#سمرائي_عذرا
الفصل 9
زين ..تاعب يا احمد تاعب اليوم هذا مش طبيعي بكل من بدايته
احمد..به خش يارفيقي وتو تحكيلي
زين ..نبي نرقد يا احمد
احمد باستغراب ..ترقد
زين ..اه
احمد..هي خش انت عارف مكانك قاعد زي ماهو وحنكمل شغلي برا في المربوعة
زين ..تمام بس يا احمد عدي بالله للمصحة ****** واطمن على عمك يوسف جاته جلطة
احمد بدهشة ..جلطة وكيف حاله تو وكيف انت مش معاه وجاي هنا كنك يازين
زين بحزن ..حاله باهي ومعاه زياد وعزالدين ومايبيش يشوفني وليش مايبيش يشوفني بعد ما نوض تو نحكيلك كل حاجة من البداية عدي شوفه وطمني عليه
احمد..به خش ارقد وتو نوقض امك زاهية ماتنوضكش نين تنوض بروحك
زين ..تمام
*وخش زين رقد في سريره اللي في دار احمد فهما رفقة من هما اطفال وماتفارقوش بكل وزين ينادي في ام احمد زاهية بي امي وحتى لما كبر احمد وداروله دار بروحه حطو فيه سريرين واحد لاحمد وواحد لزين لان احمد وحيد اهله على خمس بنات متزوجات كلهن الا وحدة بس مخطوبة وهنا كلهن اكبر من احمد الا المخطوبة اصغر منه
ومشى احمد للمصحة بيش يطمن على عمه يوسف وخش لعمه يوسف بعد مالبس الروب وبعد ما اطمن على عمه يوسف*
يوسف ..زين جاك يا احمد
احمد..ايه ياعمي وتاعب واجد وخش رقد
يوسف ..هذا حاله لما يبدا مهموم وقبل مايدير اي راي يهرب بالنوم ربي يهديك يا ولدي
احمد..لكن ماحكى ليا شئ بكل
يوسف.. انا نحكيلك شنو صار
اللي صار الصبح جاء شاب وجايب في ايده ظرف وقال ايسلمه يد بيد للحاج يوسف وطلعت ليه بعد مابلغني عزالدين وقالي انه مدفوع ليه فلوس من بنت بيش نسلمك الظرف هذا وانه مايعلمش البنت من ولايعلم شنو فيه الظرف وخذيت منه الظرف وعدى على حاله وطبعا فتحته وياريتني مافتحته لقيت صور لزين في وضع مايصحش يكون الا بين راجل وزوجته تخيلت كل شئ ان ولدي يكون زاني ومعرفتش روحي اني ماربيتش ولدي كويس شكلي دلعته نين نسى حق ربي علينا
احمد..ياعمي زين مش ضعيف ممكن نسى دينا لكن المغريات كانت اقوى منه خصوصا لما كان برا كان عاصم روحه ولما جاء هنا لقاه زي برا
يوسف..مش مبرر يا احمد مش مبرر
احمد بحيرة ..والحل ياعمي يوسف لامتى بتقعد زعلان على زين
يوسف .. يتزوج لانه مافيش حاجة تخليه يسيب الحرام اللي يدير فيه الا الزواج
وانا قلت ليه مستحيل انسامحه نين يحددلي عرب نمشي نخطبله بنتهم ويسيب الحرام اللي يدير فيه
احمد..عمي شوف انا نحكيلك كل حاجة بس بينا الكلام عشان تطمن على زين
*وحكى احمد ليوسف كل شئ من اول مازين كان مخطط لعند ماحس بيه انه بدا يتعلق بجنة
يوسف ..معقولة انا ربيت ولدي هكي ماساداش انه يزنى وكان يخطط انه يلعب ويخون بنت زي جنة
احمد..والله ياعمي كان في الاول وكان اصراره على جنة عناد على خاطر هي اول بنت ترفضه
يوسف ..اصلا هذا اللي يطلع من وحدة زي جنة خصوصا طالما هي اكيد عارفة تاريخه المعفن
