#سمرائي_عذرا
الفصل 6
زين ..مش عارف بس ما اعتقدش اني حبيتها ممكن تعلقت بيها لانها اول وحدة تقول لزين لا وممكن لانها لاهمها شكلي ولا مالي وممكن صح انفكر اني نستقر لكن مش عارف ومش واثق في روحي نبطل او لا
احمد..شوف يازين انت عمرك ماكنت هكي وبدلالة انك عشت عمرك برا ومع ذلك عمرك ماقربت وحدة رغم ان عندهم كل شئ مباح وكنت صاين نفسك وكنت ديمة تقولي بتحفظ قلبك للي تستاهله واللي تستاهل قلبي تستاهل لمساتي وجسمي
بس شنو غيرك وخلاك هكي وتميت من وحدة لوحدة ومش راحم روحك
زين بشرود..ماهذي الصدمة اللي انصدمتها تخيلت ان بنات بلادي كيف ماخليتهن نلقاهن عصاميات وان الوصول ليهن مستحيل وزي ماخليتهن ايام الابتدائي اللي وحدة ولد يطلب منها محاية تتحشم لكن رجعت لقيتهن تمن تافهات عقلهن معبي باشياء تافهة وغير ذلك هنا اللي قعدن يبعتن لي وهنا اللي تمادن معاي وهنا اللي فتحن المجال ليا صح انا كنت نقدر نشد روحي ونمنع كل شئ لكن لما تلقى كل شئ متوفر ليك وبدون اي ارتباط فأكيد مش حتقول لا وبالذات مع استمرار الاغراءات ياراجل انا لما عرفت زيزي اني مش اول واحد رقد معاها استغربت
احمد..بس يازين مش كلهن هكي البنات
زين..اكيد يا احمد اكيد في بنات صاينات روحهن وفي بنات حتى دايرات علاقات اكيد حاطات حدود في تعاملهن مش معناها اني طحت في العينة الفاسدة معناها كل البنات فاسدات اكيد و ممكن بسبب فلوسي وشكلي وحياتي وصوري اللي ديمة انزل فيهن ماطيحنيش غير في الفاسدة
احمد..بس جنة مش زيهن يا زين
جنة انسانة طاهرة وطول عمرها صاينة روحها ومش بسبب انها شينة بالعكس خطيبها الاول حاول معاها واجد في البداية بيش يدير معاها علاقة ورغم انه وسيم كشكل اكيد شايفه
زين ..وين بنشوفه
احمد..اكيد في مناسباتكم لان زياد نسيبك هو نسيبه تي انت نسيت ان ميلاد راجل ليلى اخت زياد وجنة
زين ..ايه صح زبطته صح شكله وسيم وغريبة فكر في جنة ومعاها رفضاته
احمد..اه رفضت اي علاقة تكون معاه خارج نطاق الشرع وبسبب استغراب بوها ان واحد بشكل ميلاد يحب جنة فبوها مباش يقرا فاتحة خلاها خطوبة بس ورغم انها قعدت سنتين مخطوبة عمرها ماوقفت معاه الا قدام اهلها وفي الاخير طلع ضعيف قدام اهله مقدرش يقاوم ضغطهم عليه
زين ..كيف ضغطو اهله عليه
احمد..خوات جنة الاربعة على حسب وصف اميرة ليهن انهن ملكات جمال لانك لو شفت امهن اكيد حتقول ان كلام اميرة صح
زين ..فعلا خالتي هنية ماشاءالله جمالها باين وهي في العمر هذا فبال لما كانت صغيرة كيف شكلها كان وزياد حتى هو وسيم
