#ليالي-ايار
الجزء 29
بقلم ازهار ذابله.
ماكو اي نتيجه من هذا والواضح يعرف نفسه ماعليه دليل حته مااهتم بخبر سجن يوسف اذااا مجان يلتقي بيوسف لعد شعنده يروح الهم ...?
رجعت بس خايف اروح لـ ايار " رحت لـ اكرم المحامي وحجيتله الصار وياي وكتله هذا اكيد عنده سالفه ...
اكرم : اني اشوف قصته راح اقدم عليه شكوه واخليهم يستدعونه لـ الاستجواب غصب عليه يجي ...
ـ بعد اني مااعرف شي بس هو اكيد عنده علاقه بالموضوع لان اكثر من مره شايفينه بيت يوسف اكيد متورط وياهم ...
ـ هسه شوف اعتراف يوسف وشوف لعبتهم الوصخه .. يوسف متفق ويه جلال يسدون القضيه ويشمرونها براس اي واحد بس رياض جان انسب شخص وهم مشاكله ماتخلص فقرر يوسف يتخلص منه و رائد وجلال ساعدوا ... جلال هو الي مدخل السم للمكتب يعني جان موجود عنده واثناء التفتيش دسه بالمكتب ولـ كاه احد افراد الشرطه .... هسه كلهم بالسجن ..
ـ والله جنت شاك بجلال بس شنو المقابل ..?
ـ افلوس يوسف اول مشايفه عارفه واحد طماع وع كولتهم 56..
ـ اي المهم انكشفوا بس بعد الاهم شنو علاقتهم بالقاتل كلهم ..?
ـ مالهم علاقه بالقاتل كلهم نكروا ..
ـ لا مااتصور اكيد واحد منهم يعرف شي.
يله استاذ اني استاذن ..
يوم متعب الى ابعد الحدود واصلا من البارحه مذايك طعم الراحه ولا ماكل شي بس مي وحيل انقهرت اني شنو سويت وليش هيج اتصرفت يعني من كل عقلي اريد اتزوج ايار بهيج طريقه وهيج اتعامل وياها ... جان لازم افهمها مو اقسي عليها حته لو هي بعد تختار لازم احترم اختيارها ...
لازم اتشجع واروح اشوفها والي يصير يصير ... وصلت لـ غرفتها وشفتهم كلهم بالباب ...
ام ايار : والك عين وجاي اهنا شتريد بعد ذبحتها ...
عابد: وضاح انت السبب بالي صار لـ ايار بعد شكو جاي ..!
وضاح : وانتو منو وتمنعوني اشوف ايار اريد اشوفها اريد احجي وياها ..ايار خطيبتي وهي اتحبني ومستحيل تقبل بهذا كلامكم ...
ام ايار : شوفها هي مجرد جثه وممدوده واذا شفتها مااتصور اتساعدها بشي ولا تضرها انت بعد سويت الي تريده واخذت كل شي اخذت كل ما نملك حته صحتنا .
وضاح : اني عاذرج والله بس انطيني فرصه و راح اتشوفين شكد جنتي ظالمتني واني اعترف غلطت واهوايه واذا ايار متسامحني بعد ما تشوفن وجهي ..
ـ ادخل وشوفها بلكي من تسمع صوتك تصحه لان الدكتور يكول تسمعكم واشويه استجابت لـ صوتنا ...
دخلت لغرفة ايار واني اول مره اعرف بنفسي عندي ادموع اي ادموع مجنت ابجي من قبل ولا اعرف الحزن بالدموع بـ اصعب الاوقات وجنت قوي بس ايار جانت طفلتي الي تلعب ع اوتار قلبي مااتحمل اشوفها ميته كدامي واني السبب بموتها " اي وضاح حيل اتغيرت حيل انغريت عليها وجرحتها "
كعدت بالارض وقريب يم راسها وبديت احجي وياها ...
ايار اعرف تسمعيني ..
اسف والله اسف ..
تدرين اليوم شكد بجيت.
تدرين ما باجي من قبل.
بس انتي بجيتيني..
اكدر اخذ فرصه ثانيه منج اكدر ارجع حلمج اكدر اخليج اترجعين بنتي فراشتي الي من اشوفها اطير بعالم خيالي خالي من الهموم .... ايار مشتاقلج اريد انام وانتي يمي " اريد اول شي اشوفه بحياتي وقبل
ان ابدي يومي انتي اتكونين البدايه والنهايه " ما اريد اخسر شي بعد مليت من الخساره .. ايار اعرف اتسمعيني "
بس ارجعي" ارجعي مثل قبل قويه وصلبه ارجعي ايار الي حبتني قبل لا اعرفها ارجعي ايار الي تضحي بكل حبها وسعادتها بس حته تخلي غيرها يعيش بسعاده .... ايار مستحيل بعد الحياة تنطيني روح مثل روحج ...
كملت كل حروفي وجفت ادموعي وبعدني انتظر امل" امل يرجع ارموش وعيون امل يحرك شفاف امل ينطق كلمه ينطق اسمي مثل مايصير بـ الافلام "
بس مصار شي وبقت روحي نايمه وساكنه واني ماادري شلون غفيت بالارض يم ايار .....
صحتني الممرضه وطلبت مني اطلع برا طلعت وماكو احد لا ام ايار ولا عابد.
بقيت وحدي ورجعت غفيت ع احد الكراسي الي مخلينهم لـ الانتظار ..والكراسي قاسيات وصلبات مثل ساعات الانتظار واقسه شي هو انك اتخاطب روحك بس متجاوبك والاصعب بعد انك تكون سبب بـ وضع حبيبك بهيج حاله وانت واكف ع طولك وصلب وهو متهشم من ظلمك ....
صار الصبح بسرعه وشفت ام ايار واكفه فوك راسي كعدتني كالت روح ارتاح بالبيت " مااعرف طلبها خلاني افقد احساسي بالحقد عليها وهي هم حسيتها متسامحه وياي ...
وكفت ورفضت اروح بس شفت صلابت ام ايار نهرتني وجبرتني اروح ارتاح ..
ـ طلعت واني بالكاد اكدر اشوف طريقي ونفسي مسدوده من كل شي بس لازم اقوي نفسي وبعد وراي شغل ولازم اكمل اوراق الشركه بسرعه واستلم المبلغ الباقي ...
اخذت بطريقي اكل ورحت لـ البيت بدلت واكلت وبعدهِ هاي الغصه الي خانكتني ما راحت وبعدهَ عيوني اتريد اتفيض بأي وقت ....
يتبع.
أنت تقرأ
ليالي ايار
Romanceقصه منقوله للكاتبه ازهار ذابله. لم اكن ذلك الرجل الذي تحلم بهِ كل فتاة لم اكن اعني لهم شيً.. ولا انا ذلك الرحال الاشقر الذي يجول البلدان والمدن بحثاً عن الكمال او الحقيه انا لا اعرف نفسي من يعلم قد اكون حلمها في شهر ايار ... قد اكون فارس احلامها قد...
