سمرائي عذرا

الفصل العاشر

عذرا على التأخير كنت من غير نت
#سمرائي_عذرا
الفصل10
جنة .........
مارية ..كنك ساكتة
جنة ..مش عارفة شنو انرد عليك اصلا مش لاقية سبب نقوله لروحي عشان نقوله لك
مارية ..والله زين معدنه كويس لولا ضلاله الاخير من بعد مارجع برا
جنة ..قصدك انه ماكانش هكي برا ليبيا
مارية .. ايه زين كان ديمة يقول انا عاصم روحي وقلبي وجسمي لبنت وحدة بس
جنة ..غريبة
مارية ..ماغريب الا الشيطان
جنة ..اعوذ بالله منه في كل وقت
مارو قوليلي زين غير الدكتوراء في الاقتصاد شنو عنده ثاني او شنو يحب غير الزراعة 
مارية ..وشنو عرفك انه عنده دكتوراء خصوصا القليل اللي يعرف انه عنده دكتوراء بسبب تاريخه معاش حد ركز انه عنده دكتوراء وحبه للزراعة
جنة ..مرة كنت مع عمي يوسف ربي يشفيه ويعافيه ان شاءالله وكنا بنلعبو شطرنج فقالي عدي جيبيه من دار المكتب ولما خشيت بنجيبه لفتت انتباهي شهادات معلقات على الساس وكانن معظمهن لزين شهادة الدكتوراء في الاقتصاد وشهادة امتياز في دراسة في الاقتصاد وغير جوائز ركوب الخيل القفز على الحواجز والسباق الطويل والسباحة وبالنسبة للزراعة ماهو الواضح من الجنينة اللي في ڤيلتهم وغير جنينتكم اللي تهبل لما سئلتكم قلتولي ان زين اللي دارها 
مارية ..زين يحب القراءة واجد مجرد مايكمل حاجة يخش حاجة ثانية حتى تو تقريبا يحضر في درسات لحاجة حتى هي في الاقتصاد غير نسيت اسمها طويل شوي
جنة بصدمة وفم مفتوح ..نننننننعم
مارية بضحكة ..سكري فمك اللي فتحتيه تقول شارع من صدمتك
جنة ..ماهو شئ يصدم صراحة الصايع بتاع البنات اللي كل يوم من بنت لبنت قاعد يحضر في دراسة لا لا اكيد غالطة اللي كيفه كان يحضر في دراسة المفروض  رسالة كيف تجعل المرأة تنام معاك بالسرير في اربع ساعات
مارية بضحكة ..هههههه يعطيك الهنا لو يسمعك زين بس وانزيدك من الشعر بيت زين يعشق القراية ومايعرفش يرقد نين يقرا من كتاب او فون ومهما كان تاعب ان شاءالله سطرين
جنة ..لا لا لا لا اكيد شكلك ساخنة يامارو يا الوحم مأثر عليك
مارية ..ماهو انقولك زين لولا اللبز بتاعه يعتبر راجل تتمناه كل بنت فيها عقل وكل اب يفرح بنسبه ومع اللبز هذا كله تخيلي انه عنده دماغ تجاري مش عادي كبر شغلنا في وقت يعتبر صعب غير زين ايديره وهذا كله من وراء حب للقراية ومراجعاته في جميع الكتب غير انه وهو يقرا برا اشتغل في اكثر من شركة عشان ياخذ خبرة
جنة ..ماشاءالله معناها حرام عليه فيه صفات حلوة واجد وهو ظالم روحه وسمعته بالحرام هذا
مارية ..اي والله وشكل عمي عرف بلبزه
جنة ..قصدك عمي مايعرفش وهو سمعته على كل لسان
مارية ..اكيد يعرف بس يعرف زي الناس انه بتاع بنات لكن حاجة اخرى لا
جنة ..بس ليش قلتي ان عمي عرف بلبزه
مارية ..لانه زعلان منه وماخلاشي حتى في المصحة يشوفه
جنة ..اه
تصدقي ان زين بعتلي رسالة بالعربية الفصحى
