سمرائي عذرا

الفصل الثاني والعشرين

#سمرائي_عذرا
الفصل 22
زيزي..تطفيش جنة بيش زين يبقى لي لانه لو هي معاه مستحيل يجيني
هناء..ماهو اكيد بعد علمت بحملك حتسيبه
زيزي..ياريت ادير هكي لانه ارحم من اللي بنديره فيها لو رضت انها تقعد معاه بعد هذا كله
هناء..ما اعتقدش ان اي وحدة ترضى بان وحدة تشاركها راجلها وهي ماسكرتش شهرين
زيزي..تو نشوفو مع اني بالعكس انا نقول مستحيل تسيبه انتي مش قلتي ليا انها شينة وسمرا
هناء..كانت شينة
زيزي باستغراب ..كيف كانت شنو دارت عمليات تجميل مثلا
هناء..لا الله والعليم انها هي سمحة اصلا لكن كان ناقصها راحة واهتمام وانتي طبعا ادرى الناس بزين كيف يدلل المرا
زيزي ..وانتي تقوليلي على دلع زين واهتمام زين
هناء..المهم اخر مرة شفتها فيها كان مروح بيها من الجامعة حاجة ماتفهمي شئ حتى سمارها طالع يهبل عليها لدرجة تحسديها عليه
زيزي بعصبية وغيرة ..هناااااء ناقص غير اديرلها تمثال
هناء بهزة كتوف ..انقول في الحق
زيزي..به هي اطلعي تو زين على جية خليني نستفرد بيه
هناء..هي سلام تو
*وطلعت هناء وزيزي قعدت تجهز في روحها وهي تسحاب ان زين جايها بروحه وانها تقدر تغويه ورن جرس شقتها ولما فتحت تفاجأت بزين واحمد مع بعض وكانت لابسة جيبة سودا قصيرة وبلوزة بيضاء شيفون وتحت منها كت اسود
زين .. لازم نتفاهمو على كل شئ
زيزي ..خشو شنو بنحكو من فم الباب
احمد بنفور ..خشي غيري دبشك قبل
زيزي..كنه دبشي
زين ..مكناش لكن نحن نبو نحكو بالعقل ومش داعي لتصرفاتك اللي انا حافظها صم
*وخشت زيزي بحمق تغير في دبشها ولبست فستان نص كم وطويل مخصر وواسع من تحت لونه اسود وفيه دوائر بيض
زيزي ..شنو قهوتك يا احمد
احمد..شكرا مانبي شئ
زين ..نحن مش جايين نشربو ونضيفو جايين نتفقو وبنطلعو
زيزي ..احكي يازين
زين ..حنجي انا وباتي وجنة نطلبوك من اهلك
زيزي بصدمة ..نعم
زين ..كنك
زيزي ..زوجتك عادي موافقة وعرفت بموضوع حملي
زين ..اه تعرف
زيزي..وعادي رضت والله اللي زيها ماعنداش كرامة
زين وقف بعصبية ..احترمي نفسك كرامة جنة فوق كل شئ فوق حتى كرامتي لكن هي ربي عطاها عقل انتي ماتكسبي ربعه ولان عارفة ان غلطي هذا قبل ماتكون زوجتي كنهدا مستحيل كانت تسامحني
*وفي اللحظة هذي مايعلمش زين انه عطى السلاح بكل بساطة لزيزي بيش تقتل بيه جنة
زيزي ببراءة مصطنعة ..خلاص يازين فهمت
زين ..وضيفي لمعلومك ان علاقتي بيك ماتفوتش الورق عشان خاطر البيبي بس وبمجرد ماينولد حيكون الانفصال فانتي حرة بديري عرس او لا حاجة ترجعلك لكن بمجرد ماتوصلي لشهرك التاسع حنقولو ان صارت خلافات بينا واننا بننفصلو 
ولعلمك لولا البيبي اللي في بطنك كان مستحيل انك تنكتبي على اسمي عمرك كله
احمد..هي يازين
زين ..حددي موعد مع اهلك
زيزي ..بابا مش قاعد بيروح اخر الاسبوع الجاي
زين ..لازاد ولا نقص اسبوع او عشرة ايام
هي سلام
*وطلع احمد وزين وسيبو وراهم شعلة نار لو انطلقت ممكن تحرق بنغازي كلها
زياد بعصبية ..كيف ياجنة
مارية ..انتي اكيد مش في وعيك
جنة بهدوء..لو زين غلط وهو معاي كنت مستحيل نقعد معاه دقيقة لكن هذا الغلط قبل مايتزوجني يعني ماخانيش
زياد..وشنو عرفك
