الفصل8
جنة ..الكف هذا عشان سمحت لنفسك بس وفكرت اني ممكن نفكر ننتقم من اختي الكف هذا عشان فكرت اني نرجعلك بعد خيانتك ليا
ميلاد بصوت عالي ومسك يد جنة وضعط عليها بقوة ..انتي ياجنة ليا انا بس ومستحيل تكوني لغيري وكان ماجبتك لي زي الكلبة انا مانقعد ميلاد وندفعك حق الكف هذا غالي
زين
انا لعند هنا معاش قدرت نتحمل ضرباته جنة كف كان يستاهل عشرة زيه على كلامه اللي قاله لكن لم شد ايدها معاش قدرت ففتحت الباب وحولت ايده من ايد جنة وضغطت عليها بقوة وتكلمت بعصبية وخصوصا لما شفت دموع سمرائي كيف نزلو
زين ..انت بأي حق تسمح لنفسك تمد ايدك عليها ومعاها تقلل احترامك معاها يا واطي
ميلاد ..وانت شنو دخلك بينا وبأي صفة تدخل بيني وبينها
زين ..بصفة مايكون جنة اطهر من انك تمد ايدك عليها
ميلاد باستهزاء رغم الوجع اللي يحس فيه من ضغط زين على ايده وبرغم ان ميلاد جسمه حلو لكن مش قوي زي زين في الاهتمام بيه .. ويعني انت ياصايع من وحدة لوحدة بتمد ايدك عليها
زين بعصبية جدا ..صايع صح لكن عمري ماضحكت على وحدة ولاعمري كنت خوان ومخادع زيك ياكلب
وزين ضرب ميلاد براسه وبدت عركة بين زين وميلاد وكانت الغلبة مرجحة لزين و جنة في الاخير تماسكت وفضت بينهم
جنة ..امشي ياميلاد على حالك واخر مرة توقفلي في طريق راه نمشي لمرتك ونقوللها على مضايقاتك ليا مش مكفيك انت ومرتك اني نمتنع على حوش اهلي بسببكم تبي تقطع علاقتي بحوشنا بكل عدي ياميلاد وحسبي الله ونعم الوكيل فيكم
*ومشى ميلاد وهو يلعن ويهدد انه حينتقم من الكف اللي ماتوقعاش من جنة توقع منها انها ترتمي في حضنه وانه بمجرد مايقوللها انه بيطلق اختها ويتزوجها وهكي حتنتقم منها حتفرح وتوافق وخصوصا هو يشوف فيها ديمة انها ضعيفة ولانه عرف من اول ماتزوج اختها الفرق بينها وبين جنة وقديش عرف انه ظلم روحه مع وحدة مايهمها شئ الا جمالها وفكرة بس انها خذاته من جنة وكأن جنة دايرة جريمة في حقها ولولا اهتماها بولدهم المريض كان طلقها ممكن من اول ماجابت لكن شاف فيها الام الحنون لكن ماقدرش يحبها لان قلبه مع جنة
زين بحنية ..جنة انت كويسة
جنة وتمسح في دموعها وفقدت اعصابها اتكت على السيارة .. مش كويسة ماسدهمش اللي داروه فيا ماسدهمش ليالي طويلة وانا نبكي بحرقتي وانا كل مانذكرهم يوم فرحهم وهما يضحكو واختي اللي مفروض تكون حنونة عليا خذت مكاني ولبست نفس الفيلو اللي حلمت بيه معاه وسكنت في نفس الشقة اللي فرشتها مكان مكان مش كويسة وانا كل يوم اثنين مانمشيش لحوشي اهلي عشان هيا تجي تبات عند اهلها بيش ماننصدمش بيه وبيش مانشوفش قهري وضحكهم عليا قدامي مش كويسة مش كويسة موجوعة نحس بحرقة في قلبي ومعاها يبيني نرجعله بأي حق عشان الحب انا من يوم ماعرفت انه كان داير علاقة مع اختي وهو خاطبني كرهته لانه خاني كرهته لانه ضحك عليا كرهته لانه غدر بيا كرهته كرهته
زين
كان قلبي يتوجع معاها وكل دمعة كانت تنزل منها كنت نحس بيها كأنها نار تحرق فيا وعرفت انها مش مركزة لانها كانت تحكي بدون تركيز وانهيار وشوي انتبهت ليها غمضت عيونها واغمى عليها وكان مالحقتها كانت طاحت على الطريق وعلى طول رفعتها لحضني وخشيت بيها الروضة وانفجعت المرا لما شافت شكل جنة
راضية ..خيرها جنة شنو فيها
زين ..بسرعة هاتي امية او عطر نفوقها بيها
راضية ..حاضر حاضر
