Already happened- حدث بالفعل

9- أكل الخنزير

Part 2

بدات افكر بس تفكيري كان منحصر في حاجة واحدة، يعني ايه أوكل الخنزير، بس مهما كان معناها لو الموضوع فيه ولو نسبة ضئيلة من الامل اني ارجع حياتي تاني هنفذه، مش هعيش انا هنا في المزرعة السوداء دي، الاختيارات اما اني اروح النار... او... أوكل الخنزير؟، بس لو أكّلت الخنزير هيبقي ليا فرصة اني ارجع حياتي تاني، قبل ما اتكلم داني شاورلي وقالي: "هسيبك تفكر شوية، هرجعلك بعدين"
صرخت وانا بعيط: "انا عاوز أوكل الخنزير"
مكانش عندي استعداد اقضي ولو ثانية زيادة في المكان ده، صوت ست بتصرخ من مكان قريب، كانت بتصرخ كأنها بتشوف أسوأ الوان التعذيب، خُفت اكتر من صوتها، داني لاحظ ده فابتسم بشدة.

صوت الست كان مليان رعب وألم، داني ابتسم وهو بيسألني: "صوتها بتتعذب جامد... صح؟"
بدأت اسمع صوت ضرب شديد وصوت صريخ الست بيزيد وبيعلي، كنت مش قادر اتنفس من الخوف وانا بقوله: "ارجوك... خليني بس.. خليني اوكل الخنزير، مش عاوز اقعد هنا اكتر من كده"

داني بصلي وقالي: "هرجعلك تاني، استمتع بوقتك هنا وانت لوحدك، فكر كويس في موقفك، اختار كويس وافتكر دايما، انت السبب في انك هنا!"
خلص كلامه وخرج من باب الاوضة.
الدموع كانت مالية وشي وانا بعيط بخوف..
الست مبطلتش صريخ لساعات طويلة !
بعد شوية وقت حسيت كأني بنام، عينيا تقيلة وراسي تقيلة ومش قادر اتحمل فنمت، جسمي كان واجعني وكنت حاسس بحرق حوالين رقبتي مكان الحبل، صداع مش طبيعي كان بيهد راسي، كنت مرهق وخايف وتعبان
حسيت وانا نايم بحاجة بتدخل الاوضة، بعدها بشوية حسيت بألم رهيب في صابع رجلي، فتحت عينيا وطردت النوم وانا بتنفض، صرخت وانا بحاول اتحرك لكن القيود كانت رابطاني في الكرسي كويس
لمحت دم كتير تحت رجلي، بصيت علي مصدر الدم، كان من صوابع رجلي ولما بصيت كويس صرخت برعب.

علي الأرض تحت رجليا كان في راجل بدون ايدين، بيزحف علي الأرض كانه دودة، جسمه كان مترهل ومفيهوش شعر خالص، رجليه مربوطة بسلك شائك بيجبره يزحف علي الأرض وهو بيتألم، عينيه مليانة جنون وحمرا بشكل مش طبيعي، اسنانه فيها دم مكان ما عضني في رجلي، حوالين رقبته في سلسلة او طوق، طويل وماشي لحد برا الاوضة، وعلي باب الاوضة راجل طويل واقف بيتفرج علينا، كان بيؤمر الراجل اللي تحت رجلي انه يهجم عليا تاني.

عضني تاني والمرة دي كانت مؤلمة اكتر، عيطت وصرخت بقوة والراجل الطويل بيتفرج عليا وهو مستمتع بألمي، صرخت في الراجل الدودة: "ابعد عني، كفاية"
حاولت اضربه برجلي في وشه، حاولت اتجنب سنانه، اخيراً قدرت اضربه برجلي في وشه بقوة، راسه خبطت في الارض من قوة الضربة، الراجل الطويل كان مستمتع اوي بس فجأة في دخان اسود بدأ يدخل الاوضة ويملاها، سمعت صوت السلسلة وهو بيتجر علي الارض، الراجل الطويل والراجل الدودة خرجوا من الاوضة، بدات اصرخ بجنون: "خرجوني من هنا، انا مش لازم اكون هنا"