من انت ومن تكون لتسكن جوف قلبي باوامرك
ومن انا لانفذ ماذا عن كبريائي وعنفواني ماذا عن شخصي وشخصيتي
ماذا عن جنسي وجنسيتي
جنسي ومن انا
ا. الى حواء انتمي ام من صنف ادم
مذ وجدتك وجدتني وجدت نفسا تاهت بين هفوات الجنون بين ذاتي وقله حيلتي وبين عنادي وكبريائي وجدت نفسا بريئه لم اكن اعلم بوجودها
اخلقت بعد حين
ام كانت ميته او انا التي لم اشا ايقاضها من سباتها تمسكت بك بكل قواي بكل حيويتي
الا انك لم تكتفي
بي كانثى افلتت يدك يدي وجدت نفسي لوحدي جريحه بك حلقت بي لعنان السماء وتركتني اسقط لوحل الارض
اكتملت بك وحين تركتني وجدت نفسي ضائعه غير مكتمله
لست ذكرا. لاقوى على الصبر
ولست بانثى
اصبحت هشيما مابقى مني انتمى الى
بقايا حواء
مريم السعدي
------------------------------------------- بتاريخ 19-5-2015. --
مغربيه صافن عالسما من بلكون الشقه بشارع فلسطين واسمع نعيق الغراب بوجهي صاح لزمت كلبي ياحافظ يارب --امي الله يذكرها بالخير جانت تكول مو خوش فال صياحه وره ساعه من كعده الولد والنارجيله والضحك الشقه متروسه اربع غرف وصاله ومطبخ وحمامات بكل غرف متروسه ولد شباب واحدنا يعزم الثاني صرنا سله عافو القسم الداخلي واجو غاد يمي كلنا من الموصل بس اصول ديوانيه خزاعل واستوطننا الموصل من جنت طفل لان والدي اشتغل بحقل عين زاله للنفط. بعدها اشتره كيعان ووزعهن على اخوته يشتغلون بيها واشترينا مجمع بساتين الحنطه والشعير والذره. تجار سوك النبي يونس يتراكضون عليها بموسم الحصاد اخوتي 2و8بنات كلهن مزوجات وانه الصغير مع العلم ابوي مهندس نفط بس ماخله وحده بيهن تكمل كلهن متوسطه تجي قسمتهن ويمشيهن اغلبهن كرابه اليردوهن والهن بالحسن والخلق حصه فمايوكف بطريق قسمتهم اخوي ماوصل متوسطه وضل يعيد السنين بيها ابوي بهد ماايس منه دزه لعمامي يشتغلون بكيعانه ابوي بالرغم من ما عمامي جانو بالديوانيه فلح عد العالم وماعدنا بس بعد مااشتغل بالنفط طك وضل يشتري كيعان ويذب فلوسه عليهن اثاري نيته جانت يسحب عمامي ليمه وفعلا سحبهم وكعدنا كلنا فد بستان ناس بصف ناس انه الصغير ابوي ماخله شي ماعلمني عليه بعد ماايس من اخوي الجبير منتظر
تلكاني بالتفك تفاك
بالاخلاق والشيخه انه سابگهم
وبالسباعيه اخو خيتي وخل ينخاني بين اخوتي وجماعتي فرد اذا مالكاني ادكن صدر اكون معتب وهذا انه درست ونجحت ابوي بدل المدرس خلالي عشر والحمد لله رفعت راسه وانقبلت طب بغداد وماقصر بعد وياي خلاني انزل العاصمه واشتري شقه واكعد بيها بكان القسم الداخلي وانه الكمت استقبل ولد ولايتي من يجون عالجامعه اذا كان قبولهم بغداد ماقصر وياهم لحد ما يوم اغبر واغم فجعنا كلنا -----
الو لك الوووو محمود اهلي ماكو
ابو ذيبه انه رايح هسه لبزيبز بس هالمعبر مفتوح وتعال شوف الملاطم مالت العالم لك مافتحوا بس للللللنسووووان