مارية ..ايه لان زين مستحيل يبعث رسالة بالعامية
جنة ..ليش
مارية ..لانه يحب الفصحى واجد وكان يلقى يتكلم بيها زيك انتي
جنة ..واخيرا لقيت حد زيي
مارية..به عليش خذا رقمك وعليش بعتلك رسالة
جنة ..لانه بيعتذر ليا على موعدنا اليوم
مارية ..اه وشنو قالك
جنة ..قالي انه يعتذر على عدم حضوره اليوم وبكرة بيجي في نفس الوقت
مارية ..اشبح شنو يبيك
جنة ..الله اعلم
مارية ..تعرفي ياجنو اني مع زين في انك المفروض حكيتي لي زياد شنو دار معاك ميلاد
جنة ..لا يامارو انتي عارفة زياد حيأخذ حقي ثالث ومثلث لكن خواته على سبلة حيقاطعنه بسببي غير امه تقعد تدعي عليه وهو مايستاهل غير انه وقف في الحق وغير ذلك انتي عارفة ليلى من يوم ماتزوجت ميلاد وهي عارفة روحها شنو درات ادور لي في سبلة بحيث تثبت اني قاعدة نبي ميلاد
مارية ..صح عندك حق
جنة ..مارو خطرها قولي لزياد ان زين بكرة يبيني في موضوع وبيجيني بعد العصر
مارية .. وليش ماتقوليش ليه انتي
جنة ..لاني بنخش لداري وبنمشي شوي في رسالة الدكتوراء ومرات ياخذني النوم و بكرة بيطلع بدري فمش حنلحق انقوله
مارية بمكر ..تبيني نقوله يكون حاضر
جنة ..لا يامارو انا قد نفسي مانبيش قيم عليا وبعدين خليني نشوفه قبل شنو يبي
مارية ..عارفة ياجنو انك ماتبي قيم عليك بس حبيت ننكشك نشوف شنو في عقلك
جنة ..وشنو عرفتي
مارية ..انك ممكن تكوني انتي السبب في ان زين يتربى وينعدل حاله المايل
جنة ..ههه هذا كله فهمتيه من اني نبي نشوف زين بروحي
مارية ..جنو شكل زين يحبك لا بلاش نقول حب خليني نقول معجب
جنة بصدمة ..شنو معجب تبصري شكلك يا حبك لزياد خلاك تشوفي كل الناس حِبيبة
مارية ..لا والله نشوف ونشوف كويس وخوي نعرفه كيف خطوط كفي اصلا يوم العشاء وانتي تحكي مع احمد زين كان يغلي من الغيرة
جنة وشرقت بالمية .. يابنتي خلاص شرقت قريب متت فيها
مارية ..انتي عارفتيني نضحك عليك او بنكذب عليك عليش
جنة ..ماهو الكلام مايخشش عقل زين اللي مايصاحب غير السمحة واختها بيعجب بيا انا
مارية ..كل راجل ليه اسبابه بس اللي نعرفه واللي شفته يوم العشاء حركات زين وانتي تحكي مع احمد زي حركاته لما زمان كان يجينا زياد وهو خاطبني لان زين طبعه غيور على كل حاجة يحبها
جنة .. اكيد غالطة وهي خليني بنمشي للداري يابنتي وانا بتركيزي للكتاب اللي بنلخص منه معلومات للرسالة
*وركبت جنة لدارها او زي مانقولو هربت وهي تحس في قلبها يزيد يدق وماتبيش تصدق كلام مارية رغم انها من خاطرها انها تصدقه
جنة
قديش خاطري نصدق كلامك يامارو لكن زين يشوف لوحدة زيي حتى لما عرض عليا الزواج اكيد كان في فكرة في باله عشان يعرض عليا الزواج لكن موقفه معاي كان موقف واحد فعلا معدنه كويس
ايه ياجنة شيلي من بالك الافكار هذي واشقي برسالتك اللي تمشيه فيها تمشيه لعند ماتجيب مارو على خير
.........
