سمرائي عذرا

الفصل الخامس عشر

#سمرائي_عذرا
الفصل 15
زين .. كيف حالك سمرائي
جنة بصوت واطي ومتوتر ..الحمدلله بخير كيف حالك انت
زين ..بالف خير الحمدلله
سمرائي ماتخافيش انا عند وعدي ليك
جنة بهدوء..شكرا
*ووصلو جنة وزين ودخلها لصالة الڤيلا وحولت مارية كاب جنة ورفع زين الطرحة اللي قعد مصدوم *
مارية ..زينو كنك
جنة بتوتر ..زين كنك
زين ..بسم الله ماشاءالله اقسم بالله اللي قال ان الجمال يخص البيضات يبقى حمار وام الحمارواب الحمار (حشاكم)
*وطبس على جبين جنة وباسها بوسة هادية وطويلة شوي وهو يقول *
زين ..الحمد والشكر ليك يارب على هالنعمة اللي انعمتها عليا
جنة بتوتر ..شكرا ليك انت  بسبب السعادة اللي حاسة بيها
*مدت مارية لزين علبة الذهب ولبسها ليها وكان طقم حلو وجميل*
زين ..هذا طقم العرس وباقي ذهبك عند مارية لكن هديتي تو نعطيها لك بعدين
جنة ..انا ماطلبتش حاجة
زين ..لانك ماطلبتيش لو نطول نجوم السماء كنت جبت ليك
*وبعدها غيرو الدبل وقمعزها وبعدها جتهم المصورة وخذت لهم صور ولقطات حلوة اللي استغلهن زين وزاد من توتر جنة وبعدها طلع زين للعشاء وبعد  الجو الحلو اللي داروه البنات لجنة خواتها ومارية واميرة وخوات احمد وشوي ضيوف من اقارب بعاد لاهل زين ومارية وصاحبة الروضة ومعيدة مع جنة في الجامعة وكان جو حلو وبعدها زين كلم مارية ان تجهز جنة وتفاجأت جنة بأن مارية ادخل فيها لدارها واول ماخشت لقت فستان ابيض حلو محطوط على سريرها *
جنة ..هذا منو جابه ولمنو
مارية ..هذا زين اختاره ليك عشان تلبسيه لانك ماتقدريش تسافري بالفيلو
جنة باستغراب ..نسافرو
مارية ..اه هذي مفاجأة زين ليك
جنة ..عليش ونحن اصلا مش حيصير بينا شئ
مارية بمكر ..هذي يفهمها لك زين مش انا
جنة ..امشي يامعفنة
مارية ..هي ابدي اسلحي الحجاب مابين كلمت ملك تجي تساعدني عشان تجهزي بسرعة بيش تلحقو على الطيارة
جنة ..به
*وغيرت الفيلو ولبست فستان حلو ابيض مخصر وواسع من تحت لان زين انتبه لجنة ماتلبسش في الطلوع الا الفساتين الواسعة او بشت او عباية واسعة فكان الفستان ضيق من فوق وواسع من تحت مع محرمة بيضاء ومخربشة بخربشات خفيفة باللون الذهبي  والفستان فيه حزام ذهبي ومع حذاء وشنطة ذهبية وطوق ذهبي بسيط ينحط فوق المحرمة بس ماحطاتش جنة لانها عارفة روحها بتمشي للمطار وجايب معاه بشت مفتوح لونه بيج ومرصع بالولي وطلعت تهبل بيه مع مكياجها الحلو اللي خففاته واجد عشان ماتطرش تلبس خمار  وطلعتها مارية وملك مع صوت الزغاريد اللي مايخلاش منه فرح وتلقاها زياد اللي حضنها وقعدت تبكي هي وياه نين فكهم زين *
زين ..هكي انا نقول سمرائي كبيرة وعاقلة وخوها راجل
زياد..هذي حبيبتي يا زين رد بالك منها
زين ..في عيوني
زياد ..وردي بالك على راجلك وحطيه في عيونك
جنة ..ان شاءالله ياقلب جنة
زياد..ردي بالك على روحك ياحبيبة وخيك
جنة ..باذن الله
*وسلمت جنة على بوها وعمها يوسف وبعد الاحضان من خواتها ومارية واميرة  طلعت هي وزين بس احمد هو اللي يسوق عشان يوصلهم للمطار
جنة بصوت واطي ..هي ليش لازمتها السفرة ونحن مش حيكون بينا شئ