لك محمود انه وين الاكيهم كلي قبل يومين اتصلت كالولي كلشي ماكو هساع اتصل تلفوناتهم كلها مغلقه لك انت وينك ماشميت ريحه من اهلك
ابوذيبه اكلك المطافر ماله والي الدواعش طابين وماخذيها عمي اخر تلفون من اخوي كال انه جايب الولد واهلمجنا وجايك هالحجي من الصبح
انه هم من اتصلت كالو راح نجي لبغداد وي ابو محمود واهله فد طلعه ولك ولا واحد منهم انت وين ماتفهمني
يويل دارد اكلك انه بعد شوي اوصل لبزيبز وتعال شوف العالم ولك بس نسوووان مادخلو الزلم
خرب ----- هسه انه شسوي فهمني
لتسوي شي بس طلع جماعتك من الشقه فرغها لاهلنا يابا
هاي هيه كول تم بس اشوف اهلي ولك مارايد شي بالله الكريم بس كونهم بخير
كول يا الله ابو ذيبه
يا اللله يا الله. راح محمود صاحبي ورفيج عمري من الاعداديه بقيت الوب وافرك بيدي لابيه اروح وراهم خاف يجون عالعنوان النطاهم اياه ابوي لان كالي محمود بس حريم طبو ولا بي الحك محمود بقيت عالتلفون لحد3ايام ماشفت النوم بيها وصل طارش من اخوي انه اخذوهم لكربلا بالحسينيات اتصلت بي وتواعدت وياه بمكان ورجتله واخذت كوستر لميت كل اهلي وجبتهم جاي الوجوه مجفيه وتعبانه امي ذهبها مبيوك بالدرب واختي الجبيره همات بس الصغيره ابوي وعمامي ضلوا ماقبلو . يهدون حلالنا الكوستر كله بشقتي صار بس نسوان وبيهن بنات عمامي وبنات خالتي وبنات عماتي كلهن حديثات مايتفسر الالم اللي بوجوههم ولشوكت باقين انه ومحمود طلعنا من الشقه محمود هد اهله عد اهل نسيبه بكربلا لان فتحت بيوتهم للعالم. الوضع مرعب ناس هاجه من بيوتها الكل تتباجه وخايفه ليوين ولشوكت باقين مانعرف الحمد لله من سلمو منهم اسمع قصص بلاوي من يوم طب الجيش ليهسه تركنا الشقه وكعدت قسم داخلي بديت احسب شكد عدي مصرف وخليته بيد امي والعدي هم يله يكفي ال30نفر شهرين بالزايد خواتي نطوني ذهبهن بعد الشهر ماخلص وبعته وبعد سيارتي بعد وابوي مااسمع عنه خبر ولا عمامي اتصالات اتكطعت والرايح والجاي اساله يكول ماموش خبر احوالي تدهورت ابوي ماجاي استوعب الصارله واخوي من اول سبوع اشتغل سمكري بعد ماحان يشتغل بحلاله بس الجان ليله نهاره يشتغل مايعرف يكعد بعد ومشت الايام مده ست شهور اجه واحد من عمامي كوه فار مناك وكاللنا الخبر ابوي متوفي الدنيا وكعت من عيني امي الجبل تصبر بينا وانه واخواتي واخوي عافيتنا انباعت تعبنا بذيج الفتره حيل لحد ما خلصت هالسنه بتعب وضيم احس روحي جن كبرت 10سنين فوك عمري خلصت فلوسي ومكدرت انطي حتى قسط الداخلي تالي طلعت منه رحت للشقه اباوع بالهول متروس نسوان وجهال والغرفه هم متروسه محمود خذاني وطلع كال تبات بالشارع ولا تبات هينا تعب تفكيري محمود حالته شوي احسن نسيبه يطرشله انه الكمت ادور شغل بعد منجحت هالسنه وصرت رابع طبيه امي شغلت خواتي وبنات عماتي وعمامي نسوانهم اللي تبيع كبه واللي كيك واللي تخيط واللي تطرز ردت اتخبل انه وين اروح اشتغل وين انطي وجهي ومستقبلي اخده امي رفضت كالت ابوك جان يحلم بيوم التجي دكتور وانت تهد حلمك عود من اموتن انت شتريد تسوي سوي خواتي وبناتنا كلهن باب الشقه مايطلعن بس نسوان عمامي وامي يجهزن مسواك البيت احتياجاته وانه يطرشون واحد من الصغار علي للقسم الداخلي بعد فرعين عننه الاكل والهدوم بعد غسلها وكويها هالحال طولت ومالكيت حل لحد مايوم حارس الجامعه كال لكيتلك شغل
