سمرائي عذرا

الفصل السابع عشر

#سمرائي_عذرا
الفصل 17
زين ..انا شفت فيكي الغريق اللي بيتعلق بقشة وانتي القشة والتوبة اللي بتكون على ايديك شفت فيك سعادتي اللي حسيت بطعمها من لما تميتي على ذمتي وكبرت سعادتي ووصلت للسماء امس لما تميتي لي فعلياً  وببرائتك وانوثتك الطاغية اللي ماحد اكتشفها الا انا شفت فيك الحياة وانا ثابت على صلاتي ومش بس ثبات حتى  الفجر اللي تميت نصلي فيه حاضر شفتي قديش ليا انتي تميتي ياجنتي في الدنيا
جنة بحب وعيونها مرقرقات ..ربي يحفظك ليا
زين وخذاها في حضنه..وليش الدموع اللي نشوف فيهن يبن ينزلن
جنة بتوتر .. من الفرحة يازيني
زين نحن مش في حوشنا
زين  وهو يباعد فيها على حضنه ..معاك ننسى الدنيا
هي نروحو اليوم الاثنين والعشاء مشاوي زي المعتاد وباتي اليوم كلم احمد واميرة  ومارو وزياد وملك وعماد
جنة ..هي حتى نعاون عمي حسن
زين ..لا انتي اليوم ملكة تأمري بس ماتنسيش انك عروسة مازالتي
جنة بخجل ..حاضر
*وهما راكبين السيارة رن هاتف زين واستغرب لما لقاه عماد
زين ..السلام عليكم
عماد ..وعليكم السلام كيف حالك ياعريس
زين ..بخير الحمدلله
عماد..دوووم الحمد بنقولك زين كان جنة قريبة منك خليها تفتح فونها ملك تتصل بيها وتلقى فيه مقفل وكلت دماغي بيش نتصل بيك
زين ..حاضر تو نقوللها لكن مش انتو بتجو للعشاء
عماد.. لا والله مشغولين شوي
زين ..ربي يعاونكم لكن هكي جنتي حتزعل
عماد..تو لما ترن على ملك تو تفهم منها 
زين ..خلاص حاضر تو نقوللها تو
عماد..سلام
*وسكر زين الفون وقال لجنة تفتح فونها وتتصل باختها
عماد ..تعرفي ياملك ربي جزاها على قد نيتها اختك هذي
ملك ..عليش
عماد..تو وانا نكلم في زين قديش حلوة منه كلمة جنتي وهو يقول فيه بكل حب وبدون حشم وبفخر ان جنة مرته
ملك ..الحمدلله ربي عطاها وفرح قلبها انت لو تشوفها تو ماتعرفهاش بعد ماوزنها زاد كيف تمت انثى بكل  ماتحمله من معنى ان شاءالله ربي يسامحنا علي درناه فيها
عماد.. باذن الله حيسامحكم طالما جنة نفسها سامحكتم وفرحتها انكم معاها هذي بروحها سادة
ملك .. مستحيل نبعد عليها ثاني لو حتى امي تقعد زعلانة مني لفترة طويلة
عماد..حاولي تراضي امك بدون ما اضري  جنة
ملك ..والله حتى انا نحاول معاها لكن اني نتخلى على اختي مرة اخرى مستحيل انت ماشفتش موقفها مع مالك ولد ليلى وبعد اللي دارته فيها ليلى المفروض تشمت فيها لكن هيا ابدا بالعكس وجعها وقالت عادي تتبرع ليه لو ملقوش متبرع خصوصا وسبحان الله مالك فصيلته زي جنة
اهي جنة تتصل
جنة ..السلام عليكم
ملك ..وعليكم السلام كيف حال احلى عروسة
جنة بحب..الحمدلله باحلى حال
ملك ..دووووم يارب
جنة ..ان شاءالله خير ياملوكة قالي زين ادوري فيا وليش مش جايين للعشاء
ملك ..خير اكيد ياعروسة ياحنة قبل بنديرلك عشاء بكرة عندي لكن خواتنا اعترضو قالو انتي كنتي مسافرة ومادرتيش اسبوع فقررنا انا وليلى واسماء والسيد جمال ان بكرة بنديرولك اسبوع في حوش بوك بما انك عروس طلعتي من حوش زياد ومن غير اي كلمة اعتراض بكرة بتجيك الكوافيرة اللي طلعتي عندها في فرحك بيش تمكيجك وتلبسك عربي
جنة ..بس ياملوكة العربي يبي حنة وانتي عارفة زين مايحبهاش بكل
ملك ..شوفي به حنى هندية ثلاثة ايام وتحول ومافيهاش ريحة
جنة ..حنسئل زين ونرد عليك