زين ..وكان مش حيصير شئ على الاقل نتعارفو على بعض كويس ممكن انتي تعرفيني سمرائي لكن انا مانعرفش عليك الا حاجات بسيطة
جنة ..عندك حق بس انا ماجهزت شئ
زين ..مارو جهزت ليك كل حاجة
جنة ..ربي يحفظها ويسهل عليها
زين بحب ..ان شاءالله
مش مصدق اني تزوجت ولا تزوجتك انتي
احمد..نقرصك عشان تصدق
زين ..خليك في حالك والسواقة
احمد..طبعا مقمعزلي بحذا عروستك اكيد بنكون سواق حضرتك
*ووصلو للمطار وانطلقت رحلتهم لجزر المالديف لان جنة كانت ديمة تتمنى تمشي ليها وفرحت واجد لما عرفت انهم مسافرين ليها ووصلو للمنتجع ومنه للشاليه اللي كان يهبل من حيث تصميمه *
زين..حمدلله على السلامة ياسمرائي الحلوة
جنة ..الله يسلمك يارب
زين ..خشي غيري دبشك عشان نطلب الوكال اكيد جعانة زيي
*جنة هزت راسها بنعم*
زين ..انتي غيري هنا وانا نغير في الصالة
*ولبست جنة بيجامة حلوة ومستورة وحطت وشاحها بحيث مايبانش شعرها وطلعت لقت زين مغير دبشه ببيجامة زرقة زدات من زرقة عيونه وزادته جمال على جماله والاكل جاهز وبعد الوكال خشو يرقدو
زين ..اسمعي ياسمرائي
صح انه مش حيكون بينا شئ نين انتي تثقي فيا وانا مستحيل نأخذ منك شئ بالغصب لكن النوم لازم يكون في مكان واحد وعلى سرير واحد خصوصا سراير تو يرقدو اربع اشخاص مش اثنين بس
جنة بثقة ..اصلا منو بيخليك ترقد بروحك لان لعند الان مافيكش ثقة انك ماتلعبش بذيلك عشان نخليك بروحك انت لازم تكون تحت عيني ويالله
زين ..الله على الكلام الحلو مع ان والله ماعندي ذيل بيش نلعب بيه لكن عندي حاجة اخرى
جنة وفهمت لتلميحه ..بطل ياسخيف
زين ..اهناك وحدة تقول لراجلها سخيف
جنة ..هي يا زين نرقدو تاعبة من السفر وبكرة نصحصحلك
زين بضحكة..تصبحي على جنة
جنة ..وانت من اهلها ان شاءالله
*وفعلا رقدو على سرير واحد وكلا منه له افكاره وانتبهت جنة لزين انه فتح فونه وقرا منه شوي وبعدها رقد وخطرت عليها مارية لما قالت ليها انه مايعرفش يرقد الا مايقرا ان شاءالله سطرين ابتسمت ورقدت ولما ناضت الصبح لقت روحها في حضن زين ضحكت وبعدت بالشوي بدون مايفطن زين او فطن ودار روحه راقد *
زين ..صباح الورد على احلى سمراء
جنة بضحكة ..صباح النور
زين ..هيا نوضي جهزي روحك وانا بعدك عشان نفطرو برا
جنة ..ان شاءالله     زين
زين ..نعم
جنة ..نحن ماصليناش امس لما وصلنا
زين ..كيف 
جنة ..نصلو ركعتين سنة انت الامام وانا وراك وبعدها تحط ايدك على راسي وتقرا دعاء عمار البيت
زين باستغراب..اول مرة نعرفه معليش سامحيني
جنة ..لا عادي انوض انا نتوضى وبعدها انت تتوضى وانا نطلعلك الدعاء من النت
زين ..به
*وخشت جنة توضت وبعدها زين توضئ وصلى بيها وتفاجأت بصوته الحلو وقرا الدعاء وبعدها صلو الفريضة وطلعو يفطرو
جنة ..صوتك حلو ماشاءالله
زين ..شكرا
جنة ..زين شنو كنت تقرا امبارح
زين ..رواية الكونت دي مونت كريستو
جنة ..الكسندر دوما ومعاه اوغست ماكيه
زين ..صح ودورت عليها واجد كتاب ماحصلتهاش فنزلتها على الفون
جنة ..عندي منها كتاب قصتها حلو مع اني ضد الانتقام
زين ..ليش (وخطر عليه كلامها مع ميلاد)
