Already happened- حدث بالفعل

21- الأضواء

مالكة البيت اللي قبلي كان عندها خوف رهيب من الظلام، كانت بتقول ان في شئ شرير بيعيش في الظلام جوا البيت، جلوريا اكيد عرفت اني من الناس المؤمنين بالخوارق والمهتمين بيها فقررت انها تحبك الكذبة دي عشان تعلي سعر البيت شوية، السمسار قالي ان سعر البيت ممتاز والمقاول قال انه مش محتاج اي تجديدات او تصليحات تقريباً، مضيت العقود وتجاهلت كلامها تماماً.

حاجة من الحاجات الغريبة اللي في البيت كانت مفاتيح الكهرباء، عادة مفتاح الكهرباء الخاص بكل اوضة بيكون جواها لكن في البيت ده كان الموضوع علي العكس تماماً، مفتاح الكهرباء الخاص بكل اوضة كان برا الاوضة، انا فاكر جلوريا وهي بتفرجني علي البيت كانت بتفتح النور من برا وتنتظر ثواني وبعدين تفتح باب الاوضة وتسمحلنا ندخل، الموضوع كان بسيط ومش مؤثر وخلال شهر تقريباً كنت تعودت علي ان مفاتيح الكهرباء كلها برا الاوض، وخلال الشهر الاول تقريبا محصلش اي حاجة غريبة نهائياً.
في ليلة قومت من النوم عشان ادخل الحمام، بقالي هنا شهر فكنت حفظت تفاصيل وخريطة البيت خلاص، مشيت في الظلام من غير مافتح اي نور، اثناء ماكنت في الحمام سمعت من ورايا صوت "بسست" واضحة جداً، جسمي كله اترعش ولفيت ورايا بسرعة عشان اسوف مصدر الصوت، خرجت فتحت النور من برا الحمام ومكانش في اي حاجة، ممكن صوت من مواسير السباكة او فتحات التصريف!

مرة تانية بعدها باسبوع كنت في الجراج وحبيت ادخل الحمام فدخلت حمام الجراج، سمعت صوت باب الحمام بيتقفل عليا بهدوء لوحده، المكان كان مظلم تماماً، بدأت اشم ريحة كريهة جداً، ريحة زي ماتكون خليط يين العرق والعطن والقئ، فتحت الباب وبدأت الحمام ينور مرة تانية، فوراً الريحة اختفت لكن الحيرة والتساؤل فضلوا معايا طول اليوم، اكيد في حيوان ميت برا البيت هضطر ادور عليه وابعده عن البيت بكرة.

بعدها باسبوع كان الجو عاصف وممطر، البيت كان قديم والكهرباء بتاعته قديمة، لوحة التحكم الرئيسية توقفت عن العمل وسابتني لوحدي في البيت وسط الظلام، حسيت كأن في حاجة حية معايا في البيت، جسمي كان بيترعش وانا حاسس بتواجد تقيل وكئيب بيسيطر علي الاجواء كلها في الظلام، لكن قلبي وقف لما سمعت صوت ولد وبنت صغيرين بيضحكوا ضحكة شريرة من ركن الاوضة، جريت بعيد عنهم، حسيت كأن حد بيحاول يمسك رجلي في الظلام عشان مابعدش عنهم، جريت برعب ناحية لوحة التحكم الرئيسية، كنت شامم الريحة الكريهة وهي بتنتشر في البيت كله، الظلام كان دامس، بدأت امشي بايدي علي الحيطان وانا بحاول اتلمس طريقي لهناك، حسيت بقشعريرة بتجري في جسمي كله وخوف رهيب بيسيطر عليا، بدأت اسرع خطواتي لحد ماوصلت لباب القبو، فتحت الباب وبدات اتلمس خطواتي للسلم، نزلت القبو....اكتر مكان مظلم في البيت كله!

السلالم الخشبية القديمة كانت بتئن تحت رجلي وانا نازل السلم ببطء وسط الظلام، انا مشوفتش مكان لوحة التحكم الرئيسية الخاصة بالبيت غير مرة واحدة بس ومكنتش مهتم بيها بصراحة، مكنتش عارف اني هحتاجها في يوم من الايام، كنت بتلمس حيطة القبو بإيدي وانا بدور بفزع، سمعت صوت عميق وفيه شر وحقد بيقولي بغضب: "ناحية...الشمال"

حركت ايدي ناحية الشمال وانا بترعش من الخوف لحد ما لمست اللوحة.

سألت صوت مليان خوف وبيترعش: "انت مين؟؟...انت فين؟؟"

لكن مكانش في اي رد، بس الحضور المقبض الكئيب بيسيطر علي المكان اكتر والريحة الكريهة بتنتشر بزيادة!

كتت برفع المفاتيح بهيستيريا زي المجنون بس مفيش حاجة بتحصل، سمعت الصوت بيهمس ليا بشر في ودني الشمال: "المفتاح...الرئيسي...تحت...شوية"

نزلت للمفتاح الرئيسي وفتحته بإيد بتترعش من الخوف، النور رجع والمكان كله نور تاني، ولقيت نفسي واقف لوحدي في القبو، القبو كان فارغ تماماً.
شعر جسمي كله واقف من الخوف، في حاجة شريرة عايشة معايا جوا البيت، فتشت البيت كله وقلبي بيدق برعب، فتشت الدواليب والخزانات وكل مكان ممكن حد يختبئ فيه، مفيش اي حاجة غريبة، كل حاجة طبيعية وتمام.

برغم كده مش قادر اعيش في البيت، قررت ابدأ تاني يوم فوراً ادور علي مشتري للبيت، حاولت اتواصل مع جلوريا، تليفونها خارج نطاق الخدمة ومش بترد علي اي ايميلات، لقيت مشتري للبيت خصوصاً مع السعر الرخيص اللي كنت طالبه، نقلت حاجتي كلها وهسلمه البيت بكرة وانتقل من هنا تماماً.

قررت بالليل ادخل اخد شاور اخير قبل ما اسيب البيت بكرة، فجأة واثناء الشاور نور البيت كله اتقطع، بدات احس بالخوف، بصيت من شباك الحمام، علي كل البيوت اللي حواليا ولقيت ان بيتي هو البيت الوحيد اللي النور مقطوع فيه.

سمعت باب الحمام بيتفتح ببطء والريحة الكريهة بتنتشر في الحمام

في شئ شرير قفل الكهرباء من اللوحة الرئيسية للبيت

في شئ شرير معايا في الحمام دلوقتي

لوحدنا....

__________________