سمرائي عذرا

الفصل الخامس والعشرين.. الجزء الثاني

#سمرائي_عذرا
الفصل 25 والاخير
الجزء الثاني منه
زين بجدية ..وانتي تقولي فيها من بكرة اللي موعد محاضرتك حاضر معاك
جنة بصدمة ..من جدك تحكي انت
زين ..اه
مارية..معقولة بتخش للمدرج وتقمعز بتحضر محاضرة ساعة ونص او ساعتين
زين ..على خاطر نكون مطمن على جنتي حتى ثلاث ساعات وبعدين لو اغمى عليها معقولة بنرضى واحد من طلبتها يرفعها ابدا هذي جنتي انا بس
جنة باحراج..يسلم خاطرك يارب ومايحرمني منك 
يوسف..ربي يحفظكم ويخليكم لبعض
زين وجنة ..آمين
*وفعلا زين نفذ ما قال وجنة تمت تعطي في المحاضرة وهي محرجة قدام الطلبة وبعد شوي استعادت ثقتها وتمت تشرح زي قبل وفي نهاية المحاضرة حست بدوخة راسها رجعت ليها
جنة.. ان شاءالله مازال ليكم معاي محاضرتين محاضرة لاخر درس ومحاضرة للمراجعة مني ليكم على خاطر الامتحانات وللاسف وضعي الصحي مايسمحش باني نتعب اكثر فحبيت نقترح عليكم اني اليوم ناخذو المحاضرة الاخرى خصوصا ان الدكتورة امال اعتذرت على محاضرتها اليوم ونعطكيم الدرس الجديد وتقعد محاضرة المراجعة لاني ان شاءالله حنقدم على اجازة سنة كاملة
الطلبة ..الف لاباس عليك
جنة ..ماتشوفو باس ان شاءالله
شنو رايكم كنهدا انكلم الاستاذ يوسف يعطيكم المحاضرة بدالي في موعدها لاني اكيد مش حنجي الاسبوع الجاي
طالبة ..لا يا استاذة الحق انتي تشرحي احسن حتى من غير مراجعة نحن نفهمو منك عادي ناخذو استراحة ونرجعو تعطينا محاضرة
جنة ..شنو تمام متفقين
الطلبة ..ايه متفقين
جنة ..خلاص امنا بعد ساعة نتلاقو هنا في المدرج عشان ترتاحو اكثر
الطلبة ..شكرا
*وبدو الطلبة يطلعو وزين قرب من جنة
زين..هههه شكلك بتعاقبيني على خوفي عليك
جنة ..لا والله حبيبي غير بس نبي نرتاح بكل قلت نضغط على روحي اليوم عشان نرتاح بكل
زين بلهفة .. شنو تحسي في روحك تاعبة
جنة ..شوي حسيت الدوخة رجعت لي
زين ..هيا نمشو للحوش وبعدها نرجعو
جنة ..لا حبيبي مع زحمة الطريق يادوب نوصلو ونرجعو
زين..به نمشو للشركة قريبة مش بعيدة زي الحوش وانتغذو فيها وبعدها نجيبك هنا حتى انشوفو احمد شنو صار في عرسه
جنة ..هي امنا
*وطلع زين وهو محاوط جنة بكل حب وحاط ايده على كتفها بكل تملك من زحمة الطلبة خايف عليها ووصلو الشركة وتمددت جنة على الكنبة اللي في مكتب زين اللي وقض السكرتير ماحد يخش نين يستأذن لان احمد يخش عادي
زين ..سمرائي تاعبة واجد شكلك
جنة ..لا حبيبي شوي دوخة
زين..تبي حاجة نطلبلك ليمون
جنة ..ياريت حبيبي وبعدين جعانة ياقلبي
زين ..تدلل سمرائي شنو تبي تاكلي
جنة ..نبي بيتزا
زين باستغراب ..بيتزا
جنة ..اه
زين ..بس انتي ماتعدليش عليها واجد غريبة تطلبيها هيا تحديدا يعني نحس فيك لما تاكلي فيها مجاملة للي ضيفها ليك بس
