سمرائي عذرا

الفصل الثاني عشر

#سمرائي_عذرا
الفصل12
*جنة مبتسمة بعد ما قرت رسالة زين*
زياد..ان شاءالله دوووووم يارب
جنة ..ان شاءالله بس شنو
زياد..الضحكة الحلوة
جنة ..اه ماهو موعد رسالة زين اليومية
زياد..وشنو كاتب يا حبيبة وخيك
جنة .. (ابتسمي ولاتكترثي لاحد
املئي دنياك حبا وصلي كأنك ستموتين غدا تذكري دائما انك تستحقين ان تكوني سعيدة)
زياد..كلام حلو وياريت اطبقيه لانك تستاهلي انك تكوني سعيدة
جنة مش حرام عليك هكي زين وزنه نزل للنص بسبب قلة شوفت بوه وعمي يوسف مسكر راسه انه لو مالقاش بنت يخطبها مش حيشوفه
جنة ..خلاص ياقلب جنة حنبعتله يجي اليوم عشان نقوله شروطي ولو وافق عليهن نتوكل على الله اصلا صليت استخارة اكثر من مرة وكل مانفكر في حاجة تقولي وافقي 
زياد ويحضن في جنة ..وكوني واثقة ياحبيبة وخيك ان مستحيل حد يقدر ايهينك او يذلك وانا حي
جنة بحب..ربي يعطيك طولت العمر يارب
مارية ..خيانة وانا وين في الحضن هذا
زياد بضحكة ..تعالي حضني يسدكم انتن الاثنين
مارية ..وجنتنا الصغيرة زعمك وين
زياد بحب ..بيكون مكان جنة الكبيرة لان جنة الكبيرة بيكون ليها حضن ثاني
جنة بفرحة ..قصدكم عرفتو البيبي شنو جنسه ويعني بنوتة
مارية بفرحة ..اه جنة الصغيرة
جنة بدموع ..بتسموها جنة
زياد..اكيد من لما حملت مارو اتفقت انا وياها ان لو بنت بنسموها جنة ولو ولد انتي اللي بتسميه
جنة ..ربي يحفظكم لي يارب ومع ان مافيش في الدنيا حضن زي حضنك يا خوي لكن عشان جنة الصغيرة نتنازل عليه عادي
زياد..هي ابعتي رسالة لزين
جنة ..حاضر
............
احمد..لامتى يازين انت وزنك نقص للنص امك زاهية شايلة حيرتك طول الوقت
زين بحزن ..مش قادر نحس بطعم الوكال وباتي زعلان مني مش قادر
احمد..والحل
زين .. عند جنة الحل
احمد..ولو رفضت
زين ..مانبيش غيرها ونقنع باتي انه يسامحني باي طريقة الا الزواج من بنت غير جنة
*بعتت جنة الرسالة ووصلت زين وفتحها*
زين ..( انتظرك بعد صلاة العصر في منزل اخي زياد اليوم )
احمد ..ياسبحان الله من دقيقة حزين وتو الابتسامة شاقة نص وجهك
زين بابتسامة ..بنشوفها اليوم
احمد..من
زين ..سمرائي
احمد باستغراب ..سمرائك
زين ..جنة يا بارد
احمد..ومن امتى سمرائك هذي
زين.. من لما شفتها مع ميلاد هذاك اليوم اللي خربت فيه الدنيا على راسي
احمد..ان شاءالله توافق يازين
زين ..ان شاءالله يارب
احمد..بس فايزة شنو بدير معاها
زين ..درت من وقت
احمد بفرحة ..نهيت اللي بينكم
زين.. اكيد اصلا من لما باتي رفض يشوفني وبسبب بعث الصور ليه تساحبني بنجيها وبنقوللها بنتزوجك لكن صدمتها لما قلت ليها اني كنت عارف اني مش اول واحد لمسك ولو اني كنت اول واحد كنت مستحيل نخليك وحنتزوجك ولو فترة لكن لانك انتي من البداية ماكنتيش صافية معاي ولاني عمري ماحبيتك مانقدرش نجبر روحي اني نرتبط بيك وقلت ليها اني بنتزوج من دق قلبي ليها بنتزوج من اللي بتصون  عرضي وتربي صغاري احسن تربية
