سمرائي عذرا

الفصل التاسع عشر

#سمرائي_عذرا
الفصل 19
زين ..باتي زياد دار حادث ومانعرفش شئ عليه
يوسف بخوف .. كيف ماتندريش عليه
زين ..المتصل قالي انه لقاني اخر مكالمة معاه واتصل بيا وماقالش شئ غير انه في المستشفى بس
يوسف بلهفة ..جنة
زين بحزن..جنة كانت وراي وسمعت كل الاتصال وطاحت اغمى عليها ونوضتها بالغصب وتو هي تبدل في دبشها بنطلع انا وياها وانت يا باتي عدي لمارو اكيد ماتعلمش والاحسن انك تقوللها ان جنة هي اللي تاعبة حتى لو قدر الله صارلها حاجة لما تعلم بزياد نكونو في المستشفى وغير ذلك نحن حالة زياد مانعلموش عليها مرات حاجة ساهلة
يوسف ..ان شاءالله يارب ساهلة
خلاص امنا اطلع شوف جنة وانا بنطلع وعزالدين لمارو
*وركب زين لجنة اللي تفاجأ بان جنة ماغيرتش دبشها وقاعدة منهارة تبكي وبس
زين ..يا جنتي ياقلبي قولي ان شاءالله خير مرات حاله كويس واصابته ساهلة
هي نوضي ياروحي والله ماني متحمل انشوفك هكي
*وصباها زين ودخلها للحمام وغسللها وجهها وهو يحرك فيها تقول دمية بين ايديه وغيرلها دبشها وطلع هو وياها ولما وصلو المستشفى لقو مارية ويوسف سابقينهم و تبكي واول ماشافت جنة ضمتها وهنا كأن جنة شمت عليها ريحة خوها تحركت وضمتها وقعدت تبكي وتبكي وزين يحاول يفكهن على بعض وقلبه موجوع عليهن الاثنين وحدة اخته والثانية نصه الثاني وضمهن ليه في الوقت اللي عمي يوسف يطمن على زياد وطلع زياد من العمليات وعنده كسر في ايده وضلعين واول مافاق لانهم كانو مبنجينه عشان الضلع جرح الرئة سبب في نزيف ليها وايده مجبسة طول خشت مارية وجنة وهما يتباكن هزبهن زياد بحنية وتعب واضح
زياد بتعب ..خلاص بطلن انا هكي حنتعب واجد هكي زين احذاك سكتهن انا كويس والله
زين ..حمدلله على السلامة خوفتنا عليك
زياد ..نقيس في غلاي بس
جنة وبدموع ..انت قلب جنة معقولة مش عارف غلاك حمدلله على السلامة
زياد ..الله يسلمك ياحبيبة وخيك وانتي شنو ماتبيش تقوليلي حاجة
مارية بدموع وشهقة..مانيش قايلة شئ لان انت ماحافظتش على الامانة اللي عندك
زياد باستغراب ..امانة
مارية ومازالت تبكي .. اه مش قلت ليك ان روحك هي روحي امانة بين ايديك ليش ماحافظتش عليها
زياد بضحكة وتوجع منها وجاته مارية بسرعة شدت ايده ..والله حاولت ياروحي لكن شنو بندير اللي مقابلني مش واعي بكل حاولت واجد اني نخطاه ماقدرتش
مارية ..حمدلله على سلامتك ياقلبي
يوسف ..حمدلله على السلامة خوفتنا عليك
*وشوي جاء جمال وهنية وخواته كلهن برجالتهن طبعا بدون احلام لانها مسافرة وبعد دموع وفرحة انه جاته ساهلة روحو وقعد معاه عزالدين لانه صديقه المقرب
ومارية روحت مع زين وجنة ويوسف اللي مبوش يخلوها بروحها وركبت جنة لشقتها بعد ما اطمنت ان مارية كلت ورقدت ولقت زين مجهز ليها سندوتش عشان حتى هيا ماكلتش وكلاته بالغصب وقعدت تبكي
زين ..عليش البكاء بس وانتي اطمنتي على خوك
جنة ببكاء .. انت ماتعرفش زياد شنو ليا زياد ماما اللي ماتت بدون مانعرفها بحنيته عليا زياد اختي اللي واقفة معاي في كل شئ زياد بابا اللي وين مانستحق نلقاه اللي حماني من ظلم امه وظلم خواتي ليا زياد اللي كان لي الحضن الدافئ زياد قلبي يا زين
