#سمرائي_عذرا
الفصل 1
اسماء ..عظم الله اجرك مارية وربي يصبرك على فراقها
مارية..اجري واجرك على الله
اسماء ..الحق قبل بنجي انا وخواتي لكن قلنا اكيد الشينة عندك فقلنا خليها بعد ايام على الاقل تكون معاش تقعد معاك طول الوقت
مارية بعصبية .. جنة اعز صديقة ليا ووخيتي واللي مايبهاش معناها معاش يلزمني وعزاكم وصل
وسكرت الفون والتفتت لجنة لقاتها تبكي
مارية ..ماتعدليش عليهن ياقلبي ولا ادوريهن
جنة ..معليش مارية بنروح وبكرة نجيك بدري
مارية .. به على الاقل استني يجي زياد يوصلك الدنيا مغرب
جنة .. عادي شنو بيصرلي على قولة مرت بوي من بيقرب شكلي
*وطلعت جنة وماعطتش فرصة لمارية تزيد تقنعها وهي طالعة ودموعها معبيات عيونها خبطت في شاب وشنطتها طاحت وتنطر اللي فيها لانها كانت تفتش على مفتاح سيارتها وبدون ماتنتبه للشاب اللي خبطت فيه قعد يعاون فيها في لم حاجاتها ولمتهن وطلعت تجري*
زين .. غريبة في بنت تطلع في الوقت هذا بروحها بسيارتها ههه لكن من بيعدل على شكلها حي نست مذكرتها ماخذتهاش لكن شكلها تبكي غريبة عمتي ماعندهاش حد الا انا ومارية بالك بنت وحدة من صاحبتها بعدين خيرني شغلت روحي بيها
احمد..اسم الله الكريم انهبلت شكلك تحكي مع روحك
زين..لا غير بنت
احمد.. هههه بنت حتى في عزاء عمتك مش راحم عيب ياراجل
زين بمكر..وحد يقدر ينكر الجنس الناعم او يبعده عليه طالما يجيه برجليه لعنده
احمد.. ماهو هذا اللي محيرني شنو ادير وانت تقول مغناطيس تجذب فيهن شورك
زين .. شنو اندير عيب ياراجل تقول هكي يكفي اني زين الدين يوسف عز ومال وجاه وشكل حسن بذمتك وحدة تشوف جسم رياضي وطول وعرض وبشرة قمحية فاتحة وشعر ناعم وعيون واسعات وزرق وخشم واقف مرشوق رشق وفم مرسوم بابداع ودم خفيف واخر العشرينات عمري واشهر من نار على علم وماتبيهنش ينجذبن ليا
احمد..ههه تي تواضع ياراجل من تواضع لله رفعه
زين ..ونعم بالله لكن ربي قال وانما بنعمة ربك فحدث
احمد..مافيش فايدة بس ماقلتش ليا ليش كنت تحكي مع روحك
زين ..بنت خبطت فيا
احمد..اكيد سمحة وتعمدت تخبط فيك
زين بشرود.. لا ماخطمت شورها السماحة رغم اني شفتها خطف لكن اللي مستغربه مارفعتش عيونها فيا
احمد..مستغرب ليش
زين.. انا بس ريحة عطري تلفت الانتباه مش تخبط فيا وماتعدلش عليا
احمد..انساها يا راجل وهي خش لاختك تلقاها بحاجة انك تواسيها وانت عارف عمتكم قديش غالية عليها
زين ..شوي بس نحط هذا في السيارة
احمد..شنو المذكرة هذي
زين ..شئ
*وعدى زين حط المذكرة في درج السيارة وسكره بالمفتاح وخش للعزاء ونادى على مارية وحضنها وقعدت تبكي بحرقة
زين..خلاص يا مارو مش كويس عليك وانتي بالوضع هذا
مارية ..مش قادرة يا زين انت عارف عمتي قديش غالية عليا
زين ..عارف يا مارو لكن هذا قضاء الله ومافيش منه هروب وكلنا ماشيين ليه مفيش حد بعيد عليه وبعدين ماتخليش حزنك يكون سبب لقدر الله تفقدي جنينك