جنة ..مستحيل مرا ماتعرفش راجلها ان يخون فيها غير في مرا اطنش تبي تحافظ على حوشها وفي مرا ميهمهاش شنو ايدير بالذات اذا مريحها والله مرا غبية وانا مش غبية ياقلب ياجنة
زياد بتنهيدة ..انا ماقلتش انك غبية
جنة ..خلاص امنا اوثق في اختك وحكمها
مارية ..ياجنو كيف بترضي تقاسمك فيه
جنة..زين قال بيتزوجها بس على خاطر ولده او بنته  مايكونش ولد حرام وبعد ماتجيب حيطلقها ومافيش حد حيعرف بالموضوع هذا الا انتم وعمي يوسف واكيد احمد طبعا
زياد..وهذي حاجة تنقال اصلا
جنة ..بس يا قلب جنة تحكي مع باتي
زياد ..وشنو بنقوله بالله راجل بنتك اللي ماسكرتش شهرين بيتزوج عليها
جنة ..قوله اني انا راضية وانه عادي بدل مايدير حاجة حرام بيديرها بشرع ربي وقوله عادي اني مرات مش مكفياته
مارية ..ياقلبك ياجنو
جنة بحب ..لاني واثقة من حب زيني ليا وهذي ريح هبت على علاقتنا وان شاءالله حتمشي باقل الاضرار
مارية بضحكة حزينة ..هههه ريح يابنتي قولي عاصفة واي اقل اضرار والحكاية في طفل
جنة .. طفل بيكون باته زين يعني شنو بيكون عسل وحلو زي بوه
زياد باستغراب ..عادي ياحبيبة وخيك لو امه قالت مانيش مربياته وخلاته لزين تربيه
جنة ..اه يا زياد نربيه ليش لا وياريت امه ادير هكي
مارية .. اه ياقلبي نحس في ضغطي نزل منك
جنة ببراءة ..عليش
زياد..من سلبيتك وتقبلك للوضع
جنة .. نسئلكم وانتم ردو عليا
لو انا اعترضت او انهرت بتتغير حاجة
زياد ومارية .. لا
جنة ..خلاص امنا طالما الخيانة وغلط زين قبل مايعرفني مانقدرش نحاسبه عليه لانه قبل مايعرفني ومهما كبر غلطه هذا انا وهذا طبعي وزين كان واضح معاي من قبل مايوافق على شروطي عشان نوافق عليه حكالي كل حاجة بالتفصيل وما دس عليا شئ ترا قوليلي تصرفي غلط او صح
زياد..هو صح ياجنة بس قبولك ليه بالبساطة هذي هو اللي مخوفني عليك
جنة ..ماتخافش عليا انا قوية صح الصدمة كانت كبيرة عليا في البداية لكن تو متقبلتها بكل رضى وبعدين ربي اذا حب عبدا ابتلاه
مارية وزياد..ونعم بالله
زياد..خلاص يا حبيبة وخيك من ناحية باتي وخواتي كوني هانية
جنة ..تعرف انا مش خايفة غير من ملك
مارية ..فعلا اكثر وحدة تخافي منها لاني ماتخيلتش انها تحبك بالشكل هذا وحبها ليك هو اللي يخليك اكثر وحدة تخافي منها
جنة ..يستر الله بس يا زياد ماتحكيش لحد حاليا  وبعد مانمشو نخطبوها قوللهم بعدين
مارية بصدمة ..نعم
بتمشي معاهم اخرى
جنة بهدوء..اه انا وانتي
مارية ..عليش انا لاني اخته الله غالب عليا انتي ليش
جنة .. زين قالي عشان تفهم اني كل شئ بالنسبة ليه حتى لو بيتزوج عليا
مارية ..يقولو لكل امرئ من اسمه نصيب
ان شاءالله جنة الصغيرة تطلع حتى ربعك انكون راضية آخر رضا
زياد..اكيد حتكون زي عمتها هذي حبيبة وخيها وبعدين مش يقولو البنت لعمتها لو كعبة في قدمتها لابال مسمينها علي عمتها
جنة بحب..ربي يحفظكم لي يارب
*وروح زين وجاء لجنة روح بيها وبعدين حكى لجنة على مشيته هو واحمد وفاتن اربع ايام غريبة على الكل زين اللي متمسك بجنة ومايسيبش فيها بكل حتى العمل مامشاش ليه والاوراق يجب فيهن احمد ليه عشان يوقعهن ويراجع فيهن وشغله كله يدير فيه من الحوش
احمد..لامتى يازين بتقعد حابس روحك هكي
زين ..مش حابس روحي انا خايف نسيب جنة انجي مانلقهاش
