سمرائي عذرا

الفصل الرابع

#سمرائي_عذرا
الفصل 4
مارية ..مش مرتبطة يازين كانت مخطوبة وفسخت خطوبتها
زين ..عليش
مارية ببرود..عشان تزوج اختها
زين بصدمة ..شنو
مارية ..ايه فسخ خطبته منها قبل الفرح بشهر واتزوج اختها في نفس الموعد اللي المفروض يكون فيه فرحها
زين ..لاحول ولاقوة الا بالله
مارية ..ماقلتش ليا شنو تبي منها هيا مش زي نوعية البنات اللي اتبع فيهن ولا قدهن ماتحطهاش في راسك يازين
زين بمكر ..ومن قالك بنحطها في راسي مش ممكن بنحطها في مكان اخر
مارية ..اذكر حاجة يازينو جنة اخت زياد راه
زين ..عارف عارف يامارو
مارية ..ماتبيش تقولي شنو تبي منها
زين ..كل شئ في وقته حلو
هيا سلام
مارية ..سلام ربي يهديك يا وخيي ويبعد عنك بنات الحرام
*قالتها وهي خاشة للحوش لان زين ماخشش قعد في جنان الحوش يحكي معاها وطلع منه 
جنة ..يبعد عنه بنات الحرام والله هو اللي ربي يبعده عنهن
مارية ..والله ظالمتيه ياجنة
جنة ..لانظلمه لا يظلمني سبحان الله كيف تغير هذاك العيل اللي كان كله براءة بواحد زاني
مارية ..ماياخذش في حاجة منهن بالغصب هنا اللي يسلمن في روحهن ليه
جنة ..حتى انكان يامارو يعتبر زاني اي علاقة جسدية خارج اطار الزواج فهي زنا
مارية ..ربي يهديه ويصلح حاله
جنة ..ان شاءالله يهديه ويصلح حاله 
مارية ..ههه غريبة دعيتي ليه
جنة ..مش معناها اني مش متقبلاته او معترضة على تصرفاته  معناها نكرهه بالعكس انا في كل صلاة ندعي لربي يهديه لان حرام شاب زيه ماناقصه شئ ايدير في منكر كبير زي الزنا
مارية .. وليش ماتحطيشي في راسك وانتي تخليه ينهدى
جنة بحزن  ..هههه انا بيش ان شاءالله بجمالي الخارق والله جسمي الرشيق
مارية ..امغير تسلمي بقلبك الحلو
جنة ..اللي زي زين مايهماش القلب او العقل بقدر مايهمه الشكل الخارجي
مارية .. والله ياجنة مانك شينة للدرجة اللي توصفي روحك بيها انتي لو يزيد وزنك بس وشوي رتوش تقعدي ماشاءالله عليك
جنة بحسرة ..بالله منين بيزيد وزني وانا خالتي هنية على الطلعة والخشة وهيا تعاير فيا والله اختي ليلى اللي كل مانشوفها نذكر حسرتي على عمري والله اختي ملك اصغر مني بشهرين وعندها زوز صغار وتلقح في كلام عليا اربعة وعشرين ساعة منين بيزيد وزني
مارية ..لو اطاوعي زياد وتمشي لدكتور التغذية اللي حكالك عليه
جنة ..حنمشي ان شاءالله غير انتي تكملي الشهر الثالث ونلهى بروحي
مارية بفرحة ..وعد
جنة ..وعد
على مرواحة زياد من عمله وجهزت جنة الغذاء لزياد ومارية وقعدو يتغذو
زياد..خيرها حبيبة وخيها ماتتغذاش معانا