احمد..تمام بما ان خوات جنة الثلاثة متزوجات ماكانتش الا ليلى اللي قاعدة وهي اصغر من جنة بسنة كانت قاعدة في طرابلس تقرا غادي عند خالها وبعد خطوبة جنة بسنة كملت ليلى قرايتها وروحت وطبعا اهل ميلاد قعدو يضغطو عليه انه يسيبها بعد ماشافو ليلى وجمالها ولانهم ماكانوش راضيين على جنة اصلا لولا اصرار ميلاد عليها كانو يبوه يبدلها باختها وشكل الضغط زاد لما ليلى رسمت عليه وكثر الزن امر من السحر ومع شكل جنة كانت هي الضحية رغم ان ميلاد يعرف معدنها كويس لان اكيد اصراره عليها لدرجة لما رفضت العلاقة جاء وخطبها الا انه سلم فيها في الاخير ومعاها ياريت سيبها بس تزوج اختها في اليوم اللي مفروض تكون فيه هي العروس وتخيل من قوة جنة انها حضرت العرس حتى مايتشمت فيها حد وحتى لما خش العريس جت باركت ليه هو واختها العروس اللي خذت مكانها
زين
نذكر اليوم هذا كويس لما قلقت من جو الشباب ونحن نستنو عشان بنروح بمارو لان زياد بيمشي مع اخته وقعدت نبرم وراء الصالة ولفت انتباهي صوت بكاء بشهقات وقربت واجد ولقيت وحدة تبكي بنت لابسة بشت او عباية مش عارف بالزبط ولابسة محرمة كبيرة وكانت مقمعزة على الوطا وضامة ركابها ليها وحاطة راسها علي ركابها و تبكي بحرقة وماعرفتش شنو اندير ليها كانت في ايدي شيشية امية مديتها ليها وهي ارتبكت وبدون ماترفع راسها فيا خذت شيشة المية وناضت وماشفتش وجهها اكيد هي جنة لان بوسع البشت لكن واضح اللي لابساته رقيقة واجد
احمد..زين معاي انت فيش سارح
زين ..معاك يا احمد
احمد..فهمت تو يا زين اللي بديره فيها حرام وهي ماتستاهلش والله ماتستاهل انا مازال يخطر عليا شكل اميرة يوم اللي حكت ليها جنة قصة خطبتها
زين ..تأثرت واجد
احمد..تأثرت كلمة بسيطة قدام اللي صارلها لدرجة خلت امها تتصل بيا وتسئلني تسحابني متعارك معاها وبمجرد ماوصفت ليا امها حالتها لقيت روحي لابس وماشي ليهم ولما شفتها نين خفت وبعد ماحكت لي عذرتها لان فعلا هيا المرأة لما يسيبها الراجل اللي ارتبطت بيه بيكون صعب عليها واجد لابال يسيبها ويرتبط باختها
زين ..عندك حق وخصوصا ان اميرة حساسة واجد
احمد..ها غيرت رأيك يازين بعد اللي سمعته
زين ..مش عارف انا بكرة بنمشي ليها للروضة نبي نشوفها وهي خارج رسميات الجامعة كيف تتصرف
احمد..زين نسئلك بس بجديات
زين ..خيرك يا احمد اسئل عادي
احمد..انت شفت شكلها كويس
زين ..تصدق لتو ماركزتش على ملامح وجهها كويس كل اللي نعرفه ان لون بشرتها برونزي بدرجة حلوة عارفها زي بيونسيه وجاي لو
احمد ..ياخوفي ماتطلع هذيك الشينة اللي شفتها وماطلعتش شينة
زين ..اين
احمد..اللي في العزاء اللي قلت ليك اول ماشفتها قلت ووك شنو هالشينة لكن لما ركزت فيها فيها لون عيون يهبل ولمعة تهبل
زين ..مش عارف اصلا انا مانرفعش وجهي في وجهها لاني خايف انها تكشف فيش انفكر
احمد..خلاص امنا بكرة حاول تركز على ملامحها
زين ..اكيد هي سلام بنمشي اليوم الاثنين
احمد بتأفف..شنو عندك موعد مع وحدة من اياهن
زين..يادايخ اليوم يوم الشواء مع عمك يوسف عارف كل اثنين العشاء يكون شواء ومانقدرش انغيب عليه وبعدين نحس في روحي معاش خاطري نقرب وحدة
احمد..ايه نسيت امنا استنى نمشي معاك معقولة بنهلب الشواء
زين ..يامفجوع
احمد..مافيها مفجوع عندكم طباخ لايعلى عليه بالذات في موضوع المشاوي
................
