ليالي ايار

البارت التاسع عشر

مسائووو حب 😍

#ليالي-ايار
الجزء 19
بقلم ازهار ذابله.

احجي وضاح وكعت كلبي ..
رياض يكولون هو الي قتل عمي ولكو دليل بالمكتب لكو السم الي مستخدمه ..

مستحيل اكيد مشتبهين خالوو ميسويها ..

لازم نفتهم السالفه من ابن خالج هذا شنو اسمه ...?
عابد اي هو خابرته رد وانوب سد الخط بوجهي ...
لازم باجر نحجي وياه ضروري نفتهم لان الجريمه اذا صدك رياض مرتكبها مو غبي حته يخلي باقي السم بالمكتب بس هذا القاتل يريد القضيه تنسد وياخذ راحته وهم احتمال يضرب عصفورين بحجر واحد هم اتخلص من عمي ومن رياض بنفس الوقت ..

والله ماافتهم شي من كلشي يعني بابا مجان عنده اي اعداء وخالوو نفس الشي شلون كل هذا يصير بينا فجأه..

انتي شلون عرفتي ماعدهم اعداء هذا زمنه العداوه موجوده بكل مكان فما بالك السوك والتنافس واكيد ميحبون احد ينافسهم ....
هسه شلون اكول لـ ماما لو شنو اسوي. 
هسه اسكتي باجر من يجي هذا مدري شسمه هو يكلها ..
ان شاء الله ...يله اني اروح واسفه ازعجتك ..
لا ماكو ازعاج اخذي راحتج ...

راحت ايار واني اول مره اشوف اعيونها بهذا الجمال مااعرف شصار بس عيونها جانت تختلف عن عيون ايار الي اعرفها جانت عيونها مليانه حزن ودمع يرفض السقوط ورمشها متثاقل بالدمع وماخذ مكان السد بالبحر ومانع موجات الدمع من النزول .... وجهه مضوي مثل ليله مقمره من فصل الصيف "جمالها جان كله غايب عن نظري بس من شفتها اليوم اعترف ابصرت كل مواطن الجمال في الكون ...استغفر الله اني شجاني وشلون هيج افكر اعوذ بالله من الشيطان ...

دخلت غرفتي وبقيت بس ابجي وشلون ماما تتحمل هذا الخبر ...?
واني شلون احجي وياها هي اصلا متضايقه مني واتحاسبني لان اتصلت بـ وضاح وخليته يساعدنه هسه هذا الخبر حيدمر علاقتي بيها للابد اني اعرف ماما ماتسامحني بعد اكيد ...

بس صار الصبح رجعت خابرت عابد ولحيت اهوايه عليه الا ان رد عليه ..

الووو ايووو شنو سالفتج ..
عابد فدووه ضروري تجينه للبيت ..
مااكدر لج احنه مخبوصين وين اجيج.. !
بس افتهم مني اني وضاح نكدر انساعدك لان نعرف اهوايه قصص يمكن اتساعد المحامي بس تعال للبيت وارجوك انت كول لــ ماما .
اوك اني حجيكم ..

احس نفسي خلصت من حمل جان خانكني خلصت من امي بعد هي وعابد هو يفهمها وخلي اروح لـ وضاح واكله ..
وضاح وضاح ...
نعم ايار بس دقيقه هسه ..
وضاح جنت طالع من الحمام واسمع ايار اتصيح ايار تعلمت مني من اتريد شي تصيح مدك الباب هذا صفه بدويه بحته لان احنا سكان الخيم استأذانه يكون مو مثل المدينه لا جرس ولا دكت باب احنا دكتنا صيحه بأسم صاحب الخيمه ومن بعيد انصيح حته اذا اكو نسوان يطلعون ويرحون خيمهم ...
بدلت بسرعه وطلعت لـ ايار ..

صباحووو واسفه لان من الصبح زعجتك ..
صباح الخير لا ماكو اي ازعاج اسف لان تأخرت عليج ..
اوووبس شعرك مبلل ادخل نشف راسك حته لا تتمرض ..
وانتي ليش خايفه عليه ..?
م م ..مخايفه ..
اشبيج اتمأمئين ..!
عابد هو .... عابد اتعرفه ابن خالو حيجي بعد اشويه بس حبيت اكولك يله باي ..

اوووف بلكوه خلصت منه هذا صاير مزعج ويخوفني اخ شكله يجنن شلون وياج ايار يعني متنسينه مو كلتي بعد مااحبه شلون هسه تتغزلين بي .....

حائراً بين قلبي الذي تركني وذهب لك
وبين عقلي الذي يريد ان يبتعد عنـــــك
اين المفر منك وانا اصبحت كلي لك..

وصل عابد وماما استغربت زيارته المفأجه وبدت التحقيق وياه ..
عابد : عمه اريد اكلج شي مهم بس مااريدج تتعصبين ...
ام ايار : احجي ماما شكو ...?

عابد : بابا متوقف بالسجن. .

ايار : ماما لا تخافين اكيد اكو حل ..

ام ايار : شنو بالسجن ليش شنو الصار البارحه جان يحجي وياي خابرته قبل المغرب فهموني ...
عابد : وره العشه دخلوا الشرطه البيت وياهم هذا المحقق وعنده امر تفتيش البيت واول ما فتشوا المكتب ولكو السم الي مستخدم بالجريمه وبابا يكول اول مره اشوف هذا الشي جان مخلينه بعلبه صغيره ...
ام ايار:هذا البلوه السوده هذا اكيد وضاح ..
ايار: ماما وضاح شكو مو اربعه وعشرين ساعه ويانه شوكت لحك يخطط وبعدين اتعرفين وضاح رجال بسيط منين يعرف هيج قصص ..

بسرعه اخذت ماما شال وشمرته ع راسهه وطلعت تركض واني وعابد نركض وراها ..
دخلت ضربت باب غرفت وضاح وهجمت ع الكنتور وتشمر بملابسه واحنا اتخشبنه اتسمرت بمكاني حايره بين اهم اثنين بحاتي شنو يكون قراري اروح اسحب ماما واكلهه لا وكفي كل هاي القصص لو ابقه متفرجه واخليها تطرد حلمي اخليها تبعد حبي عني اخليها تظلم وتطرد الشخص الي ساعدنا بدون مقابل شنو اسوي وين اروح ويامن اصير ..

ماما ماما خلص ارجوج اوكفي فدووه بس خلي افهمج ...
وضاح : ايار ليش تبجين خليها ولا تبجين ماكو شي يسوه ..
عابد : اني اسف اخ وضاح بس هي متعصبه ...
وضاح : لا عادي اول وتالي هاي النهايه هيج بس اشويه قربت. ..
ام ايار : تطلع من بيتي احسن ما اجيب عليك الشرطه ...
وضاح : عابد لازم اشوف اني وياك المحامي عندي اهوايه معلومات ...

عابد :تكدر ..?هسه انروح للمحامي ..

وضاح : اي ماعندي شي بس خلي ام ايار اتكمل تجميع ملابسي حته اخذهم وياي ههههههههه.
ام ايار : تضحك مو لك انت غشاش وتضحك ع عقولنا انت الي قتلت عمك وانت الي ورطت رياض والدليل البارحه اتعاركت وياك وكتلك مااحتاجك اخوي موجود صبح الصبح طيرت اخوي الله يهلكك يا شيطان ..

وضاح : يله خويه خلي انروح واني اسف ام ايار ومشكوره ..

ايار : وضاح وين اتروح ليش عندك احد اهنا ...?
وضاح : ارجع لـ اهلي..

يتبع ...