جنة ..حبيبة وخيها تغذت مع يزيد اليوم
زياد..صحة على قلبكم يارب كيف حاله بالله
جنة ..الحمدلله فرحان انه بيخش للمدرسة
زياد..قوليلي ياجنة لو بنكفل يتيم زيك شنو اندير
جنة ..تتكفل بمصاريفه ورعايته وتهتم بيه لو مرض واطلعه وادهوره بين وقت ووقت وتبدا مسؤل عليه على تصرفاته وتنصحه وتفهمه يعني مافيش شروط معينة
زياد..تمام بما ان الحمدلله ربي موسعها علينا حنكفلو يتيم شنو رايك يامارو
مارية ..معاك ياحبيبي هذي مش محتاجة مشاورة
زياد..خلاص ياجنة كلمي عمتي عزيزة وقوليلها اني بنكفل واحد من الصغار اللي عندها
جنة ..شنو رأيك يا زياد بدل ماتكفل واحد وانت تو بيكون عندك بيبي ومرات تقصر مع الطفل اللي بتكفله وهذا يبدا ذنبه في رقبتك وغير ذلك ماتنساش ان البيبي اللي بتجيبه اذا بنت بتكون غير محرمة عليه بمجرد مايبلغ وتطر للفصل بينهم لما بتجيبه يقضي وقت معاك فشنو رأيك تخصص مبلغ كويس كل شهر وتعطيه لعمتي عزيزة وهكي تكون ساهمت في مساعدة الخمسة بدل الواحد ولو استحقت حاجة تقوللنا عليها نوفروها ليها زي ما ادير معاي مرات تستحق حاجة ويكون مبلغها كبير ومرات واجد يكون عندي المبلغ لكن نكلم في بابا وعمي يوسف عشان يشاركو معاي بيش ياخذو معاي  جزاء من العمل الصالح
زياد..والله فكرة كويسة وزي ماقلتي مرات بعد مايجي البيبي نقصر معاه واليتيم يعتبر امانة نتحاسب عليها
مارية ..هو ليش ربي حرم التبني
جنة ..لان التبني يعتبر هدر لحقوق عائلة المتبني من ناحية الورث والنسب وغير انه اذا كان ذكر ليس محرم على نساء البيت المتبني والعكس لو كانت انثى وحرم التبني تحريم ابدي وذكر في قرآنه الكريم ( وما جعل أدعياءكم أبناءكم ذلكم قولكم بأفواهكم والله يقول الحق وهو يهدي السبيل وأدعوهم لآبائهم هو أقسط عند الله فإن لم تعلموا آباءهم فإخوانكم في الدين ومواليك ) صدق الله العظيم
وغير ذلك من ناحية المصاهرة يعني كيف يكون مسجل باسمه مثلا ويعشق اخته ويبي يتزوجها بالدين حلال لكن لان ليهم نفس الاسم يعتبر حرام وتصير لخبطة هما في غنى عنها وطبعا في واجد اسباب لكن انا وضحت ليك اهم الاسباب لتحريم التبني وغير ذلك في الشرع  اليتيم هو من مات والده ويكون غير بالغ لكن بمجرد مايبلغ معاش يبقى يتيم الا اذا كان عقله مش طبيعي  والبنت لعند ماتتزوج وتعرفي في ناس واجد ديمة تسخف على اليتيم وهو راجل مصنع وماتسحابش ان اليتم سقط عليه بمجرد بلوغه وحتى لو كان فقير فاي مساعدة ليه بعد البلوغ تعتبر مساعدة لفقير بس  
مارية ..سبحان الله من جعل لكل شئ سبب
جنة وزياد ..ونعم بالله
................