احمد..انا بنرقد نحس في روحي خلاص
زين ..خوذ راحتك اما انا مازااااال
احمد..اصلا انت لو ترقد تو تبدا غريب صح
لكن شنو بدير حتى اوراق رسالتك مش معاك
زين..لا معاي حاجة ليها وقت عندي وجاء وقت اني نقراها
احمد..شنو
زين ..حاجة خاصة
احمد..خاصة عليا
زين ..طالما ماتخصنيش اكيد خاصة عليك
احمد..معناها عندك حق
هيا تصبح على خير
زين ..وانت من اهله
وطلع زين شور سيارته وفتح درجها وطلع منه المذكرة اللي طاحت من جنة في العزاء وبعد تفكير قرر انه يقراها رغم انه ماتخصاش لكن قال بالك نلقى فيها مفتاح يقدر يقنعها انها توافق على الزواج منه وبدء يقرا فيها
زين
يااااااه مازالت في البداية ومازال عمرك بس 13سنة وشفتي هذا كله امنا كان نكمل قراية شنو بنلقى
*وقعد زين يقرا ويقرا ويقرا ومشى عليه الوقت ولما وصل لخطوبتها وفرحتها ووصل لصفحات فرح اختها وخطيبها وهو يقرا فطن لروحه وعيونه يدمعو واستغرب من روحه لهدرجة اثرت فيه وابتسم لما لقاها كاتبة على الشاب اللي حن عليها وعطاها امية وقديش تمنت انها ترتمي في حضنه وتبكي وتبكي لانها مش لاقية حضن يضمها*
زين
ههه حيجي الوقت اللي تلقيني فيه سند وحضن دافي ليك ياسمرائي بس انتي توافقي تكوني معاي وتساعديني اني نلقى نفسي اللي تاهت بين مغريات الدنيا وترجعيني لربي وان شاءالله ربي يغفرلي ويسامحني يارب
*وكمل قراية وكان يتوجع مع وجعها ويتألم مع المها*
زين
الله ياسمرائي قديش الدنيا ظلماتك امك تتوفى وهي تولد فيك ومرات اب تكرهك لانك نتيجة حب بوك لامك وحتى بعد ما ماتت  امك ماقدرتش تنسى شنو ذنبك صح وقديش تعرضتي لاهانات من اقاربكم وسكتي على خاطر بوك مايديرش مشاكل معاهم والله زياد قديش محظوظة بيه مارو اللي حنين على اخته هكي من صغره قديش بيكون على مرته
*فعلا زياد كان الصدر الحنون على اخته من بعد ماجت لحوشهم وهي عمرها 12 سنة بعد وفاة جدتها ام امها اللي ربتها من لما ولدت وزياد حبها وعرف انها طيوبة واجد لان بوه كان ديمة يحكيله عليها وهو اللي قعد حامي ليها من خواته وامه لدرجة انهم مايقدروش يقولو حتى كلمة ليها طالما زياد قاعد وكان مستعد يدير اي حاجة على خاطرها لدرجة انه زعل من اخته الكبيرة وقعد شهر مايكلمش فيها على خاطر سمعها مرة بالصدفة تنادي في جنة ياعبدة وماسامحهاش نين اعتذرت من جنة قديش في خوت هكي حنان على خواتهم
.........