احمد ..وهي شنو دارت
زين بتنهيدة ..قعدت تبكي ودايرة حالة وبعدين قعدت اتهدد وقلت ليها اعلى مافي خيلك اركبيه
احمد.. خاف منها يازينو هذي وحدة مغرورة والمغرور مايحبش حاجاته تريح منه وهي شايفاتك من ممتلكاتها
زين ..ماتخافش اصلا اللي هي تقدر اديره بتعدي لجنة وتحكيلها علي بينا بكل جراءة
احمد..واكيد وحدة زي جنة مش حتسكت يازينو وتتقبل الموضوع بسهولة
زين ..ماهو انا تو قبل مانسمع ردها حنحكيلها عليها وهكي نضمن لما تجيها زيزي يكون جنة عندها العلم ومش حتتأثر بكلامها
احمد.. زين العقل هكي تكون فعلا بينت انك بتخش صافي معاها من الاول وفي نفس الوقت تقطع اي حبل على فايزة انها اضرك او اضر جنة
زين ..ايوه هذا فكري ولاني فعلا والله نبي ننظف
هي تو بنسيبك بنعدي ناخذ حاجة معاي لجنة
احمد..شنو
زين ..خليك في حالك
...............
*جنة تستنى في زين لبست فستان باللون البني الداكن اللي عطي للون بشرتها لمعة مميزة ولبست عليها محرمة باللون البيج الفاتح تغطي منطقة الصدر كلها وجاء زين واستقبالته بابتسامة حلوة *
زين ..السلام عليكم
جنة ..وعليكم السلام
زين ..الله ما احلى ضحتك
جنة باحراج ..شكرا
زين ..تفضلي
جنة ..شنو
زين ..حاجة بسيطة بس ماتفتحيهاش الا بعد مانروح وماتخافيش ماهيش حاجة غالية
جنة ..شكرا
زين بلهفة ..ها ياسمرائي شنو ردك
جنة ..استنى اشرب القهوة قبل
زين ..نشرب القهوة والشاهي والعصير وكل شئ وناكل حتى الوكال بس نسمع رايك قبل
جنة ..انا عندي شروط وردي يعتمد على موافقتك او رفضك ليهن
زين ..هي نسمع
جنة باحراج ..اولا لو صار نصيب مايتمش زواجنا فعليا الا بعد انتأكد انك فعلا تغيرت
زين بمكر..قصدك مانقربكش يعني زوجتي بس بدون تواصل جسدي
جنة بخجل كبير ..اه
زين
مانسحابش اللي لون بشرتهم هكي خدودهم يتوردو ومعاها خجلها زادها حلاوة وماتبنيش نقربها الصبر يارب
جنة ..زين تسمع فيا
زين ..اه نسمع كملي وبعد مانسمع شروطك انرد عليك لاني حتى انا بنحكيلك على حاجة قبل ماتسمعي ردي على شروطك
جنة ..تمام وثانيا اهتمامي بمارو مانقدرش انقصر فيه لعند ماتجيب 
وثالثا بعد ولادة مارو بنكمل دكتوراء والشغل عادي مايهمش اذا خليتني نشتغل عادي واذا ماخليتنيش عادي
رابعا امور دينا مافيش اعتراض عليها نهائيا
زين ..زي
جنة ..انوضك لصلاة الفجر مثلا
زين ..به كملي
جنة ..مانبيش عرس والسكن اكيد بيكون مع عمي يوسف
ويوم ماتفكر تخوني يكون الفراق بيني وبينك وبدون كلام 
هذين شروطي
زين ..بالنسبة لي اولا انا موافق بس مش لفترة طويلة لاني متأكد من البداية حتتأكدي من تغيري
وثانيا مستحيل اصلا نمنعك لان مارو اختي قبل ماتكون مرت خوك وصديقتك
ثالثا الدكتوراء واي دراسة اخرى تبي تحضريها مستحيل يكون عندي مانع وبالعكس حتلقيني نساعد فيك وبالنسبة للشغل برضو ماعنديش مانع شرط ماياثرش على علاقتنا