جنة ..لان الانتقام يضر الاثنين الظالم والمظلوم لكن الواحد يخليها لربي وهو ياخذ الحق لان ربي كبير وعقابه حتى ماخذش في الدنيا ياخذه في الآخرة
زين..وجهة نظر
جنة ..تعرف انهم دارو منها مسلسل مصري وتركي واجنبي غير الافلام
زين ..انا حضرت المسلسل الاجنبي حلو وعجبني
جنة ..صح الاجنبي حلو لكن للاسف التركي نسخ لصق منه لكن الحلو المسلسل المصري كان قبل المسلسل التركي ولما تفرجت عليه توقعته نسخة عن الاجنبي لكن طلع قصة مختلفة نهائي كانهم اقتبسو الفكرة من الرواية وضافو ليها
زين ..حلو انا مامرش عليا قبل المصري تو نبحث عليه في النت
جنة ..وانا نتفرج عليه معاك لاني نحب نحضره مرة ثانية
زين ..ان شاءالله
*ومشن الايام  دهوير وفسح وغوص  بالنسبة لزين طبعا لان جنة ماتعرفش تعوم *
زين ..منظر المرجان تحت مش عادي حاجة من الخيال تو نوريك الصور اللي صورتهن نغير دبشي بس
جنة ..به وجيبلي معاك فوني داخل الشاليه نسيته
زين ..حاضر
*وعدى زين للشاليه ودوش وغير دبشه وشد فون جنة وتفاجأ برسالة جايتها واستغرب الاسم * 
زين وهو يمد في الفون ..منو الخايبة
جنة ببرود ..زيزي
زين بصدمة ..من
جنة بنفس البرود ..زيزي صاحبتك السابقة
زين ..شنو تبعتلك
جنة ..انا فتحت اول مرة بعتتلي فيها وعرفت هيا منو وبس بعدها معاش فتحتهن بكل
زين ..ممكن نفتح نشوف رسائلها
جنة ..عادي تفضل
*وقرأ رسائل زيزي على الفايبر واستغرب من جنة لانها فعلا بعد الرسالة الاولى ورغم انهن فوق الخمسة وعشرين رسالة مافتحتهنش *
زين..جنة ممكن نعرف السبب اللي خلاك ماتفتحيش رسائلها
جنة بثقة ..انت حكيت لي كل حاجة وانا صدقتك لاني فعلا بنعطيك فرصة للثقة فليش نقرأ كلام انا عارفاته اصلا منك
زين شد ايد جنة وباسها ..ربي يحفظك لي
جنة
لما باس ايدي شعور غريب لايمكن وصفه
زين
لما قالت السبب ليش مافتحتش الرسائل قديش سعادتي كبيرة بيها وبعقلها وان شاءالله عمري ماحنضيع ثقتها بيا
زين ..سمرائي ليش مانزلتيش معاي للغطس والله ماتحبيشي
جنة باحراج ..مانعرفش انعوم اصلا عشان نغطس
زين ..معقولة
جنة بحزن ..وانا صغيرة كانت جدتي تخاف عليا ولما توفت وجيت لحوش بابا كانو يمشو وماياخذوش فيا
زين ..وزياد كان يخلي فيك
جنة ..لا لما كانت خالتي تسكر راسها اني مانمشيش بحجج مقنعة لبابا كان زياد يقعد معاي قديش انحرم يا روحي بسببي من طلعات وزرادي ومشيات
زين ..ربي يخليه ليك وحاول يغير ليها جوها وان شاءالله لما تكوني زوجتي صح حنعلمك العوامة
جنة ..كيف هو لوي ذراع يعني نكون مرتك فعليا تعلمني كنهدا لا
زين بمكر ..ماهو كان بنعلمك تو والله ماني ضامن روحي والضامن الله وبعدين تزعلي مني
جنة بيش تغير الموضوع  ..زين شنو طموحك
زين ..ان شركتنا يكون ليها فروع داخل وخارج ليبياويكبر اسمنا
جنة ..ان شاءالله بس شنو المانع
زين ..هو حاليا انفكرو في الموضوع وحنبدو بطرابلس بس وبعدها بنفكرو بمصر وتركيا
وانتي شنو طموحك
جنة بحب ..ان يكون ليا علامة معروفة في الشوكلا
زين ..قصدك تعرفي اديريها
جنة ..نقولك سر بس توعدني ماحد يعلم بيه
زين ..وعد
جنة ..الشوكلا اللي يبيع فيها محل ***** كلها من صنع ايديا