زين .. تعرف عرفت البنت من
احمد..الشينة
زين ..اه
احمد..وطلعت من
زين ..جنة صاحبة مارو
احمد..والله عليك صدفة امس نحكو عليها وتطلع نفس البنت لكن هكي خطتك مش حيصير منها
زين ..ليش
احمد..ماهو هكي ماتقدرش تسيبها لما تتزوج لان زياد ومارية حيكونو مسؤليين عليها غير بوها
زين ..لا مش حتقول حاجة لانها ماتصدق تاخذ واحد زيي فأيش ماندير فيها مش حتحكي لحد عليه عشان مايشمتش فيها حد وحتفهم الناس ان حياتنا تمام التمام بيش يحسدوها عليها ويرتد جزء من كرامتها
احمد..اما انت من الاخير عقلك عقل شرير به شنو عرفت عليها
زين ..عرفت من مارو انها كانت مخطوبة وقبل فرحها بشهر خطيبها سيبها وتزوج اختها في نفس موعد الفرح اللي مفروض يكون فرحها ومن تحرياتي عرفت انها معيدة في الجامعة وعندها محاضرة وحدة بس في الاسبوع وباقي الايام تمسك في روضة اطفال ومش عارف ليش لانها ماديا تعتبر حالتها كويسة واجد وانها تساعد في مراء ترعى في ايتام في حوشها وامها ماتت وهي تولد فيها ومرت بوها وخواتها مايحبوهاش الا زياد بس يحبها واجد لدرجة ديمة اينادي فيها حبيبة وخيها والاهم من هذا كله عمك يوسف يحبها واجد
احمد..البنت كويسة ماشاءالله عليها
زين ..بس شكلها مش حلو
احمد..ربي يهديك ياصاحبي
به شنو بدير تو
زين ..لانها جدية ومش بتاعت لف ودوران فحنخش من باب اللي اي بنت مستحيل تسكره
احمد..وشنو الباب هذا زعمك
زين ..بنمشي انا وانت ويوسف نخطبوها رسمي
احمد..شنو
زين ..زي ماسمعت عندك اعتراض
احمد..وانا نقدر نعترض لكن تتوقع زياد يعطيها لك وهو عارف تاريخك
زين ..ماهو هذا اللي مخوفني زياد
احمد.. يعني انت خايف من زياد ومش خايف من دراه الكبد فايزة
زين بضحكة .. ياراجل رد بالك تقول الاسم قدامها تاكلك من غير ملح
احمد..تمشي تملح المهم شنو بدير معاها وزعمك حتسكتلك يعني
زين ..حاليا مش حنقول ليها حاجة عشان ماننحرمش من الجو السمح اللي ادير فيه ليا لكن لما خلاص يتحدد موعد الفرح حنقوللها ونسيبها مؤقت لعند بعد مانتزوج ونسق اموري بعدها نرجع ليها
احمد..خزي على تفكيرك المسخ زيك
زين ..وبكل فخر
احمد..به وشنو عرفك انها موافقة
زين ..ماهو هذا اللي بنديره قبل مانكلم باتي ونحكيله نكلمها هيا ونشوف شنو ترد عليا وبعدها نمشو نخطبوها
احمد..ولو رفضت
زين بضحكة ..هههههه تحكي جد والله تبصر منو اللي بترفض هذي وبترفض من زين الدين يوسف ياراجل قول كلام غير هذا
احمد..انا نقول لو
زين ..مافيش لو يا احمد هيا اللي زيها ماحتصدق ان واحد زيي فكر انه يشبح ليها مش انه يتزوجها
احمد..ممكن به امتى بتمشي ليها ووين
وزي ماقلت انها جدية وماعندهاش في اللف والدوران
زين ..بكرة عندها محاضرة في الجامعة بنعديلها وبنحكي معاها
..............
هنية ..لامتى ياجمال امشي كلام هالبنت عليا
جمال ..قلت ليك مية الف مرة جنة مالكش دعوى بيها
هنية ..كيف ماليش دعوى بيها وانا مربيتها
جمال باستهزاء ..مربيتها من امتى ان شاءالله جنة ربت روحها بروحها ولو في حد رباها بعد ماجدتها توفت خوها زياد اللي دار باله منها واللي اهتم بيها واللي يطبطب عليها لما يجرحوها بناتك ويستهزو عليها ويهون عليها وجعها لما تعامليها زي الزفت وتقوليلي ربيتها اي رباية وهي لو جاعت مايندري عليها حد غير زياد ولو مرضت مايسهر عليها حد غير زياد حتى انا ورغم اهتمامي بيها مانقدرش نقول ربيتها بسبب اني كنت ديمة مسافر فاللي رباها ومن حقه يكون بوها وامها هو زياد
هنية ..وزياد منو مش ولدي
