سمرائي عذرا

الفصل الثالث عشر

الفصل13
يوسف بعصبية مزيفة..شنو تبي جاي هنا مش قلت ليك ماتورينيش وجهك
زين مقاطع بوه..الا لو جيت وقلت ليك نبي نخطب
يوسف ..ها وجبت او لا
زين ..اكيد يا باتي بس اسمعني قبل
يوسف ..احكي شنو
زين بتنهيدة..ياباتي والله اليوم اللي صارت فيه المشكلة والله كنت جاي بنقولك اني بنتزوج واني بنسيب العفن اللي اندير فيه لكن الصور اللي وصلنك خلنك تلزني بدون ماتسمع عقاب كلامي
يوسف ..لان صدمتي فيك كانت كبيرة
زين وجاء باس ايد بوه ..والله ياباتي انا عرفت غلطي حتى قبل ماتلزني وقررت اني ننظف وجنة هيا اللي تساعدني ماننرجعش للوسخ اللي اندير فيه
يوسف باستعباط ..وشنو علاقة جنة
*طبعا يوسف اتصلت بيه جنة وبلغاته بموافقتها من ايام لكن داير روحه انه مايعلم بشئ*
زين بحب ..جنة هي البنت اللي بنتزوجها هي اللي بتكون شريكة حياتي ورفيقة دربي
يوسف ..ومالقيتش الا جنة عشان تنظف بيها
زين ..والله ياباتي نبيها ومانتخيلش حياتي بلاها وتعرف ياباتي لو كانت رفضتني كنت حنجيك ونحايل عليك تسامحني وتنسى فكرة الزواج لان لو مش جنة مش حنتزوج
يوسف ..تحبها
زين باحراج ويحك في راسه..مش عارف يا باتي نبيها تكون معاي ومش مصدق روحي ان وحدة نظيفة وصافية زيها بتكون مرتي معجب بيها واجد لكن نحبها مش عارف
يوسف ..وبه شنو بدير تو
زين بفرحة ..بكرة بعد العصر بنمشو لعمي جمال
يوسف ..وبه كيف نسقت امورك
زين ..اتصلت وانا جاي بشركة تنظيف عشان الدور الفوقي بيش تجي جنة تشوفه عشان تعرف كيف تفرشه
يوسف..ليش الدور الثاني وانت عندك شقة
زين ..جنة ماتبيش الشقة قالت لانها ماتبيش تكون بعيدة عليك وفي نفس الوقت ماتبيش شقتي عشان في غيرها خشلها مع انها ماقالتهاش لكن حسيتها
يوسف..عندها حق به بيعها واشري غيرها
زين ..هي ماتبيش تخليك بروحك وانا زيها واكيد يا باتي  بنبيعها وبنغير اي حاجة ليها علاقة بتاريخي المعفن
يوسف..ربي يبارك فيها بدن بشايرها يهلن من تو
زين بتنهيدة ..لاني نبي ننظف من قلبي
يوسف ..ربي يهديك ويصلح حالك
زين ..امين يارب
يوسف ..وبه والعرس كيف نسقتو خصوصا قبل عمتك الله يرحمها هي اللي كانت ماسكة مناسباتنا
زين ..اتفقت انا وزياد
*وحكى زين لباته على شنو الاتفاق بينه وبين زياد وجنة واعجب يوسف بالكلام ولقاه انه مناسبه *
يوسف ..احسن رايي والفاتحة احجزلها صالة لان نحن ناس معروفين وهذا عرسك فواجد ناس حتجي وحيحضرو
زين ..تمام ياباتي وحنمشي لامي زاهية ونسئلها شنو اندير
يوسف ..راي سليم لكن ماتعبهاش اي حاجة تقولك عليها جيب حد يديرها مش هي او وحدة من خوات احمد لان كلهن بصغارهن ومشاغلهن واجدة ربي يعينهن
زين ..باذن الله ياباتي المهم انت راضي علي تو
يوسف ..رد بالك يازين تكون درت هذا كله عشان رضاي بس
زين ..صح ياباتي نبي رضاك اكيد لان مالياش حياة بلاك لكن درت هكي بسبب نفسي الاول حسيت روحي ظلمتها واجد وخفت من ربي يجيني الموت وانا غافل فدرت هذا كله لنفسي وعشان ربي يغفرلي ذنبي
يوسف جاء وحضن زين..راضي عليك ياولدي راضي عليك ليوم الدين بس تأكد لو درت حاجة او زعلت جنة انا اللي بنوقفلك راه نش زياد ولا جمال
زين بحب..ربي يخليك لي ياباتي
..............