جنة ..اه حتى انا مستغربة لاني من اول مانضت وانا خاطري فيها وصيت حتى عم حسن عليها وهو استغرب لكن شكله وحم حبيبي
زين ..ياقلب حبيبك احلى بيتزا تجيك
*واتصل زين وطلب البيتزا وشوي جاء احمد وبعد الاذن خش وجنة عدلت جلستها على الكنبة
احمد..اووووه السيدة جنة هنا وانا نقول الشركة منورة بالزايد
زين ..احم احم
احمد بضحك..نقولو في الحق شنو اخبار المحاضرة يازين ان شاءالله استعوبت الدرس
زين..طالما سمرائي هي اللي تشرح اكيد بنستوعب
احمد..طالب مجد
زين ..اكيد انا على ايديها تعلمت واجد ادروس تعلمت كيف نقرب لربي تعلمت كيف نصحح حياتي تعلمت كيف نكون نظيف
احمد..ترقع في الكلام قول رباتك
زين ..ربتني وافضل ترباية مش يقولو الرجال قوومون على النساء لكن انا نحس بالعكس هي اللي كانت قوامة عليا وهدتني للطريق الصح
احمد باعجاب..زين يحكي بفخر على مرا رباته ياعجائب الدنيا
زين بفخر ..ايه لما تكون سمرائي هي المرا اكيد بنحكي بفخر
احمد..ربي يهنيكم يارب
زين ..امين يارب
جنة بخجل..احم احم شكلكم انسيتو اني هنا
زين وجاء قمعز حذاها ..في حد ينسى الشمس وهي ساطعة في النهار او القمر مكتمل في الليل اكيد لا ياعمري
احمد..ياعيني ياعيني
جنة بتغير الموضوع لانها تحشمت من غزل زين ..وانت شنو صار في عرسك وياريت تسامحني بسببي تأجل
احمد..ابدا عمرك ماتقولي هكي انتي مرت خوي ومستحيل كنت حندير عرس وخوي حالته حالة ومش عارف كيف مرته حالها هذا بالنسبة ليا غير اميرة اللي معاش قدرت ادير حاجة من كثر ماكانت مشغولة عليك
جنة ..ربي يحفظكم لبعض يارب وتو حددتو موعد جديد او لا
احمد..ايه ان شاءالله بعد شهرين
زين وجنة ..ليش
احمد بضحك ..كنكم انفجعتو
جنة ..ليش حسيت الوقت واجد
زين ..انا تخيلتك الاسبوع الجاي تحدده
احمد.. انا واميرة قررنا بعد شهرين عشان جنة تكون فاتت ايام الحمل الصعبة اللي هنا اول ثلاثة شهور يعني لما تسكريهن يكون حالك احسن من تو بيش تقدري اتجهزي معانا لعرسنا
وغير ان اميرة في فترة غيابك ماقدرت تجهز شئ
جنة ..ربي يحفظكم لبعض ويحفظكم لينا يارب
احمد..امين
بس قولولي ليش جايين هنا
زين ..ياسيدي الست جنة بترجع للجامعة بتعطي محاضرة اخرى بعد اقل من ساعة فقلت هنا اقرب ترتاح فيهن ونتعذو
احمد..عليش متعبة روحك وانتي اصلا تعطي في محاضرة وحدة بس قبل
جنة ..عشان بيش نرتاح بكل نبي ناخذ اجازة لعند مانولد على خير ان شاءالله
احمد..اجازة من غير راتب
جنة .. لا رصيد اجازاتي يغطي لعند مانجيب وبعد مانجيب بتكون اجازة وضع
احمد..ان شاءالله على خير
*وجت البيتزا وكلت جنة وزين بينما احمد سيبهم عشان جنة تاخذ راحتها مع راجلها وقال انه بيتغذى في الحوش وزين استغرب واجد طريقة وكال جنة
