سمرائي عذرا

الفصل الواحد والعشرين

#سمرائي_عذرا
الفصل 21
زين ..وشنو اللي خلاك تسكتي لتو طالما الموضوع ليه شهرين
زيزي بحزن مصطنع.. لاني سافرت وكنت نبي اندير عملية اجهاض لكن كلهم اجمعو ان في خطر على حياتي وانا جياتك مانبي منك شئ غير نعرف فيك بس لان في الاخير انت باته
زين وهو شارد .. به به
وطلع وعدى سيبها في مكتبه وهي تنادي عليه ولا كأنه يسمع فيها طلع مش عارف شنو يدير ومايندريش على روحه نين درس قدام البحر ونزل من السيارة منهار
زين ..يارب يارب عارف روحي غلطت وارتكبت واجد ذنوب بس يارب كيف اندير يارب يارب جنتي كيف بتتقبل الموضوع يارب دلني على الصح يارب انت اللي بيدك الحلول
*وقعد زين فترة من الوقت وهو يناشد في ربه ويبكي بحرقة خايف يخسر جنة اللي تمت روحه وسلامه وهدايته اللي من يوم ماتزوجها وهو مواظب على صلاته وقراية قرانه والتصدق والزكاة وبعد عن معظم المحرمات وبعدها فطن لروحه انه ليه وقت قاعد على البحر ولما شاف ساعته ناض بسرعة لانه اكيد جنة بتكون مشغولة عليه وبمجرد ماوصل لڤيلاتهم ركب طول لشقته حتى بدون مايسلم على بوه لقى جنة قاعدة في الصالة تستنى فيه وهي بدموعها ومنظرها خوف زين اكثر مما هو خايف من اللي بيقوله ليها
زين بلهفة.. كنك ياقلبي عليش تبكي شنو صاير
جنة بدموع ..انشغلت عليك وانت ماتردش على فونك وحتى احمد قالي طلعت من وقت خفت عليك
زين وخذاها لحضنه ..ماتخافيش ياقلبي
انا كويس مافيا شئ اهو احذاك
*وضم زين جنة ليه واجد وبقوة خوفه يهون فيه بضمه ليها لكن قرر انه يحكيلها لان تعلم من جنة اذا الكذب ينجي مرة فالصدق ينجي الف مرة
زين بجدية ..جنتي في موضوع لازم نحكيه ليك
جنة ..ان شاءالله خير
جنة
اليوم كله وانا قلبي مقبوض وهذا ليش كنت خايفة تكون صارت حاجة لزين لكن لما شفته اطمنت شوي لكن خوفي زاد لما ضمني زين ضمة جديدة عليا اول مرة نحسها ضمة كأنه خايف يفقدني ولما تكلم بجدية وقالي بنحكيلك موضوع حسيت قلبي بيوقف من الخوف لاني عارفة اللي بنسمعه حاجة واعرة
زين ..اليوم جتني زيزي وقبل ماتتعصبي اقسملك بالله مانندري عليها نين خشت عليا المكتب
جنة بهدوء خالف البركان بداخلها..وشنو تبي
زين بحزن ..تعرفي ياجنتي انا مادسيت عليك شئ من قبل ماتبقي مرتي صح
جنة ..صح
زين وهو شاد ايديها بين ايديه ودمعة خاناته ونزلت ..زيزي حامل ياجنتي
*جنة دموعها نزلن على طول وبدون ماتسئل على تفاصيل لان لو البيبي مش ولد زين ليش بتجيه زيزي اصلا خصوصا قاللها على اخر مرة رقد فيها معاها حولت جنة ايدين زين من ايديها وصبت من على الكنبة وخشت للحمام (حشاكم) وفتحت الدوش وبدبشها من الصدمة خشت تحت منه وهي شبه منهارة ان احلامها كلها انتهت سعادتها راحت منها
جنة
لكن زين يبيني انا ويحبني انا لكن شنو ذنبه البيبي يكبر بدون اب او على انه ولد حرام
*وقعدت جنة تقريبا نص ساعة تحت الدوش وهي تفكر وتبكي وخوف كبير مسيطر عليها لكن في نفس الوقت مش قادرة تزعل من زين بالعكس هي زعلانة عليه لان هو ماخانهاش لان العلاقة كانت قبل مايرتبط بيها وطلعت جنة من تحت الدوش وانفجع زين لما لقاها طالعة بدبشها المبلول لان كان خايف عليها فقعد واقف قدام الباب 
