سمرائي عذرا

الفصل السابع

#سمرائي_عذرا
الفصل 7
زين بصدمة ..قصدك صوتي عالي
احمد بضحكة ..لا بس انت رفيقي ونعرف تفكيرك شنو
زين ..طالما عارفني هيا نوض
احمد ..هيا نضت
*وعدى زين واحمد شور زياد ومارية وقعدت جنة مع عمها يوسف
يوسف بفرحة ..شكلك قريب مش حتبعدي علي
جنة ..انا ديمة قريبة منك ياعمي بس ليش تقول هكي
يوسف..تو تعرفي قريب شنو نقصد
كان ياجنة تخشي عند عمك حسن واديرلنا قهيوة من دياتك اممم ياسلام مابين ماطاب الشواء
جنة ..من عيوني ياعمي انديرلكم كلكم والله انا وانت بس
يوسف ..مع ان خاطري اديرلي انا وياك وتمكريهم لكن نحن كرماء
جنة بضحك..خلاص تو نعدي نسئل احمد وزين شنو قهوتهم يحبوها
يوسف ..زيي معدلة
جنة ..تمام معناها كلنا نفس الذوق
يوسف ..ايوه وعلى فكرة انتي وزين تتشابهو واجد في اذواقكم
جنة ..والله غريبة
*وعدت جنة لداخل الفيلا للمطبخ عشان ادير القهوة
جنة بالمصري  ..ازيك ياعم حسن يا احلى شيف والله
حسن ..ازيك يا جنة والله انتي اللي زينة البنات
جنة بحزن ..زينة من وين ياعم حسن
حسن ..الزين مش لازم يكون بالشكل يابنتي وبعدين ايه اللي ناقصك دنتي بعينك الجميلة ديه اللي بلون البندق على عسل كده ماتعرفيش تفرقي  وبلون بشرتك ديه اللي عاملة زي لون الفنانات اللاتينيات وجسمك بس عاوز اسبوع من تحت ايدي يأكل وتبقي ولا نانسي في جسمها
جنة ..الله يكرم اصلك ياعم حسن وانت ديماً ترفع في معنوياتي خلاص انا جهزت القهوة وحفكر في عرض اني آكل من تحت ايديك اسبوع
حسن ..وانا بالانتظار يابنتي (اللي قراء الكلام بالطريقة المصرية يدرس جنبي هههه)
وكان زين يراقب فيها بدون ماتفطن ليه وكان يشوف فيها قديش بسيطة بدون تعالي ولاتكبر في تعاملها مع العم حسن
وشكله يعرفها كويس
زين
فعلا شكلي انا اللي كنت نغيب واجد على الحوش او ممكن هي تتعمد ماتجيش وانا قاعد
*وطلعت جنة بالقهوة وطلع وراها زين ورجع جيهة زياد ومارية واحمد بدون ماتفطن جنة انه كان يراقب فيها وضيفتهم جنة القهوة لاول مرة زين يرفع عيونه فيها ويشوف وجهها مزبوط وعلى طول اذكر كلام احمد وسرح فيها نين تنحنحت  جنة بيش فطن وخذا قهوته وعدت هيا بفنجانها جيهة العم يوسف*
احمد بهمس لزين ..على فكرة هي نفسها البنت اللي شفتها يوم عزاء عمتك
زين بنفس الهمس ..حتى انا تو كيف ركزت في وجهها واذكرت كلامك طول هذا ليش تنحت فيها لاني سرحت في وصفك ليها بس لون عيونها ماشفتاش كويس الاضاءة مش واضحة
احمد ..مش بكرة بتشوفها الظهر ركز اكثر
زين ..اكيد
*وتعشو ومشى العشاء جميل بين بصارة زياد وزين واحمد والهدرزة الحلوة بين مارية وجنة والعم يوسف وبعدها كل واحد روح لحوشه وجنة روحت بعد تغيرها لجوها ونسيانها لسبب حزنها وبعد تغيير دبشها واطمنت ان مارية معاش تبي منها حاجة خشت لدارها وفتحت مذكرتها وكتبت زي العادة*
(هاهو يوم حزني المعتاد من كل اسبوع ياكتابي ولكن عذرا اليوم لست بحزينة ولن اكتب على ألمي ووجعي بل سوف اكتب على لحظات جميلة احسست بها اليوم ومن فترة طويلة جدا لم اشعر بذلك
ها انا اليوم ياكتابي ومن سنتين اشعر اني سعيدة في مثل هذا اليوم احمد وزين وعمي يوسف وزياد ومارو كان سبب سعادتي قضيت وقت جميل معاهم وكم تمنيت ان تكون لي اسرة هكذا فعذرا كتابي اليوم انا سعيدة جدا)
*ولكن هل لزي  جنة مكتوب ليه السعادة تو نشوفو والايام الجاية تثبت لنا ذلك
وجاء ثاني يوم وكلا منهم له وجهته زين توجه لشركته وجنة توجهت للكلية عشان تشرح لاميرة وبعدها بتعدي لروضة*
زيزي ..صباح الخير يابيبي
زين ..صباح النور غريبة نايضة بدري
زيزي بدلع ..اشتقت ليك قلت نتصل بيك اتجيني بعد ماتكمل شغلك
زين ببرود ..مش عارف يازيزي امتى نفضى