زين ..حبيبي معقولة هذا كله من الوحم
جنة ..انا مستغربة روحي واول مرة نحس ان البيتزا تهبل
زين ..ههههههه يعني مازال ماشفت شئ هذا انتي كيف سكرتي الشهر الاول
جنة ..تفاءل خير
زين ..بدت بالبيتزا يستر الله
جنة بتكشيرة زي الاطفال..يعني شنو تقصد
زين بضحك ..ابدا ياروحي مانقصد حاجة انتي لو تطلبي اي شئ نجيبه لك
جنة ..ربي يحفظك ياقلبي
*ورجعت جنة للجامعة وزين خش معاها ووحدة من الطالبات ماقدرتش تغلب فضولها
الطالبة بصوت واطي ..استاذة جنة
جنة ..نعم
الطالبة.. معليش على التدخل بس فضولي بيقتلني ليش زوجك خاش يحضر في محاضرتك
جنة بحب ..مع اني مش ملزومة لكن نجاوبك لاني حامل وديمة تصيرلي دوخة فهو خايف عليا هذي القصة بس
الطالبة بفرح ..الف مبارك استاذة وربي يحفظه ليك تستاهلي على قد نيتك عطاك ربي راجل يخاف عليك واجد ويحبك
جنة ..الله يبارك فيك امين يارب
هيا نرجعو للجد تو
الطالبة ..حاضر
*وعطت جنة المحاضرة وكملت معاهن وخشت لمكتبها تاخذ في حاجاتها الخاصة ولما ركبت السيارة فتح زين درج السيارة ومد للجنة المذكرة
جنة ..هذي شنو ادير عندك وكيف وصلتلك
زين ..لقيته لما خبطت فيك وانتي طالعة من عزاء عمتي وطاحت شنطتك وضميتها معاك لكن طلعتي بسرعة والمذكرة قعدت في ايدي
جنة ..صار انت اللي خبطت فيك
زين ..اه ومعاها ماعبرتينيش حتى بنظره
جنة ..ماكنت نشوف في حاجة قدامي زين .. اي لاحظت لانك مارفعتيش راسك حتى لما جيت بنعطيك المذكرة ماركزتيش عليا
جنة ..تعرف هذي اول مذكرة كتبت فيها وكانت اقتراح زياد اني نفضفض  بالكتابة بالذات لما تسافر مارو كل صيف
زين بأسف..سامحيني سمرائي اني سمحت لنفسي نقراها
جنة ..عادي حبيبي والحمدلله انها كانت عندك انت وبعدين كل شئ فيها تقريبا زدت عرفته بعد زواجنا يعني ماكانش فيها اختراع ذرة
زين ..بس عانيتي واجد ياقلبي
كان وحدة مكانك ممكن دارت في روحها حاجة ملي مرت بيه
جنة بحب ..زياد السبب اني مادرتش هكي هو اللي علمني كيف نصلي بخشوع هو اللي كان يواسي فيا ويقطع اي حد انهنت عنده معاش يمشيلهم كم من مشوار ومن مناسبة سيبهن على خاطري زياد هو اللي خلاني نحب حياتي ومستحيل نفكر اندير حاجة في روحي وانا عندي سند زي وخيي قلب جنة 
زين ..يابختك بيه قريت اللي كاتبتيه كله عليه
جنة ..اتصدق لما كان عمري 12 سنة لما جيتهم مانعرف شئ لان حاجاتي الخاصة كانت تجيبلي فيهن مرت خالي بعد ماتوصي فيها جدتي ومعاش عرفت لمن نقول ولان زياد قلب جنة حس بيا زي التايهة ومش عارفة لمن نقول بالذات العنصر الانثوي في الحوش كلهن يعاملن فيا تقول مرض معدي فجابلي حاجاتي كلها من ملابس داخلية ومن الحاجات الخاصة بمرضتي وكنت حتى السوق في الاعياد وبداية كل مدرسة هو اللي يرفع فيا تصدق لو نقولك زياد هو اللي رباني ومهما اندير ليه مانوافيشي حقه
