سمرائي عذرا

الفصل الحادي عشر

#سمرائي_عذرا
الفصل11
زين ..انا جاي بنعاود نفس عرضي اللي رفضتيه في الاول وقبل ماتحكي اي شئ اسمعيني للاخير
جنة ..باه حنسمعك للاخير بس حتحترم ردي مهما انكان
زين بتنهيدة ..ان شاءالله
*جابت مارية القهوة قبل مايتكلم زين وعدت وسيبتهم بروحهم *
زين ..انا لفيت ودرت واجد ولبزت اكثر مايتخيل عقلك وعارف روحي غالط ومهما نبرر مايعطينيش الحق اني نغلط الغلط هذا في حق نفسي وباتي اللي رباني لكن اللي صار صار وتو انا حاسس بالذنب وبنسعى ان باتي يسامحني وربي يغفرلي
جنة ..اكيد لما توتبك تبقى من قلبك صدقني ربي حيغفرلك ذنبك ( والذين اذا فعلوا فاحشة أو ظلموا أنفسهم وذكروا الله فاستغفروا لذنوبهم ومن يغفر الذنوب إلا الله ولم يصروا على مافعلوا وهم يعلمون ) صدق الله العظيم  وعمي يوسف مستحيل حيزعل منك ممكن ياخذ على خاطره وتصعب عليه نفسه لكن زعل ويقاطعك لا
زين بتنهيدة  ..صدق الله العظيم واستغفر الله واتوب اليه لا ياسمرائي قدر وقاطعني تخيلي ان باتي مريض ومانكونش معاه وبحذاه نعانيه
جنة
سمرائي الله قديش الكلمة حلوة من فمه ماتخيلتهاش هكي
زين..جنة انتي معاي
جنة بأحراج ..معاك يازين  كمل
زين ..نقولك ان باتي قدر وقاطعني ماتتخيليش اليومين اللي فاتو عليا كانهن دهر عليا حتى لما كنت برا يوميا لازم نكلمه على Face Time ونطمن عليه ونشوفه وتو بسبب ذنبي باتي قاطعني وانتي اللي بيدك تخليه يوافق يسامحني
جنة باستفهام ..انا
زين ..اه ياجنة انتي اللي في ايديك مش بس تخلي باتي يسامحني لا انتي في ايديك تخلي حياتي تنعدل وتنصلح
جنة ..برضو انا كيف
زين ..تتزوجيني ياجنة وتعدلي من حالي وتقويني في حالة ضعفي وفي قوتي تشجعيني تزيدي تقربيني من ربي عشان يسامحني تخلي باتي يعاود ينظرلي زين الاول
جنة ..........
زين ..اعطيني فرصة واعطي لنفسك فرصة انك تعيشي وتحبي وتنحبي مانكذبش عليك انا تو حاليا مشاعري مش عارف شنو هي باتجاهك اعجاب او حب مش عارف شنو لكن اللي نقدر انقوله لك اني راقد واعي نفكر فيك بس و لكن اللي عارفه اني نبيك ياسمرائي
جنة بتوتر ..ممكن معاش تقولي
سـ مـ ر ائـ ي
زين ..تطلع معاي عفويا زي مانطقها لساني اول مرة عفويا بيني وبين نفسي
جنة ..به نسئلك سؤال شنو ضمني انك ماتخونيش لانك عارف اني نخنت من قبل واكيد خونة ثانية تنهي عليا
زين ..انتي ياجنة الضمان
جنة ..انا كيف
زين بثقة..حنانك اهتمامك وممكن مع الوقت حبك ليا هما اللي يخلوني مانشوفش غيرك وصدقيني ياجنة انا ماحبيتش قبل
جنة ..نرد ونسئلك السؤال اللي ماعرفتش تجاوب عليه اول مرة ليش انا
زين بتنهيدة.. نحكيلك بصراحة بس انتمنى ماتزعليش مني لاني مقرر اني مانكذبش عليك مهما انكان
*وحكى ليها زين شنو كان مخطط وناوي يدير لما يتزوجها وطبعا جنة انصدمت وحست بالوجع لكن ماقدرتش تبين على خاطر زين ماكذبش عليها وقاعد يقول في الحقيقة لكن ركزت في باقي كلام زين*
زين .. وبعدها الحكاية انقلبت عليا شكلي من كثر ماتميت نفكر فيك عشان بنتتقم منك لانك رفضتيني تغير احساسي ناحيتك ولقيت روحي نفرح لما نشوف ضحتك اللي تهبل  لمعة عيونك ولونهن المش عادي  بديت انركز على حاجات ماتخيلتش اني نركز عليهن واولهن لون بشرتك اللي تتمناه بنات اوروبا كلهن من روعته غير نحن مانعرفوش نقولو على البنت جميلة الا لما تكون بيضا لكن انتي اللي لون بشرتك تقول جاية من امريكا الجنوبية وغرت عليك واجد لما كنتي تحكي مع احمد في البداية كذبت شعوري بعدين معاش قدرت ننكر ونار ولعت فيا لما ميلاد مسك ايدك وخــفـ.....
