انا بشتغل حارس امن في مستشفي في وردية الليل، مبني المستشفي قديم ومكون من 7 ادوار، اتبني تقريباً سنة 1800 وكان كلية لدراسة التمريض قبل ما يتحول لمستشفي من فترة كبيرة وجنبه مبني صغير مهجور بنستعمله كمخزن مهجور للمستشفي.
شغلي كحارس امن في وردية بتبدأ بالليل بيخلي المطلوب مني سهل وبسيط، مطلوب مني التعامل مع المرضي اللي عاوزين يهربوا من المستشفي او الناس اللي عاوزين يتسللوا لزيارة حد في وقت غير وقت الزيارات، او حد عاوز يسرق مورفين او اي مخدر تاني من جوا، انا وزميلي في الشغل بنقعد في كشك صغير برا المستشفي، بصراحة المكان بالليل بيبقي موحش ومخيف، بس مهما كان المكان برا مظلم ومخيف، كنت بفضل اكون برا علي اني اقضي وقتي جوا مبني المستشفي بالليل او الاسواً اني اقضي وقت جوا المخزن المهجور.
بيتطلب مننا ندخل مبني المخزن المكون من 4 ادوار كل ليلة نفحصه ونتأكد ان محدش اقتحمه، بكون حريص جداً اخد معايا زميلي في الشغل ونفضل سوا لحد ما نفحص المبني فحص سريع جداً ونخرج.
المخزن ده مخيف!
دايما بنسمع اشاعات ان المستشفي والمخزن مسكونين بأرواح شريرة، ممكن، ليه لا؟!
علي الاقل حالة وفاة واحدة بتحصل كل يوم جوا المستشفي، انا من يوم ما اشتغلت هنا مشوفتش اي حاجة خارجة عن المألوف خالص، زميلي في الورية بيقول انه طول الوقت بيسمع حاجات بتتحرك وبيشوف ظلال خافتة بتظهر ولما ببص عليها بتختفي.
كل ده اتغير لما قررنا نلعب اغبي لعبة ممكنة!
كنا قاعدين في الكشك انا وفرانك بنحاول نقضي وقت الوردية باي طريقة، بعد شوية سمعنا حد بيقرب مننا، بصينا من الشباك، كان مايك، حارس امن معانا مسؤول عن مكان تاني في المستشفي بس في الليالي المملة اللي زي دي بييجي يقضي معانا الوقت، مايك مؤمن بالاشباح والارواح والماورائيات عموماً، مايك دخل قعد جنبنا وهو بيسال: "انتم عمركوا شوفتوا حاجة غريبة جوا المخزن؟"
هزينا راسنا سوا بالرفض انا وفرانك، سألنا بقلق: "طبعاً انتم عارفين ان المكان ده مسكون"
بان عليا الضيق وانا بقوله: "مايك...كفاية"
قال بحماس: "لا دي حقيقة، المكان ده قبل مايبقي مستشفي كان كلية تمريض، بيقولوا ان الكلية كانت صعبة والدراسة شاقة وقاسية والامتحانات مستحيل تتحل، الطلبة عبروا عن احتجاجهم علي صعوبة الكلية بالانتحار"
قولتله بغضب: "دي اغبي حاجة سمعتها في حياتي"
كمل كلامه بحماس وهو بيحاول يقنعني: "5 طلبة سنة 1910 اعلنوا عن احتجاجهم علي صعوبة الدراسة بالانتحار الجماعي، نطوا من فوق السطح بتاع المخزن وماتوا كلهم"
بصتله وانا بقوله: "انت مصمم تثبتلي انك غبي"
مايك بصلي بخوف وهو بيقول: "انت مش مصدق"
قولتله بغضب: "مفيش حد عاقل هيصدق اللي انت بتقوله ده!"
صوته بدأ يبان عليه الخوف وهو بيقول: "عارف الخزانة الزجاجية اللي في مدخل المخزن، اللي فيها خمس تماثيل البورسلين اللي لابسين زي الممرضين؟"
أنت تقرأ
Already happened- حدث بالفعل
Horrorأعِزائيِ القراء دَعوني اصحَبَكَم اليومِ في رحلةَ أرجو ان تَكونَ مُمّتِعّةَ، رِحلَتَنا اليَومِ مِتنَها 23 قِصةَ مِن قِصَصِ الرُعبِ الحَقيقية الَتي حَدَثَت في اماكِن مُختَلِفةَ حَولِ العالم عليَ يَمينَكُم الآن المَزرَعَة السَوداء... مَكان خاص مَليء با...