زين ..عارف ياجنتي والله عارف والحمدلله انه جاته ساهلة وبكرة حيطلع من المستشفى بعد اصرار زياد وحتى الدكتور قال حالته مش صعبة و الكسر شهر بس ويحول الجبس طمني بالك ياقلبي
جنة ..يارب يارب ماتوجع قلبي عليه
زين ..امين
هي تمددي ياقلبي وارتاحي وبكرة حنمشي نجيب زياد هنا
جنة باستغراب ..زياد بيروح هنا
زين ..اه بعد صراع بين باتك وباتي انتصر العقل
جنة ..كيف
زين ..عمي جمال قال يروح عندي وباتي قال يروح عندي وزياد قال بنروح لحوشي طبعا باتي اصر واقنعهم بالعقل بالذات لما قال عمي جمال زياد ولدي والاولى انه يروح عندي فرد عليه باتي وقاله انت لو واحد بس يخصك ان الثلاثة يخصوني
جنة باستغراب ..ثلاثة
زين ..اه باتي قال زياد راجل بنتي ومارية بنتي وجنة كنتي فاستغرب باتك شنو علاقة جنة فرد باتي وقاله انت عارف علاقة جنة بزياد فمستحيل تسيبه وان ڤيلاتكم الاثنين  صغار والناس حتجي واجد فالافضل انه يجي يقعد عندي وطبعا باتي ضرب على وتر حساس عند زياد اللي هو انتي وقاله انت ماترضاش ان اختك العروس تسيب راجلها وتقعد معاك لانها مستحيل تسيبك لكن لما تجي تقعد عندنا الڤيلا واسعة وجنة حدير بالها عليك وعلى مارية اللي مستحيل تسيبكم وفي نفس الوقت ماتسيبش راجلها فاقتنع باتك وزياد وبكرة بنعدي انطلعه ان شاءالله وبنمشي لدكتور صديقي في مصحة ***** عشان يمر عليه يوميا يتابعه وبنجيب ممرض على خاطر المضاد الحيوي اللي لازم ياخذه اسبوع كامل في الوريد
جنة ..امتى صار الكلام هذا
زين وانتو مع زياد نحن برا نسقنا كل شئ خصوصا ان زياد قال بكرة بنروح مانيش قاعد على خاطرك وخاطر مارية لانكم مستحيل تسيبوه وخايف على مارية وحملها تلقط شي ميكروب من المستشفى يضرها
جنة ..ربي يخليكم لي يارب
زين ..هي حبيبتي تمددي وارتاحي بكرة ورانا يوم طويل
*ورقدو الاثنين في حضن بعض وزين حس بشعور غريب لما شاف جنة في حالة الانهيار اللي صارتلها لما عرفت بحادث زياد وناضو ثاني يوم وعدى زين دار اللي حكى لجنة عليه كله وتفاجأت جنة ومارية بان زين اتفق مع شركة خدمات وبعتو اربع بنات وحدة عشان تساعد الشيف حسن والباقيات التنظيف والتقديم وهنا عليهن استقبال الضيوف بس وبعد فترة جو اهل زياد كلهم وخواته وروح زين بزياد وفرحو كلهم بطلعته وبدن استقبال الناس اللي تحمد على السلامة عمامهم وخوال زياد وماغاب حد من معارف زين لانهم معارف مارية ومشى اليوم بتعب اللي مخلاش من تغزل زين بجنة في كل فرصة يحصلها وقديش هي حست باهتمامه وحبه ليها وديمة وهي تصلي ان ربي يحفظ ليها السعادة ويديمها عليها
احمد وهو يصفق بايده ..زين وين رايح
زين ..قاعد نريح في دماغي شوي من هرجة المربوعة وزحمة الرجالة
احمد ..اسماله على زياد المريض اللي مفروض يرتاح
زين ..تصدق نحن مهما نتقدمو او نطورو مستحيل نوصلو لثقافة زيارة المريض
احمد..ثقافة زيارة المريض