احمد..في البداية ياعمي عناد لكن تو لا ومتأكد انه يحبها غير مازال مش متأكد من مشاعره لان كان فطنت امس وانا نهدرز معاها بكل راحة كيف كان هو يغلي
يوسف ..صح فطنت ليه وهو كل شوي ينادي فيك عشان ماتقعدش معاها نين صبيت معاه بكل واستغربت من ردت فعله
احمد..ايوه وتبي الحق ياعمي اكثر وحدة تربي زين هي جنة لانها الوحيدة اللي فكرت في زين كرجل وافعاله الغير مزبوطة مش فكرت في فلوس وشكل زين
وشكلها شخصيتها حلوة نين جذبت زين ليها
يوسف ..ان شاءالله تكون جنة من نصيبه يارب
احمد ..يارب
هي بنطلع تو انا ياعمي وبكرة نجي نطمن عليك وبنشوف زين وشنو وراه وتو انا نحطك في الصورة في كل حاجة
*وروح احمد ولقى زين مازال راقد وطبعا احمد مستحيل يوعي زين لانه مش حينوض طالما راقد مهموم نين ينوض بروحه واتصل بأميرة يطمن عليها
احمد..اهلين حبيبي كيف حالك اليوم
اميرة ..كويسة ياقلبي كيف حالك انت
احمد..مش كويس والله
اميرة ..خير يا احمد شغلتني
احمد..زين صايرتله مشكلة
اميرة ..ان شاءالله خير
احمد..متخاصم هو وبوه وبوه زعلان منه
اميرة ..غريبة زين طول عمره عنده بوه خط احمر بالله خليك معاهم يا احمد زين حيتعب واجد بزعل بوه عليه
احمد..غريبة من وين الحنية هذي قبل غير ننطق اسم زين يركبك ستين عفريت
اميرة ..ماهو اليوم اول مرة نشوفه راجل
احمد باستغراب ..تشوفيه وين شفتيه
اميرة ..كيف زين ماقالكش شنو صار معاه
احمد بتنهيدة ..لا انتي عارفة زين لما يكون مهموم يرقد ومازال مافاقش لتو وبنستناه نين ينوض وحتى زعلته مع بوه سمعتها من عمي يوسف مش زين
اميرة ..آه نسيت صح
احمد..به شنو اللي صار وشنو اللي خلاك تشوفيه راجل
اميرة ..امبدري كنت عند مارو لانها قالت لي ان جنة تاعبة فعديت لمارو نطمن على جنة خصوصا ان الصبح سيبناها مافيها شئ فنشغلت الحق وشفتها وحكتلي شنو صار معاها
*وطبعا حكت اميرة لاحمد شنو صار مع جنة وزين في الروضة بالتفصيل
احمد..خزيه هالواطي يسحاب روحه كان بيطلق اختها بتجيه تجري
اميرة..شفت تفكيره المعاق
احمد..بس والله زين طلع زي ماتوقعت وانه فعلا حب جنة
اميرة بصدمة ..شنو حب جنة
احمد..اه زين حب جنة في البداية كانت عناد لانها رفضاته وبعدها تعلق بيها
اميرة ..غريبة واحد زي زين عرف بنات اشكال والوان ويحب زي جنة
احمد..كنها جنة عشان شينة
اميرة ..لا طبعا وبعدين جنة مش شينة وهي لو جسمها يمتلى شوي تبقى تهبل مع سمار بشرتها الروعة
احمد..امنا شنو قصدك
اميرة ..جنة انسانة طيوبة وماتعرف في الدنيا شئ اكثر من شغلها ومارية وخوها زياد وباتها وزين مقطع السمكة وذيله فتحس انهم مش راكبين على بعض وبعدين وحدة كجنة تبان لزين كأنها ساذجة وماعندهاش شخصية مع ان شخصيتها قوية
احمد..ممكن من وجهة نظرك هكي ممكن وممكن انها عششت في دماغ زين عشان اول بنت ترفضه ومن كثر مايفكر كيف يكسر خشمها لانها رفضاته تحول التفكير لمشاعر ثانية
اميرة ..لو كان يصير نصيب انا نتوقع جنة تربيه وتعدل حاله المايل
احمد..حتى انا وعمي يوسف هكي نقولو