جنة ..كمل كنك سكتت
زين ..هذا اللي عندي سمرائي وكل اللي طالبه فرصة ومستحيل تندمي عليها
وخوذي وقتك وفكري في طلبي جديات واي طلب تبيه نوافق عليه وتحت امرك فيه وقبل مانصبي حاجة وحدة نبيك تعرفيها سمرائي اني مستحيل نظلمك او نغدر بيك لاني بجد محتاجك في حياتي
جنة بهدوء عكس اللي بداخلها ..عطيني وقتي وبنصلي استخارة ونرد عليك ان شاءالله
زين بتنهيدة ..تمام سمرائي بس ما اطوليش عليا
جنة ..ان شاءالله
*وطلع زين وجنة مش عارفة تفرح بعرض زي او تحزن ورغم انه كان صريح معاها وماكذبش عليها في حاجة الا تفكيره الاول وجعها برغم مشاعره وكلامه الثاني الا انها مازالت خايفة وقررت انها تصلي وتستخير وتسئل بوها وخوها الرأي *
مارية ..وين رحتي من بدري انادي فيك
جنة ..نعم يامارو
مارية..كنه زين شنو يبي
جنة بشرود..يبي يتزوجني
مارية بصدمة ..زين بيتزوج
جنة فطنت لروحها..اه
مارية ..مش مصدقة زينو فكر في الزواج
جنة ..انتي يابتي متخلفة والله الوحم اثر على مخك نقولك بيتزوجني شديتي في انه بيتزوج وفتي القردة اللي عرض عليها الزواج
مارية بضحك ..ههههه حشاها القردة
جنة ..ياحيوانة والله لو ماكنتي حامل كنت عرفت شنو انديرلك
زياد..ترا توريني  حبيبة وخيها شنو بدير في نص خوها ودنيته كلها
جنة وجت حضنت زياد..يعني شنو بنديرلها ناخذها في حضني ونبوسها بس ماتخافش ياقلب جنة على دينتك وهي معاي
زياد بحب..عليش واصل النقاش بينكن للتهديد
مارية بفرح ..زينو قرر يتزوج
جنة ..اقسم بالله بتجلطني مرتك هذي
زياد..بعيد السو عليك من الجلطة
بس عليش
جنة ..تعال قمعز ياقلب جنة وشد مرتك هذي خير ما نجيب اخرتها عشان نحكيلك
زياد بضحك ..آني قمعزت ها شنو صاير
جنة ..زين عرض عليا الزواج
زياد بهدوء .. وانتي شنو رأيك
مارية ..بصراحة فكرة بس ان زينو بيتزوج هذي بروحها اعجوبة وانه يختار جنة للزواج معناها فعلا حط عقله في راسه
جنة ..صار كنتي مركزة معاي يامعفنة وانتي دايرتلي عم التوهان
مارية ..اصلا فرحتي فرحتين ان زينو بيتزوج وانه اختارك انتي دونن على كل البنات
جنة ..غريبة زياد انت مش مستغرب من عرض زين
زياد..اصلا عندي العلم
مارية وجنة ..نعم
زياد بهدوء..زين جاء خطبك مني ومن باتي وقال انه حاب مايلفش ويدور وانه مايبداش حياته النظيفة اللي قرر يبداها بطريق غلط فقبل مايكلمك كلمني انا وباتي وخطبك منا وقال انه بيسئلك ولو وافقتي حيجيب باته ويخطبك رسمي
جنة
للهدرجة فعلا ناوي يتغير زعمك نعطيه الفرصة ونتوكل على الله على الاقل زين في الاخير شاب فيه مواصفات حلوة تتمناها كل بنت وانا وفي الاخير صح مش زي كل البنات بس بنت
زياد..وين رحتي جنة
جنة ..قاعدة بس انت شنو رأيك
زياد..اسمعي ياقلبي هذا الموضوع بالذات ممكن نقولوك رأينا لكن الرأي الاخير ليك انتي