زين ..اه المفروض المريض محدش يزوره الا لما يتماثل للشفاء او قريب يصح بيش يزوره عشان مرات الهدرزة والزيارات في بداية المرض تزيد تتعبه بدل ماتريحه وتو زياد المطلوب راحة تامة ووين الراحة وين مايبي يغفي شوي يجيه حد مع ان في رجالة ذوقين الحق لما يلقوه راقد يقولو سلمولنا عليه ماتنوضوشي وفي اللي يجي عشر دقايق حتى فنجان القهوة مايشربش بيش مايتعبش زياد وهذوم نوعية تفهم في زيارة المريض وبرضو مابعدتش عن عاداتنا يعني تجي تزور المريض اول مايطلع من المستشفى لكن في نفس الوقت ماتتعباش لكن في ناس اعوذ بالله منها لاذوق ولافهم تجي تتغذى وتتعشى على اساس ان اللي طلع من المستشفى خلاص تما زي الحصان مش مرات انه طلعوه عشان الحوش اكثر راحة من المستشفى
احمد..فعلا والله عندك حق ولا الدخان بحذا المريض هذا بروحه حاله الله المستعان
زين ..ايه والله عارفين ان عنده ضلعين مكسورين وسببت جرح في الرئة يعني الدخان حيتعب الرئة بزيادة وهما شئ نين نقولوه طفي الدخان
احمد..فكنا منهم بس قولي شنو سر السعادة اللي في عيونك رغم التعب اللي انت فيه
زين بهيام ..سمرائي
احمد..كنها جنة شنو الجديد استنى تميت زواجك معاها صح
زين هز راسه .. اه يا احمد قديش نقولك كمية براءة ماتفهم شئ والله لما تمت تبكي خايفة اني نمل منها عشان هي ماتعرف شئ
احمد..جديات تحكي
زين ..والله ولانها بريئة وشكلها عمرها ماحكت مع حد في الامور هذي تسحاب قلة عرفها حاجة مش تمام وهي ماتعلمش ان البنت البريئة بالنسبة لشاب زيي مجرب اجمل هدية يتحصل عليها
احمد..ايوه من قدك ياعم
زين ..اجمل ايام انا عايشهن تو ولا كأني شفت السعادة في حياتي يوم الا لما جنة كانت لي وعلى قد ماكنت مستمتع بالحرام لكن الحلال احلى واحلى وتعرف لما دارو اسبوع في حوش هلها قعدت نفكر كيف بتسلم على ميلاد غيرة تنهش في قلبي وعجبتني لانها طلعت ليهم بالكاب والخمار والجوانتي عشان الحنة قديش كبرت في عيني رغم انها قالتها ليا قبل مانوصولو اهلها لكن لما تشوف بعينك شئ ثاني
احمد..بس هما محرمين عليها
زين ..محرمين مؤقت مش دايم
احمد..ايوه ايوه زين يحكي في الدين
زين ..لا ماكنت نعرف حاجة نين سمعت جنة توضح في الموضوع هذا لاميرة يوم ركبت انادي فيهم على العشاء
وحكى زين جنة شنو قالت بالتفصيل على المحرم
احمد..ربي يكمللها بعقلها ويحفظها ليك يازين والله انا بروحي ماكنت فاهم هكي ولما نشوف زمان في جيرانا كيف كناينهم تتعامل مع خوت رجالتهن واللبس اللي مايلتبسش الا قدام نساء بس وهنا يلبسن فيه احذا خوت رجالتهن نقول عادي لانهم محرمين ليهم لكن مانسحابش ان هذا شئ مكروه ولازم كل حاجة تبدا بحدود
زين ..والله وانت تصدق ان جنة بعمرها هذا كافلة يتيم
احمد..والله معقولة
زين بحب ..اه واول مرة نعلمها اليوم بعد ماروحت بزياد وقالت لي اني لازم نمشي وعطتني ظرف بيش نعطيه للمراء المسؤلة عليهم ولما استغربت حكت لي كل حاجة عليه وكان تذكر مرة قلت ليك تبعتها كانت واخذة معاها عيل صغير
احمد..اه
زين ..طلع هو العيل هذا هو اللي متكفلة بيه اسمه يزيد وسبحان الله فيما صور ربي عيل ماتفهم شئ