زين بخوف..جنتي انتي كويسة ليش دبشك مبلول هكي خشيتي تحت المية بدبشك ليش تو تمرضي
*وخذاها زين جيهة الدولاب وطلع ليها دبش وقعد ينشف فيها وغيرلها دبشها ولاف المنشف على شعرها وهو محتار شنو يقول لان الوضع صعب عليه هو قبلها هيا لانه يبيها هيا بس
زين ..ياقلبي والله غصب عني لكن مش عارف شنو اندير
وجاه صوت جنة تقول طالع من حفرة بكل الم ووجع
جنة ..انا نقولك شنو ادير
زين بخوف وتوتر ..اي شئ ياجنتي انديره الا انك تبعدي عليا
وخذا جنة في حضنه وهو خايف انه يفقدها او تقوله انه بتسيبه وحس بشوي اطمئنان لما لقاها اضم فيه بنفس القوة
جنة ..تزوجها يازين
زين بألم.. والله ياجنتي لو قبل مانعرفك وينصلح حالي  مع ربي في تعاملي وصلاتي كنت قلت ليها امشي ملحي واعلى مافي خيلك اركبيه ومايهمنيش شنو ادير فيه لكن تو نخاف ربي يعاقبني باقسى عقاب مع ان حتى الجنين هذا عقاب ليا ربي بيذكرني بذنبي عمري كله وكنت خايف ياجنتي انه يعاقبني فيك لكن العقاب جاء قاسي واجد
ونزلت دمعة غصبن عن زين من وجعه وهو بيتزوج وحدة ويشاركها في اسمه مع جنة وحست جنة بحاجة ساخنة على كتفها فعرفت ان زين يبكي ورفعت راس زين ليها وتمسح في دموعه بشفايفها وبهمس تحكي من الالم
جنة ..حبيبي  الله غالب وهذا اختبار لينا مع بعض تزوجها قبل مايكبر حملها ومعاش فيها كيف تترقع
زين ..انا مش داير شئ ادير هيا اللي بديره نشري شقة ليها ويجيها مصروفها وكل حاجة تبيها لعند تجيب وبعدها كل واحد يمشي في حاله وولدي او بنتي مش حيكونو اول وحدين تربو بين ام واب منفصلين
جنة ..بس هكي حرام
زين ..ماتصعبيهاش عليا ياجنتي هذا اللي نقدر انديره مستحيل نشاركها فراش او سكن او مكان يجمعني بيها مستحيل
*جنة حضنت زين وهو ضمها بقوة خايف ومعجب بصمودها قدامه وهي تعطي فيه الحل بكل قوة كان وحدة ثانية راه قلبت الدنيا عليه لكن هي وثقت فيه وبينت الثقة بتصرفها هذا ورقدو من هم التفكير ووجع الروح اللي عصف عليهم وجاء ثاني يوم ولاحظ يوسف البسمة اللي اختفت من وجه ولده وكنته
يوسف ..كنكم ان شاءالله مش متعاركين
جنة بضحكة جاهدت بيش تطلع ..بعيد السو ياعمي ربي مايجيب بينا عراك
زين ..امين يارب
يوسف ..امنا خلايقكم كنها مقلوبة هكي
زين بتردد ..ياباتي بنقول
جنة قصت عليه عارفاته محرج ..زين لازم يتزوج زيزي
يوسف بصدمة ومش مستوعب شنو سمع .. شنو من يتزوج من
جنة ..زيزي صاحبة زين قبل مايتزوجني لازم يتزوجها ياعمي
يوسف وقف بعصبية ..ليش لازم ليش ترا فهموني ليش وانت رد عليا كنك حاط راسك في الوطا ارفع راسك ورد عليا
جنة بألم ..عمي اسمعني انا هدي بالك بالله عليك
يوسف ومازال بعصبيته ..اين نهدي بالي وانا كنتي تقولي ان راجلها اللي هو ولدي لازم يتزوج شنو نفهم انا ترا فهموني صبي انت وواجهني وكلمني
زين وقف..انا يا باتي
جنة بسرعة ..زيزي حامل ياعمي
*وهي كملت كلمتها من هنا وتسمع صوت كف من هنا
يوسف ..انا انا فعلا ماعرفتش انربي حتى بعد ماقلت انعدل وحاله ماشاءالله وانا نشوف في حبك لجنة يكبر ويكبر فرحان ومش مصدق وانت هكي تجازيها  هكي تخونها