زين ..عادي ياجنتي اللي تبيه ديريه نتحملها على خاطرك
جنة ..خلاص ياملوكة زين قالــ
ملك ..سمعته ياعروسة ربي يهنيكم ببعض
جنة بحب ..امين يارب
بس انا مانندريش على ذهبي عند مارو ماشفتاش لتو
ملك ..اطمني زين جابلك ذهبك كامل حتى من الخلخال وجايبلك ذهب رقيق واجد
جنة ..والله تصدقي نسيت اني نسئل عليه بكل
ملك ..لان قلبك ابيض وعمره ما اهتم بمتاع الدنيا فربي عطاك راجل جابلك كل حاجة بدون ماتطلبي
جنة بحب ..ربي يخليه ليا
ملك ..امين يارب وعلى العموم مارو بتجي للعشاء وبتجيب معاها الحناية ومعاها الذهب
جنة بضحك ..ههه انتم منسقين كل حاجة
ملك ..اكيد اصلا انتي ماينفعش معاك الا سياسة الامر الواقع
جنة بضحك ..عند حق
ملك ..هي سلام وراي شغل واجد
جنة ..ربي يعاونك يارب
ملك ..جنة
جنة ..نعم
ملك بتردد..جنة بنقولك راه مكلمين عمامك كلهم وعماتك ان شاءالله ماتضايقيش
جنة ..عادي حبيبة اللي بديروه ماشي
ملك بفرحة ..تمام ياعروسة
جنة ..سلام وربي يعاونك
ملك ..امين يارب
زين .. ملك رجعتلك بقوة واندفاع
جنة بضحك ..اه كأنها بتعوض اللي فات بكل سرعة
زين ..ربي يخليكم لبعض بس
جنة ..بس شنو يازيني
زين ..ميلاد
جنة ..كنه
زين ..اكيد بيشوفك لان مش معقولة عماد وعبدالله بيسلمو عليك ونقول لميلاد لا
جنة ..ماتخافش ميلاد تغير وجاء قبل مانبقى مراتك
زين بعصبية ..شفتيه وماقلتيش ليا ليش ووين شفتيه اصلا
جنة بهدوء..زيني حبيبي انا شفته قبل مانكون مرتك وشفته وين جاء للحوش عند زياد وحكى معاي وتأسف علي صار  منه
زين..احكيلي بالزبط شنو دار بينكم
جنة ..حاضر
*وحكت جنة لزين الحديث بالزبط اللي دار بينها وبين ميلاد وتفهم كلام جنة
زين ..آسف على عصبيتي لكن ماتلومنيش سمرائي
جنة ..معاش تتآسف حبيبي
*ووصلو للحوش قبل المغرب بشوي وركبت جنة بعد ماسلمت على عمها يوسف وخلت زين معاه مقمعز يستنى في مارية وزياد والحناية غيرت دبشها وجهزت على خاطر الحنة واذن المغرب ونزلت باسدالها وصلو جماعة هي وعمها يوسف وزين وعزالدين والشيف حسن وكانت سعادة جنة كبيرة انهم صلو جماعة وهما كملو صلاة على جية زياد ومارية والحناية وركبن فوق وخلو الرجالة تحت والحناية بدت ترسم لجنة في الحنة وخشت عليهن اميرة عشان تكمل جمعتهن اللي ماخلاتش من الضحك بسبب خفة دم اميرة وكملت الحناية وروحت وقعدت مارية توري في جنة واميرة الذهب
اميرة ..ليش زين مايحبش الحنة
جنة ..لانه يقول يحب الحاجة بطبيعتها حتى المكياج مايحبش اللي تحط فيه بكثرة قال المكياج داروه عشان يرسم الملامح او يصحح حاجات لكن انه يغير بكل ويكون بكثرة مايحباش
اميرة ..حي عليك بكرة شنو بيقول لان العربي لازم مكياج اوفر
جنة ..والله ماني عارفة
مارية ..حتى انا لما كنت نمكيج وانا بنت كان يعارك فيا ويقولي انتي مش مستحقة وتخيلي كان فارض عليا واقي شمس بس وهو اللي يشرلي فيه يبعث عليه من مصر
جنة ..زين عنده حق اصلا انتي يامارو مش مستحقة مكياج بكل
اميرة ..هي ننزلو رايفت على حمودي طالما حنتك جفت وغسلتيها 
جنة ..حمودي الهيبة هذي كلها واخرها حمودي
مارية ..ردي بالك تقوليها قدام عمي والله لدنه لابس احمد عليها
اميرة ..هههههه لا ماتخافيش فاطنة لروحي لان والله لو يسمعها عمي ماعاد نخلص اللي اندير فيه في الناس يطلعه عليا
