الامتحان وهنه ماكو ...
سجود : اي ست ايار مخليه علينا مراقب مو ...
ايار : لا والله ست سجود بس اعرف سوالفجن ...
مرام : ماما احنه طلعنه بعد الامتحان وتغدينه ويه صديقاتنه ماكو داعي هم اتحملين ايار المسؤوليه ..
ام ايار : اي انتوا بكيفكم اطلعون وتتغدون واني محد يكلي واذا حجيت كلمه كلها اتصير محامين براسي مو بنات حشه عصابه ...
ايار : اسفين ماما بعد ميعدونها وبعدين هنه كالن الي ونسيت اكلج ..
ام ايار : محد تحجي حرف زايد يله ع غرفكم مااريد اشوفكم ..

ماما اذا تعصب هيج يصير لازم كلنا نختفي من وجهه واذا زودنه كلمه اتصير مشكله متخلص اني وسجود نتفهم امي ونعرف شلون اتفكر بس مرام دائما اتعاند وتضوج من تصرفات ماما اتحب تعرف ليش ماما متحب اتناقشنه بس ماما هيج شخصيتها اتحب تنطي امر ويتنفذ بدون اعتراض او نقاش ...

وضاح رجعت انظف غرفتي وارتب وشفت اكو باب من الكنتور مسدود اني ممستخدمه وصار عندي فضول اشوف شنو بي هذا الباب يمكن بي اغراض الحارس القديم وانتبهت وين راح الحارس وشنو قصته ....
حاولت افتح الباب ماكدرت جان مقفول
بس ظليت احاول لحد ما انفتح ....

يتبع .......