وجابت راضية امية وعطر ورش قطرات مية على وجه جنة وبدت تفتح عيونها بشويش فقرب منها العطر عشان يزيد يفوقها وفعلا ناضت وهيا حاطة ايدها على راسها تحس بدوخة
جنة بتعب ..شنو صارلي
زين ..اغمى عليك
ممكن وخيتي كباية امية وسكر مرات صارلها هبوط
راضية ..حاضر
زين بلهفة ..شنو تحسي تو
جنة باحراج ..كويسة بس راسي دايخ واجد
زين ..الف لاباس عليك ممكن عشان تأثرتي واجد هذا ليش راسك يوجع فيك
جنة بصوت مرهق..شكرا يازين بس انت شنو جابك انت هنا
زين وتجاهل باقي كلامها ..مافيش شكر ياجنة وافضل شئ كان اليوم تعتذري على شغلك وتكلمي زياد يجي يروح بيك خير
جنة باحراج ..ممكن يازين ماتقولش لزياد علي صار قدامك
زين ..ليش ياجنة على الاقل زياد ياخذلك حقك ومعاش ميلاد يتمادى معاك او يجي شورك
جنة ..زياد مايحملش فيا حاجة وحيتهور وايدير حاجة في ميلاد لانه مستحيل يسكت وحتكبر المشكلة وحينقطع زياد على امه وخواته وغير انهن مايصدقن اي حاجة يلصقوها فيا ويديروني اني انا اللي انلصق في روحي عليه
زين بتنهيد ..انتي حرة ياجنة وانا مستحيل نحكي حاجة انتي ماتبيش تقوليها
وجابت راضية كباية المية والسكر وشربتها لجنة
واتصلت جنة بزياد وقاللها انه جايها على طول
زين ..خليني نعدي قبل مازياد يجي ويستغرب وجودي هنا
جنة وانتبهت لزين ..صح يازين انت ليش كنت هنا
زين ..كنت نبي نحكي معاك لكن وضعك اليوم مايسمحش لكن اذا سمحتيلي نجيك في حوش خوك
جنة بعد فترة صمت ..تعال امتى ماتبي يازين
زين بفرحة ..خلاص ان شاءالله بكرة انجي بعد العصر واليوم نخليك ترتاحي
وعدى زين وجاء زياد باسرع مايكون
زياد..كنها حبيبة وخيها بعيد السو عليها
جنة وهي حاضنة خوها..ماتخاف ياقلب جنة كويسة غير دوخة شكلي عندي هبوط وخفت انسوق يغمى عليا من جديد
زياد ..به هي نرفعك تعايني
جنة ..لا مش مستحقة ياقلب جنة غير شوية كرم منك تكي لينا على مطعم سمح اتجيبلنا كبدة مشوية نتغذو بيها وانا نقوي روحي بيها ونرقد ولما نوض حنكون زي الحصان
زياد ..مع اني عندي لو كان تخليني نرفعك تعايني خير لكن اللي تبيه حبيبة وخيها هو اللي بيصير
*وعدت جنة مع خوها وخلت سيارتها قدام الروضة وزين مامشاش ودرس بعيد نين شاف سيارة زياد اطمن وكان خايف ان ميلاد يعاود يرجع ليها لكن لما تأكد ان زياد جاها
زين
شنو درتي فيا يا سمرائي زعمك فعلا زي ماقال احمد اني حبيتك مش عارف لكن اللي حسيت بيه اليوم شعور غريب ماحسيتاش مع اي وحدة اجمل منها واحلى منها احسن حاجة خليني نمشي لباتي ونحكيله وطالما جنة غالية عليه حيساعدني في اقناعها
وهو بيروح رنت عليه زيزي
زين ببرود .. ايوه
زيزي بصوت ضعيف ..زين انا مريضة وتاعبة واجد ومافيش حد معاي يرفعني للمصحة وخايفة نسوق اندير حادث
زين ..وتي روحك آني جايك
*وعدى زين بطيبة قلب لان هو في الاخير انسان لزيزي بيش يرفعها للمصحة واول مافتحت ليه الباب لابسة روب اقل مايقال عنه انه ساتر حاجة*
زين وعيونه تمشط فيها ..مش قلتي مريضة وقلت ليك وتي روحك
زيزي ..غير خش شنو بتحكي من على الباب
زين ..هي وتي روحك نخش نستناك
*وخش زين وشوي لقى زيزي تبوس فيه من كل مكان فيه*
زيزي ..انا اشتقت ليك وانت بعيد عليا وديمة ادور في عذر ماتجينيش
*وكملت ما ادير فيه وزين قاوم في البداية لكن النفس امارة بالسوء والشيطان يزين كل شئ حرام (استغفر الله العظيم واتوب اليه)
وبعد وقت قضاه زين في ملذات بالحرام وهو كاره نفسه لان ضعف قدامها روح لڤيلتهم وهو يفكر انه خلاص بينضف على خاطر نفسه الاول وبعدين على خاطر بوه وجنة وخش على بوه*
