سمرائي عذرا

الفصل الثالث والعشرين

#سمرائي_عذرا
الفصل23
جنة ببكاء ..محتاجتلك ياملك تعاليلي بسرعة
ملك بلهفة ..هي تو اني جياتك
*وفعلا مهناش وقت وكانت ملك عند جنة
ملك ..شنو في طمنيني شغلتيني عليك
جنة حضنت اختها وقعدت تبكي وبعد وقت 
جنة ..انا مانقدرش نحكيلك شئ لكن اللي نبيه تو لازم نطلع من الحوش قبل مايروح زين
ملك ..اللي تبيه ياجنة هي
جنة ..شوي انزل شنطتي بس
ملك بفجعة ..شنطة شنو ياجنة
جنة ..تو نحكيلك لكن تو لازم نطلع من هنا
ملك ..هي
*وركبت جنة نزلت شنطتها ولبست عبايتها وطلعت مع اختها وركبت السيارة
جنة ..اطلعي بيا على المصرف قبل
ملك ..حاضر
*بعتت رسالة لزين وسكرت فونها
جنة ..اتصلي بعماد وعطيه ليا
ملك باستغراب ..حاضر
واتصلت ملك بعماد وعطاته لجنة
جنة ..اهلين عماد كيف حالك
عماد ..بخير انت كيف حالك
جنة ..الحمدلله على كل حال
عماد نبي منك خدمة
عماد ..ادللي ياجنة
جنة ..نبي سيارة تكون شعبية مش مميزة
عماد ..حاضر تبيها لمن
جنة ..ليا انا ونبيها تو حاجة ساعة نجي ناخذها منك وما اديرش عقد باسمي دير العقد باسم بابا
عماد..حاضر عطيني ملك
كنها جنة ياملك
ملك ..والله ماني عارفة ماحكت شئ ليا بالك لما نجوك المعرض تفهمنا
*ووصلت جنة للمصرف وسحبت فلوس وطلعت ومشو جيهة معرض عماد للسيارات
جنة وملك ..السلام عليكم
عماد.. وعليكم السلام
طمنيني ياجنة كنك شنو فيك وخيرك بتبيعي سيارتك وانتي عارفة مافيش  منها واجد في البلاد
جنة ..لا مش بايعتها بس بناخذ سيارة مش ملفتة للانتباه لما نستحق انتحرك بيها
ملك ..وين بتعدي ياجنة وليش ماتبيش تلفتي الانتباه لما تتحركي بيها
جنة بهدوء..بنهرب
عماد وملك بصدمة ومع بعض ..بتهربي
جنة بوجع ..نبي فترة نراجع تفكيري نبي فترة نبعد
ملك بخوف ..زين دارلك حاجة وبعدين وين بتعدي ياجنة انتي ماعندكش حد الا نحن
عماد..تعالي عندنا
ملك ..اي والله تعالي عندنا ياجنو
جنة ..ماينفعش اصلا اول مكان حيجيه زياد وزين عندكم بما اني طلعت مع ملك
ملك ..امنا بتعدي وين
جنة ..مانيش قايلة لحد لكن ماتخافوش حنطمنكم عليا ولو استحقيت حاجة حنكلمكم انتم
ملك ..بس هكي حننشغل عليك
جنة ..تو نفتح حساب ثاني على الفيس ونتواصل معاك ديمة
ملك ..الله يهديك ويريح بالك غير كان تقوليلي كنك
جنة ..حاليا انا قاعدة نتخبط ومش عارفة شنو اندير لكن ماتخافوش عليا انا قوية وواجد صدمات طلعت منهن تو هي عماد عطيني السيارة 
عماد..وعليش تشري وتدفعي فلوس خوذي سيارة زي ماتبي ولما تقرري ترجعي رجعيها عادي
جنة ..بارك الله فيك
*وخذت سيارة من عماد وطلعت وسيبتهم الاثنين مشغولين في الوقت اللي وصلت فيه الرسالة لزين معاش عرف شنو يدير واعصابه نهارن لدرجة وهما مروحين عزالدين هو اللي ساق السيارة
يوسف ..غير قولي شنو كتبت ليك بالزبط
زين يقرا بوجع ..(حبيبي زيني فرحتي التي لم تكتمل لاتشغل بالك علي لقد ذهبت لكي اعيد اموري وللاسف لا استطع ان اطلب منك الانفصال قلبي وعقلي رافضين ان ينفصلو عنك ولكن في نفس الوقت رافضين البقاء معك وانت تعلم وقلتها لك اكثر من مرة الخيانة ثمنها الفراق وداعا ياقطعة من روحي طعنتها بغدرك)
يوسف ..والمعنى
زين ..والله مافهمت يا باتي والله ماخنتها ونحلف حتى على مصحف والله ماخنتها
والله ماخنتها والله ماخنتها
وقعد يكرر في الكلمة الاخيرة بقهر واكثر من مرة على رنين فونه
زين ..الو
ملك ..زين شنو اللي صاير بينك وبين جنة