زياد..والله مهووسة لكن كيف عرف
جنة ..اكيد من مارو
زياد..لكن ماعلقش على حبك ليها
جنة ..لا مقالش شئ غير لما مدها لي قالي مش حاجة غالية خاف اني مانقبلهاش منه واني نفتحها بعد مايروح
زياد..ربي يهنيكم وطالما عرف عشقك للشوكلا البيضاء معناها مهتم بيك ويبي يتقرب منك بجميع الطرق
جنة ..امين يارب
زياد.. بكرة الصبح بعد ماتروحي من الروضة عدي لحوشنا غادي عشان تجهزي الضيافة وانا حنجيبها لك تبي حاجة معينة
جنة ..جيب المتعارف عليه الا شوكلا الضيافة تو نجيبها انا
زياد..الله لو تحصلي زي بتاع عرس خواتك
جنة ..اصلا حتى انا بنجيبها وحنجيبلك منها
زياد ..تمام خليني نمشي انوض مارو ونعصرو
*وجاء ثاني يوم ومشت جنة للروضة وبعدها روحت للحوش وطبعا انصدمت لما سمعت مرت بوها هنية تحكي في الهاتف مع وحدة من خواتها *
هنية .. شفتي ياخايبة انتي وخواتك العبدة اللي ماتجي في ربع جمالكن وين ماطاحت طاحت واقفة
ملك ..نصيب يا امي
هنية ..لو كان وحدة فيكن مازالت ماتزوجت راه خذيته منها زي ماخليت ليلى تاخذ منها ميلاد
ملك..يا امي خلاص خلي جنة في حالها شنو تبي منها اخرى
هنية بعصبية ..شنو ياملك تو تميتي تحبي العبدة بنت العبدة
ملك بتنهيدة ..حرام عليك يا امي جنة شنو ذنبها ان باتي حب امها وتزوجها
هنية بصوت عالي ..ذنبها انها بنتها بنت من خذت جمال مني ومن حضني
ملك ..هي ماخذاتش منك بدلالة جبتي ليلى بعد جنة ولو خذاته منك ماكانش ليلة يبات عندها وليلة عندك بشرع ربي عدل بينك وبينها
هنية ..بت انتي انعدلي كنك ادافعي عليها
ملك ..لاني خايفة يا امي خايفة ربي ياخذ فيا وفي صغاري حق جنة منا مادرناش فيها شوي وهي ما ذنبها شئ والله كل مانقمعز مع عماد ويذكر فيا بشنو كنا انديرو في جنة ننقهر يا امي مهما انكان هي اختي
هنية ..ماتقوليش اختك
ملك ..اختي يا امي اختي وحنجي اليوم عشان نكون معاها ونساندها في فرحتها يا امي ياسرها سنين وهي في هم وحزن شنو مازال تبي منها يا امي راجعي روحك يا امي قبل ماربي ياخذ حق جنة منك باسوء عقاب
هنية ..انتي اكيد انهبلتي يا هالعبدة ساحراتك
ملك ..الله يهديك يا امي هي مع السلامة
*جنة سمعت الكلام وخصوصا كلام هنية لكن حست من ضمن الكلام ان ملك ادافع عليها وحست بفرحة في داخلها ان خواتها بعدن على بغض امهن ليها وخصوصا ان زياد قاللها ان ليلى تبي تعتذر منها لكن خايفة وهي ردت على زياد انها عادي امتى ماحبت تجي تجي وتحكي معاها ووصل لجنة تغير خواتها*
جنة ..السلام عليكم
هنية .......