زين ..ربي يحفظه يارب ويحفظله جنة الصغيرة
جنة ..امين يارب
زين ..جنة تعرفي من اللي عطاك شيشة المية في عرس ليلى
جنة ..لا لكن انت كيف عرفت اه اكيد من المذكرة
زين ..انا ياجنة اللي عطاك الشيشة واللي تمنيتي ترتمي في حضنه
جنة باندهاش ..والله
زين ..اه ويشئ القدر مش ترتمي في حضنه بس انك تكوني مرته وشريكة حياته وحامل بطفل منه
جنة بخجل ..الحمدلله يارب
*ومشن الايام غريبة على زين بسبب وحم جنة اللي كل مرة تطلب في حاجة ومع ذلك كان فرحان ومش مصدق وطبعا جنة كانت تشارك مرة مرة في اميرة في بتاتها وملك ماانقطعنش زيارتها على اختها وديمة تطمن عليها بالفون هي وليلى واسماء وجاء اسبوع عرس اميرة وزين كان محضر مفاجاءة لجنة وشرالها فستان بيش تحضر بيه الفرح بتاع اميرة لان حفلة احمد حصلت فستان
جنة ..يهبل يازيني مش عادي مش عادي
زين ..عجبك
جنة وهي اضم فيه ..اكيد يا زيني معقولة انت تجيب حاجة مش حلوة
زين ..من اول ماشفته حسيته كانه مفصل ليك وخذاها في بوسة طويلة وبعدها لعالمهم الخاص خصوصا انه كان ممنوع عليها الثلاث الشهور اللي فاتو بسبب ضعف جنة وبعد فترة جنة تتوسد صدر زين
جنة ..نحبك
زين ..وانا نموت فيك ان شاءالله ماتعبناش البيبي
جنة ..لا
حقة زين شنو تتمنى انت بنت او ولد 
زين بحب ..مع ان اللي يجي من ربي يامحلاه اهم حاجة يكون بصحة تامة بس نتمنى بنت
جنة باستغراب ..ليش
زين ..ليش استغربتي
جنة ..لانك ولد وحيد فتخيلت تبي ولد
زين ..ولاني وحيد نبي بنت عشان البنت هي الحنية كلها ونبيها تشبهلك
جنة بحزن ..لا يازين ان شاءالله ماتشبهلي
زين ورفع راس جنة وخلى وجهها مقابل وجهه
زين..ليش ياجنة وكنك انتي
جنة ..سمرا وشكلي مش حلو
زين بحب..سمرا ياريت تطلع زي سمارك وشكلك مش حلو منين ان شاءالله بلون عيونك هذا اللي انتمنى عيالي كلهم يطلعو عيونهم كلهن زي لون عيونك واللي بجسمك الرشيق اللي لما امتلى تما مغري للفتنة والله طولك الحلو ترا قوليلي والله شعرك وسواده ونعومته 
جنة ............
زين ..سمرائي من اللي كنتي تسمعي فيه من الناس عديمة المفهومية ومرت بوك المسمومة خلوكي تفقدي الثقة في روحك وبروحك الحلوة وبقلبك اللي مافيش اطيب منه لو يرجع بيا الزمان مرة اخرى كنت حنختارك انتي ياجنتي في الدنيا
جنة ..نحبك
زين ..وانا نموت فيك
*ومشن ايام اسبوع عرس اميرة واحمد وزين مايفارقش في احمد بكل وجنة ومارية ديمة مع اميرة وحضرو حنتها وجاء يوم حفلة اميرة وجتها الكوافيرة لعندها لان زين ماباش يخليها تمشي لعندها من خوفه عليها ولبست جنة الفستان اللي جابه ليها زين وبعد ماتجهزت طلعت اتوري في زين الطلة الاخيرة قبل ماتلبس كابها
جنة ..شنو رايك
زين ...........