جنة وهي ضامة زين اللي حست بضعفه وان دموعه على نزول ..ياعمي والله ماخاني اللي صار قبل مايتزوجني بالله عليك اهدى زين من لما عرفني ماخاني حتى بنظرة ياعمي
*قمعز يوسف بهوان على الكرسي وهو يحس بوجع وجرت طول جنة جابت ليه دواه وقمعزت زين اللي منصدم من ردت فعل باته ماتخيلش عمره كله انه يمد ايده عليه وجنة قعدت بين نارين نار راجلها ونار عمها وهي بروحها فيها بركان بينفجر
يوسف ..به بترضي ربك وبتتزوج به للناس شنو بنقولو لاهل جنة شن نقول لزياد حامي عرضي شنو نقول شنو الغلط اللي بنتهم دارته بيش ولدي يتزوج عليها ترى قولولي 
جنة ..كل شئ ليه حل ياعمي كل شئ ليه حل غير اهدى بس
وجابت اميه لزين وشرابته
يوسف بحمق..مازال يهمك مازال ادوري فيه كاني منك من نحط عيني في عينه
زين ..يا باتي
جنة وقصت عليه وهي تبوس في راس زين .. هذا قلبي ياعمي ولو الغلط داره بعد ماتزوجني كنت درت اللي قلت ومكنتش تشوف فيا واقفة تو حذاك لكن هذا غلط زين قبل مايعرفني وربي ليه حكمة في كل شئ
يوسف..ونعم بالله
يوسف
لو يقولولي اني ننحط في موقف زي هذا نقول مستحيل وعلى قد وجعي من ولدي على قد ماواجعتني اللي واقفة قدامي وهي تبوس في راس ولدي رغم كبر ذنبه وهي واقفة معاه سد يحمي فيه والله لو ولدي دار حاجة كويسة في عمره هي جنة المرا باصلها ووقفتها مع راجلها كان وحدة ثانية ماهمتها الا نفسها ومافكرتش بلي صار قبلها او بعدها
جنة ..هديت ياعمي شوي
يوسف هز راسه بمعنى اه
جنة ..يتزوجها عادي ونحن نقولو بيجدد فراشه والشرع حلل اربعة وشخصية زين عادي يتقبلو هذا الشئ منه مع تاريخه القديم تو يقولو ماتحملش يعقل والناس حتصدق بسرعة
يوسف .. وبه زين يصدقو انه يدير هكي وانتي واهلك
جنة.. انا نقول عادي مادارش حاجة حرام
واهلي انا نخبرهم ونفهمهم اني مانبيش نطلق ولا انا اول وحدة ولا اخر وحدة ان راجلها يتزوج عليها  لكن زياد لازم نحكيله الحق مانقدرش اندس عليه ومتأكدة خوي حيدعم قراري وحيساعدني  قدام بابا
*زين وقف ونسى باته حذاه وخذاها في حضنه وطلق لعيونه انهن يبكن براحتهن من الوجع اللي حسه ومن جنته اللي تكابر وهي عيونها ينطقن بكل وجع الدنيا
بكا لاول مرة في عمره بحرقة وهي معاش قدرت تشد روحها بكت وبكت حتى هيا نار راكبة فيها بتجي وحدة تشاركها في راجلها حتى بالاسم وهي خايفة مافيش وحدة تتزوج زين وتستغنى عليه بسهولة وصبا يوسف وحضنهم الاثنين حس بي كبر وجعهم حس بندم ولده حس بنار جنة وبعد فترة هدو وجابلهم الشيف حسن عصير ليمون طازج لانه كان سامع كل اللي صار هو وعزالدين لكن يوسف وجنة وزين عارفينهم انهم محل للثقة وبعد ماشربو العصير طلع زين ومعاه جنة حطها في حوش خوها عشان تحكيله هو ومارية كل شئ وزين مشى لاحمد بيش يمشي معاه يحكي مع زيزي لانه مايبيش يشوفها بروحه
.............
زيزي بضحك ..شفتي اللي وصلت ليه
هناء ..شنو
زيزي ..اهو زين بعتلي رسالة انه بعد ساعة جايني 
هناء..صحة ليك به شنو الخطوة الثانية
زيزي.. جنة
هناء..كيف
زيزي ............
#حياة