*وجاء ثاني يوم وعدت جنة ومارية وزياد لزيارة يوسف قبل ماتمشي جنة للروضة وبعد ما اطمنو عليه طلب يوسف من مارية انها تطلع هي وزياد ويخلو جنة معاه يبيها في موضوع
جنة ..خير ياعمي
يوسف ..ان شاءالله خير يابنتي
جنة ..تفضل
يوسف ..انتي عارفة قديش غالية عاليا انتي
جنة ..عارفة ياعمي وحتى انت عارف قديش نحبك
يوسف ..تسلمي يارب
يابنتي انا نبيك توافقي على طلب زين
جنة ..اي طلب ياعمي
يوسف..طلب زين اللي رفضتيه
جنة ..بس ياعمي
يوسف ..قبل مانسمع باقي كلامك نبي تردي عليا قبل ليش رفضتيه
جنة باحراج ..لانه صايع ومش مصدقة انه يبيني فعلا للزواج
يوسف..ليش
جنة ..شنو ليش
يوسف..ليش مش مصدقة
جنة باحراج .. لان انت عارف شكلي وشكل زين ماشاءالله غير ذلك انه ديمة يصاحب في كل بنت سمحة ولما يبي يتزوج يفكر فيا في الاخير
يوسف ..وليش ماتقوليش انه لما فكر فيك فكر في مرا تصونه صح مرا تربي صغاره احسن تربية مرا تساويه في العقل
جنة ..........
يوسف ..انا عارف يابنتي ان زين في البداية فكر فيك عشان يرضيني بس خصوصا لما عرف اني نحبك لكن بعدها مشاعره تغيرت من ناحيتك ومتأكد انه معجب بيك
جنة ......
يوسف ..على خاطري يابنتي عطيه فرصة يثبت ليك انه فعلا يبيك
جنة بعد صمت طويل ..حاضر ياعمي تو نفكر في اللي قلته ليا
يوسف ..الله يريحك يابنتي وانا متأكد لو تزوجتي ولدي حتخليه ينسى كل لبز يدير فيه
جنة ..ان شاءالله ياعمي
يوسف ..امنا اطلعي لزياد خليه يديرلي اوراق خروج
جنة ..كيف خروج ياعمي والدكتور قال تبي على الاقل يومين بيش يزيد يطمن عليك اكثر
يوسف ..انحس في روحي احسن بعد ماتكلمت معاك وعلى الاقل بنبدا نوتي لجيتك لحوشنا
جنة بخجل ..بس انا مازالت ماوفقت
يوسف بثقة ..بس انا متأكد ان بنتي جنة حتجي تنور حوشي في اقرب وقت
جنة ..نمشي نكلم زياد
*وفعلا طلعت جنة وكلمت زياد وبعد اصرار يوسف اطر الدكتور انه يكتبله خروج مع تنبيه مارية وزياد انه يزيدو يهتمو بيه ويبعدو عليه اي مشاكل وروحو وبعدها جنة مشت للروضة وبعدها روحت للحوش رغم ان مارية وزياد في حوش يوسف  ورقدت وقبل العصر بشوي حط زياد مارية في الحوش عشان تكون مع جنة لما زين يجي وبعدها في الليل قررو انهم بيعدو يباتو عند يوسف وجنة بتبات في حوش اهلها لانها اشتاقت حتى لبوها
واذن العصر وصلت جنة صلاتها ولبست فستان واسع لونه وردي هادي وعليه محرمة من نفس اللون ومخربشة برصاصي هادي ونزلت للجنينة بيش تستنى زين برا عشان ماتطرش انها تقمعز معاه بروحها في مكان مسكر وجتها مارية قمعزت حذاها
مارية ..شكلك مستعجلة على شوفته
جنة ..لا بس فضول نبي نعرف شنو يبي فيا
مارية بمكر ..آه فضول قلتيلي
جنة ..بطلي صماطه
مارية ..اهو زين جاء
زين ..السلام عليكم
مارية وجنة ..وعليكم السلام
زين..كيف حالكم اليوم
جنة ومارية ..بخير الحمدلله
مارية ..خليني نجيبلكم قهوة والله تبو حاجة ثانية
زين ..لا قهوة تمام التمام
مارية ..خلاص نجيبلكم القهوة
وعدت مارية تجهز في القهوة
جنة ..تفضل يازين خير فيش تبيني
زين .............
#حياة