سمرائي عذرا

الفصل الخامس والعشرين.. الجزء الأول

#سمرائي_عذرا
الفصل 25 والاخير
الجزء الاول منه
احمد ..ها طمني مشت كل حاجة تمام
زين بفرحة وبصوت عالي  ..كذابة يا احمد كذابة
*على خشت يوسف عليهم لما سمع صوت زين العالي
يوسف ..منو اللي كذابة
*جاء زين يجري يحضن في باته وبفرحة يحكي على زوال الغمة من عليه
زين ..زيزي يا باتي كذابة كذابة مش حامل بكل اصلا دارت هكي عشان تتزوجني بس
يوسف واحمد..الحمدوالشكر ليك يارب
يوسف ..على الخبر هذا لدني مطلع صدقة كبيرة الحمد ليك يارب الحمد ليك يارب انك استجبت لدعاي الحمدلله
احمد..بس كيف عرفت
*وحكى ليهم زين كل شئ سمعه
احمد..صار جنة تسحابك خنتها
زين ..ايه لانها ديمة تقولي فيها تخوني نسيبك بدون نقاش
يوسف ..خلاص نستنو اول اتصال ليها بيا او بماور لانها حتى هيا تتصل بيها
زين وهو يصبي ..معناها لازم نمشي نحكي كل شئ لزياد ومارو عشان يفهمو غير ان مارو تفهم اني ماخنتش جنة لان مارو لاسئلت عليا ولادورتني ولاهمها اللي صارلي من بعد جنة عليا شكلها جنة حاكية ليها كل شئ
يوسف ..به عدي على الاقل لما تتصل بحد فينا نفهموها اللي صار
احمد..هي يازين امشي لزياد وانا بنروح نرقد من امس وانا معاك ماغمضت عين
زين بحب ..لو كان ليا اخ ماكان وقف معاي زيك في الوقت اللي دماغي مسكر انت شغلت دماغك شكرا يارفيق عمري
احمد وهو يحضن في زين ..وانت عارف اني ماعنديش خوت ولاد الا انت ياخوي
يوسف..ربي يحفظكم يارب
*وعدى زين لڤيلا زياد ومارية اللي استقبلوه بكل برود رغم تاثرهم بشكل زين كيف رايح ذابل في يومين بس وقمعز زين وضيافته مارية قهوة
زين ..عارفكم كارهين شوفتي وبالذات بعد مافهمت مارو ليش قاسية عليا هكي وماكلفتش روحها حتى اتصال تطمن عليا بيه بعد جنة ماسيبتني وهيا عارفة ان جنة روحي
مارية باستهزاء.. روحك ها ماهو واضح
زين ووجه كلامه لمارية ..انتي عارفة جنة ليش سيبتني وبدل ماتجيني وتسئليني حتى ياستي تهزبيني او تعاركيني لا صدقتي فيا وماصدقتيش لا انتي ولاجنة اني تغيرت فعلا واني مستحيل انديرها
زياد ..قصدك تعرفي وماقلتيش ليا
مارية ..مش قلت ليك في حاجة وجنة حلفتني مانقولهاش حتى ليك
زين ..بس والله العظيم ماخنتها يا مارو
مارية ..امنا شنو درت ماسدهاش انها رضت انك تتزوج عليها وتطلع في الاخير خاينها
زين ..اسمعو نحكيلكم  كل شئ
*وحكى زين كل شئ صار وزياد ومارية نصدمو ان ممكن في وحدة ترخص روحها لدرجة هذي
مارية ..سامحني ياخوي لكن تاريخك خلاني انا وجنة نصدقوها ماتلومش علينا
زياد.. الحمدلله افتكيت من هالغمة
زين ..الف الحمدلله يارب
قوليلي يا مارو جنة وين
مارية..والله مانعلم ومابتش تقولي وانها بس تتصل بيا واتصلت بيا يوم سيباتك وحكتلي كل شئ واليوم كلمتني قبل العصر لكن حاضر غير تتصل بيا بس نفهمها كل شئ
زين ..بالله عليك يامارو راه جنة روحي لو صارتلها حاجة عمري مانسامح روحي عليها
مارية..ماتخافش باذن الله بمجرد ماترن عليا انقوللها طول
..................