زين ..انتي اللي قوليلي شنو اللي صاير انا خليتها بتطلع معاك
ملك ..اه جيت خذيتها
وحكت ليه كل شئ باستثناء انها خذت سيارة من عماد لانها جنة طلبت منهم انهم مايقولوش على نوع السيارة وانها ركبت تاكسي وطلعت 
زين ..وكيف خليتيها يا ملك كيف
ملك ..والله وحلنا فيها واللي زاد وحلني اكثر ماقلتش السبب ومازادت شئ اكثر من اللي قلته لك 
*زين سكر من ملك وهو تقريبا شبه منهار ومازال عنده امل انها ماتكونش رفعت معاها دبشها لانها لو مارفعتش دبش معاها معناها ماهيش مطولة ولو واخذة دبش معناها مطولة واشبح ترجع او لا وعند هذي الفكرة كان لقى طار طيران للڤيلا واول ما وصل ركب يجري ممكن ياخذ في ثلاث درجات بخطوة وحدة وفتح الدولاب وهنا انهار وقعد يخبط ومش عارف شنو دار وليش سيباته وخطر عليه زياد مكمن سرها
زين ..ايوه يا زياد جنة وين
زياد باستغراب .. كيف جنة وين
زين بدون تركيز  ..جنة مهناش جنتي عدت وسيبتني  خلاصي من عفني راحت مني
زياد بعصبية وبدون مايركز على حالة زين ..شنو درت ليها يازين والله لو درت ليها حاجة مافي حد يخلصك من ايدي
زين .. لو نعرف شنو درت فيها تعال خوذ الحق اللي تبيه
زياد..به كيف عدت وكيف طلعت
زين ..رفعت باتي للمصحة حس روحه تاعب فاتصلت بيا وانا غادي وقالت ليا انها بتكلم ملك بتطلع هي وياها للسوق بتجيب لبسة وببتغذا عند اهلها وبعدها نجي نروح بيها وبعدين وانا في المصحة جتني رسالة لكن لاني مش متوقعها منها ماشفتهاش على طول نين اطمنت على باتي وبعدين فتحتها لقيت رسالة من جنة فهمت منها انها تودع فيا وتو جيت للحوش لقيتها واخذة جزء من دبشها وسئلت ملك وحكى لزياد شنو قالت ليه ملك
زياد ..غير اهدى تو انا نتصل باسماء وليلى وعمتي عزيزة نمشي نشوفها بالك عندها وانت شوف اميرة واحمد
زين ..به به
....................
مارية ..كنك يا زياد صوتك عالي مع من تتعارك
زياد ..حكى ليها كل شئ
مارية .. جنة بعتتلي رسالة
زياد بلهفة ..قالتلك وين
مارية بهدوء ..لا يا زياد ماقالتش وين لكن اطمن فيا عليها وقالت نقولك ماتخافش عليها وما ادوروش عليها عند حد لانها مش عند حد يعرفوه بكل
زياد بشك .. مارو حبيبي انتي عارفة انا قديش جنة تعنيلي نحلفك بجنة الصغيرة شنو تعرفي قوليلي لان هدوءك هذا غريب وانا نعرف علاقتك بجنة شنو شكلها 
مارية بتنهيدة .. انا مابعتتش جنة لي رسالة اتصلت بيا وحكت انها محتاجة فترة تعيد حساباتها وعشان تعطي لزين فرصة ان يكمل زواجه بزيزي وقالت ضغط ما قدرتش تتحمله والحق قالتلي حاجة اخرى لكن حلفتني مانقول لحد لكن قالت تو تتصل بيك
زياد ..جنة والله ماتستاهل هذا كله والله قلبي كان مخوفني تماسكها الزايد خلاني انشك انها حتنهار لكن ماتخيلتش انها لما تنهار  كمل كلامه بوجع ادور على مكان للامان غير حضني
مارية ..هي ليها اسبابها لكن هي كويسة وبعدين ماجاتكش لان عارفة زين بيجيها هنا وهي بالدرجة الاولى تبي تبعد عليه
زياد..ياريت خليني نكلم خوك لانه حتى هو نحس فيه شوي وينهار  هذا اذا ما انهارش اصلا
مارية ..به كلمه
زياد..انا البرود اللي انتي فيه قاتلني
مارية ..بس مطمنة على جنة
زياد..ياريت بس هذا السبب
*واتصل زياد بزين وحكاله شنو صار مع مارية وزين بعد اطمن ان جنة كويسة وطالما انها اتصلت بمارية معناها اكيد مش حطول غيبتها وهكي طمن روحه وهو يفكر شنو جد عليها وحضن مخدتها وروبها اللي كانت لابساته مازالت ريحتها فيه ورقد كعادة دائمة عند زين لما يقلق يرقد وبس
...............