جمال ..وعليكم السلام
جنة ..كيف حالك ياباتي
جمال ..بخير الحمدلله
جنة ..كيف حالك ياخالتي
هنية ..من الله بخير
جمال ..مبارك ليك بنيتي والله زين راجل كويس وعمك يوسف طيب
جنة ..الله يبارك فيك يارب
جمال ..حكلي زياد على انك ماتبيش عرس ليش يابنتي
هنية ..وفرت علينا نحن اولى بكل قرش
جمال بعصبية ..نفس المبلغ اللي دفعته لعرس خوتها حتاخذ زيه وفوقها احلى طاقم ذهب
هنية بعصبية ..عليش
جمال بهدوء ..هذي جنتي وحبيبتي وطالما هي ماتبيش عرس فزيها زي خواتها الفلوس اللي صرفنهن على اعراسهن تاخذهن جنة وادير بيهن حاجة ليها
هنية ..بس هي مش مستحقة
جمال ..وشنو بناتك كانن مستحقات
هنية ..بس
جمال قطع عليها كلامها..كلمة اخرى ياهنية حوش اهلك بابه مفتوح
هنية بصدمة ..شنو معقولة بعد العمر هذا كله هكي تقولي
جمال ..لان كيلي طفح منك وظلمك لهالبنت وفي الاخير مستخصرة فيها حقها والله ياهنية لو نسمع بس انك منكدة عليها او محرضة وحدة من بناتك عليها لعطن كل ما املك ليها بيع وشراء وتحويل فلوسي كلهن في المصرف لحسابها
*ناضت هنية بحمق وهي تسب وتعارك في سرها وتتوعد لجنة *
جنة..ليش يابابا قلت ليها هكي بعد العمر هذا
جمال بتنهيدة ..لانه بعد العمر هذا كله مانبيهاش تنكد عليك فرحتك بس تعاليلي جاي في فرحة اخرى في عيونك ياترى شنو سببها
جنة بفرحة ..ملك
جمال بغم ..كنها
جنة ..سمعتها تحكي هي وخالتي هنية وعلى حسب مافهمت من الكلام انها كانت تدافع عليا
جمال ..وهذا مفرحك
جنة بحزن..قديش صعب عليا يا بابا ان يكون عندي خوات وانا عايشة كأني وحيدة ولولا مارو راه فعلا وحيدة وحتى ليلى مكلمة زياد انها تبي تحكي معاي وبتعتذر لي
جمال ..وبتسامحيها
جنة ..مسامحتها من لما جابت مالك يا بابا
جمال ..معقولة
جنة ..اه يا بابا وتمنيت ربي يسعدها ووجعني واجد لما عرفت بمرض مالك وقديش كان خاطري انقوللها لما يقرب لسن اللي مقرر انه يدير العملية مستعدة انتبرعله لو طلعت مطابقة ليه لكن خفت تفهمني اني اندير هكي عشان ميلاد لكن لو فعلا ماحصلوش ليه متبرع حنتبرع ليه لان هو طفل ماذنبه شئ وفي الاخير وبعيد على ميلاد وليلى انا خالته
*والكلام هذا كله سمعاته ملك اللي كانت جاية تبي توقف وتساعد اختها جنة في خطبتها وتعبر ليها على اسفها بطريقة غير مباشرة وطبعا ملك جت بسرعة لان حوشها قريب من حوش اهلها وتأثرت واجد بكلام جنة وطيبتها وقديش انقهرت انها كانت تسمع في كلام امها*
جمال ..ربي يعطيك على قد نيتك يابنتي
ملك ..السلام عليكم
جمال وجنة ..وعليكم السلام
جمال ..شنو جيبك تو والله امك كلماتك عشان تجي تنكدي على اختك
ملك بحزن .. لا ياباتي انا جيت عشان نعاون جنة ونساعدها اليوم
جمال بهدوء ..ردي بالك ياملك اضايقي اختك
ملك ..لا يا باتي والله مانبي انضايقها والله جاية بنساعدها ونوقف معاها زي ماكانت هي توقف معانا ونحن مش حاسين بيها
جمال ..غريبة وشنو غيرك يابنت هنية
ملك وبدت تبكي ..عماد يا باتي
جنة بلهفة ..ضربك والله دارلك حاجة
ملك ومازالت تبكي ..لا ياجنة لا يا اختي عماد ديمة يعارك فيا علي كنا انديرو فيه ليك والايام اللي فاتن قالي انه خايف مني ولما سئلته ليش قالي اللي ماليشي خير في هله ماليشي خير في حد وانه يشوف في جنة قديش وقفاتها معانا ونحن نكافؤ فيها بالسية بسبب امي وفعلا حسيت بيه وحسيت بذنبي وجنة ماليهاش ذنب ان باتي تزوج امها
جنة وهي تحضن في ملك ..خلاص يا اختي والله مازعلت منكن لاني عارفة انكن طيبات لان مستحيل بنات جمال ومايكوننش طيبات