*وقعدو احمد واميرة يهدرزو على حالهم واحوالهم وعشقهم لبعض وزين مازال غارق في نومه هارب مؤقتا من همومه وجنة قاعدة تحس في روحها تاعبة من اللي صار ليها اليوم وقعدت تذكر في تصرفات زين معاها وحست باحساس غريب وزياد روح من المصحة بعد ماتأكد ان عمه يوسف تما حاله باهي وطلعوه من العناية ومرات بعد بكرة يطلع وجاء ثاني يوم وزياد حكى لمارية شنو صار لعمها يوسف بعد ما اطمن ان حاله كويس بيش ماتتعبش مارية بسببه وزعلت واجد عليه وقررت انها تمشي هي وجنة بيش يطمنو عليه واستغربت جنة انها مالقتش زين مع بوه وهي عارفة قديش زين يحب بوه
وروحو للحوش بعد ماطمنهم الدكتور ان حاله باهي وبيدروله خروج بكرة وجنة قعدت تستنى في زين اللي بيجي بعد العصر تبي تشوف شنو بيقوللها واستنت واستنت لكن للاسف زين ماجاش لانه اصلا ماناضش الا بعد المغرب*
احمد..وين يازين شكله همك كبير
زين بتنهيدة ..باتي كيف حاله
احمد ..كويس وامبدري مشيت ليه ولقيت عنده مارو وجنة وزياد وبكرة بيدروله خروج
زين ..الحمدلله الحمدلله وخبط ايده على راسه
حي نسيت
احمد..شنو نسيت
زين ..جنة قلت ليها بنجيها بعد العصر
خليني نبعث رسالة لمارية تعطيني رقم جنة
احمد..زعمك تعطيه ليك بسهولة هكي
زين ..تو نكتب ليها انها تستأذن منها وكان بعتته لي باهي كنهذا نكلم جنة على هاتف مارو
احمد..تفكير سليم
وفعلا بعث زين لمارية وشوي وجاته رسالة برقم جنة وفرح واجد انها وافقت تعطيه رقمه وبعث ليها رسالة
(عذرا سمرائي لما استطع ان آتي اليك اليوم مثلما وعدتك ولكني بشوق كبير لرؤياك وسوف آتي غدا بعد العصر إن شاءالله )
*وطبعا زين ما استناش منها رد لانه متأكد مستحيل يجيه رد منها*
احمد..نوض دوش ومابين مادوشت نكلم امي تجهزلك حاجة تاكلها بيش تحكيلي شنو صار معاك من البداية
زين ..تمام
*وخش زين يدوش واحمد عدى لامه تجهز وكال لزين اللي يادوب كلى منه زين
وبعد فترة احمد وزين يشربو في قهوتهم وحكى زين كل حاجة صارت معاه من لما مشى لجنة في الروضة وبعد اتصال زيزي ومشيه ليها لعند ماانتهى بالعراك مع بوه*
احمد..انت حبيتها يازين
زين ..ايه حبيتها حبيت لمعة عيونها حبيت ضعفها بعد ماعدى ميلاد وحبيت قوتها وهي تهزب فيه وغرت عليها منه تصدق انا غرت
غرت انها عندها ذكريات تربطها بيه وان قلبها دق ليه وولعت النار فيا لما مسك ايدها ومانقدرش انقولك قديش خفت لما قاللها انطلق اختك ونتزوجك وهكي تكوني انتقمتي منها قديش خفت انها توافق
احمد.. يااااااه يا زين جنة ادير فيك هكي
زين ..مش عارف شنو دارت فيا رفضها ليا شدني ليها او من كثر ما راقبتها وتبعتها مش عارف امتى هالقلب خاني ودق ليها وهالعقل مسح اي اتفاق بيني وبينه وانشغل بيها
احمد..به منو اللي بعتت الصور لباتك ومنو البنت اللي معاك
زين بتنهيدة ..هناء اللي معاي وطلعت مصورتني
احمد..لكن هناء شنو مصلحتها لانها هي بنت ليل ومستحيل حتفكر يوم انك تتزوجها لو هي هكي تفكر