*وفي الوقت هذا جنة كانت الدوخة تزيد عندها وتراسل في ملك على حساب الفيس وتراقب في منشورات زين اللي اول مارجع من عند مارية وزياد نزل منشور وكتب فيه
(لو كنت اعلم ان بعدك هكذا يعذبني ماكنت تركتك دقيقة
ببعدك اشعر بان النفس ينقطع والقلب دقاته تخذلني لوكنت اعلم
لو كنت اعلم ان فراقك هكذا يؤلمني لمنعت عيوني من الرمش حتى لاتفقد النظر الى وجهك
#سمرائي_عذرا ان كنت سبب في وجعك عذرا )
قرتها جنة ونزلو دموعها
جنة
قديش اشتقت ليك وطالما انت تتعذب هكي ليش خنتني
*ومشت الايام وتما على غياب جنة اسبوع كامل وزين بيهبل وهو يراقب في فون باته ويتصل بمارية يشوف انها اتصلت بيها او لا و ذبل من وراء فراقها وخصوصا انها مازالت تسحابه خاينها وجنة اكثر منه مع الوحم والدوخة اللي باستمرار مصاحبتها لدرجة بعتت طلبية المحل مع ولد خالها ماقدرتش تمشي بروحها
وخطر على زين محل الشوكلا في نفس يوم اللي بعتت ولد خالها يسلمها فمشى ليه وسئل عليها قالوله ان الطلبية الجديدة وصلت وجابها لاول مرة شاب ركبت نار الغيرة في قلب زين
زين
زعمك منو ياجنتي اللي استعنتي بيه بعيد عليا وعلى خوك منو ياربي يارب رجعها ليا سالمة يارب
*وروح نزل منشور على الفيس وقراته جنة
( صدقيني لا اغار
هو فقط قليل من الجمر
على قليل من النار
هو بركان صغير داخلي
ولكن
صدقيني لا اغار
هو احساس بالموت قربك
هو شعور برغبة الانتحار
ولكنني ابدا لا اغار
فقط اشتعل من رأسي إلى قدمي
هل هذا يعني انني حقا اغار ...؟)
وبعد ماقراته جنة طول عرفت انه مشى للمحل وعرف ان راجل وصل الطلبية وفرحت انه مازال مهتم بيها ويغار عليها لكن شنو ادير في قلبها اللي حاسس بالغدر
ومشى اسبوع ثاني وزين كل مرة ينزل في منشورات على الفيس يحكي على معانته في بعد جنة وسكرت جنة شهر وهي غايبة عليهم زياد ومارية ويوسف وحتى احمد واميرة كلهم تعبو من التدوير عليها  واحمد اجل عرسه هو واميرة لانهم ماقدورش يفرحو واصحابهم مهمومين وزين اكثرهم ذبول ياكل دوب مايخليه ينوض بيش يدور عليها في كل مكان يدور بين المستشفيات والمصحات يمشي يقضي في وقت طويل مع يزيد ويشوف شنو ناقصه يحس فيه قطعة من جنة هذا ليش قريب منه ومايفارقش فيه معظم الاوقات وفي يوم بعد بعتت ملك رسالة لجنة وجنة للاسف مافتحتش في نفس اليوم فتحت ثاني يوم ولقت الرسالة (جنة مالك تاعب ورقدوه في المستشفى يبو دم وانتي عارفة فصيلته نادرة ياريت كيف تجي تعالي مافيش الا انتي من اول ماخش المستشفى وهما يدورو وماحصلوش ) طبعا ملك جنة ماخبرتهاش انها حامل وبمجرد ماقرت الرسالة طول طلعت بلغت نرجس انها طالعة ومشت للمستشفى اللي بمجرد ماوصلت لقت زياد ومارية وجمال وحضنوها واجد ومابوش يعاتبوها بالذات زياد اللي لما عرف السبب ببعدها عذر اخته لانه اكثر واحد يعرف ان جنة تعبت واجد من الخذلان والخيانة ضمها ليه
زياد..هكي هنت عليك ياحبيبة وخيك
