سمرائي عذرا

الفصل الثاني

#سمرائي_عذرا

الفصل 2
جنة ..صباح الخير يا بابا
جمال (والد جنة).. صباح الورد بنيتي كيف حالك اليوم
جنة ..بخير يا بابا الحمدلله
جمال ..اليوم بتمشي لمارية والله لا
جنة ..ايه بس بنمشي قبل لعمتي عزيزة ناقصاتها شوي مواد غذائية على خاطر الصغار 
(عمتي عزيزة مراء في اول الخمسينات تربي في خمس اولاد ايتام بنتين رباح وياسمين وثلاث اولاد حسام وآسر ويزيد  اهاليهم ماتو وماعندهمش من يربيهم وهيا تزوجت وراجلها مات وهي صغيرة ولانها كانت تعشقه قررت انها معاش تتزوج بعده فخوتها قاطوعها وفتحت حوشها ليهم كانها دار ايتام صغيرة تكسب فيهم اجر  وانا نعاون فيها بلي كتبه ربي وكافلة واحد منهم يزيد )
جمال..ربي يعطيك على قيس نيتك ويحفظك يابنيتي هاكي فلوس اشري بيهن
جنة ..عندي يا بابا
جمال.. شنو مستخصرة فيا الاجر
جنة .. لا يابابا هاتهم وبعد مانروح منها بنمشي لمارية بأذن الله
جمال.. جنة
جنة .. نعم يابابا
جمال ..اطلعي بسيارتي يابنتي ماتمشيش بسيارتك طالما بتروحي موخر زي امس
جنة .. بس انت ماتحبش تطلع بسيارتي جمال .. عادي ماعنديش مشواير واجد اليوم  وكان عندي طلعة تو نكلم زياد يجي يرفعني
جنة ..كيف معاش بتولي للعزاء
جمال .. لا اصلا انا نمشي على خاطر عمك يوسف وعمك مريض اليوم وماهوش جاي
جنة ..الف لاباس عليه تو نتصل بيه نطمن عليه غريبة مارية اول مانضت كلمتني وماقالتهاش ليا
جمال..مرات ماقالوش ليها البنية ماهي ناقصها كيف فاقدة عمتها وبيقوللها عمك مريض  شوفي شنو بيصور ليها عقلها
جنة ..صح يابابا عندك حق لابال عمي يوسف تقول بوها غير ان شاءالله ولده الصايع داير باله على بوه
جمال ..هههه يهديك الله وانتي العيل هذا تقول قالتلك حد
جنة ..ماهو انت عارفني يابابا الشباب الملاعبة مانرفعهمش من الوطا ومعاها حاسبين روحاهم حاجة مهمة وهما غافلين ان اخرهتهم بيندفنو في حفرة شبرين ومايرفعوش معاهم غير اعمالهم الحسنة قدام ربي
جمال .. ربي يكملك بعقلك وماتخافيش زين الدين عند بوه ويوقف عنده الدنيا في كفة وبوه في كفة ثانية
جنة ..به الحمدلله انه طلع في حاجة فالح فيها
جمال ..امغير يسلم حتى شغل بوه من شركة ومحلين لشركة كبيرة ليها اسمها وقريب عشر محلات لتو زادن بسبب ذكائه ورجحاة عقله
جنة ..باهي طلع منه ثمرة وياريت عقله هذا يدله ويخطى طريق الغلط اللي ماشي فيه
جمال ..امين يارب
جنة .. هيا السلام عليكم
جمال ..وعليكم السلام  طريق السلامة يارب 
.............………
احمد.. زين خيرك من امس جوك مش تمام
زين .. لا عادي
احمد..والله مازالت محيراتك الشينة
زين.. ايه لان في دماغي فكرة وبنشوف كيف بنفذها
احمد..فكرة شنو يجيرنا الله من افكارك
زين..مش ديمة باتي يقولي تزوج وانا مانبيش
احمد..شنو غيرت رايك وبتتزوج
زين .. لا طبعا وبنسيب البنات اشكال والوان ونرتبط بوحدة تخنقني ابدا ابدا
احمد.. امنا شنو بدير
زين .. غير خلي الفكرة تثبت في دماغي ونجمع معلومات وبعدين تو نحكيلك
لكن تو نبي نعرف البنت هذي منو
احمد..شنو عرفني اني حتى شوف ماشفتها
زين.. حتى انا مش عارف منو متوقعها تكون بنت وحدة من صاحبات عمتي اليوم بنستنى بنشوف بالك بتجي
ورن هاتف زين الدين
زين..الو وعليكم السلام
عزالدين ........