جنة ومارية ضحكن واجد على اميرة ومقالبها في احمد بالذات
مارية ..جنة فيش ادوري
جنة ..اندور في جوانتياتي وشخاشيري
اميرة ..عليش ماهيش حنة عربية عشان بيش تصبغ
جنة ..مش عشان الصبغ مانقدرش ننزل هكي قدام عزالدين واحمد
اميرة ..كيف بدل ماتقولي عمي يوسف قبلهم
جنة ..لا عمي مش محرم لي
اميرة ..مافهمتش
جنة ..نفهمك ياستي عمي المعاملة معاه تكون من باب الحشم بس زي بابا لانه مُحرم عليا ليوم الدين سوى انا على ذمة زين او لا عكس السلف واخت الزوجة
اميرة ..مافهمتش
مارية ..حتى انا
جنة ..عمي يوسف طالما انا تزوجت ولده فيحرم عليا ليوم الدين سوى انا انفصلت على  زين لقدر الله او بعد عمر طويل زين ميت عكس السلف يكون مُحرم مؤقت لانه بمجرد موت الزوج او الانفصال يقدر يتزوج مرت خوه وزيها الاخت فهذا ليش اسمه مُحرم مؤقت وليش ديما المرا تكون محتشمة قدام سلفها او راجل اختها وتخلي المعاملة بينهم بكل احترام لان الشيطان شاطر ويخش هلبة في العلاقات وقديش مشاكل صارت وقديش اخ حب مرت خوه وقديش اخت حبت راجل  اختها  والسبب الدلاله الواجدة بحجة انه مُحرم وناسين انه مُحرم مؤقت عكس ام واب الزوج او الزوجة محرمين دائمين
مارية ..الله ينور عليك واول مرة نعلم بيها لان بحكم ماعنديش اخ لزياد
جنة ..حتى لو عنده ياقلبي كنت حنشرحه لك زي ماشرحته لخواتي اول ماتزوجن رغم انهن كانن دايرات روحهن مش معدلات عليا لكن الحق في تعاملهن مع رجالات خواتهن واسلفاهن بكل احترام في بصارة ودلانية لكن بدون تعدي حدود الاحترام
اميرة بعصبية ..ماهو واضح انهن يسمعن فيك بحكم اللي دارته فيك ليلى
جنة بهدوء..ليلى اولا كانت صغيرة وكانت بنت امها بالدرجة الاولى وكانت تسمع في كلامها واجد رغم اني مرة سمعت اسماء وهي تعارك في ليلى وبعدها حتى ميلاد ماحبنيش لان صدقيني لو حبني لا ليلى ولا اهله قدرو يغيروه عليا لكن الحمدلله (عسى ان تكرهو شئ وهو خيرا لكم) والف الحمدلله لان بلي دارته ليلى ربي رزقني بزيني احلى حاجة حلوة صارتلي
اميرة ..قدرتي تحبيه وتثقي فيه وانتي عارفة تاريخه
جنة بحب ..اه نحبه واجد واثقة فيه اه واثقة واجد عارفة يا ميرو لما اجنبي كافر يدخل للاسلام نلقوه واخذ الاسلام بجميع اركانه وبدون اي غلط لدرجة انقولو هذا ان شاءالله من الدنيا للجنة طول لما يموت زين هكي زين قرر انه يتغير ولما الانسان يقرر وبتصميم يكون ثابت على قراره زينو هكي واختارني بيش نساعده انه يثبت على تغييره وان شاءالله ربي يقدرني بحبي واهتمامي انه يبقى هكي
زين
انا كنت راكب بناديهن عشان يجن يتعشن لما طولن مانزلن خصوصا ان مارو قالت لي الحنة تاخذ نص ساعة بس بعد الرسم والحناية ليها قريب ساعة ونص طالعة فسمعت اميرة تحكي بصوت عالي واميرة هذي مشكلتها لما تتعصب معاش تركز فسمعت اسم ليلى وقديش عجبني رد جنة عليها وكل مرة نتأكد ان جنة اختيار عمري اللي اخترته صح 100%
زين ..هيا يا مدامات العشاء جاهز
جنة ومارية واميرة ..نازالين
زين باستغراب ..جنتي كنك لابسة شخشير وجوانتي
جنة ..ماهو مانقدرش نمد ايدي وهي مزينة بالحنة قدام احمد وعزالدين
زين بحب..ربي يحفظك ويكملك بعقلك يا سمرائي وباسها على راسها
مارية ..احم احم
مانكمش بروحكم
زين ..شنو تشوفي فيا اندير بوسة على الراس بريئة