جنة ..بس انت عارف ان رايك انت يهمني وخصوصا ان نضرتك في الناس ماتخيبش
زياد..شوفي ياحبيبة وخيك زين انسان يعتبر ممتاز جدا ويناسب ويشرف اي بنت ترتبط بيه حتى بعيبه اللي كلنا نعرفوه لكن المرا الشاطرة تقدر تبعد راجلها عن المحرمات وياما رجالة كانو يشربو ويحششو سيبو بسبب مراتتهم  وطالما زين قرر انه يبطل معناها حيبطل اكيد ولو ضعف انتي تكوني ليه السند
جنة ..حنصلي استخارة وبعدها نشوف رايي
*ومشن الايام وعدت جنة لبوها اللي كان رايه زي راي زياد وصلت استخارة وكانت تحس براحة كبيرة كل مرة تصليها غير كلام عمها يوسف وهي تمشي تزور فيه وزين كل يوم يبعث ليها رسالة على فونها كانت تبعث السعادة في قلب جنة*
مارية ..فيش سرحانة
جنة ..في رسالة باعتها زين
مارية بفرح ..مازال يبعتلك في رسالة كل يوم ونفس الموعد
جنة ..اه في البداية استغربت بس بعدين تميت نرجى فيهن
مارية ..ياعيني ياعيني شكلنا طحنا وماحد سما علينا شنو قايلك فيها المرة هذي
جنة ..كاتبلي (رغبتي فيك كانت حقيقية جدا ولم اكن عندها تحت تأثير اغنية نظرة او ماشابه كنت ادرك واعي بأني اريدك بطريقة اعمق مما اظن وتظنِ)
مارية ..الله محلاها اشبح تأليفه او من كتاب
جنة ..تقريبا اشعار لنزار القباني
مارية ..يااااه فعلا اما انتي وهو وافق شن طبق والله زي مانقولو بالعامي طنجرة ولقت غطاها
جنة ..عليش
مارية ..انتي مخرومة قراية وهو احرف منك
جنة ها قررتي والله مازالتي
جنة ..مازالت
مارية ..حرام عليك يابنتي تقريبا كل الدلائل تقولك وافقي
جنة بتنهيدة ..عارفة يامارو بس خايفة خايفة ننكسر من جديد وخايفة ننخان من ثاني وننجرح من ثاني
مارية ..مستحيل حد حيخليه يديرلك حاجة صدقيني غير اني نثق بزينو لما ينوي شئ انه يديره مستحيل يقصر فيه وطالما انه قرر انه يتغير حيتغير
جنة ..والله ماني عارفة بس تعرفي لو وافقت مش حنخليه يقربني نين نتأكد من مشاعره اتجاهي وانه مستحيل يرجع للبز اللي كان يدير فيه
مارية ..تمام برضو وحتى فكرة انه تكوني صعبة بالنسبة ليه تخليه ديمة يفكر كيف يخليك تأمني ليه
جنة ..يستر الله بس مازال مش حنعطيه رايي تو حنسويه على نار هادية قبل وحتى عمي يوسف قالي اذا وافقتي تعبيه قبل ماتقولي رايك
مارية ..اما عمي هذا فعلا هالمرة ربى زينو على حق ماتتخيليش شكل زين تو كيف ضعف بس عشان  ماشافش باته فحرام عليكي ما اطوليش عليه واجد
جنة ..يسهل الله
*وشردت جنة كالعادة بينها وبين نفسها وفي الخطوة اللي بتخطيها لانها مش ساهلة وهل تقدر تحب زين وتسلمه نفسها او لا او هو حيكون وفي ليها او حيخونها مع اول وحدة حلوة تطلع قدامه مع انها من داخلها مصدقة ان زين يبي يتغير بس الخوف مسيطر عليها
.................