رابعا امور دينا مستحيل نعترض لاني نبي من قلبي ربي يسامحني وصلاة الفجر حتى بمية نوضيني
اما خامسا السكن زي ماتبي مع باتي بس في الدور الفوقي هو لي ومستغل منه جزء وحترتبيه وتفرشيه بذوقك
وقبل ماا ناقشك في موضوع العرس اسمعيني بنحكيلك حاجة لان مرات تغيري رايك لكن والله ويشهد عليا ربي اني نبي نتغير بجديات وهذا الموضوع بالذات لازم تسمعيه مني لانه ممكن يسبب لينا مشاكل لقدام
جنة ..تفضل احكي حنسمعك
زين بتنهيدة ..انا نعرف بنت
جنة ..بنت قول عشرة عشرين
زين بجدية..معليش جنة ممكن ماتقاطعينيش وعارف روحي اني مصاحب بنات واجد بس في وحدة ممكن تسبب لينا مشاكل وبنحكيلك قصتي معاها ومهما كانت صعبة عليك انتمنى تسامحيني على كلمة بنقولها
*وحكى زين من بداية علاقته بزيزي لعند اخر مرة رقد معاها يوم ماصارت المشكلة وكيف نهى حكايته معاها*
جنة ..ليش خايف تسبب لينا مشاكل
زين ..لانها انسانة مغرورة ومتملكة وماتحبش تخسر حاجة ليها الا بمزاجها وطبعا انا اللي سيبتها فمتوقع منها ادير اي حاجة
جنة ..شوف يازين حكاياتك مع فايزة مالياش اي حق نسامحك او لا بسبب انها كانت قبل ماتقرر انك ترتبط بي لكن لو صار شئ بعد ارتباطنا مستحيل انسامحك وننسحب من حياتك بهدوء
زين بثقة..مستحيل نغلط او نخونك لاني فعلا نبي ننظف ونفتح صفحة جديدة في حياتي صافية وطاهرة
جنة ..تمام يازين وتأكد مهما حاولت تفرق بينا طالما انت مادرت شئ وانا على ذمتك فمستحيل نعطيها الفرصة تفسد حياتنا
زين بفرحة..يا احلى جنة في حياتي
جنة بخجل..شكرا
زين بجدية.. نرجعو للشروط وافقت عليهن كلهن لكن اللي مش موافق عليه العرس كيف ماتبيش العرس
جنة ..ماهو
زياد..السلام عليكم
جنة وزين ..وعليكم السلام
زين ..تعال احضرنا يازياد جيت في وقتك
زياد..ان شاءالله خير
زين ..جنة قالت لي شروط وانا ماعنديش مانع على شروطها كلهن الا الشرط الاخير
زياد بحيرة ..اللي هو
زين ..ماتبيش عرس
زياد..كيف ياجنة ماتبيش عرس
جنة بحزن ..لمن بندير عرس يازياد انا ماعنديش حد يحبني في الدنيا الا انت وباتي ومارو وجدتي الله يرحمها لمن بندير عرس
زين ..لاهلك لعمامك لخوالك
جنة وعيونها دمعو ..اي اهل خواتي اللي لما نحضر في اعراسهم يعاملو فيا كاني الخدامة بتاعتهم والله خوالي من لما ماتت جدتي معاش شفت منهم واحد خايفين من لسان خالتي هنية والله عمامي درت حادث كبير وطلعت منه برحمة ربي اللي ماجاء واحد فيهم وكل واحد عذر اقبح من ذنب ولما ليلى جابت ماغاب عليها واحد واسماء التوت رجلها كلهم جو وانا اللي شفت الموت بعيوني كل واحد فيهم تعذر بعذر واهي لمن بندير عرس ترا قولولي
*وزاد بكاء جنة وجاء زياد خذاها في حضنه وقعد يهدي فيها *
زياد..خلاص ياحبيبة وخيك خلاص اللي تبيه يصير
