سمرائي عذرا

الفصل الثالث

#سمرائي_عذرا
الفصل 3
احمد.. شنووووو شنو تقول انت وفايزة اللي انت راقد معاها وانا توقعت انك معجب بيها
زين .. يعني هيا اول وحدة ومن قال اني معجب بيها
احمد.. زين انت شنو تقول
زين ..اسمعني بس وانت تفهم كل شئ
احمد..هيا انا نسمع
زين .. نحكيلك على زيزي قبل
زيزي هذي هيا اللي تسحاب روحها هيا اللي طيحتني وانا مابيتش نخليها تفهم عكس هكي وحتى لما كانت تشوفني مع غيرها كانت تقولي خوذ راحتك المهم في الاخير انت لي تسحاب روحها انها هكي بتضحك عليا لانها لو كانت تحبني صح كانت مستحيل ترضى اني نصاحب غيرها ومعاها عارفة وواثقة اني نرقد معاهن
احمد..اذا ماتحبكش عليش امنا قاعدة معاك برغم الوسخ اللي ادير فيه
زين ..لانها تبي شهرة زين الدين يوسف  وفلوسه وعزه
احمد باستغراب ..بس هيا مش فقيرة حالتها المادية ممتازة
زين .. بس مش زي حالتنا وشهرتنا وهيا انسانة مادية ومغرورة بكل حتى الهدايا هيا اللي تطلب فيهن مني تخيل المهم وهذا كله عادي لكن لما رقدت معاها ماكانتش بكر وتسحاب روحها ضحكت عليا وتعرف والله ورغم وساخاتي  لو كنت انا الاول اللي قربها وهيا سلمت روحها ليا عشان تحبني بس كنت مستحيل انتخلى عليها لكن انا مش اول واحد قربها وحتى قبل مانرقد معاها قلت ليها اني مش بتاع زواج وكانت موافقة وانا عمري ماغصبت وحدة انها ترقد معاي كلهن برضاهن وفي الاخير مستحيل نتزوج وحدة سلمت روحها لحد قبلي
احمد.. وبه كيف بتتزوج الشينة وانت زين الدين يوسف الجمال والمال والشخصية
زين.. اصلا وحدة زيها حتحمد ربها وتشكره ان واحد زيي فكر يتزوجها وبعد مانتزوجها هيا تقعد في الحوش مع باتي وانا ناخذ راحتي ونصيع بمزاجي وكل مانجيها ترضى بيا لانها مستحيل تفكر في الطلاق
احمد.. وبه عليش بتتزوجها اصلا ماهو انت عايش حياتك
زين..عشان باتي
احمد..وكنه عمي يوسف
زين.. باتي ديمة يقولي كان تبيني راضي عليك اتزوج وانت عارف اني عند باتي ونوقف يعني نبي رضا باتي وفي نفس الوقت مانتقيدش بزواج يكتفني
احمد..يستر الله من افكارك لكن لو دورت اكيد لقيت غير الشينة اللي تحكي عليها
زين.. هو انا شفتها خطف مازالت ماتأكدت من ملامحها مزبوط
احمد..كان تطلع الشينة اللي شفتها اليوم معناها مش شينة بكل
زين بمكر..وانت كنك علقت معاها
احمد.. تعرف لون عيونها رغم انهن صغار لكن سبحان الله لونها زي لون العسل الداكن وقريب للون البندق ماتفهم شئ فيهن سحر غريب
زين ..شوقتني انشوفها
احمد..خسارة روحت قبل ماتجي انت بشوي
..........
عدت جنة لحوش خوها زياد ودورت على مذكرتها مالقتهاش وعدت للجامعة في مكتبها مالقتهاش وحست بالحزن لانها مالقتهاش
............