احمد..شنو قصته زعمك
زين ..بوه وامه دارو حادث ماتو الاثنين وهو عاش ولما مالقوش ليه اقاراب تكفلت بيه المرا هذي دايرة زي دار الايتام بس في حوشها وعندها بيزيد خمسة اطفال
احمد..ربي يباركلها الواحد مفروض يدير زي جنة
زين ..فعلا حتى انا هكي درت بس انا ماحددتش حد لان رسولنا عليه الف صلاة وسلام قال(انا وكافل اليتيم في الجنة هكذا ) واشار باصبعيه السبابة والوسطى وفي اية ديمة تقول فيها جنة نين حفظتها (واعبدوا الله ولاتشركوا به شيئا وبالوالدين إحسانا وبذي القربى واليتامى )صدق الله العظيم
احمد..عليه الف صلاة وسلام
زين.. بس تعرف يا احمد خايف
احمد باستغراب ..خايف من شنو
زين ..خايف ان ربي يعاقبني بلي كنت اندير فيه بجنة يوجع قلبي بيها
احمد.. استغفر ربك يازين ربي يقبل التوبة وحتى كان بيعاقبك اكيد عقاب بيش تحس بس لان ربي لما التوبة تكون خالصة من القلب يقبلها باذنه تعالى
زين ..ياااارب
*ومشن ايام وجن ايام وخفت الزحمة عليهم وجنة وزين غارقين في احلى ايام وكل يوم حب زين لجنة يكبر وجنة حبها لزين يكبر ومشى الشهر وزياد حول الجبس وروح لحوشه ومارية حالها تمام وصحتها وصحة الجنين زال عليهم اي خطر وجنة رجعت لشغلها بعد شهر ونص اجازة ومشت للجامعة واتفقت هي وزين انهم يطلعو اليوم يغيرو جو في المزرعة بتاعتهم وخشت جنة للمحاضرة طبعا تفاجؤ الطلبة بالتغيير اللي صار لجنة وكيف وجهها ضاوي وهي لابسة سروال واسع لونه اسود كأنه جيبة وعليه بلوزة وردية هادية وعليها جاكيت خفيف اسود وكويش وردي ومحرمة كبيرة نوعا ما بلون وردي وطبعا الطلبة باركو ليها زواجها وهي تسمع فيهم يتهامسو على شنو شكله عريسها فقررت جنة ترد شوي من كرامتها وبعتث رسالة لزين
زين
كنت في الطريق جاي لجنة لان بنعدو للمزرعة نتغدو فيها لان الجو بدا يدفئ والعشية بيجي باتي واحمد وزياد ومارية بتعشو مع بعض وسمعت صوت الرسائل ففتحته (حبيبي زيني عندما تصل  للكلية اصعد لي في المحاضرة وادخل للقاعة لرغبة ما في نفس يعقوب )
ضحكت على العبارة الاخيرة وفهمت انها تبي توري راجلها لطلبتها خصوصا بعد اللي قريته من كتابتها على التعليقات اللي يقولو فيها الطلبة
جنة
وانا ناخذ في الحضور والغياب دق الباب وقلبي دق معاه لان عارفاته حبيبي زيني اللي يدق
جنة برسمية ..تفضل
زين ..السلام عليكم
جنة والطلبة ..وعليكم السلام
طبعا الهمس تسمع فيه جنة وهنا يسئلو على هوية اللي خش عليهن وكلمات الغزل اللي تسمع فيها خلتها تغار عليه وهو لابس سروال جينز اسود وعليه سورية بيضا مبينة تفاصيل جسمه وكويش ابيض 
جنة ..هي دقيقة بس ونطلع
طالب ..عرفينه عليه يا استاذة
جنة برسمية ..مع انه مش فرض عليا
وتغيرت لهجتها بحب هذا زين الدين يوسف زوجي
طبعا جنة لاحظت الصدمة في وجههم كلهم وكانت هذا اللي تبي توصله
ولمت ورقها في شنطتها اللي على طول مد ايده لايدها وشدها بتملك من كتفها وطلع هو وياها تحت صدمتهم وهي في قمة السعادة
زين ..وصلتي للي تبيه
جنة باستعباط  ..نبيه شنو اللي نبيه
زين ......
#حياة