زين ..آسف ياجنة والله ماقصدي نوجعك لكن انتي بنت بنوت ليش تتزوجي تقول ارملة او مطلقة رغم حتى لو كنتي ارملة او مطلقة ليك الحق انك تفرحي
زياد..به انا عندي حل
زين ..شنو هو
زياد..ادير انت فاتحة رجالة كبيرة كاشهار للعرس ونحن انديرو عشاء صغير في حوشي هنا
زين ..تمام لان حتى نحن اصلا ماعندنا حد بعد ماعمتي ماتت الله يرحمها مالياش الا مارو ومارو ماعندهاش حتى اصحاب غير جنة واميرة
زياد..يعني متفقين هكي
زين ..ها ياجنة تمام هكي
جنة بصوت واطي ..اه
زين ..انا وافقت على جميع شروطك يعني هكي نفهم انك موافقة
جنة وهي مازالت في حضن زياد ..موافقة
زين ..الحمدلله يارب واخيرا تو بنعدي لباتي وبكرة باذن الله جايينكم يازياد بعد العصر عند عمي جمال
زياد..تمام به مستعجل ليش ماشربت شئ
زين ..بنمشي نتفق مع يوسف وبعدها بنكلم شركة نظافة بيش ينظفو الدور الثاني عشان تجي جنة تشوفه وتعرف كيف بتفرشه وبنعدي انسق على الفاتحة بنكلم امي زاهية ونسئلها شنو اندير لاني مانبيش مارو تتعب خصوصا في وضعها هذا
خطرها مارو شنو حالها وحال البيبي في اخر مراجعة
زياد بفرحة.. حالها وحال جنتنا الصغيرة تمام التمام ولله الحمد
زين  باستغراب .. جنتكم 
زياد..مارو حامل ببنوتة وبنسموها جنة ان شاءالله
زين بفرحة ..بنصير خال ياسلام ولاحلى بنوتة واحلى جنة ياسلام
زياد ..مالكش علاقة بجنتي خليك في جنتك
زين ..غير تبقى لي وانا نخليك تتمنى تشوف طرف صبعها
زياد..جرب بس
زين ..تو اتشوف وهي سلام وسلمولي على الخموجة اللي لتو ماناضت
زياد بضحكة ..هههه كيف عرفتها راقدة
زين ..لان من اول ماجيت ماشفتهاش فمليهاش الا تفسير واحد انها راقدة
وهي سلام يادوب انلحق
زياد وجنة ..سلام
زياد..جنة نحكو جد حبيبتي
جنة ..نعم ياقلب جنة
زياد..معاش نبي نشوف دموعك ياقلبي ونبيك تفرحي وتعيشي زي اي عروس
زين والله كويس وشفت الحب في عيونه ليك
جنة باستغراب ..حب
زياد ..لاني راجل عاشق فنعرف نميز نظرة الحب
جنة ..ياريت يازياد اللي تقول فيه صح
زياد..ان شاءالله مع العشرة تتأكدي
جنة ..ان شاءالله
زياد..بكرة نمشي للمصرف ونسحبلك فلوس وتبدي تجهزي روحك وتبدي تبتتي لشقتك
جنة ..لا ياقلب جنة عندي فلوس والله ماني محتاجة واذا استحقيت حنقولك وانت عارفني
زياد..بس انا اللي نبي نجهزك
جنة ..اكيد انت لان من اللي بيكون معاي خطوة خطوة في كل شئ ولو استحقيت لفلوس حتشوف بعيونك
زياد بتنهيدة ..امري لله
جنة ..هيا امنا نوض الخموجة على قولت زين مابين ماجهزت عصرية حلوة من دياتي خصوصا اني كنت مجهزة كيكة بنقدم منها لزين مشى قبل مايذوقها
زياد بمكر ..شنو اللي في ايديك ياحبيبة وخيك
جنة ..اه هذي جابها زين معاه مش عارفة شنو
زياد ..به عدي لدارك وشوفيها شنو
جنة ..لا ياقلبي من امتى وانا ندس عليك في حاجة استنى حنفتحها هنا
زياد..شنو طلعت
جنة بفرحة ............
#حياة