بشرك الله بالخير كول
كال
حارس ثانويه بنات جاي يمنا بشارع فلسطين بقيت صافن ووافقت راسن كال من الاربعه وفوك وهم مكان تبات بيه وينطوك صفين اذا تريد تجيب اهلك بقيت افكر فاتحت امي كالت توكل بالله واخذ اختك انصاف وضفاف لان بناتها بالثانويه بلجن يخلوهم بيها ولو مستمعات واقلها تقل الهوسه هينا بالشقه وفعلا اخذتهم ورحت بليل طبينا وشفنا الصفوف كبار 2وصف واحد صغير اتفقت وي انصاف اختي الحبيره الها صف وضفاف الها الثاني وانه الصف الزغير تاكدت المدرسه مابيها ولا استاذ زلمه ولا مدير ولا اي احد يبات هنا غيري زلمه الحارس مال مدرسه بوقت الدوام حارس من الشرطه التربيه معيتجنته ببكت انتهاء الدوام يروح يعني اامن على خواتي ارتاحن خواتي وكيفن بعد الحصره الجانت هناك اخذن راحتهم الله يعلم شون جانت بيوتنا كامن عدنا غرفه بكد هالصف مرتين بس شنسوي لله الحمد املاكنا وبساتيننا خذوها الكفره المايخافون الله باسم الدين دخلولنا بس على حجايه اني هاذ اختبار
امي اصلها مصلاوي وامها من الديوانيه واخذها ابوي الله يرحمه هالفتره هواي تغيرت قسيت حيل وصرت مااضحك بعد كاجنت اتخبل اذا اشوفن واحد مبوز واروح كوه اضحكه صار الضحك عدي شي غريب وكلبي دومه معصور ابوي هد حيلي وثكل حملي بس يبقى عدي امل باجر عكبه يرجعون واكدر الزم الحلال انه واخوي ونعيشهم بنعيم ابوي القديم بس السالفه طولت انصاف وضفاف كدرت ادبرلهم واسطه وسجلت بناتهم بالثانويه وخواتي يشتغلن حتى المدرسه ينضفنها يغدوها مرايه المدرسات كيفن عليهم تالي وكت انه خواتي يشتغلن منضفات استغفر الله والحمد لله جان راتب الحراسه شي قليل وانطي بيد انصاف ايام مرت طويله وانه هالسنه رابع بديت اطبق وكل وكتي دراسه الشغله ناسبتني حيل لان اكضي الليل ادرس لاجل حلمي وحلم ابوي وياخذني الحنين ويجيبني لايامه واحن لصوته من يكول
بويه ابو ذيبه انه مخليك للزمن ثاري ابوي يقصد هالوكت الاغم الحمد لله ربي -------
من هنا بدات الحكايه
قصتنا اليوم تحجي عن ابن خير والدنيا افترت عليه طلعت الدلال التدلله بس نفس الوكت بقه ابن خير الامام علي عليه السلام عده مقوله كال بيها
اطلب المال من بطون شبعت ثم جاعت فالخير فيها اصيل ولا تطلب المال من بطون جاعت ثم شبعت فالخير فيها دخيل
سلام الله عليك سيدي ومولاي
القصه طويله وماريد اقصر باي حدث بيها لان بيها تجارب وعبر
القصه انقلت عن طريق البطله حرفيا هالقصه تعبتني قهرتني وفرحتني لكيت بيها الامل والتحفيز اللي احب انشره بقصصي حبيت البطله واحترمتها جدا اخليكم بالاحداث--------