زين بخوف .. هيا جاي بسرعة مع السلامة
احمد..خير شنو في
زين .. باتي زاد تعب بنعدي نرفعه للمصحة
احمد..استنى نمشي معاك
زين..لا انت تقعد هنا وتستنى سيارة نوع BMW فيا سوداء وتسوق فيها بنت مش ملفته للانتباه حاول كيف تقصص عليها من غير ماحد ينتبهلك
احمد..تمام بس طمني على باتك
زين ..ان شاءالله هي سلام 
.................
بعد ماكملت جنة شغلها مع عمتهاعزيزة جت لحوش عمة مارية اللي فيه العزاء عشان تقعد معاها وتواسيها وادير بالها عليها لانها حامل في البداية وهيا ضعيفة ولما جت بتنزل تفكرت انها تتصل بعمها يوسف
فتحت هاتفها واتصلت وفي الوقت هذا كان العم يوسف في المصحة في غرفة الكشف وزين الدين يستنى برا وفجاءة رن هاتف بوه ولما شاف الاسم لقاه جنة
زين الدين يحكي مع نفسه
جنة من جنة هذي زعمك صاحبة مارو ومعاها حاطلها صورة حمامة بيضا ياعيني ياعيني يا استاذ يوسف  خليني نفتح نشوفها من
جنة..السلام عليكم
زين ..وعليكم السلام
جنة باستغراب ..معليش هذا مش هاتف عمي يوسف
زين..ايوه
جنة
غريبة هذا مش صوت عمي يوسف ولاصوت عزالدين مرافقه
زين ..تفضلي يا ابلة
جنة ..معليش عمي يوسف وين
زين ..انتي من
جنة ..طالما انت مش عمي يوسف ولا انت عزالدين مش لازم تعرف انا من لو سمحت عمي يوسف وين
زين الدين
معقولة في صوت هكي ناعم ويجنن عنده حق باتي حاط صورة حمامة بيضا ليها اكيد شكلها واو زي صوتها واكيد هي صاحبة مارو اكيد بتكون سمحة زيها
جنة ..معليش ياخوي خيرك ساكت
زين ..اطمني عمك يوسف كويس غير تو جبته للمراجعة لانه تعب شوي
جنة بلهفة .. خيره ان شاءالله ماتعبش زي العادة بالله عليك خوي طمني عليه
زين..ماتخافيش لا مش زي تعبه المعتاد غير زيادة اطمئنان
جنة ..الحمدلله الحمدلله ربي يحفظه ويطول في عمره
زين ..امين يارب بس ماقلتيش من انتي
جنة ..اسئل عمي يوسف مع السلامة
وسكرت الهاتف ونزلت من السيارة على رفعت راس احمد وقعد مركز فيها وهيا لابسة عباية بيج واسعة او اكبر من مقاسها تبان وعليها محرمة مخربشة بالوان واجد وكويش قهوي داكن زي لون شنطتها 
احمد بينه وبين نفسه
هذي زعمك الشينة اللي يحكي عليها زين لا هذي نازالة من سيارة مختلفة لكن استنو شوي هذي مش شينة واجد جسمها صح رقيق بكل لكن لون بشرتها يهبل تقول بيونسيه وعيونها لاقوة الا بالله لونهن غريب زي لون العسل ممزوج بلمعة غريبة رغم انهن صغار وشفايفها اوه من شفايفها اكيد زين يحكي على وحدة ثانية لو كان بس القلب مسكر بابه بقفل ومفتاحه عند اميرة ماكنت سيبتها
خشت جنة لمارية وهدرزت معاها وقضت وقت لاباس بيه وقررت انها تمشي لحوش خوها عشان ادور مذكرتها في دارها اللي دايرها ليها خوها عشان لما تضايق من خواتها وامهن تجي تقعد عنده خصوصا ان مذكرتها هذي هي اول مذكرة كتبت فيها ذكرياتها ولان ورقها واجد مكتوب فيها ممكن معظم تفاصيل حياتها مشت وهي تدعي انها ماتكونش راحت منها في مكان ثاني
.........