جنة ..ايييه علينا يازين نخاف من سكوتك
زين ..مش عارف شنو نقول الكلام تاه هو صح تخيلت القفطان يطلع عليك حلو بس مش للدرجة هذي لكن نسيت انتي اللي اكيد زدتي حليتيه
جنة بحب..ربي يحفظك لي يارب
زين
الفستان لما شفته في المحل عجبني وتخيلته عليها يهبل ولان لحفلة اميرة فخذيته بكل ثقة ولما طلعت عليا فتحت فمي سمرائي قديش طلعت بيه روعة كان الفستان بقصة الحورية طويل ولاصق على جسمها لصوق لدرجة بينت بطنها الطشة اللي دوبك باينة ومن تحت واسع شوي وكان كم وظهره عريان كله ولونه فضي يلمع وخذيت ليها معاه خراص وخاتم واسوراة  ذهب ابيض على شكل قلب جواه حبة لولي وساعة فضة وحذاء ابيض وشنطة نفس اللون والكوافيرة دارت ليها تسريحة كأن شعرها مظفور بطريقة حلوة وصلت لنص ظهرها غطاته شوي وخصلات عشوائية على وجهها ونفخة من قدام لاني ماخليتهاش تطلقه انا هكي وخايف عليها وزينت التسريحة بطوق بسيط من حبات اللولي هي من خلت الفستان تبان حلاوته ودعيت لربي يحفظها لي
جنة ..هي حبيبي ساعدني في لبست كابي
زين ..حاضر ياسمرائي الغالية وبالله عليك ارقي روحك ياقلبي ومانوصيكش رقص لا وتحريك واجد لا لانك لابسة كعب وانتي عارفة انه ممنوع عليك
جنة ..حاضر يازيني
*ومشى العرس احلى مايكون واليوم الثاني كان زفة احمد اللي طلع فوق الخيال واميرة كانها اميرة بحذاه وبعد التصوير وامور العرس كلها طلع بيها احمد لشاليه حجزه ليهم زين وبكرة بيسافرو لنفس المكان اللي سافرو ليه  هدية جنة وزين ليهم ولما وصلو للشاليه طب احمد اميرة وخش بيها وسكر الباب برجله
احمد وهو ينزل فيها ..واخيرا ياعمري
اميرة ..واخير ياروحي
احمد ..هيا غيري بيش نصلو معاش عندي صبر
اميرة بخجل ..حاضر
وبعد الصلاة والدعاء خذا احمد اميرة بحضن كبيرررررر كان متمنيه هو وحاجات واجدة
اميرة بخجل ..احمد
احمد..نعم ياعمري
اميرة ..نـ حـ بـ ك
احمد ..وانا نموت فيك ماتعلميش قديش حلمت باللحظة هذي بحضن مايقطعاش عليا حد ولا من بوسة رغم انك كنتي حلالي لكن كنت تقول نسرق فيها
اميرة ..ربي يخليك لي
احمد..تعرفي بكرة شنو عندنا
اميرة ..اكيد الصباحية
احمد..لا بنسافرو
اميرة بفرحة ..والله
احمد..اه والله جنة وزين حجزو لينا وبكرة بنمشو لنفس مكانهم اللي مشو ليه اول ماتزوجو
اميرة ..المالديف
احمد..اه مع اني والله تحشمت منهم لكن هذا زين رفيقي رغم ان معظم مصاريف العرس كلهن يعتبر تكفل بيهن كهدية ليا ومعاها هو ومرته حجزو للسفرة هذي
اميرة ..ربي يحفظهم لبعض ويحفظهم لنا
احمد..امين يارب
حبيبي بالك جعانة
اميرة ..شوي
احمد..في عشاء جاهز هي نتعشو عشان ناكل بعده احلى حلو
اميرة ببراءة..شنو احلى حلو
احمد..تو تعرفيه بعد مانتعشو
*ونخلوهم في حالهم وفي ليلتهم اللي تجمع فيها شوقهم وحبهم لبعض ونرجعو لجنة اللي حست بتعب واجد لان برغم مايخلوش فيها ادير في شئ من حواس العرس لكن حست روحها تاعبة وتحملت على روحها عشان ماتخربش على احمد واميرة فرحتهم وهما طالعين من الصالة وبعد ما اطمن زين على احمد انه وصل
جنة بتعب..زيني انا تاعبة بكل
زين بخوف ..شنو حبيبي
جنة ..نحس في روحي بنطيح من طولي
زين ..هيا نرفعك للمصحة
وبخوف رفع زين جنة للمصحة وطمناته الدكتورة انه طبيعي الوجع هذا بسبب عدم الراحة وعطتها مسكن وروح بيها وزين كان قريب يموت من الخوف عليها ولما روحو لقو يوسف يستنى فيهم وهو قالق عليهم واجد وبعد ماطمنه زين علي جنة ركبو لشقتهم  وساعدها في تغيير دبشها وتحويل مكياجها وريحها على السرير وغطاها وغير هو دبشه وخش معاها وخذاها في حضنه