ملك ..والله انتي اللي طيبة
جنة ..به هي امسحي دموعك
جمال بفرحة ..ربي يحفظكن لبعض ويهدي خواتك الاخرات
ملك ..والله حتى خواتي زيي غير خايفات من ردت فعل جنة انها ماتسامحهنش وحتى انا خايفة زيهن لكن قلت انواجه خير من الهرب ونقعد نلوم روحي
جنة ..والله ماني زعلانة ولا وحدة منكن
ملك ..به هي نوضي نشوفو شنو بتجهزي ونعاونك وحتى شنو بتلبسي
لان على حسب ماقالي زياد ان حتى التلبيسة بديروها اليوم
جنة بخجل ..اه كلمني زين اليوم وقالي انه كلم زياد وباتي واتفقو ان التلبيسة تكون اليوم لان العرس ممكن بعد اسبوعين
ملك بغمزة لجنة ..مستعجل
جمال ..ربي يخليكن لبعض ونوضن هي شوفو حالكن
جنة ..خش يابابا راضي خالتي
جمال ..به تو نخش ليها
*وعدت جنة وملك وكانت فرحة جنة كبيرة مش بسبب خطوبتها بقد فرحتها انها مش بروحها وزي ماتمنت ان خواتها يكونن معاها ويجهزو معاها كل شئ خصوصا بتعب مارية من الحمل وانها بتساعد ام احمد في تجهيز الفاتحة وحتى اليوم تأسفت من جنة وانها مطرة اتجي مع عمها وزين *
ملك ..هذي الضيافة جهزناها والعشاء قال زياد بنجيبه جاهز لضيق الوقت
جنة ..ماهو قبل ماكانش في عشاء لكن بابا اصر على العشاء فقال زياد حيجيب مشاوي وبيتزا وسلاطات وفطائر شامية
ملك ..حلو وحيكون عشاء مميز
به تو شنو بتلبسي
جنة ..مازالت ماقررت مرات نفكر نلبس بدلة السروال ومرات نلبس قفطاني الاخضر مش عارفة قاعدة
ملك ..اين بدلة السروال السكرية
جنة ..اه
ملك ..لا فوتيها مش بتاعت تلبيسة قفطانك الاخضر حلو ومع شعرك الطويل حيطلع يهبل
جنة ..لا مانيش طالعة من غير حجاب
ملك ..ليش ياجنة شعرك يهبل وحيزيدك حلاوة
جنة باستغراب .. يزيدني حلاوة 
ملك ..اه ياجنة ماتصدقيش كلامنا اللي ديمة نقولو فيه واللي يقول ان الجمال بشرة بيضا بس كنهدا بيونسيه وجاي لو ماحد صنفهن من الجميلات وغير لون عيونك اللي فيهن لمعة تهبل وجسمك لو يزيد وزنه شوي تقعدي اجمل الجميلات وشعرك اللي كل وحدة منا حاسدينك عليه ولونه الطبيعي غير طوله وكثافته 
جنة بفرحة ..قديش كلامك فرحني والله
ملك ..سامحينا ياجنة والله كنا على غفلة والحمدلله ربي انار بصيرتنا ومانقدروش نحطو اللوم على امي بس حتى نحن كان عندنا عقل وطيبتك كانت واضحة وحبك لينا غير نحن اللي كنا عمي
جنة ..مسامحتكن والله وربي يهنيكن
هي عاد دوري معاي شنو نلبس
ملك ..شنو رايك لو نطلعو تو نمشو لمحل صاحب عماد عنده حاجات تهبل وطالما انتي مصرة على الحجاب عنده لبس مستور ومناسب للحجاب 
جنة ..ماهو زين مازال مش محرم لي
بس وين حنلقو محل مفتوح تو الساعة 3:30  وحنلحقو هما حيجو الساعة 6
ملك ..حنكلم عماد تو يكلم صاحبه يفتح على خاطرنا ونمشو نجو بسرعة طالما كل حاجة واتية
جنة ..به ياملك خلاص انتي اتصلي بعماد وانا حنكلم زياد
*واتصلت ملك براجلها عماد وكلم صاحبه وقاللهم بيطلع تو يفتح المحل على خاطرهن وفرح عماد واجد بان ملك ردت لعقلها خصوصا ان عماد عارف ان مرته قلبها ابيض وطيبة زي جنة غير سم امها واختها احلام هما اللي خلوها هكي تتعامل معاها واتصلت جنة بزياد اللي فرح من كلام جنة على ملك ودعى بالهدايا لباقي خواته وامه وطلعت ملك وجنة وعدن للمحل واختارت ليها ملك فستان حلو وطبعا سعادة جنة كانت اكبر بقرب اختها منها اكثر من الخطوبة بروحها وروحن بسرعة وتجهزت جنة تحت اشراف ملك اللي قررت انها ماتسيبش اختها ولو للحظة وعماد من فرحته هو اللي شد صغارهم الاثنين عشان تكون متفرغة لجنة وجاء وقت جيتهم واستقبلهم زياد وجمال وهنية اللي حلفها جمال لو حاولت تهين جنة قدامهم حيكون الشيخ اللي يعقد قِرآن جنة هو نفسه اللي حيطلقهم وبعد الترحيب وزين متوتر ويستنى في جنة تخش