جنة ببكاء ..اكثر واحد اشتقت ليه انت والله لكن خفت
زياد..تخافي وانا خوك
جنة ..والله بعدت عشان ماحد يضغط عليا
زياد وهو حاضن وجه جنة بين ايديه
زياد..المهم تو انك هنا بس ليش ذابلة هكي ياحبيبة وخيك
جنة ..بعدي عليكم خلاني من غير روح
ملك ..هي ياجنة
زياد ..نطلع نجيب عصير عشان يعوض الدم
جنة ..به
*وخشت جنة تتبرع بالدم ونست انها حامل وجابلها زياد عصير وشرباته لكنها حست بالضعف واجد وفي الوقت هذا مارية حكت ليها كل شئ وفرحت جنة ان زين ماخنهاش وانه ماغدرش بيها وقررت انه بتمشي ليه وماتعلمش ان ملك اتصلت بيه
جنة ..انا بنمشي ليه
زياد..به نوصلك
جنة ..لا بنعديله بروحي اكيد في الشركة هو
زياد..اكيد
جنة ..هي سلام
*ولما ناضت جنة حست بدوخة كبيرة لكن كابرت على روحها وصبت وطلعت وولعت سيارتها ومن حسن حظها ان المستشفى مش بعيدة واجد على شركة زين وبعد جهد جهيد قدرت توصل للشركة بسبب الدوخة في نفس الوقت زين وصل للمستشفى
زين بلهفة وفرحة..وين جنة
مارية ..مشتلك للشركة انت منو قالك
ملك ..انا اتصلت بيه خفت جنة تختفي اخرى
زين ..به انا ماشي حكيتي ليها يامارو
مارية ..اه حكيت ليها كل شئ هذا ليش هي مشت ليك
زين ..به انلحق عليها شنو سيارتها
ملك ..سيارتها سوناتا رصاصية
زين وهو يمشي ..هي سلام
*وصلت جنة للشركة وخشت وهي مرهقة جدا تسئل على زين وقالولها انه طلع جنة حست بوجع معاش قادرة تتحمل ونست انها حامل لما تبرعت بالدم طيبة قلبها وفزعتها نستها جنينها اللي مازال يتكون داخل رحمها وركبت سيارتها وحاولت تولعها لكن معاش لقت جهد تولع بيه سندت راسها على الدومان  وغمضت عيونها وفي نفس الوقت زين وصل للشركة وقالوله انها جت سئلت عليه وتو كيف طلعت طلع زين يجري وهو بيركب سيارته لفتت انتباهه وحدة راكبة في سيارة  سوناتا ومنسندة على الدومان ولما قرب منها عرف انها جنته سمرائه اللي ليه شهر ماشفهاش
زين بلهفة وحب..جنة جنتي سمرائي
جنة ودوب تفتح في عيونها..زيني
زين بخوف ..جنتي انتي كويسة
جنة بصوت واطي ..زيني تاعبة انا حامل
زين وزاد خوفه فتح باب السيارة ورفعها لسيارته وطلع بيها طول للمستشفى اللي فيها العيلة ودخلوها طول للاسعاف ومباش يسيب ايديها ولو ثانية وبعد ماكشفت عليها الدكتورة وعرفت انها تبرعت بالدم قعدت  تعارك  وركبو ليها طول تغذية ووحدة في جرت وحدة نين قدرت جنة تنوض بالشوي وتفتح عيونها
جنة بهمس ..زين
زين ..ياعيون وياقلب ويا روح زين
جنة ..انا حامل يازيني بقطعة منك
زين..واحلى خبر في حياتي سمعته بعد رجعتك ليا
جنة ..انا اسفة
زين ..عليش تتاسفي انا اللي مفروض نتأسف ان ماضيي تعبك وضرك آسف سمرائي
جنة ..وانا نتأسف عشان ماعطيتكش فرصة وتبرر وادافع على روحك
زين ..مش مهم المهم انك انتي معاي
جنة وايدها على خد زين ..بس انت ليش رايح هكي لحيتك كابرة واجد وشعرك طاول بكل
زين وحاط ايده فوق ايدها اللي على خده..كيف بنهتم بروحي وروحي بعيدة عليا انتي ماتتخيليش الشهر هذا كيف مشى عليا وبعدين انتي حالك احرف من حالي