زين ..والله صح تي انا نقعد بالساعات بيش ناخذ شوكلاتي المفضلة من الزحمة اللي عنده ههههه وفي الحلقة الاخيرة مرتي تطلع هي اللي ادير فيها
جنة بفرح..شنو نوعك المفضل
زين ..شوكلا الحلقوم نموت فيها وخصوصا لما تكون بشكل دائرة والحلقوم والفستق مستف فوقها ومخططة بالشوكلا البيضاء والقهوية يمي بس غريبة كيف ماحد يعلم بيك
جنة ..اتصدق حتى زياد
زين ..غريبة لكن وين تخدمي فيها وليش زياد ماعنداش العلم
جنة ..عندي مكان خاص مأجرته (ماتبيش تقول انه في حوشها اللي كان ساكن فيه باتها مع امها )نخدم فيه ونبعث على خام الشوكلا من سويسرا عندي صديقة على الفيس هي اللي متكفلة تبعث فيها ليا والمحل بالصدفة رافعة عينة لمحل بنوريها له لقيته مسكر فخشيت للمحل وهي في ايدي فالشاب اللي في المحل سئلني عليها لفتت انتباهه طريقة التغليف وبعد ماذاقها هو الشباب اللي معاه سئلوني عليها حكيت ليهم وعلى طول بدون اي شئ طلبو مني انهم يتعاملو معاي وبالسعر اللي نبيه شرط مانبيعش لحد الا هما داخل بنغازي
زين ..ماشاءالله اصلا المحل تما مشهور بسبب الشوكلا هذي حتى في الفاتحة مشيت انا وعمتي زاهية حجزنا فيها
جنة ..حتى عرس خواتي يمشو ياخذو فيها من المحل
زين ..بس ليش زياد مايعلمش
جنة بتنهيدة ..زياد كان يلقى يحطني في صندوق ومايطلعنيش منه بسبب خوفه عليا وحتى شغل الروضة يبيني نسيبه غير انا اللي متنحة فمخصصة يومين نمشي فيهن للاستوديو ونخدم فيها بكميات كبيرة ونرفعها للمحل
زين ..ان شاءالله معاي حيكبر حلمك ويتحقق ان شاءالله
جنة ..يعني مش مانع اني نكمل
زين ..ابدا انا كل يوم يزيد تعلقي بيك اكثر والسبب انك بنت معبية مش فارغة
جنة باستغراب .. معبية مش فارغة
زين ..معبية دماغك نظيف ويفكر مش فارغ بتفاهات اللبس والممكياج والماركات
جنة ..اه 
*ومشت الايام سعادة وجنة ماتوقعتش زين انه هكي بكل فزاد تعلقها بيه وزين حاوط جنة باهتمام عمرها مالقاته الا من خوها زياد وفي يوم زين كان يغطس ولانه يطول فجنة خشت ادوش بدون ما ادخل دبشها معاها *
زين
تعبت من الغطس وقلت خليني نروح بدري والحق اني اشتقت لسمرائي الوقت اللي نقضي فيه معاها كان نلقاه مايكمل وفتحت باب الشاليه على اساس بنخش ونفجعها على طلعت جنة من الحمام لافة روحها بمنشف وردي هادي للركبة وشعرها لافيته بمنشف نفس اللون وباين منه خصلات بسيطة عرفت منهن ان لون شعرها اسود ومانندريش على روحي الا جاي شورها وضامها لي بقوة كاني نقول لروحي فعلا هي لي وكان خاطري نحول المنشف اللي على شعرها لكن خفت تزعل مني وتتعصب  وبعدها حسيت برعشتها بين ايديا ماقدرتش نقاوم اغراء جسمها اللي بعد زيادة وزنه تما فتنة قاتلة وخذيتها في بوسة بدت قوية لاني مش مصدق روحي ولما زادت ترعش تحت مني وحسيتها حيغمى عليها زدت حضنتها وخليت بوستي ناعمة وهادية بيش ماتخافش مني واللي اسعدني انها في البداية ماعرفتش شنو ادير وبعدها تجاوبت معاي ومابعدتش عليها الا لما دفتني عرفت الهواء انقطع عليها وسيبتني  وعدت تجري للدار وهي تترنح عرفت انها دايخة ضحكت وفرحت واجد قديش حلو انك تكون اول واحد في حياة امراءة ولعنت روحي الف مرة بأني مكانتش اول امراءة في حياتي وخشيت اندوش بيش نعطيها راحتها   