ومشن الايام باهتمام زين ويوسف على جنة وهي كل يوم تحمد في ربها وتشكر فيه انه جازاها على صبرها بزوج كزين واب زوج  زي يوسف وجنة مع كبر بطنها تزداد حلاوة في نظر زين ومرت الشهور وطبعا قرر زين وجنة انهم مايعرفوش جنس البيبي يطمنو عليه بس  وجاء اليوم المنتظر في نص الليل
جنة بوجع ..زين زيييييين
زين بفجعة..جنة كنك حبيبتي
جنة بهدوء ماتبيش توتر زين ..حبيبي اضني بنولد
زين بفجعة اكبر ..شنو
جنة بعيطة من الوجع ..بببببنولد خلاص ياروحي
زين ..هيا هي نجهز بس
*ونزل زين يجري ولع السيارة بيش تسخن وحط فيها الشنطة اللي مجهزينها وركب من جديد لبس جنة ولبس هو باقصى سرعة وبلغ باته اللي لقاه نايض من هرجة زين وركبها السيارة وطلع واتصل يوسف بزياد ومارية لانهم خافو يزعلو بالذات زياد لانه يوصي ويقوللهم مهما كان الوقت بلغوني
ووصل زين ودخلوها طول ولادة وشوي وكان زياد ومارية ويوسف معاه وبعدها جاء جمال
وزياد وزين كانو اكثر وحدين خايفين ومتوترين على جنة وماقدروش يهدو ولاقدر حد يهديهم
زين ..يارب يارب طمن قلبي عليها يارب طولت يارب
زين
كل مانسمع عياطها كل مانزيد نخاف عليها وياريتني قلت للدكتورة تجيبها قيصري خير كنهذا ماتعذبتش هكي القيصرية آخرها جرح ويصح لكن عياطها هذا يشق في قلبي شق
زياد..ماتوجع قلبي على وخيتي يارب هذي مش وخيتي هذي بنتي اللي كبرت على ايديا يارب طمن قلبي وريح بالي وماتوجعني عليها يارب 
مارية ..اهدو انتو الاثنين وترتونا وانتم ماشيين جايين تو تنوض بخير
زياد..بعد الوجع اللي حسيته معاك ماتخيلتش روحي نمر بيه ثاني مش قادر حتى نقعد من خوفي عليها
مارية .. ربيـ......
وسمعو عياط البيبي وشوي طلعت عليهم الممرضة
زين وزياد ..كيف حال جنة
الممرضة ..الام بالف خير والبنوتة بصحة تامة
زين وزياد..الحمد والشكر ليك يارب
زين بفرحة ..بنية تما عندي بنية زي ماتمنيت الحمدلله الحمدلله يارب
زياد..امتى نقدرو نشوفوها
الممرضة ..شوي نغيرولها وننقلوها لجناحها
زياد..تمام
وشوي ونقلو جنة لجناحها وخشو كلهم عليها بدون مايعطو فرصة لزين هو الاول وبعد التهاني والتحميد على السلامة وبعد ماسلم عليها زياد اللي مقدرش يشد دموعه من فرحته باخته اللي يعتبر فيها كانها بنته وجنة وهي مجهدة ومتعبة
جنة ..بنتي وين
زين وهو شايلها في ايده بعد ما اذن ليها جدها يوسف في وذنها وبعد مادارت على حضنهم كلهم
زين ..هاكي ياقلبي هذي بنتنا
وساعدها على انها تسند روحها بيش تاخذها في حضنها
جنة ..بسم الله بنتنا حلوة
زين بحب ..مش انتي امها اكيد بتكون حلوة
جنة وهي تشوف لزين بنظرات حب  ..ولانك انت باتها
وطلعو الاخرين من حذاهم بعد ماسلمو عليهم كلهم اللي زادو بملك وعماد وليلى واسماء وعبدالله اللي جو بعد ما اتصلت بيهم مارية  
زين وهو يبوس في جبين جنة ..تعبتي جنتي صح
جنة ..احلى تعب وانا نولد في قطعة تكونت مني ومنك
زين ..ياقلبي انتي شنو بتسميها
جنة ..انت اللي بتسميها انت تمنيت بنت وجاتك البنت
زين وهو شايل بنته بين ايديه يحط فيها في سريرها ..تمام حنسميها لما تفتح عيونها
جنة باستغراب ..ليش 
زين ..تو تعرفي بعدين
وعدل ليها السرير ونزله وركب حذاها وخذاها في حضنه
زين ..جنتي اكيد تاعبة هي ارقدي
جنة وهي تسكر في عيونها..تاعبة حبيبـ....