مارية بهمس ..اهدى ياعم الحبيب شوي وتخش
زين بنفس الهمس..متوتر تقول انا اللي بنت مش عارف كني
مارية بضحك ..كنك يازين تقول اول مرة تتعامل مع بنت
زين ..فعلا يامارو اول مرة نتعامل مع بنت ما لفتش زين الدين يوسف نظرها ولاحاولت انها تتقرب ليه
مارية ..ربي يهنيك يا وخيي
زين ..امين
*وبعد الكلام الرسمي لطلب يد جنة لزين والموافقة طبعا خشت جنة بسفرة القهوة ووراها ملك بسفرة الحلو*
زين
متوتر واجد وفرحان في نفس الوقت ونستنى في خشتها علينا وخشت وانا مطبس راسي لكن قلبي حس بيها رفعت راسي وهي خشت من الباب رافعه سفرة القهوة في ايدها ولاشعوريا لقيت روحي واقف نملي في عيوني منها كانت لابسة قفطان طويل لونه اخضر داكن من الشيفون وضيق من منطقة الصدر ويتوسطه حزام فضي وواسع من تحت واجد وكمه واسع شوي ولابسة محرمة من الحرير باللون الاخضر فوق منه طوق بسيط ورقيق لونه فضي  واول مرة ماتكونش المحرمة مغطية نص جسمها بالعكس مرفوعة بطريقة حلوة زي الربطة التركية ومع لمسة كحل اخضر في العين ولمعة على شفايفها الله من شفايفها كان ناخذهن تو في بوسة طووووويلة 
مارية تجبد في زين ..زين قمعز حشمت بينا تقول اول مرة تشوف بنت
زين باحراج وهو يقمعز  ..شفتها فقدت السيطرة على روحي
مارية ..تخيلت كل شئ الا اللحظة هذي يازينو
زياد..تفضل القهوة يازين
زين ..شكرا
جنة ..العفو
اول ماخشيت رفعت راسي لزين اللي صبا طول لما شافني وقديش منظره يهبل وهو لابس سروال جينز ابيض وسورية بيضاء ملاصقة على جسمه بطريقة تهبل وعليها جاكيت ازرق ملكي يهبل زاد من لمعة عيونه الزرق 
*ضيفت جنة وملك القهوة والحلويات وقمعزت معاهم ولانهم عيلة وحدة فمدروش الفصل بين الصبايا والرجالة وقعدو يهدرزو ويحكو على تجهيزات العرس وطبعا جنة قمعزت بحذا مارية وتمت مارية بينها وبين زين*
زين..مارو حبيبتي صبي قمعزي احذا راجلك اكيد رايف عليك
مارية بمكر ..لا زياد حبيبي يكفيه انه يشوف فيا بعيونه
زين وهو يكز على سنونه ..اقصري الشر يامارو احسن مااندير فضيحة هنا
مارية بضحكة ..وعليش نعدي حذا راجلي ارجلي
زين ..ارجلك امش يامعفنة
كيف حالك ياجنة
جنة ..كويسة الحمدلله
زين ..فرحتلك ان ملك اختك معاك
جنة رفعت وجهها ليه باستغراب ..وانت شنو عرفك اني انا وخواتي مش تمام
زين ..زي ماعرفت انك تعشقي الشوكلا البيضاء وهو يمدللها في طرف شوكلا بيضا طلعه من جيب جاكته
جنة ..شكرا
زين..بس غريب ان في حد يحب الشوكلا البيضا
جنة ..مش عارفة ليش حبيتها ممكن من كثر حبي للحليب والله عشان كانت الارخص كانو يجيبو فيها ليا وانا صغيرة
زين ووجعه اخر كلامها..وعد مني كل ما نخش للحوش بعد الزواج نجيبلك معاي شوكلا والايام اللي قبل الزواج كل مانتلاقو انجيبلك معاي
جنة بخجل..شكرا وبه شنو تعرف اخرى عليا
زين ..تحبي اللون الكريمي والاخضر وتحبي العيال واجد وتحبي القراءة زيي وتحبي العربية الفصحى وتحبي الروايات البوليسية واجد واجاثا كريستي كاتبتك المفضلة ومن عشاق الرجل المستحيل  وحاجات اخرى 
جنة ..اكيد مارو مافيش غيرها بس الرجل المستحيل ماظنيش مارو تعرف اني نعشقه
زين ..تؤ تؤ مش مارو
جنة باستغراب ..امنا منو
زين ..مع الوقت تو تعرفي
جنة .. يستر الله
يوسف ..هي لبس خطيبتك دبلتها
زين ..حاضر
جنة بهمس .. بس
#حياة