Already happened- حدث بالفعل

20- كارول...كارول في كل مكان

كنت قاعدة قدام مطعم مستنية اكلي لما لمحت بنت شبه كارول بالظبط، كانت لابسة جيبة قصيرة وده كان غريب لاننا كنا في شهر يناير والجو كان برد، كانت ماشية بشكل طبيعي بينما انا كنت بترعش من البرد، برغم البرد كنت واقفة برا المطعم مستنية دوري عشان برا محدش بيبص عليا، بس جوا بحس ان كل الناس بتبص عليا وبتراقبني، وانا بفضل البرد علي عيون الناس.

انا اسفة ساعات كتير بنسي انا بتكلم في ايه، هحاول اركز شوية....

علي اي حال البنت دي كانت شبه كارول بالظبط، شعرها البني وعينيها الخضرا، عيون كارول كانت زرقا بس هي هي نفس العيون، انا بعرف وبفهم في العيون كويس، انا كنت بفكر في كارول طول اليوم، الكاشير بتاع المطعم رجعلي دولار متطبق علي شكل قلب، سالته لو كان يعرف كارول، لان القلب الورقي ده من الحاجات اللي كارول بتعرف تعملها، وكارول كانت اجتماعية وليها علاقة كويسة بكل الناس في كل مكان، الكاشير بصلي بطريقة غريبة لما سألته، اكيد كارول قالتله حاجة عني.

كنت ببص لشبيهة كارول دي لما سمعت تليفوني بيرن، كانت والدة كارول، كانت بتعيط طول المكالمة وانا بكره صوت العياط، سألتني لو كنت هروحلها النهاردة ولا لا، افتكرت ان ده السبب الرئيسي اللي انا كنت رايحة المطعم عشانه، عشان الزيارة هتكون طويلة وممكن اجوع هناك فكان لازم اكل حاجة قبل ماروح.
اخدت شنطتي ومشيت ناحية الكنيسة اللي فيها الجنازة.

مشيت ناحيتها، التابوت كان مقفول، كان تصرف صحيح منهم لان الطعنات وشهت وشها تماماً، ومش هيبقي شئ لطيف لو الناس شافتها بالمنظر ده.

سلمت علي والدة كارول، بصتلي باستغراب كانها متعرفنيش، بصتلي بصة غريبة، لو الظروف كانت مختلفة كان هيبقي ليا رد فعل مختلف معاها، الموت بيخلي تصرفات الناس غريبة، غريبة لدرجة انها ممكن تنسي اقرب صديقة لبنتها، علي اي حال هي مش ناسياني، هي اتصلت بيا من حوالي نص ساعة، يعني هي فاكراني كويس، هحاول اتكلم معاها بعدين، لما الامور تستقر شوية، بس بالطريقة دي متوقعة انها ممكن تنكر اتصالها بيا بكل سهولة.

بصيت علي الصور اللي محطوطة حوالين النعش وبدأت افتكر ذكريات صداقتي مع كارول، افتكرت اول مرة اتقابلنا في المكتب اللي كنا بنشتغل فيه سوا، كنا بنوصل الشغل بدري ونقضي وقتنا كله مع بعض، روحنا بارات سوا، اكلنا في مطاعم مع بعض، شوفنا افلام سوا، كارول مكانتش الطف شخص في الدنيا، بس كنت بحبها وهي كانت بتحبني، وبسرعة جداً بقينا اصحاب ومش بنفترق ابداً.

فضلت في الكنيسة لحد ماقفلوا الابواب، الجنازة بكرة الصبح.

انا عارفة مين اللي قتل كارول.