طول زين وهو يتفرج عليها وقديش فرحان انه تما اب وجنته هي امها ورجع بتاريخ حياته كيف كان وكيف اصبح وكيف تغيرت حياته للاحسن بسبب وجود جنة في حياته وخذاه النوم وهو حاضن جنة وعيونه على بنته 
................................
ميلاد..درت زي ما قالت جنة وعطيت لروحي ولي ليلى فرصة لحياتنا صح حياتنا تمت احلى واهدى بدل الحرب اللي كنا عايشينها لكن قدرت ننسى جنة لا واني ما اندمتش على اني ضيعتها من ايدي نقعد كذاب
ليلى ..حياتي تمت مع ميلاد احسن واحلى حسسني باهتمامه واحترامه ليا تغيرت نظرت الاتهام في عيونه شوري وجنة اختي لو عمري كله وانا نعتذر منها مانقدر نوفي حاجة ملي دراته ليا وكيف ربي عاقبني بولدي اللي في الاخير مافيش حد طلع مطابق معاه الا جنة وكل مانشوف فيها سعيدة مع زين كل مانحس براحة
ملك ..رجعت جنة لينا واكتشافنا لحملها قديش فرحت ليها وقديش فرحتي كانت كبيرة اني كنت جزء منها وانها استعانت بي والوقت اللي كانت منقطعة فيه على الكل كانت تتواصل معاي وامي ان شاءالله ربي يهديها ويصلح حالها مابتش تتغير حتى بعد ما اكتشفو عندها كتلة في الثدي وابصر شنو تتطلع وخذو منها عينة بيش يعرفو شنو هيا   ومع ذلك مازالت ما لانت من جيهة جنة
زيزي.. درت كل شئ بيش نباعد بين زين ومرته اللي فضلها عليا ومش عارفة ليش هي لكن اكتشفت في الاخير اني انا السبب انا اللي سلمت نفسي لشيطاني ومالقيتش من ينصحني نين وصلت وبسبب لبزي لمرض الايدز وهذا كان اكبر عقاب ليا وممكن عشمت فيا جنة مشت معاي بنية طيبة لما عرفت اني حامل وحتى لما عرفت اني كذابة واني كنت نبي نخرب حياتها تلاقيت انا وياها ومعاها زين ماوجهتش لي ولا كلمة وحسيت فعلا زين خير مني على الاقل زين كان صايع بس تاب وانعدل حاله واجد من بعد زواجه بجنة وانا بعدت على ربي حتى بعد ما هزبني زين لما اكتشف كذبي عليه عرفت غلطي بس بعد فوات الاوان 
مارية .. يقولو اعظم الهدايا تجيك على هيئة بشر وانا ربي عطاها لي جنة احن واحسن صديقة واخت ماجابتهاش امي وتكمل علاقتي بيها بخوها اللي هو شريك حياتي واب جنتي الصغيرة ربي يحفظهم لي
زياد..لحظة اللي شفت فيها جنة وهي شايلة بنتها بين ايديها اللحظة هذي حسيت فعلا ان حبيبة وخيها خذت نصيبها الحلو من الدنيا لان مافيش احلى من زوج يحبك وطفل منه بين ايديك انا هكي راضي ومعاش نطلب في شئ من ربي الا يدوم عليا وعلى حبيبة وخيها السعادة طول العمر
....................
جاء ثاني يوم وزين بنته في حضنه وفرحان بيها واجد وبعدها فتحتت عيونها
زين بحب..عسل
جنة ..شنو
زين ..بنسميها عسل
عسل زين الدين يوسف
جنة ..حلو الاسم بس ليش
زين بحب ..لون عيونها زي لون عيونك تمنيت من ربي وحققلي امنيتي
جنة ..الحمدلله
زين وهو حاضن بنته ومرته ..الف الحمدلله
انتهت
مافيش بنت شينة ولابنت سمحة في بنت تهتم بروحها ونفسيتها رايقة وفي بنت ماتهتمش بروحها وظروفها صعبة وفي بنت سمحة وجميلة بقلبها لدرجة مهما كان شكل وجهها ماتحسش بيه وفي اللي شكلها جميل لكن حقودة او حسودة او مغرورة او مافيش عقل بكل مافيش انسان كامل ومافيش انسان سئ بالمجمل ولا انسان جيد بالمجمل
#حياة