Already happened- حدث بالفعل

12- اسوأ هدية عيد ميلاد

عيد ميلادي ال 25

امي كانت ديماً تقول ان انا احسن هدية ربنا رزقها بيها طول حياتها، انا من مواليد 25 ديسمبر عشان كده اهلي بيعتبروني هدية الكريسماس ليهم، عيد ميلادي محدش بيفتكره في التوقيت ده لان كل الناس بتبقي مشغولة بفترة الاعياد.
ممكن تقولوا عليا حساس شوية في النقطة دي بس فكرة انك تعيش عمرك كله بدون حفلة عيد ميلاد لان الناس بتقرر ان حفلة واحدة كفاية والافضل طبعا تبقي حفلة الكريسماس، الموضوع مزعج شوية.
انا فاكر صور حفلات عيد ميلادي اللي فاتت كلها لازم يكون فيها بابا نويل، ومع الجو البرد ونغمات الكريسماس وحقيقة ان سني بيزيد كل سنة، فالوقت ده مكانش ابداً هو وقتي المفضل في السنة.
ماما دايما بتفتكر تقولي كل سنة وانت طيب عشان عيد ميلادي قبل ما تهنيني بالكريسماس، وبتبقي حريصة انها تيجي تقضي معايا الوقت هي واختي وبصراحه دي حاجة لطيفة منهم، لحد سنة 2014 تقريبا لما حبيبتي سببت مشكلة بين والدتي وبينها والاتنين بطلوا يجولي في عيد ميلادي فمؤخراً بقيت بحتفل بعيد ميلادي لوحدي وانا بشتري هدايا الكريسماس للناس اللي اعرفهم.

عيد ميلادي ال 26

قررت اعمل حاجة جديدة ومختلفة السنادي، قررت اعمل حفلة، عزمت 30 شخص فعلاً للبيت عندي، شوية من الاصدقاء القريبين، شوية من زمايل الشغل اللطاف وواحد بس من جيراني.
15 شخص وافقوا ع الحضور، 8 بس اللي ظهروا في النهاية.
عموماً الموضوع كده كان افضل لان شقتي ضيقة جدا، ويدوب تكفي 10 اشخاص بس وبصعوبة، بصراحة كنت مبسوط ان جاري كان واحد من ال8 اللي حضروا وانا استغليت ده وطلبت منه يجيب كراسي للحفلة وهو جاي، كل اللي عندي في البيت كنبة صغيرة وكرسي الكمبيوتر وكرسيين صغيرين.
كانت حفلة لطيفة وكل الحاضرين كانوا مبسوطين، كنا بنشرب...بناكل سوا...بنلعب العاب لطيفة...بناكل شوكلاتة...وبنكمل شرب واكل كل ما نخلص، جالي مجموعة هدايا وبدات افتحهم عشان افرح نفسي.
الهدايا كانت عبارة عن بيرة، خمرة، ويسكي، ويسكي، ويسكي، ويسكي، انا مش سكير للدرجادي!
لاحظت ان بو وديف اعز اصدقائي من الطفولة مجابوليش هدايا والموضوع فعلاً كان مضايقني منهم، بو لاحظ نظراتي ليهم بضيق فبدأ يدافع عن نفسه: "جبنالك هدية، اقسملك بده، هي بس هتتأخر شوية، الراجل المفروض يـ.."
ديف خبطه علي راسه وهو بيقوله بغضب: "اسكت ياغبي، هتبوظ المفاجأة"
ضحكت وانا بقولهم: "ماشي ياغريبين الاطوار"
وبصراحة انا مكنتش بشتمهم، هما فعلاً غريبين الاطوار علي عكسي تماما، انا مستقر في حياتي، بحب شغلي، بحب اقرأ، بحب العب فيديو جيم، ديف وبو علي عكسي تماماً، بيسوقوا دراجات بخارية، بيتعاطوا مخدرات من انواع مختلفة، عندهم اوشام وبيحبوا يجمعوا اشكال سكاكين مختلفة، مش عارف انا صاحبتهم امتي وازاي برغم اختلافنا لكن في الحقيقة هما اعز واقرب اصدقائي، انا بثق ومستعد اضحي بحياتي عشانهم وهما كذلك كده.