جنة
طلعت من الحمام وانا لافة منشف على جسمي قصير وشعري لافة عليه منشف بيش مايقطرش على جسمي ورفعت راسي مالقيت الا زين واقف ومتنح وشوي جاء وضمني ضمة قوية وتهبل شعور مانقدرش نوصفه رعشة ركبت في جسمي كله وبعدها فاجأني ببوسة على شفايفي فقدت فيها كل قوة بوسة بدت قوية وبعدين تمت هادية ناعمة زيه ولما خلاص معاش حسيت بالهواء قعدت اندف فيه بعد عليا وخشيت للدار نجري رغم ان رجليا مش حاسة بيهن وقمعزت على السرير انلم في شتات نفسي وسمعت صوته وهو خاش للدوش
*لبست دبشها وجففت شعرها ولبست سروال واسع اسود كانه جيبة مخطط بالابيض بالطول زادها طول وعليه سورية قصيرة بيضاء ووشاح مخربش اسود وابيض واحمر وحطت رتوش خفيفة كالعادة وطلعت لقت زين بكبوط الحمام
جنة باحراج وخجل واضح ..صحة
زين ..سلمك حتى انتي صحة
جنة ..سلمك
*قرب منها زين وجنة بعدت لكن زين قعد يقدم وهي توخر نين شدها الساس فخذاها زين لحضنه وتكلم بهمس
زين ..سمرائي ماتزعليش مني ومانقدرش انتآسف الحق لاني مانحسش روحي درت حاجة غلط لانك في الاخير انتي مرتي
جنة بتوتر وخجل ..بس انت وعدتني
زين ..ماوعدتكش اني مانضمكش ماوعدتكش اني مانبوسش الشفايف اللي تقول حبيتين كرز مغطسة بشوكلا
جنة ..به بس معاش تخش عليا دون استئذان
زين ..حاضر وزاد ضمها بقوة
جنة ..آه
زين ..معليش لاتقاومي حضنك دافي زي حضن امي اللي من سنين واجدة فقدته
جنة ولاول مرة لفت ايدها على وسط زين وحضناته حتى هي
جنة ..وانا حضن امي عمري ماحسيت بيه
زين ..الله يرحمهن
جنة ..به هي سيبني وخش غير البس دبشك بيش ماتمرضش
زين ..حاضر
*وسيبها زين وخش غير دبشه وطلع لجنة لقاها تستنى فيه وطلعو تمشو وهما حاضنين ايدين بعض وفي حاجة جديدة في قلب كل واحد فيهم للاخر *   
جنة ..زين امتى نروحو
زين ..قلقتي
جنة ..معاك ماحسيتش بالوقت بكل ونحن لينا عشرة ايام تو لكن رايفت على زياد ومارو وعمي يوسف مانبيش نطولو عليه
زين ..حاضر ياسمرائي لكن حنرجعو مرة اخرى وانتي تكوني تعلمتي العوامة عشان تغطسي معاي
جنة ..ان شاءالله
زين ..قوليلي في حاجة مستغربها
جنة ..شنو
زين ..ليش سيارتك BMW
جنة ..وشنو الغريب
زين ..الغريب تحسي ان البنات يبن السيارات العاليات او الصغيرات لكن BMW او المرسيدس تحسي البنات مايحبوهنش
جنة ..هههه تصدق انا نعشق الالماني بصفة عامة السيارة اللي قبل هذي كانت فولكس باصات واللي قبلها كانت مرسيدس واللي درت فيها الحادث قريب متت اودي
زين ..عليك عشق انتي تقريبا جربتي الالماني كله
جنة ..مازالت الاوبل بس ماجربتهاش
زين ..يامخرومة لكن ولايهمك حنجيبلك احدث موديل في الاوبل موجود في بنغازي
جنة ..تسلم يارب
زين ..خلاص امنا خليني نطلع نشوفهم يشوفلنا حجز
*ومشى زين يشوف حجز وخلى جنة برا وبعدها حست روحها ناعسة خشت للشاليه بترقد واتكت بدبشها وهي في الدار خش زين للصالة بدون مايعلم بان جنة داخل
زين ..الحمدلله كيف حالكم انتم
احمد..كلنا كويسين
زين ..الحمدلله
احمد..شنو جو الزواج وكيف وضعك معاها
*جنة ناضت وقربت من الباب تبي تسمع الكلام بوضوح *
زين ..بالنسبة لجنة انا ظلمت روحي
#حياة