احمد..عليش هي مش موافقة ومصدقة انك ماخنتهاش 
زين ..خايف يا احمد اقتناع جنة وراحتها وحتى انها مامنعتش روحها عليا لكن خايف ان عقاب ربي مازال مكملش
احمد..استغفر الله العظيم استغفر ربك
زين ..استغفر الله العظيم لكن والله يا احمد قلبي قابضني بشكل مش عادي
احمد..وجنة راضية صح او غير تكابر
زين .. تصدق في البداية نسحابها تكابر لكن لما نداعب فيها تستجيب معاي ونقضو احلى وقت واحلى ليالي مشن علينا لتو وطول الوقت اللي قاعد فيه معاملتها معاي زي ماهي حب وحنان وحتى باتي كان مطنش عليا هيا خلاته يرجع زي قبل وهذا اللي مخليني متأكد انها ماتكابرش على روحها 
احمد..ربي يكمللها بعقلها وانت عليك اللي ماعندك نيه ترقد معاها وانتم بالظروف هذي
زين .. ماقدرتش نحس في روحي لما نقضي ليلتي معاها وردت فعلها هي الحاجة الوحيدة اللي اطمن فيا ان جنتي مسامحتني ومش زعلانة مني
احمد..ربي يفك الغمة هذي باقل الخسائر لكن تعرف يازين انا احساسي الموضوع فيه ان
زين بانتباه ..كيف
احمد.. شنو المعنى تو جت وقالتلك ليش من اول ماعلمت انها حامل ماقالتش
زين .. قالت انها كانت مسافرة
احمد..مش عذر كانت تبعتلك حتى رسالة بالذات لما قالت ليك انها كانت تبي تجهض والدكتورة قالت في خطر على صحتها ليش مش من اول ماقالت ليها الدكتورة هكي بعتت ليك وكلماتك
زين ..مش عارف
احمد..شنو ضمنك ان البيبي ولدك
زين ..مافيش ضمان نين تجيب وبعدها اندير فحص DNA بيش نتأكد حتى قبل مانسجل البيبي عشان مانخشش في قضايا نسب
احمد..عين العقل  تعرف هو لو فيها كيف راه سافرت انت وياها لتركيا او الاردن او امريكا او بريطانيا  راه درتو  التحليل لان عندهم الامكانية هذي يديرو التحليل وهو في رحم امه المهم يكون حملها في البداية 
زين ..والله جديات تحكي
احمد.. ايه انا اصلا اليومين اللي فاتن مابطلتش تدوير على امكانية دورت التحليل هذا
زين ..تعرف نمشو الاسبوع الجاي نخطبها وهي مازالت ليها شهرين واسبوعين على حسب الورق اللي عندي  ونحجز ونسافر انا وياها بحجة ان بنشرو دبش من تركيا  خير هي هكي مش حتشك وبالذات بعد مانخطبها
احمد..تمام التمام وهكي حتى جنة لو طلع البيبي مش ليك ترتاح عشان ماتكونش تزوجت غير ان شاءالله ماحكتش لاهلها
زين ..لا زياد ومارو بس وقالت لزياد مايحكيش لاهلها نين يخطبوها قبل
احمد..خليها تأجل مايقولش نين تسافر انت وياها واديرو التحليل
زين ..نسافرو انا وياك وجنة واميرة وخوها وهي
احمد..جنة وعرفت لكن انا واميرة وخوها عليش
زين ..على خاطر اميرة تشري دبش من تركيا ناسي يا دايخ ان عرسكم مازال عليه شهرين بس وطبعا حتى وانت اميرة قاري فاتحتها فمستحيل يخلوها تسافر بلا واحد من خوتها
احمد..والله همك ومشكلتك هذي وزحمة الشغل نستني تو تفرح اميرة واجد لكن
زين ..لكن شنو
احمد..معناها لازم نحكي لي اميرة على حقيقة زواجك بزيزي
زين ..قصدك هي ماتعلمش الحقيقة
احمد..هي لتو ماتعلمش انك بتتزوج قلت خليها نين تخطبها قبل
زين ..تمام معناها قوللها عادي يا احمد خير ماترجع لحقدها الاول بتاع زمان وماصدقت افتكت منه وبدت تتقبلني بدون حقد 
احمد..متفقين فعلا والله عندك حق هي ما بطلت الا خليني وخليك
هي بنروح انا تو وانت خليك مع جنتك اكيد خذيت من وقتك واجد
