#حكاية شهرزاد
الكاتبة فاطمة عادل
مشت الايام وعدت الأيام ونجحنة الحمد لله وفرحت بنتيجة أخواني الاصغر مني أكثر من فرحتي بنتيجتي لان اتعب من ادرسهم
تمشي الايام ومسؤولياتي تزيد كلش اتعب ومرات اكعد ابجي من التعب اكو شغلات اعرف اسويها وبيبي ترضى علية وشغلات من مااكدر اسويها تعيط علية واني انقهر وابجي وتجي بيبي تراضيني دكلي اريد اعلمج اريدج تصيرين أم لأخوانج
صارت سنة ٢٠٠٣ سقوط بغداد
بدت الاوضاع تسوء بابا أتسوك كلش هواية الطحين والتمن وحتى اشترى نساتل وهل شغلات لأخواني صناديق
منعرف شنو رح يصير خايفين وخصوصا بابا وجدو وبيبي اشوف بعيونهم الخوف علينة وبدت الحرب وصرنة ننام كلنة بغرفة وحدة الجو انكلب أسوود
صدام حسين دافن نفط أسود ع طول القناة بالرصافة واحنة قريب علينة القناة وشعلو حتى يشوشون الرؤية ع الامريكان والمناطق القريبة من القناة هية اللي وكعت بيها
مرات تصير ضربة قوية بابا حاضني ومنيمني ع ايدة وزيد من الناحية الثانية ويمة عامر واني حاضنة زياد ونايمين بالكع كلنة وبيبي وجدو ع جربايتهم
أسمع بيبي تسحبح وتندعي وتكول ياساتر استر ع اولادي ومرات اكعد الكاها تبجي انقهر عليها كلش
تكعد بيبي الظهر تجيب الجولة وتسوي أكل بالغرفة مال غدة والعشة وهية تروح تجيب المواد من المطبخ ابد متخليني أطلع اروح اني اجيبلها المواد تخاف علية
مرات من تصير ضربة قوية زيد يبجي لو زياد يخافون بابا كال كل متصير ضربة قوية أني انطيكم حاجة لو نستلة لو جبس همة فرحو وصارو كل ضربة يكولون البابا يلا نريد وبابا ينطيهم شوية ضحكنة وغيرنة من الخوف اللي جنة بي
الى أن كالو رح تسقط بغداد ومرح نعرف شنو رح يصير
مهدي : يابة انتو أخذو الجهال وروحو انت وأمي اني باقي بالبيت
الجد : لا يابة شلون حجي تبقة بوحدك مترهم
الجدة : لاا اني باقية وية مهدي انت اخذ الجهال وروح ابو مهدي واني ومهدي نجي وراكم
الجد : ووين نروح ووين ننطي وجهنة بهل ضرب
الجدة : روح لبيت كرايبك لبلد روز
مهدي : اي ببيت أخوك الله يرحمة كاعدين بس ولدة بي
الجد : الله كريم مهدي حضر جنطة وحدة لولدك لا هواية مابية ترى
مهدي : اي يابة مااحضر هواية
شهرزاد : ثاني يوم طلعنة بالسيارة والطريق كلة حاضنة أخواني يخافون وصلنة للبلد روز وطبينة للبيت كاعدين بي رجال ومرتة وجهالة وأختة ورجلها وجهالها اولاد أخو لجدو دخلونة بس وجهم ثكيل
فرغولنة الغرفة وحطيت الغراض رتبتها وفتحت الجنط ونطيت هدوم لأخواني يبدلون
وصادفتنة مشكلة أحنة من طلعنة من بغداد باردة جايبين هدوم شتاء ومن وصلنة لبلد بدت تحتر وخصوصا الظهر كلش حارة بس احنة نلبس الهدوم الشتوية ومنكدر نحجي لان جدو منين يجيب النة
جدو حالتة المادية زينة كال لاهل البيت اني اصرف ع البيت وعلى اولادي انتو لتصرفون طلع هوة والولد وجابو اشكال من المسواك والنسوان يخلوني أني انظف يكولون لان أخوانج اللي يوسخون البيت بالرغم همة هم عندهم جهال ووكحين بس اني لزمت البيت وتنظيفة واني مو منوع اناقش اشتغل واسكت
أنت تقرأ
حكاية شهرزاد
Romanceأقسى كلمة عرفها التاريخ هي كلمة الوداع، حيث لا رجعة، لا وأمل، ولا حب، ولا حياة.💙