زين ..السلام عليكم
يوسف بعصبية ..منين بيجي السلام وانا عندي ولد زيك شفت فيه فرحة عمري اللي ربي مارزقنيش غيره وفرحة بيك لما كبرت وتميت راجل لكن شكل عيشتك برا بلادك نساتك دينك وعاداتك واصلك
زين ..كنك ياباتي تحكي هكي شنو درت انا
يوسف وهو يعزق في صور على وجه
يوسف ..زنا يازين عارف انك بتاع بنات وعارف انك مقضيها كل مرة مع وحدة لكن ماتخيلتش توصل لزنا يازين زنا ياولد الحاج يوسف معقولة انا ربيتك هكي
زين وهو مصدوم من الصور ..انا ياباتي
يوسف بتعب ..ولاكلمة باتي هذي معاش نبي نسمعها منك اطلع يازين ياخسارة ربايتي فيك اطلع
زين ..ياباتي اسمعني بس
يوسف ..برا معاش نبي نشوف وجهك اطلع
عزالدين ..معليش يازين اطلع تو على خاطر باتك مايتعبش
زين بكسرة ..اللي تبيه ياباتي
وطلع زين ويوسف طاح على عزالدين واطر بسرعة انه يرفعه للمصحة واتصل بزياد
في المصحة
زياد..كنه عمي يوسف ياعزالدين
عز الدين.. تعارك هو وزين وطاح عليا وتو خشوه للعناية
زياد..به اتصلت بزين
عز الدين ..لا والله جيت في بالي انت اتصلت بيك بسرعة
زياد..تو نتصل بيه انا بس عليش تعارك عمي وزين
عز الدين ..مانقدرش نحكي حاجة ماتخصنيش
زياد..صح عندك حق
واتصل زياد بزين وكان زين متوقع حاجة صايرة لجنة لكن انصدم لما عرف ان بوه تعب جاء للمصحة بسرعة
زين ..ها طمنوني على باتي شنو قال الدكتور
زياد بحزن ..بداية جلطة ولولا عز الدين لحقه بسرعة وجابه للمصحة كان لقدر الله عدى فيها
زين وطاح على ركابه ..مني انا كله بسببي انا شنو درت يارب
يارب ما اضرني فيه يارب
يارب مد في عمره يارب وانا اندير اللي يبيه يارب
زياد ..استهدى بالله يازين عمي الحمدلله حاله كويس ووجوده في العناية زيادة احتياط بس وطمنا الدكتور وقاللنا تعدى مرحلة الخطر وشوي ويفوق وتخش عليه وتطمن بروحك
زين ..يارب يارب
زياد..هي صبي وقمعز على الكرسي واستهدى بالله
وطلعت الممرضة وقالت ان يوسف فاق ويبي حد اسمه عز الدين
عز الدين ..انا
الممرضة تعال معاي نعطيك اللبس الطبي بيش تخش عليه
زين ..معليش انا ولده ونبي نشوفه
الممرضة ..هو طلب واصر على عز الدين
عز الدين ..تو نخشله يازين ونقوله انك برا
زين بتنهيدة وجع ..تمام
وخش عز الدين على يوسف حجرة العناية بعد ما لبس الروب الطبي
عزالدين ..حمدلله على سلامتك ياعمي يوسف
يوسف بصوت متعب .. الله يسلمك يارب
عز الدين ..زين وزياد برا وزين يبي يطمن عليك
يوسف ..قوله انه مايورينش وجه الا وهو مسيب الطريق اللي ماشي فيه ويحددلي عرب نمشي نخطبله بنتهم
عز الدين ..به اناديه حتى يطمن عليك وقول له انت
يوسف ..لا يا عزالدين مرضتي هذي فرصة جتني بيش زين ينفذ كان ضعفت وخليته يشوفني مش حيدير حاجة غير اني مازالت مصدوم في ربايتي كيف تطلع هكي
عزالدين ..حاضر ياعمي
وطلع عزالدين وخذا زين على تركينة بعيدة على زياد وحكى ليه شنو قاله يوسف
زين بعصبية ..كيف مايبيش يشوفني
عزالدين ..والله هكي حكى ليا واللي قاله ليا مازدت ولانقصت منه حرف
زين بوجع ..حاضر قوله حاضر
وطلع زين من المصحة بدون مايقول اي كلمة ومشى شور احمد وهو حزين وتاعب على الاخر
احمد ..كنك يازين
زين .........
#حياة
أنت تقرأ
سمرائي عذرا
Fanficعندما يكون اختلاف بشرتنا سبب لنظرة مؤلمة او كلام جارح نسمعه ولكن الله لاينسى احد رواية باللهجة الليبية لصديقتي حياة احمد (مكتملة)