*وروح احمد ورجع زين لحضن جنة اللي تقول خايف فعلا انه يفقده ومشن الايام وقبل يوم من مشيتهم لاهل زيزي بيش يخطبوها عمي يوسف حس بروحه انه تاعب شوي واطر زين يرفعه للمصحة بيش يطمن على بوه وخلى جنة بروحها في الحوش لان عزالدين اصر انه يمشي معاهم والشيف حسن طالع للسوق يجيب في حاجات ناقصة المطبخ وسمعت جنة الجرس يرن لبست اسدال الصلاة وطلعت فتحت الباب
زيزي ..السلام عليكم
جنة ..وعليكم السلام تفضلي اختي
زيزي ..انا زيزي
جنة انصدمت  وبالذات لما شافت شكلها
جنة ..تفضلي
زيزي بذوق متصنع..معليش جيت من غير موعد غير حبيت انتعرف عليك
جنة ..تفضلي جوا مش حنحكو على الباب
وخشت زيزي تحت صدمة جنة واستغرابها من الزيارة
جنة
عنده حق زين ماقدرش يشد روحه عليها تي هيا تحل من على حبل المشنقة من جمالها لابال وهي تغري فيه
زيزي ..ان شاءالله زيارتي ماضايقتكش
جنة ..لا ابدا انستي
زيزي..الله يآنسك
جنة ..شنو تحبي تشربي
زيزي..اي عصير عادي
*طلعت جنة للمطبخ وصبت عصير وحطت معاه شوكلا وهي مازالت مش مستوعبة الزيارة لان خطر عليها كل شئ الا انها تزورها وهي اللي كانت تجهز في روحها كيف بكرة تتلاقى معاها وفجأة تلقاها قدامها ضيفت جنة زيزي
زيزي ..معليش غصبن عني اللي صار
جنة ..مش لازم نحكو في الماضي اللي صار صار المهم تو لان معاش في حاجة تتصلح
زيزي ببراءة مخادعة ..عندك حق وانا قلت لزين ان مازالت في البداية على الاقل شهر ونص مازال مافيش حاجة باينة
جنة بصدمة ..شنو شهر ونص
زيزي بمكر لانها وصلت للي تبيه ..قصدي الجنين ليه ستة اسابيع وزين قالي الخطوبة بكرة والعرس بعد اسبوعين نكون كملت الشهرين
جنة بشرود ..اه حتى انا زين هكي قالي
زيزي ..به شكلك تاعب مانبيش نعطل عليك غير قلت نتعرفو على بعض حتى ولو على السريع
جنة ..لا مافيش حاجة وتشرفت بمعرفتك
*وطلعت زيزي من عند جنة بعد مافجرت قنبلتها واللي نسفت جنة نسف حست حياتها كلها انهارت وقعدت تعيط بصوت عالي ودموعها ينزلن بغزارة 
جنة
ليش يازين ليش ياقلبي ليش ليش يافرحتي اللي مكملتش نحكي بثقة ونقول المرا تعرف راجلها لما يخونها وماسحبتش روحي انا الغبية انا الحمارة والبيهمة (حشاكم) شهر ونص معناها رقد معاها وانا على ذمته
*وبعد فترة بكاء لاباس بيها ناضت جنة وغسلت وجهها واتصلت بزين عشان مايبانش البكاء في صوتها تحكي معاه وقلبها ينعصر عصر
جنة ..كيف حال عمي تو
زين ..مازال يكشفو عليه
جنة ..زيني نبي نقولك
زين ..شنو ياجنتي
جنة ..نبي نكلم ملك تجيني بنمشي انا وياها للسوق بنشري لبسة لمشوار بكرة ونتغذا عند اهلي وبعدها العشية نتصل بيك تروح بيا
زين ..به استني نين نروح ونطلع انا وياك
جنة ..معقولة بنسيبو عمي نحن الاثنين
زين ..به ياجنة بس ما ادوريش واجد في السوق
جنة ..حاضر
زين ..جنة
جنة ..نعم
زين ..نحبك
جنة ..حتى انا هيا سلام
زين ..سلام
زين
جنة تحكي معاي لكن في نبرة صوتها حاجة غريبة قلبي مازال مقبوض لكن قلت اكيد عشان مشوار بكرة نطمن في روحي بالكلام هذا
.............
جنة ..الو  السلام عليكم
ملك ..وعليكم السلام
جنة ببكاء ..ملوكة تو تسيبي اللي في ايدك وتجيني ضروري
ملك ..كنك ياجنة شنو في ليش تبكي
جنة .............
#حياة