جنة ..انا كان اللي مصبرني عليك الحمل بس
زين ..نحبك
جنة ..وانا نحبك
وخشو العيلة وجاء يوسف واحمد وعزالدين لكن طبعا احمد وعزالدين ماخشوش على جنة لانها كانت ممددة حتى رجالة خواتها ماخشوش طلعوا زياد وزين طمنوهم عليها بين اللي يحمد على سلامتها ويباركولها بالحمل وبين ضحك خواتها اللي اتهموها بالجبن عشان اول عركة عدت وسيبت راجلها واختفت بكل طبعا زياد برر غياب جنة انها حصل سوء فهم بين جنة وزين وانها ماتحملتش فهربت منه تراجع في حساباتها وبين تأسف ليلى
ليلى ..سامحيني والله لو نعلم انك حامل ماخليتك تتبرعي
جنة ..اصلا انا بروحي نسيت لاني لما جيت كان همي مالك وبس
ليلى ..ربي مايحرمني منك وشكل ربي بيعقابني بيك طول العمر
جنة ..ليش وعليش ياقلبي بيعاقبك
ليلى ..علي درته فيكـ
جنة قصت عليها..مش قلنا خلاص صفحة وسكرناها
ليلى ..تعرفي انك طلعتي المطابقة والصالحة بالتبرع لمالك
جنة بفرحة ..والله الحمد والشكر ليك يارب
ليلى ..فرحانة
جنة..اه على الاقل ياروحي تنتهي معاناة مالك مابعده
ليلى ..ربي يحفظك يارب والله لو ندعولك انا وميلاد العمر كله مستحيل نوفوك حقك
جنة ..ماتقوليش هكي ان شاءالله بعد مانولد بخير وسلامة نجهزو للعملية باذن الله وراسلو الدكتور واتفقو معاه بيش كل حاجة تكون جاهزة
ليلى ..ان شاءالله
*وطلعو كلهم بعد ما تطمنو على جنة وانا امورها تمت تمام لكن الدكتورة قالت الليلة لازم تقضيها في المستشفى عشان تطمن عليها وزين اصر مايسيبهاش فنقلها لمصحة  خاصة بيش يكون معاها وطبعا المصحة فيها الدكتورة اللي تابعتها في المستشفى وقضى زين الليلة مع جنة وثاني يوم عطوها خروج وفتح زين ملف للمتابعة فيها لجنة
ورورحو لقو الشيف حسن مجهز احلى سفرة فطور برا في الجنينة وبحذا حمام السباحة اللي عبوه من اول ماخش الصيف وفطورو هما ويوسف ومارية وزياد اللي فرحانين برجوع جنة وزوال الغمة عليهم وجنة الصغيرة معاهم
زين ..لما تولد جنة على خير يكون عمر جنة الصغيرة تسعة شهور
مارية ..اه لانها شكل جنة كانت حامل لما انا ولدت
يوسف ..ربي يسهل عليها ان شاءالله
*وطبعا جنة انحرجت من الكلام وخدودها تمو حمر ولاحظها زين
زين بصوت واطي ..حبيبي يتحشم
جنة ..عمي يوسف وانت فالق اللي هناك
زين ..والله ياجنتي فرحتي برجعتك وزوال الغمة اكبر من فرحتي بحملك
زياد..جنة ردي بالك على روحك وكان تاخذي اجازة مفتوحة من الجامعة خيرلك وحتى الروضة
جنة ..لا تو صعب لان حرام الطلبة عندهم امتحانات قريب مانقدرش نرخي بيهم وبالنسبة للروضة من لما تزوجت معاش مشيت ليها وانت عارف اصلا انا نمشي نساعد فيها بس من غير فلوس
زين ..وبه كان اغمى عليك في الجامعة شنو اندير انا خصوصا ان الدكتورة قالت مرات يغمى عليك في اوقات مش معلومة
جنة ببصارة..هو يوم في الجامعة كنهدا تعال احضر معاي
زين ............
#حياة