زيزي بعصبية ..كيف يازين اول مرة نقولك تعال وتقولي مش عارف شنو اللي مغيرك معاي والله لاف على وحدة جديدة قولي نسيبك في حالك لعند ماتمل منها
زين .. تو نشوف يازيزي ونرد عليك هيا سلام عندي اجتماع تو
*سكر منها زين وشرد بينه وبين نفسه*
زين
هه جو جديد يعني عندها عادي اني ندير جو جديد اي حب اللي تحكي عليه اللي تحب صح مستحيل ترضى ان حبيبها يشبح لوحدة غيرها مش لابال يرقد معاها وخطرت عليا جنة وانها قديش ميلاد حاول يرتبط بيها بعلاقة وهي مابتش رغم شكلها المفروض وافقت حتى تحس بانوثتها وقدام البنات انها تحب وتنحب ولا مش اي شاب من شاب وسيم وماديا مرتاح زي ميلاد لكن هيا على العكس
*وهو يفكر في جنة خطر عليه ان احمد قاعد معاها فقرر ان يتصل بيه بالك للمرة العاشرة*
احمد..ها يازين والله هذي المرة العاشرة اللي تتصل بيا وعلى العموم طمن بالك آنا تو طالعين انا واميرة في سيارتي مروحين وجنة في سيارتها ماشية للروضة ارتحت تو
زين بمكر..اه ارتحت وهي سلام بنوض نمشيلها
احمد..سلام
*وعدى زين للروضة وتفاجأ بيها انها مكان بسيط فاتحته مرا محتاجة ومعاها فاتحتها باسعار رمزية للامهات اللي ظروفهن تعبانة ويشتغلن ومايقدرنش على اسعار الروضات المرتفعة وطبعا زين وصل قبل جنة لان الروضة لما خذا عنوانها طلعت قريبة من مقر شركته وخش للمرا ودفع ليها مبلغ رمزي كصدقة تحسن بيها من حاجات الروضة عشان الصغار يكونو مرتاحين اكثر ومباش يقوللها هو من ورجع لسيارته وقعد يستنى في جنة اللي بالصدفة درست وراء سيارته ولان سيارة زين مظلمة ماشافتاش وشكلها حتى السيارة ماتعرفعاش ولما قربت منه جاء زين بينزل بيش يوقفها لكن تفاجأ بشاب وقف عليها وهما قريبين من سيارة زين في البداية معرفاش لان عاطيه بظهره لكن عرفه لما جنة تكلمت بعصبية ونطقت اسمه*
جنة بعصبية ..شنو تبي ياميلاد
ميلاد بهدوء..كيف حالك ياجنة
جنة ومازالت على نفس العصبية ..بخير الحمدلله طالما انت ومراتك بعاد عليا مراتك ياميلاد اللي هيا اختي
ميلاد بحزن .. انا السنتين اللي فاتن كنت بعيد عليك وتخيلت روحي ننساك
جنة وعصبيتها زادت ..تنساني او تتفكرني حاجة ترجعلك شنو دخلني بيك
حول من قدامي بنمشي
ميلاد بحب..لازم تسمعيني ياجنة انا مازالت نحبك وماقدرتش ننساك وكانت اكبر غلطة اني رضخت لضغط اهلي
جنة بوجع ..تعرف ياميلاد لو سيبتني بس بسبب ضغط اهلك كنت سامحتك لكن انت كنت خاطبني وداير علاقة مع اختي سنة كاملة داير علاقة معاها وانت خاطبني كل شئ نسامح فيه الا الغدر والخيانة ياميلاد يا راجل اختي
ميلاد ..شوفي قلت سماحك شنو صارلي عطاني ربي ولد مريض
جنة ..ربي يشفيه ليك لكن هذا عيل ماليش اي ذنب سوى انه انك بوه
ميلاد ..جنة وافقي بس وانا نطلق اختك ونتزوجك وافقي وخوذي حقك منها
زين
انا كنت نسمع في كلامهم لاني فتحت الروشن شوي بيش نسمعهم كويس وكنت مع كل كلمة تقولها جنة نحس في قلبي يدق بسرعة كأني انا نتوجع معاها ومع كل كلمة يقولها ميلاد نحس في نار تغلي فيا نين واصلة دماغي ونبي نطلع نفتح راسه لان تجرأ ووجع سمرائي
سمرائي !!! ايه سمرائي الطاهرة اللي مستحيل انسيبها وكنت بننزل عشان نباعده عليها ونسكته ونقول خلاص جنة مش من حقك انت كانت عندك فرصة وضيعتها وتو فرصتي وجنتي ليا انا سمرائي الغالية اللي مستحيل نخلي واحد زيك يقربها او يجي شورها لكن لما سمعت اخر كلام قاله ميلاد جمدت مكاني وخفت ان جنة توافق لان هذي فرصتها ترد كرامتها وسكتت شوي وردت جنة رد صدمني وماتخيلتاش منها جنة الضعيفة والهشة والحزن اللي ديمة في عيونها واول مرة ننتبه للونهن فعلا حلو لكن كانت الدموع مرقرقات فيهن توجعت لوجعها
ميلاد بعصبية وصوت عالي ..شنو درتي انتي كيف سمحتي لنفسك
جنة ............
#حياة