خلوني انعرفكم بابطال القصة 
زين الدين يوسف
عمره 27 شاب جميل وشخصيته حلوة وعيونه زرقاء وجسم رياضي وبشرة قمحية فاتحة موصفات تتمناها كل بنت غير انه ذكي وحالته المادية عالية  وماعنداش اخوة الا بنت عمه مارية وهي اخته في الرضاعة  وماعنداش الا باته واهم حاجة عنده ومايحبش يزعله وعيبه صايع وبتاع بنات
جنة جمال
عمرها 25 سنة معيدة في الجامعة ومشرفة في حضانة وتحب اعمال الخير وفي الشكل بمقياس الجمال تعتبر عادية لكن من يقترب منها واجد يكتشف ان فيها صفات جميلة لها عيون بلون البندق الساحر رغم صغر حجمهن وباقي الصفات خلوهن تعرفوهن لقدام
لها  اخ واحد زياد واربع اخوات احلام واسماء وملك وليلى وكلهم خوتها من بوها وهي من مرا ثانية امها ماتت وهي تولد فيها وربتها جدتها لعند تما عمرها 12 سنة وبعدها ماتت وجت عاشت عند بوها مع مرته وخوتها ولان امها كان بوها يحبها واجد فلما جت جنة سماها هو عشان تكون جنته وهي طيوبة واخلاقها عالية جدا مش ملتزمة لكن على الاقل محافظة على دينها وصلاتها وقراءة القرآن وهادية بطباعها ودائما تحسها مكسورة ولولا وقوف خوها وباتها معاها كنهدا راه حياتها اسوء مايكون خصوصا انها قليلة الجمال بين اربع اخوات واخ اقل مايقال عنهن انهن ملكات جمال وكانت مخطوبة وفسخت الخطوبة قبل الفرح بشهر وحتعرفو السبب لقدام
احمد عادل
عمره 27 الصديق المقرب لزين الدين وحالته المادية زي زين وغير انه شخص يتمتع بصفات حلوة وشكل متناسق وشخصية تعتبر جادة واجد وخاطب اميرة رمزي ويحبها قد الدنيا ورغم انه صديق زين الا انه بعيد بعد التام عن علاقات زين واميرة خطيبته تكره زين لانها ديمة تخاف انه ياخذ احمد لطريقه لكن مجبرة تتقبله لان احمد مستحيل يبعد على صديق عمره من ايام الطفولة
اميرة رمزي
عمرها 24 سنة جميلة الصفات جسم حلو ومتناسق وعيون خضرا وبشرة بيضاء وقصيرة شوي بالذات لاحمد عادل خطيبها ومرحة ودمها خفيف لكن ماتحبش زين لانها ماتحبش كثرت علاقاته بالبنات وعندها اختين واخ متزوجين وعندهم صغار وهي تعتبر اصغر وحدة في عيلتها
زياد جمال
اخ جنة و عمره 31 سنة شخصية قوية وملامح جذابة قمحي البشرة وطويل وجسم حلو مهتم بيه وشعر ناعم وطويل وحنون واجد على اخته لدرجة ديمة يقولولها حبيبة وخيك وزوج مارية سيف وتزوجها عن علاقة حب ماطولتش وتزوجها من ثلاث سنوات لكن هذا وين ربي رزقهم وحملت مارية  
مارية سيف
عمرها 25 سنة عيون زرقاء وجسم رشيق وبشرة بيضاء وشعر كيرلي وطويل زي ميريام فارس وطولها يعتبر معقول وزوجة زياد جمال وحامل  ووحيدة اهلها لان امها تعبت واجد عند ولادتها وحولو ليها الرحم  واخت زين الدين في الرضاعة لانها امها لما جابتها تعبت فرضعت مع زين الدين قبل ماتفطمه امه بشوي 
فايزة خالد
عمرها 24 سنة جميلة جدا ولا عارضات الازياء في شكلها شعر اشقر اللون وعيون عسلية فاتحة وجسم متناسق بجميع تفاصيله وماديتها ممتازة وانانية ومغرورة جدا وغير محجبة وعايشة حياتها زي ماتبي وكيف ماتبي امها وبوها منفصلين وكل واحد فيهم متزوج وهي مقضيتها بينهم ومرات تقعد بروحها في شقة هي شاريتها وتقضي فيها وقتها هي وصاحبتها 
................