زين روح ببوه وجابه للعزاء وسئل زين  بوه
زين ..باتي مني جنة
يوسف ..عليش تسئل
زين..لانها اتصلت بيك تطمن عليك واستغربت انك تعرف وحدة انا مانعرفهاش ومعاها تعرف عزالدين وغير ذلك الصورة اللي حاطها ليها
يوسف بضحكة .. ركزت حتى على الصورة
زين ..ماهو صوتها يشبه الصورة
يوسف ..وقلبها حلو زي الصورة
زين..ياعيني يا عيني منو هذي عاد يا يوسف
يوسف ..حبيبة القلب
زين ..نعمممممم
يوسف.. خيرك فتحت فمك
زين..بالله ياباتي ماتبصر معاي منو هذي
يوسف ..شئ بنوتة حلوة القلب والروح ظلمتها الدنيا واجد وصديقة مارو اختك وعندي زي مارو بالزبط
زين..اه قصدك هذي جنة اللي قعدت تعيب علينا وخلتنا نغيرو دلع مارية من ريري لمارو
يوسف ..ايوه
ووصلو زين الدين ويوسف للعزاء ومشى زين لاحمد يسئل فيه
زين ..ها جت اليوم
احمد.. لا شفت وحدة بس مش نفس السيارة اللي قلت عليها وغير ذلك مش شينة زي ما انت مصور هذي فيها حاجات حلوة وتبي شوي اهتمام وتبقى ولا ملكات الجمال
زين..كيف صار واميرتك وين عدت
احمد..قاعد مكانها هنا (وشير بايده باتجاه قلبه) اكيد لكن هذي سبحان الله لفتت انتباهي لاول وهلة تقول ووك شنو هالشينة لكن لما تركز فيها لمعة في عيونها غريبة ماتعرفش تفهمها
زين ..كان ماخبرت اميرة مانقعد زين 
احمد.. قول ياسيدي لي اميرة  وانا عارف شنو حترد عليك
زين ..ماهو انا ماقاهرني الا ثقتها فيك الزايدة
احمد بهيام ..لانها عارفة اني مستحيل قلبي تخشه وحدة بدالها مش زيك انت
زين ..انا اصلا مايوصلنش للقلب بيش تخش او تطلع منه
احمد..امنا فايزة وين
زين بضحكة ..حي عليك كان تسمعك تقول فايزة تقتلك
احمد باستهزاء ..ماهو احسن من زيزي محسسني  كانها رقاصة من كبريهات مصر
زين..ههه عليك تفكير خطرت عليا جنة صاحبة مارو
احمد..وخيرها هذي وشنو دخلها بموضوعنا
زين..ماهو لما كنا ندلعو في مارية ريري قالت نفس كلمتك وخلتنا ندلعوها مارو
احمد..فعلا والله عندها حق وحتى مارو مميز واحلى من ريري بس كيف عرفتها وانت عمرك ماقلت ليا انك حكيت معاها او شفتها او حتى تعرف شكلها
زين..ماهو زمان قالتها لعمي الله يرحمه وهو اللي قال لينا كلامها ونحن انا وباتي وعمتي الله يرحمها قعدنا انادو فيها مارو زي صحبتها
احمد..بس مش غريبة صاحبة اختك من الابتدائي وانت عمرك ماشفتها ورغم انك عمرك ماتسلم بنت منك
زين .. انا كنت نعرفها في الابتدائي لكن بعدها انت عارف اني طلعت مع باتي وامي الله يرحمها برا ليبيا وكملت قرايتي للجامعة وحتى لما رجع باتي وامي انا قررت نكمل قرايتي وبعد ما توفت امي وباتي مرض  وعمي توفى اطريت نرجع عشان خاطر الشغل اللي تما متعب لباتي فهذا ليش معاش نذكر شكلها وغير ذلك حتى لما نجي لمارو مستحيل تطلع ليا وديمة نستغرب في تصرفها لان اي مكان نكون فيه البنات يبدو يدورو في سبلة عشان يطلعو ويشوفوني الا هيا حتى لما مارو كانت ساكنة معانا
احمد .. غريب امرها صاحبة اختك هذي به شنو اسمها
زين .. ماهو قلت ليك جنة
احمد.. ههههه كلا هيا تقول لغز غريب مافكرتش تحله
زين.. بسبب مارو ديمة تقولي مالكش دعوى بيها هيا مش زي العينة اللي تعجبني وغير ذلك اخت بو نسيب مهما انكان صاين عرضي مانقدرش اندوس او نهين عرضه
احمد.. اما انت اللي غريب من باب صايع وماتهلب تحت منك بنت ومن باب تخاف على اخت راجل اختك عشان صاين عرضك
زين ..ماهو انا قلت ليك مستحيل نقرب وحدة غير برضاها وعمري ماوعدت وحدة بالزواج
احمد.. خلينا منها تو
به قولي شنو تفكر وشنو تبي من البنت هذي
زين .. ياسيدي نبي نتزوجها
احمد بصدمة ..شنووووووووو
#حياة