جمال ..تصدقي انا هذي اللي محيرني منين زياد جايب الحن هذا على اخته وانتي امه
هنية ..والله انا طيبة لكن ماقدرتش ماقدرتش ننسى انك حبيت امها وفضلتها عليا وهي العبدة (معليش على اللفظ رغم اني مانحباش لكن سياق الرواية لازم منه ) عليا انا البيضاء زي الحليب والجميلة
جمال ..الله يرحمها حتى بعد هذا كله ماقدرتيش تسامحي وتنسي
هنية ..ماقدرتش ياجمال مانقدرش ننسى خيانتك ليا
جمال ..انا ماخنتش ياهنية ولاعمري كنت خوان انا اول ماقلبي دق ليها تزوجتها على سنة الله ورسوله الخيانة لما نكون حبيت وعشقت من وراك لكن انا اتزوجت على سنة الله
هنية ..لو حبيتها من وراي وسيبتها كنت نقول نزوة وعدت على حالها وماحد يعلم بيها ونتحشم قدام الناس
جمال ..لاحول ولاقوة الا بالله يعني خفتي من الناس وماخفتيش من رب الناس لهدرجة ايمانك ضعيف يا ولية
هنية ..انا ايماني مش ضعيف لكن لما تتزوجها قدام الناس هكي حشمتني قدامهم لكن لو درت علاقة معاها في السر حتى لو علمو مايقدرش حد يوجه ليا كلام عشان مانعرفش ويقولو نزوة وسيبها
جمال ..يا ولية شنو الجهل هذا اللي عندك بدينك معقولة عندك عادي اندير علاقة ونغضب ربي والله نتزوج وربي راضي عليا
هنية ..جاهلة جاهلة وفكني من الدوة هذي وتفولح ودور لبنتك على عريس يلمها
جمال ..شنو ندور لبنتي على عريس هيا سايبة وشنو يلمها هذي تشوفي فيها من شقة لشقة والله من سيارة لسيارة بنتي تنزان بالذهب
هنية ..بامارة شكلها اللي مادق بابها عريس متسقم غير المطلق والارمل
جمال .. مش كل حاجة شكل وسيورها ربي يعوضها باحسن شئ يتخيله عقلك
وترا اطلعي من حذاي خير مانطلع جنوني فيك تو
هنية ..آني طالعة وانت غير نجيب سيرة ست الحسن والجمال تتكهرب
جمال ..استغفر الله العظيم واتوب اليه يارب الصبر بس
...................
وجاء يوم جديد وجنة مشت لجامعتها وعطت محاضرتها ولانها كانت المحاضرة الاولى فبعد ماكملتها خشت لمكتبها وقررت انها تقعد شوي تكتب في مذكرتها كالعادة
ها هو يوم جديد يا كتابي اكتب فيه
اليوم وانا القي في المحاضرة يضنون اني لا انتبه لهمزهم علي او لسخريتهم مني لماذا لا ينتبهو بأني القي المحاضرة عليهم بضمير واني لا ابخل عليهم بأي وسيلة تسهل عليهم فهم المحاضرة لماذا يتناسون انهم عندما يحتاجوني لشرح اي نقطة غير مفهومة اكون موجودة لكي اساعدهم في فهمها لماذا يتناسون اني اعاملهم بكل احترام واني لا استخدام سلطاتي معاهم لماذا
زين ..السلام عليكم
معليش خبطت على الباب بس مارديتيش عليا
رفعت جنة راسها وباستغراب وصدمة
جنة ..انت شنو ادير هنا
زين بابتسامة ..مش تردي السلام قبل
جنة باحراج ..وعليكم السلام
زين ..ممكن نحكي معاك في موضوع
جنة ببرود..انت ماعرفتنيش على نفسك قبل بيش تحكي معاي موضوع
زين بصدمة .. قصدك ماعرفتينيش
جنة باستعباط ..لا محصليش الشرف
زين بقهر وصدمة ..انا زين الدين يوسف اخ مارو
جنة ..اه اهلا وسهلا تفضل بيش نساعدك
زين
هذي شنو شكلها ماتشوفش او نظرها ضعيف وسمعها اخرى معقولة نقوللها انا زين الدين يوسف وترد عليا بكل برود بدل ماتفرح اني انا متنازل ونحكي معاها
جنة ..استاذ زين وين رحت
زين باستغراب ..استاذ
جنة ..معليش مانقدرش نحكي مع رجل مانعرفاش  بدون صفة وانت مش كبير في السن بيش اناديك ياحاج او ياعمي
زين .. بس انا قريبكم نعتبر مايستحقش الموضوع للرسمية هذي
جنة .. قريب لزوجة خوي مش لي
المهم ماقلتش شنو الموضوع اللي تبيني فيه
زين ..بدون لف ودروان تتزوجيني ياجنة
جنة بكل ثقة ..لا
زين بصدمة ..شنو قلتي  
#حياة