مارية ..والله ماني قادرة
زين..معناها بنكلم زياد يجي يشوفلك حل اهو جاء زياد
*جاء زياد وجاته مارية طول حضناته*
زياد..لا اله الا الله حبيبتي استهدي بالله
*مارية تبكي وبس*
زياد ..هكي نزعل ياقلبي انا مانقدرش على دموعك وبعدين على خاطر اللي في بطنك زعلك يأثر عليه وهذا كأس كلنا بنشربو منه استغفري الله وادعيلها لان هذا اللي بيفيدها ياقلبي
مارية بتنهيدة ..استغفر الله
زين ..انا قلت ماليها الا زياد
زياد..انت بروحك تبي من يواسيك عارف عمتك قديش غالية عليك حتى انت
زين بحزن..انت عارف عمتي انها ماعندهاش صغار وديمة تحسب فيا انا ومارية زي صغارها وبالذات مارية كانت تقول امها بالذات لما امها ماتت وهيا صغيرة
زياد..الله يرحمها بالله كيف حال باتك
زين ..تاعب والله ماتخيلته يزعل هكي عليها ولولا العزاء كنت روحت بيه يرتاح
زياد ..ربي يحفظه
حبيبتي اهدي خلاص
زين..نخليكم نمشي للرجالة
زياد..تمام شوي ونلحقك
مارية ..حبيبي اتصل بجنة شوفها وصلت للحوش او لا
زياد..قصدك روحت بدري غريبة سيباتك
مارية بحزن .. لا يا زياد جنة تو كيف طلعت
زياد..كيف طلعت تو
مارية ..اختك اسماء كلمتني تعزي فيا وقالت انها وخواتها قبل بيجو لكن قلنا الشينة اكيد معاك خلوها نين تبدا معاش معاك ديمة ونجو نعزوك فرديت عليها بعصبية وقلت ليهم عزاهم وصل وسكرت الفون في وجهها وطبعا جنة سمعت كلامها كله وطلعت وهي تبكي
زياد.. لاحول ولاقوة الا بالله ربي يهديها ويصلح حالهن خواتي هذين كله من امي اللي خلتهن هكي والله جنة قطعة من السماء نزلت على الارض
مارية ..بالله كلمها واطمن عليها هي ماتروق نين تحكي معاها
زياد..اكيد ياقلبي خشي انتي للداخل وكولي حاجة على خاطر اللي في بطنك ياروحي
مارية ..حاضر وطمني على جنة لانها مش حترد عليا
زياد..تمام
*وخشت مارية ووقف زياد يفكر شوي وتنهد واتصل
جنة ..السلام عليكم
زياد..وعليكم السلام
وين انتي
جنة ..انا قدام باب الحوش كيف وصلت
زياد..كيف تطلعي في الوقت هذا بروحك
جنة بحرن.. شنو بيصيرلي يعني على قولة امك من بيبحث في وحدة كيفي
زياد..استغفر الله العظيم انا واخذ عليك جنة الواثقة في نفسها مش الضعيفة
جنة بدموع ..واثقة يا زياد لكن شنو بندير الكلام واعر وبالذات لما يكون من لحمك ودمك
زياد..احسابي معاهن بعدين وربي يسامح امي اللي زرعت الكلام هذا في راسهن
جنة ..بالله عليك على خاطري ماتدوي معاهن مانبي مشاكل معاهن وربي يقدرني الفترة هذي نصبر عليهن خصوصا انك ومارية على الاقل تبو ثلاثة ايام بيش تجو لحوشكم
زياد ..لا تعالي ياحبيبة وخيك المفتاح عندك وتعالي حتى ونحن مش قاعدين وقبل المغرب روحي بيش ماتباتيش بروحك
جنة ..يصير خير ياقلب جنة
زياد..هي سلام تو
*ونزلت جنة من سيارتها وخشت للحوش واستقبلتها مرت بوها كالعادة بكلام جارح وقاسي على اي انثى مهما كان شكلها