مشن ايام العزاء وتمت مارية مستقرة في حوشها وتعاون فيها جنة وديمة معاها لان مارية جسمها ضعيف بسبب الحمل والدكتور قال لازم الاهتمام بيها وماتبذلش مجهود خصوصا الثلاث الشهور الاولى اللي مشى منهن شهرين على خير بعد ماتروح من محاضرتها اللي تعطي فيها للجامعة وباقي الايام تقضي فيهن في حضانة وروضة اطفال لانها تعشق اي شئ يتعلق بالاطفال وحتى لما زياد بلغها بحمل مارية فرحت واجد
جنة ..حبيبتي مارو بنطلع انا بناخذ يزيد وبنمشي نرفعه للسوق بناخذله دبش وحاجات المدرسة
مارية ..طريق السلامة حبيبة وربي يعطيك على قد نيتك يارب
جنة ..امين يارب ولو جاك حد رني عليا نجيك طول
مارية ..باذن الله
*وطلعت جنة وهيا طالعة كان زين جاي لمارية ولما شاف سيارتها عرفها
زين
هذي طالعة من عند مارية الصبح شنو بايتة عندها بس مارية ماعندهاش صديقات يباتن عندها الا جنة صاحبتها زعمك هذي هي صديقة مارية  اللي من وانا صغير ماشفتها بس مانتخيلهاش شينة هكي خليني نمشي وراها بالك نعرف وين تسكن
ومشى زين وراء جنة اللي مشت لحوش عمتها عزيزة وشافها لما خذت عيل صغير معاها وقرر يشوف شنو بدير ووين بتعدي وطلعت جنة للسوق وخذت حاجات ليزيد وبعدها قررت انها تغذيه في مطعم وفعلا تغذت هيا وياه وهي تعامل فيه بكل حب ورحمة فهو يتيم لاحول ولاقوة له في الدنيا وزين مازال يراقب فيها ومستغرب
زين
زعمك هذا ولدها بس فرق السماء على الارض بينها وبينه وكان هذا ولدها وين بوه خليني وراها نين نعرف عليها كل شئ وحنسئل عليها مارية ولازم تجاوبني
وكملت جنة الغذاء وطلعت هي ويزيد ومازال زين وراها وبعدها رجعت يزيد لحوشه وروحت لحوش خوها زياد وهي درست ودرس زين وراها وهو يحاول يوقفها لكن سبقاته بسرعة لانها شافته وهو ينزل من السيارة اللي ماركزتش عليها 
مارية ..اسمالله الرحمن الرحيم كنك خاشة تجري
جنة ..زين ولد عمك وراي مانبيش نتلاقى انا وياه
مارية ..هههه لو يسمعك زين تجيه جلطة ان في بنت على وجه الارض ماتبيش تتعرف عليه
جنة ..بالله فكيني منه هالصايع
مارية ..خليني نشوفه ونجيك
جنة ..تمام مابين ماجهزت ليك العذاء اكيد قاعدة من غير غذاء تستني في قلب جنة قريب يجي
مارية ..اكيد ونقدر انا ناكل وحبيبي مش قاعد معاي مع اني ناكل معاك عادي لانك حبيبته وهو قلبك
*وطلعت مارية لزين
مارية ..كنك ماخشيت قاعد واقف برا
زين ..مارو بنسئلك ولازم تردي عليا
مارية ..غير قول السلام
زين ..السلام عليكم
مارية ..وعليك السلام
ان شاءالله خير يازين عمي فيه حاجة 
زين بجدية .. عمك كويس يامارو الحمدلله بس بنسئلك منو اللي خشت تو للحوش
مارية ..وعليش تسئل يا زينو ديمة نقولك خليك بعيد عليها
زين باستغراب ..قصدك هذي جنة صاحبتك واخت زياد
مارية ..ايه بس عليش تسئل
زين ..حنقولك بس مش تو
مارية.. شنو تبي منها
زين ..اللي نبيه منها حتعرفيها قريب بس تو جاوبيني على سؤالي هي مرتبطة مخطوبة او متزوجة
مارية ..زين باعد عليها
زين بجدية ..ردي علي يا مارو
مارية .. 
#حياة