ليالي ايار

البارت العشرون

#ليالي-ايار
الجزء 20
بقلم ازهار ذابله.

وضاح: ارجع لـ اهلي.

ايار : واتعوفني ...?

لا تضوجين خلي هسه اروح اشوف شنو القصه وبعدين ارجع اخذ ملابسي وافهمج.

بعد ماترجع مو ..?

لا ارجع مو هذا عابد وياي هو يرجعني ..

خليت ام ايار تغلط وتسب ومااعرف شلون اتفكر بيه هيج بس شكول هي هاي تاليتها انوب طلعت مجرم " بس محد هزني غير دموع وحيرت ايار جانت حايره بيني وبين امها ...
وصلنا لمكتب المحامي هو نفس المحامي الي جان يشتغل عد عمي ونفسه الي الوصيه جانت عنده ..
سلمنه عليه وبديت احجيله الي اعرفه.
وضاح : استاذ اني اشك بـ يوسف والمحقق متفقين لان شفت جلال يم يوسف اكثر من مره...
اكرم : يعني قصدك همه الي قتلوا جراح.

وضاح : مو شرط همه لان علاقتهم اطورت بعد مقتل جراح يعني مو متورطين بالجريمه بس الهم مصلحه يتخلصون من رياض بهيج طريقه وهم تنسد القضيه واكيد يتسترون ع القاتل.

عابد : اي اتذكرت بابا قبل شهر اتعارك ويه يوسف ع مشروع مااعرف مناقصه وصارت بينهم مشكله.
اكرم : ماعدكم شي بعد اكثر اكدر استفاد منه هذا كلامكم بدون دليل.

وضاح : نكدر نفتهم كل شي بس نعرف نجمع كل خيوط الجريمه نبدي اولا بالاختفاء لبعض الاشخاص قبل الجريمه وبعدين ظهور بعضهم بعد الجريمه ...
صار عدنه مجموعتين "الحارس مصطفى اختفه قبل الجريمه بـ اسبوع ... بعد الجريمه ظهر المحقق جلال الي بس تحجي وياه تعرف هو انسان غير محترم وانسان رخيص يكدر اي واحد يشتري ..بعد اهم شخص هو رائد وما ادراكم من رائد هذا واحد داهيه واتشوفه اتحس نفسك اتعرفه من قبل او شايفه بمكان معين واني اتذكر شايفه بس وين مااتذكر ..الشي المحير هو جان يشتغل ويه يوسف وترك او انطرد واشتغل بشركة عمي والمحير بالموضوع بعد مااشتغل ويه عمي قوه العلاقات بين عمي ويوسف وهذا لازم انخلي عليه نقطه استفهام كبيره ...
اكرم : احيك ع هذا المخ بس تبقه الادله هي اهم شي ولازم نوصل لـ مصطفى
ونفتهم منه لان همه بعدوه لان يعرف شنو راح يصير او متفق وياهم ومرتب كلشي واستقال وراح بدون اي شك ..

عابد : اني دخت هسه منو القاتل منو الي يريد يلبس التهمه لـ بابا وليشـ.

اكرم : وضاح تكدر اتروح واذا احتاج شي اخابرك ..
وضاح : ان شاء الله بس اني هاي الغتره مو ببغداد اريد ارجع لـ اهلي وبعدين ارجع احتمال خمس ست ايام وارجع ..

طلعنا اني وعابد وطول الطريق عابد يسولف ابد ماسكت بس يلغي ع الماركات والسيارات مااعرف هذا شنو من بشر هسه هو بيا حال ويلغي دوخني واخيراً وصلنا لبيت عمي ونزل وياي ..
لكيت البنات منتظراتني بالحديقه
سجود : وضاح لا تروح فدووه والله بعد ماازعل عليك ..
مرام : وضاح اذا اتروح حنفتقدك اهوايه تكدر تبقه بس ع مودنا ارجوك..

عابد : ليش اني خيال او ظل بنطار ماركه بـ *** دولار و قميص بكذا مبلغ ونظاره شمسيه بـ **دولار وانتو مشفتوني ...?

سجود : عابد ماركه والله مو وكتك عوفنا بحالنه ..
مرام : شفناك يا اخي متشوف حالتنه اذا راح وضاح محد يبقه النا هو بمكان بابا ..

وضاح : ادري وين رايح مو راح ابجي ع روحي غير اشوف اهلي وارجع لا تخافون بعدني ممكمل شغلي المهمه معلقه.

ايار : يعني احنا وحياتنه عندك مجرد مهمه هذا كل الي كدرت اتسوي لحد الان كافي وزايد تكدر تعتبر نفسك كملت مهمتك ..
وضاح : ايار ممكن نحجي ع انفراد ...
ايار: اكيد.
شنو كلتي مهمه مو واني كملت مهمتي يعني تجين وياي ...?
وين اجي وياك?
مو انتي كلتي خلصت مهمتك يعني لازم اخذج وياي لـ اهلي واكلهم هاي ايار جراح الي كدرت تسرق قلب العبد الفقير المسكين وضاح بكل سهوله.

هههههه بكل سهوله كول غيرها ياشيخ.

يعني ضحكتي موافقه ..?

انت شتكول ....?
اكول احبج وراح انهي كل شي يكدر يوكف بطريقنا وارجع واكون وياج والج طول العمر.

ايار خجلت فرحت انصدمت كل المشاعر المتناقضه حسيت بيها وكل فصول السنه اجتمعوا سوه بردت واحتريت وتساقط يئسي مثل اوراق الخريف واتفتح زهر احلامي بربيع بديع" لوحه فنيه انرسمت بفرشات فنان كرس حياته لرسم ...بس بعد كل هذا الجهد والتعب ماكدرت اواجه وضاح انهزمت بس هاي المره مو بكذبه انهزمت بحقيقتي بمشاعري الطاغيه ع وجهي ..

من سمعت اعترافي طارت مثل الفراشه
الي تخلصت من كل قيودها وانولدت من جديد حسيت بشعور غريب يمكن هذا اسرع قرار اتخذته بحياتي وهو افضل قرار مو ناتج عن قلبي لا هذا اختيار عقلي وقلبي اثنينهم اتفقوا ع نفس الشي هي ايار .....
يتبع.