مارية ..يا راجل تي اميرة نزلت تجري من لما قربت من جنة حست في حاجة بتصير
زين بمكر ..وانتي كنك مانزلتي معاها والله تبي تشوفي
مارية ..خزيه يا بارد قبل بنلم الذهب انا وجنة
زين ..خلوه تو نلمه انا وياها بعدين هي العشاء تو واتي وحتى زياد قال لازم تاكلي عشان دواك
مارية بتأفف.. اف امتى بس نفتك من هالدوء
جنة ..هانت حبيبة انتي تو في نهاية الخامس والدكتورة قالت بتاخذيه لنص السادس
زين ..هانت معناها اسبوعين وشوي
هيا ننزلو
جنة ومارية ..هي
زين بهمس لجنة ..انا ماشفتش حنتك
جنة بنفس الهمس..تو تشوفها بعد مايروحو
زين بصوت عالي ..الصبر يارب
مارية باستغراب ..كنك يازينو
وكانو وصلو لزياد واحمد واميرة وعزالدين ويوسف 
زياد..بتركزي على زين تتعبي يامارو
مارية ..عندك حق
*وتعشو وطبعا زين يحط في الشواء في الخبزة ويعطي فيها لجنة بكل حب يوكل فيها وكان عشاء حلو مليان حب واهتمام وضحك بالذات احمد واميرة وبعدها كل واحد روح لحاله وركبت جنة ولبست روب قصير والحنة كانت رسمتها حلوة وطلعت عليها وطلعت على زين *
زين ..انا مانحبش الحنة لكن تو شكلي بنحبها
جنة ..حلوة صح طالعة
زين ..تهبل طالعة عليك وحتى نقشها لطيف ومنسق مش حاجة محطوطة على بعض
جنة ..تصدق عمري ماحنيت لان ديمة خالتي هنية وخواتي يقولولي على خاطر لون بشرتي مش حتبان
زين ..حسسوني انك فحمة وهو انتي تعتبري قمحية داكنة برونزية تهبل الفنانات يدفعو في فلوس عشان بشرتهم تكون هكي وانتي ربي عطاه ليك نعمة
وبعدين من وين هالروب السمح انا ضميت الدبش ماشفتش ولا روب ليك
وقلت اكيد عشان اتفاقنا
جنة بخجل ..ماهو لما عرفت روحي اني نبيك اتصلت بمارو ونحن في المالديف على خاطر تاخذلي مجموعة ارواب وفي ارواب حجزتهن من الفيس ووصلوهن  لعند حوش زياد واستلمتهن مارو 
زين ..ربي يخليك لي يارب
هي سمرائي تعالي ناخذك في حضني لان بكرة حيكون يوم طويل ومتعب
جنة ..ربي مايحرمني منك
*وعدو في سابع نومة وجاء ثاني يوم وقررت جنة انهم معاش بياكلو بروحاهم حيفطرو ويتغذو ويتعشو مع عمها يوسف وزين بفرحة وافق وبعد الفطور مع الظهر جت الكوافيرة ومكيجت جنة ولبستها العربي وطلعت حاجة من الاخير خصوصا ان لون البدلة اخضر وذهبي ولبستها الذهب وكان زين داير مفاجأة لجنة انه لبس زبون عشان ملك وقضاته انهم جايبين مصورة بيش زين يخش مع جنة ويصورو بيش يرجع حق جنة ولو شوي بانها ربي عطاها على قيس نيتها وانها تزوجت شاب مصنع منع لانهم متوقعين عريس اي كلام تزوجته جنة بحسب التلقيح اللي لقحوه على ملك وهي تعزم فيهم وخش زين للشقته بعد ماروحت الكوافيرة ومارية طبعا ماجاتش لانها مشت لحوش عربها بيش تعاونهم فالكوافيرة جت معاها اميرة وروحت هيا وياها ولما فتح باب الشقة لقى جنة تستنى فيه
زين ...........
جنة
بعد ماطلعت الكوافيرة واميرة وشفت روحي في المراية فعلا هذا وين حسيت بأني عروس لكن خايفة من ردت فعل زين على المكياج لاني حسيتها ثقلاته واجد خصوصا انه لما جت الكوافيرة قالي كان ماعجبنيش المكياج تحوليه مستحيل تطلعي بيه وقررت نستناه عند الباب هو فتح الباب وكان لابس زبون طالع لاقوة الا بالله لدرجة حسدت روحي اني متزوجة راجل زيه لكن هدوئه ومانطقش ولاحرف خوفني بالزايد
جنة بتوتر ..كنك زيني كنك ساكت شنو مش حلو 
زين ..
#حياة