ليلى ..راك تحاول تنسى عشان حياتنا تتسقم وتنعدل
ميلاد ..مش قادر وكل مانشوف مالك نحس ان ربي عاقبنا بيه هي مشت معاي بنية صافية وانا غدرت بيها
ليلى بعصبية ..كيف غدرت بيها
ميلاد..لما تكون مخطوبة ليا وانا اندير علاقة معاك مش غدر هذا المفروض لما عرفت روحي مايل ليك راه فسخت خطبتي معاها نسيت ان ذنب الولاية يرتد ولو بعد حين
ليلى ..هذا ليش انت عيل ثاني ماتبيش تجيب مني لانك مازالت تبيها
ميلاد بعصبية .. لا انا خايف من ذنبها خايف من عشمها ليش انتي ماتبيش تفهمي ان ذنبنا كبير معاها كسرنا قلبها وخاطرها وخلينا الناس تدوي عليها في كلام زايد هي اشرف من انه ينقال عليها
ليلى .. انا وقتها صغيرة وواخذتني الدنيا وزايدها كلام ماما تعبي فينا عليها لدرجة عمتنا ماخلتناش نشوفو معدنها اللي انت كل ماتحكي عليه نحس بذنب كبير
ميلاد..يعني عارفة انك ظلمتيها
ليلى بحزن ..عارفة
ميلاد ..به ليش ماحاولتيش تمشي ليها ليش ماحاولتيش تعتذري ليها هي قلبها طيب صدقيني حتسامحك لانك اختها وبنبرة حزن مش زيي انا مش حتسامحني
ليلى ..ليش متأكد انها حتسامحني
ميلاد ..لانها جنة اللي حيفرح قلبها باختها وان اختها فكرت فيها وتتمنى سمحاها جنة اللي كانت ديمة تقولي ياريت خواتي يحسن قديش انا نحبهن مش ما زي امهن مفهمتهن
ليلى ..خايفة تردني خايفة تزيد تدعي عليا بدل ماتسامحني 
ميلاد.. به احكي لزياد وصدقيني حيفرح واجد وبعدين حتى لو ردتك وزعلاتك انتي اللي درتيه فيها شوي عادي امشي مرة واثنين وعشرة واكيد حتسامح في الاخير 
ليلى ..صح نسيت زياد هو اللي يقدر ايراضيني عليها وحندير زي ماتقول لو مرة او عشرة لاني فعلا والله نبي سماحها ورضاها 
ميلاد..بجد ياليلى تبي جنة تسامحك
ليلى ..تعرف يا لودي كل مانشوف مالك تخطر عليا جنة وقديش اني ظلمتها وتخطر عليا ايام واجد قبل مانمشي نقرا في طرابلس وكنت لما تكون ماما مش قاعدة في الحوش نمشي لجنة وكانت تساعد فيا في قرايتي وقديش تكون حنونة عليا
ميلاد ..به ليش درتي فيها هكي ليش خذيتيني منها
ليلى بحزن .. في الاول كان ضغط من ماما عشان تكسر قلب جنة زي ما امها كسرت قلبها وبعدها والله وبدون مانندري لقيت روحي نحبك وفي الحب الانسان يكون اناني وانا كنت انانية لدرجة ديمة خايفة من حبك لجنة
ميلاد..وانتي مادرتي شئ يخليني ننساها
ليلى بحسرة ..يعني مازالت تحبها
ميلاد............
ليلى ..برغم حبي ليك لكن لو انفصالي عليك يرضي جنة ويخليها تسامحني انا مستعدة ننفصل عليك وبدموع وصوت باكي بس ارجوك خليلي مالك ماتاخذاش مني
ميلاد ...........
#حياة