زياد..كنه حبيبي مهموم شكله
مارية ..نفكر في جنة
زياد بلهفة ..كنها حبيبة وخيها صايرة معاها حاجة
مارية ..لا بس اليوم عارف انت ليلى انها بايتة في حوشكم زي كل يوم اثنين في الاسبوع وطبعا جنة تذكر في وجعها واليوم شكلها حزين بكل
زياد..ياروحي والله مابيدي حاجة شنو اندير ليها وهذا نصيب صح وجعها صعب بس مافيدي حاجة
مارية بتفكير ..شنو رأيك ناخذوها ونمشو لعمي يوسف كلمني امبدري وقالي نجو نتعشو معاه
زياد..عادي حتى تغير جو خصوصا ان عمي يوسف يحب جنة واجد وهي ترتاح معاه ويقدر يغير جوها خلاص شوفيها تجهز روحها مابين انا كلمت عمي يوسف وقلت ليه جايين
مارية ..تمام بكل
*وعدت مارية لجنة ووافقت وزياد كلم عمه يوسف ومشوا ليهم واستقبلهم يوسف بكل حب لان مارية يعتبر فيها بنته وجنة يحبها واجد لطيبة قلبها وكان جو جميل وزياد يجهز في الشواية وبحذاه مارية وجنة مقمعزة مع يوسف تهدرز وتضحك هيا وياه
يوسف..في حد يابنتي قالك ان ضحتك حلوة
جنة بفرحة ..لا والله انت اول واحد
يوسف ..معناها ليا الشرف في اني نركز على ضحتك الحلوة هذي
جنة ..احم احم شكلنا بنتعاكس ياجماعة
يوسف ..شكلي لان اصلا في حد يشوف لون العيون هذي ومايعاكسش
جنة بخجل ..عمي يوسف
يوسف ..ياروحي على اللي يتحشم
زياد..خف عليها ياعمي هذي قرعتي في الدنيا راه
يوسف ..ربي يحفظها لك يارب
زياد..زين وين امنا
يوسف ..كلمني بعد اتصالك وقالي جايي هو واحمد
جنة بارتباك ..عمي يوسف هو زين بيتعشى معانا
يوسف بمكر..اه ياجنة عندك اعتراض
جنة ..لا ياعمي غير انت عارف اني ما اختلطش بزين من قبل
يوسف..عارف يابنتي لكن نحن عيلة وحدة وخصوصا ان زين يعتبر مستقر هنا ليه فترة لامتى بتتجنبيه وخصوصا تو غير النسب بيقعد خال بنت او ولد خوك
جنة بتردد ..عندك حق ياعمي
زين وهو يدرس في سيارته
زين ..شكله زياد ومارو هنا
احمد..غريبة باتك ماقالهاش ليك لما كلمته
زين ..لا ماقالش
احمد..زعمك جنة جت معاهم
زين ..اكيد لا ديمة زياد ومارو يجو بروحاهم
احمد..اه هيا ننزلو نسلمو
زين ..احلى سلاااااام على الناس الرايقة
احمد..السلام عليكم
يوسف وجنة وزياد ومارية ..وعليكم السلام
زين
مش مصدق جنة هنا وردت السلام عادي ومعاها ابتسمت اكيد في حاجة مش مزبوطة يا انا من كثر ماتمت شاغلة دماغي بديت انتخيل فيها ومعاها تبتسم
يوسف ..زين وين رحت
زين وهو يحك في راسه ..قاعد ياباتي آنستي ياجنة
مارية ..جنة بس اللي آنست
زين ..اكيد لان هذا حوشك لكن جنة اول مرة تجينا
يوسف ..لا غالط يازين حتى جنة هذا حوشها ومش اول مرة تجي هنا انت اللي كنت ديمة مش قاعد
زين ..صح انا اللي ديمة ندور لكن شكلي بنبطل دوران وغمز ليوسف
احمد..اهلين ياجنة كيف حالك انا احمد خطيب اميرة زعمك تعرفيني
جنة ..اهلين بيك يا احمد اكيد نعرفك اميرة ماعندها سيرة الا انت
احمد.. قبل بنتشرف بشوفتك بكرة لكن سبحان الله آني شفتك اليوم
جنة .. زي اليوم زي بكرة بس ليش بكرة
احمد..ماهو بكرة بنجيب اميرة للجامعة
جنة ..اه مرحبتين بيك
زين
شنو الشعور اللي حاسس بيه تو قلبي يدق بسرعة ومضايق انها تحكي مع احمد براحتها هي حاجة من اثنين ياحاسده ياغيران يانهار اسود في شنو نفكر انا
احمد
وانا نحكي مع جنة انتبهت لزين انه متوتر وانا نعرف صاحبي كويس والله لغيران شكله خليني نتمادى اخرى بالك يتغير مخططه ويحس روحه فعلا انه يحبها ويستقر ويفك روحه من طريق السو هذا
احمد..ماقلتيش لي ياجنة رسالة الماجستير على شنو بالزبط
جنة بحماس ..في محاسبة المصارف
احمد..اه هذا ليش انتي مستشارة لبعض المصارف زي ماقالت لي اميرة
يوسف ..جنة دماغها نظيف ولولا انها ماتبيش تنشغل على مارو راهي تو شارقة برسالة الدكتوراء
احمد..اه ماشاءالله ربي يحفظك
زين بعصبية وصوت عالي ..انا بنوض نشوف زياد ومارية وين وصلو في الشوي نحس في روحي جعت
ماتبيش تنوض معاي يا احمد
احمد بمكر ..لا مرتاح هنا الكرسي مريح مش عادي
زين ..ماشي يا احمد كله مسجل
زين
هذا كله وماقدرتش نركز على شكلها ومعاها احمد واخذ راحته وهو يهدرز معاها وانا نغلي نغلي بس ليش انا حامق ونغلي زعمك نغار
احمد بهمس لزين.. مش زعمك اكيد يازين
زين .........
#حياة
أنت تقرأ
سمرائي عذرا
Fanfictionعندما يكون اختلاف بشرتنا سبب لنظرة مؤلمة او كلام جارح نسمعه ولكن الله لاينسى احد رواية باللهجة الليبية لصديقتي حياة احمد (مكتملة)