زين ..لا لا هناء عارفه روحها لكن وراها زيزي ومتأكد منها بعد الفيلم اللي دارته امس
احمد..ماتستبعد شئ بس ليش انت متأكد انها زيزي
زين ..لان زيزي صاحبها اللي كانت راسمه عليه الزواج جاته بعثة برا وتزوج بنت عمه وسافر من حوالي يومين فتو تبي تشد فيا اكثر عشان انا الفرصة الثمينة ليها
احمد..بس ليش مشيت ليها يازين ومعاها رقدت معاها
زين بتنهيدة ..مشيت لانها وجعتني لما قالت انها مريضة وماعندها حد وماسحبتش الموضوع ينتهي هكي
احمد..لكن يا زين طالما انت عارف روحك ماتقدرش تمنع روحك على زيزي يبقى ابعد على جنة افضل لانها مش حتتمل الخيانة مرتين
زين بعصبية ..مستحيل انباعد على جنة نحس في روحي نستغنى على كل شئ الا هي وزيزي نقدر انسيبها ومستحيل نرجع ليها وبعدين انا بنحكي لجنة لو وافقت وعطتني فرصة عشان تساعدني
احمد..ان شاءالله يا زين توافق لان حاسس هي اللي تربيك
زين باستهزاء ..تربيني
احمد..اه عندك اعتراض نحس فيها قوية عكس الضعف اللي باين عليها تنسيك الطريق الماشي فيه
زين ..لا ابدا والله حتى انا نبي نسيبه مش عشان جنة او باتي حتى عشاني انا
*جنة وصلتها الرسالة واستغربت من كلامها انها بالعربية الفصحى واستغربت ان حد كيف زين يبعث رسالة بالفصحى وعجبتها الرسالة وخصوصا كلمة سمرائي*
جنة
الله محلاها الكلمة اول مرة واحد يوصف لون بشرتي بطريقة حلوة
العقل ..كنك ياجنة قلبك دق من جديد شكله
جنة ..لا لا ما دقش قلبي _ رد بالك ياقلبي ادق انت دقيت مرة وشفت شنو صار فينا رد بالك تعاودها مرة ثانية وبعدين لما بتقرر ادق بدق لزين
القلب ..وخيره زين تتمناه الف بنت
العقل.. بس مش انتي اللي يتمناك اكيد في باله حاجة وانتي بيستخدمك لتنفيذها
القلب ..وليش مايكونش انجذب ليا عشان نظافتي وطهارتي
العقل ..اضحك اضحك على روحك اللي زي زين مايهماش غير الشكل ونحن عارفين اللي فيها
جنة بصوت مسموع.. خلاص خلوني في حالي
مارية ..اسمالله الكريم كنك ياجنو انهبلتي تكلمي في روحك
جنة ..هههه لا مازال شوي عقل فاضلين
غير كنت نفكر بصوت عالي
مارية ..من بدري وانا انادي فيك وانتي مارديتيش عليا فيش كنتي سرحانة وزين خيره شنو يبي في رقمك وشنو جد عليك خلاك توافقي اني نعطيه الرقم
جنة ..عشان موقفه معاي امس مستحيل ننسى كيف باعد عليا ميلاد وكيف ربي جابه ليا في الوقت اللي خلاص حسيت روحي بنضعف قدام ميلاد
مارية ..تضعفي كيف قصدك كنتي حتوافقي ترجعيله
جنة بهزة راس ..مستحيل نفكر مجرد التفكير اني نرجعله
مارية ..ها امنا شنو قصدك بتضعفي
جنة ..نضعف لان جسمي بدا يرعش خفت ان يغمى عليا قدامه
مارية ..يعني عادي قدام زين
جنة ..المهم مش قدام ميلاد
مارية .. شنو التغيير المفاجئ جيهة زين ياجنو
جنة ..........
#حياة
أنت تقرأ
سمرائي عذرا
Fanfictionعندما يكون اختلاف بشرتنا سبب لنظرة مؤلمة او كلام جارح نسمعه ولكن الله لاينسى احد رواية باللهجة الليبية لصديقتي حياة احمد (مكتملة)