احمد..مازال راقد ياعمي
يوسف ..اصلا كان ناض توا يبدا غريبة
احمد..به حد ركبله الشقة شافه
يوسف ..جاء زياد المغرب دق عليه مفتحش ليه
احمد.. كان نعرف بس شنو اللي صار مع جنة بس اللي خلاها تسيب كل حاجة وراها
يوسف ..الله واعلم
احمد..بنركب نجرب اندق عليه في وضع زي هذا المفروض مايرقدش لان هكي خطر عليه وبالذات وببعد جنة عليه مرات ينسحب من الحياة لاقدر الله
يوسف ..اركب ياولدي بالك يفتحلك
*وركب احمد لزين وقعد يدق عليه
احمد..افتح يازين النوم مايصلحش بيك
لازم انفكرو في حل الحكاية فيها ان افتح يازين
*وفتح زين الباب واندهش احمد من شكل زين اللي تقول ليها شهور مفارقاته مرته مش يوم يعتبر مازال ماسكرت 24 ساعة  زين اللي لما حب عطى للحب كل شئ كان شكله ذابل بمعنى للكلمة من معنى وشعره رغم نعومته منكوش بوضوح من توتر زين يشد فيه ولبسته اللي مش مرتبة عن غير عادة زين نهائيا
زين بصوت تاعب..إن  شنو يا احمد
احمد ..صحصح معاي يا زين معقولة هذا شكل واحد كاين راقد
زين ..مارقدتش يا احمد لاول مرة نبدا مهموم والنوم يجافيني في بعدها حتى عاداتي معنداتني كانهن يعاقبن فيا على بعد جنتي عليا
احمد باستغراب..امنا ليش مافتحتش الباب لزياد لما دق عليك
زين بصوت مهموم ..مانبيش نشوف حد حتى وجهك غير حسيت في كلامك ممكن حاجة تريحني
احمد..اولا خليني نكلم عمي حسن يديرلك عصير ليمون
زين ..قهوة نبي قهوة
احمد..به قهوة وعصير ليمون
زين ..هي قولي شنو اللي تفكر فيه
*وبعد احمد وصى الشيف حسن على عصير الليمون والقهوة
احمد..جنة كانت راضية وانت قلت ومتأكد انها راضية
زين بتنهيدة .. ايه والله راضية لان الليالي اكبر اثبات كنهدا مستحيل تكون معاي كل ليلة اروع من ليلة اللي قبلها
احمد..به شنو اللي جد عليها تو وقبل ماتمشو تخطبو فايزة بيوم
زين ..مش عارف يا احمد مش عارف ماهو لو انا عارف ليش تايه هكي انا امنا
احمد..انت هذا فيش فالح اللي محيرني كيف في التجارة قدرت تكبر الشركة الصغيرة لكبيرة ومحل لعرم محلات كيف عقلك التجاري هذا مش ناجح في امور حياتك
زين ..احمد والله ماني حامل فلسفتك عليا
احمد..بسيطة يازين سئلت عمي حسن اذا جاء حد لجنة الصبح فقالي انه كان برا لكن لما روح لقى في المطبخ سفرة فيها  طاستين عصير وشوكلا ولما طلعت برا اللي سئلتهم كان شافو سيارة الاولاد في الشارع قالولي سيارة هونداي سانتافيا بيضاء درست قدام الڤيلا بس ماطولتش
زين ..ولا كونان  باقي
احمد..وهذي وظيفة الصاحب لما صاحبه يطيح في مشكلة ويوقف عقله
زين ..هونداي سانتافيا بيضاء منو اللي عنده نعرفوه سيارة زي هذي حتى ملك وليلى سيارتهم وحدة سوداء ووحدة دمية
احمد بنفاذ صبر ..فايزة يا زين فايزة
زين بصدمة ..نعم
#حياة