هنية (مرت اب جنة).. هذا اكيد زياد اللي كان يكلم فيك يطمن على ست الحسن والجمال
جنة ..استغفر الله العظيم
هنية ..هذا اللي فالحة فيه كان الفلوس اللي تكدسي فيها على قلبك واللي تصدقي بيها على اللي يستاهل واللي مايستاهلش مشيتي سافرتي برا وغيرتي في خلقتك ومشيتي لمركز تجميل وغيرو لون شعرك اللي يخوف وشريتي مستحضرات تجميل تفتح لون بشرتك وانتي جايبة لينا العار شينة وسط غزلة الحوت على بنياتي
جنة ..كملتي كلامك والله نخش داري
هنية ..خشي خشي اصلا كان كلامي ليه اعتبار راك سمعتي كلامي ومشيتي معاي للعيادة اللي مش عارفة شنو ادير لكن المهم تخلي بشرتك بيضا
جنة ..شكلك مطولة عن اذنك
*وخشت جنة لدارها وكالعادة لازم تقمعز مقابلة المراية تتفرس في ملامح وجهها وتنعي روحها
جنة ..مش ذنبي ان لوني برونزي ومش ذنبي ان عيوني صغار ومش ذنبي اني رقيقة بكل وكيف بيزيد وزني وانا اللي حذاي كلهم يعاير فيا بشكلي ولون بشرتي حتى صاحبات ماعندي في الابتدائي كانو يقولو عليا عبدة (عذرا على استخدام هذا اللفظ اللي مانحباش لكن سياق القصة محتاجه فعذرا مرة ثانية لان كلنا عبيد الله ) ويخافو مني وفي الاعدادي كانو يقولو عليا قهوية ويتهزو وفي الثانوية يبتعدن عليا خايفات لما يصاحبني مايقربش منهن الشباب بسببي وفي الجامعة صارلي نفس الثانوي غير تغيرت التسمية لحاجة ارقى برونزية لكن مارية هي الوحيدة في الابتدائي ماخافتش مني وقعدت معاي وكم من مرة مسحتلي دموعي نين تمت صديقتي الوحيدة وبعدها تمت مرت خوي الغالي زياد وهيا حامل تو في الشهر الثاني وفرحانة ليها واجد وحتى هيا وحيدة اهلها ماعندهاش خوت الا زين الدين ولد عمها وخوها في الرضاعة زين الدين الصايع بتاع البنات
*وناضت غيرت دبشها وخشت للحمام اللي في دارها وبرغم قسوة مرت بوها الا بوها غالية عليه واجد وخصص ليها دون عن خواتها كلهن دار بروحها بحمامها وتوضت وصلت وقمعزت تدعي
جنة ..يارب اختر لي الخير وارزقني بما يريح نفسي يارب انت من اخترت ان يكون هذا شكلي لسبب انت تعلمه فاختر لي الخير كما تريد يارب وخفف همي وغمي يارب وناضت كالمعتاد لتبحث عن مذكرتها لكي تكتب بها جديدها اليوم ولكنها ما لقتش سوى الجديدة الفاضية لكن التي تكتب بها حاليا ملقتهاش وتكلمت مع روحها
جنة ..زعمك وين حطيتها رغم انها مازالن فيها ورقتين فاضيات ممكن نكون نسيتها في حوش زياد اكيد نسيتها تو ناخذ وحدة جديدة ونبدا فيها
بسم الله
ها هو يوم جديد من اوجاعي يضاف للقائمة الطويلة التي امتلائت بها وكل ذنبي اني سمراء البشرة ولست جميلة هل هذا ذنب احاسب عليه او ذنبي ان اخواتي الاربعة جميلات جدا وهل اصراري ان احافظ على ماخلقني الله به ذنب كبير ورضاي به ذنب اكبر
#حياة
أنت تقرأ
سمرائي عذرا
Fanfictionعندما يكون اختلاف بشرتنا سبب لنظرة مؤلمة او كلام جارح نسمعه ولكن الله لاينسى احد رواية باللهجة الليبية لصديقتي حياة احمد (مكتملة)
