حكاية شهرزاد

البارت الواحد والاربعون والاخيررر

#حكاية شهرزاد

الكاتبة فاطمة عادل

لَقد خَطوت خَطوات ثَقيلة إلى أن وصلت إليک وأصبحت خَطواتنا واحدة وكأنها خَطواتي الأولى أصبحنا أنا ومُراد نبحث عَن الحياه.. لا عَن السَعادة لأن السعادة بمفهومها شُعورٌ واحدٌ فقط .. أما الحَياه فَهي مزيجٌ مُوسيقي من عِدة نَوتات أصبحنا نَعزِف عليهَا مَعاً .. كَان قَلبي كاليلُ مُضلِماً .. وَما إن شَرق بِنورک .. حَتى تفاجأت بعاصِفة أُخرى .. أنَا وأنتْ تَعبيرٌ مجازيٌ فَقط .. إننًا فَقط نَحنْ .. إياک وتَفرقتي بِكلمه أُخرى .. إكتشفتُ مؤخراً بأنني الجليد لِذلك كُنت أحترق عِندما أرى الشمس .. وهكذا فجأة أراک وأنتَ تَتجه نَحوي لِتُغطي ذلك الجَليد كالمضلةْ.! .. وَحالي عِندما كُنتُ نبتَة وأنت الماء لتُسقيني ..! 《 صَدق اللهُ عِندما قَال ولَقد جَعلنا من الماء كُل شيءٍ حَي》 فبعد إن إنطفأت روحِي ها أنا أحيا مُجدداً بفضلک ..💙🍀

ومشت ايامنة مثل العسل ونفس الشهر حللت وطلعت حامل الحمد لله والشكر فرحتنة اني ومراد متنوصف
وبدت بطني تكبر يوم بعد يوم اباوع ع بطني وفرحانة واسولف وية الطفل ومااعرف اذا جان ولد او بنية
بس اوعدة مااتخلى عنة وكل شي اني انحرمت منة اعوضة لابني او بنتي
واخذنة سونار وطلع مولودي الاول ولد دمعت عيني واني اشوف حركتة ببطني واسمع نبضاتة مراد مبتسم ويباوع ع شاشة السونار وعيونة مليانة فرح

مراد : حبيبتي تكوميلي بسلامة انتي وأبنة

شهرزاد : يارب مراد اندعيلي

مراد : ان شاء الله حياتي

وصار عرس نيفين طالعة مثل الاميرة تجنن علاقتي ببيت ابو فيان تزيد ومتقل لان فعلا احس بعمو ابوية وخالة امي اذا فترة مااشوفهم ابجي عليهم ودائما همة يجووني او اني ومراد نمر عليهم

ويوم من الايام أجة عمي هادي وخالة انعام وابنهم الصغير صار عندهم ولد مدللي بشكل مو طبيعي الحمد لله حالتهم متحسنة بعد الفاجعة مالتهم جدو فرحتة برجوع بيت عمو هادي كلش جبيرة يبجي ويبوس بعمو

عدت الايام وجبت ولد سميناه مهدي ع اسم بابا الله يرحمة فرحتي بي متنوصف شعرة اشقر وابيض طالع ع مراد بس ملامحة علية حتى خالة ام مراد دكول صلوات ابنكم ماخذ احلى شي بيكم اثنينكم يجنن وهادء
مرات اباوع علية واكول يارب هاي الهدية من الجنة لو هذا حق صبري اللي طتنياه
والحمد لله والشكر ماعندي فرحة تكمل كبر مهودي وصار عمرة تلث سنوات وبدت عندة اعراض التوحد ومن وديناه للدكتور وكال النة ابنكم هيج حالتة حسيت الدنيا اضلمت بعيوني رجعنة للبيت حالتي موزينة مراد اخذ مهدي ووداه لامة تريد تشوفة اني من اللي بية كسرت البيت كلة مبقيت شي مكسرتة وابجي هذا فرحتي بهاي الدنيا بس رحت توضيت وصليت واستغفرت ربي وحمدت الله ع نعمتة ومن هذاك اليوم الى حد الان اني اراجع بمهودي بلكي يطيب

اما جدي ربي ينطي عمر وعافية انسى الدنيا وقهرها من اباوع علية ومن ادخل يتلكة مهودي بلهفة ويكولة يابة مهدي احسة يتذكر بابا الله يرحمة

عامر وريهام صار عندهم ايلاف ومصطفى ربي يحفظهم اموت عليهم واذا اخوية او زوجتة اذوني بيوم من الايام عوضوها الي بعد السنين

زياد تخرج وخطب بنية وياه بالكلية انسانة راقية بشكل ربي يتمم ع خير ونفرح بي

بيت ابو فيان عائلتي الثانية اللي معوضيني عن الحنان اللي فقدتة من صغري عمو كالي اذا ابنج استمر بالتوحد اني اسفرة واعالجة ع حسابي لان هذا حفيدي
نيفين تزوجت بس ممرتاحة وية زوجها وعاشت وياه خمس اشهر ورجعت لاهلها وطلكت طلع ميستاهلها يأذيها ويضربها متستاهل هذا الشي بس الحمد لله نيفين قوية وكدرت توكف ع حيلها وحاليا تكمل الماجستير ومهودي روحها من الدنيا كلش تحبة ودائما تشتريلة الملابس والعاب ربي يسعدها

خالة ام فيان مقهورة ع بنتها بداخلها بس كدامها تتضاهر بالقوة لان تخاف ع بنتها لتتأذة
فيان تزوج وصار عندة بنات اثنين بيناتهم سنة يجننون يشبهون فيان شقرات وعيون ملونة ربي يحفظهم

رغد صديقتي حياتها جحيم وية ابن عمها بس عايشة وعندها تلث اطفال ومن تجي لاهلها تخابرني وتشكيلي ومرات اروح الها ربي يعينها ومنير كلش متأذي ع فراكها ويكوللها لو وراح جيش اطفال وترجعين مطلكة اتزوجج بس اهلها ميقبلون تطلك

حيدر اخذ جزاتة مراد عرف وين بيتهم وراح اله وضربة وهوة عرف انه مراد عرف بسالفتة وبعد مااعرف اخبارة

بيت عمي هادي رجعو سافرو لان خالة انعام من شافتني رجعت تبجي وتذب اللوم بية ودكلة لعمو من اشوفها اتذكر بنتي نرجس واني عاذزتها وربي يساعد قلبها

اما خالة ام مراد جابت بنية اكبر من مهودي بكم شهر سمتها مريم ربي يحفظها وحاليا اربيها وية ابني لان دائما سوة ويحبون يلعبون سوة
روان تزوجت شخص تقدملها خوش انسان ومتحملها بالرغم هية متكبرة وميعجبها احد ربي يسعدها

اني ومراد حياتنة مثل العسل بس الحياة لاتخلى من المشاكل وحاليا كل همي مهدي ربي يشافي الي ويخليليا
مدللتة كلش واخاف علية اريد اشبعة من الحنان اللي جنت فاقدتة

اما بيبي وماما وبابا وزيد اذكرهم دائما بدعاء او بالسوالف ميروحون من بالي فراكهم حارك كلبي وكل موقف امر بي اتمناهم وياية اذا جان حزين او مفرح

وحاليا اني ومراد ننتضر مولودنة الثاني وطلع بنوتة خلي تجي بسلامة واشبعها من حضني وحناني لان البنية تحتاج اكثر للعاطفة واسويها صديقتي مو بس بنتي متشوقة جدا اشوف بنتي اندعولي بالسلامة وتمام الخلقة

والحمد لله اللذي بنعمته تتم الصالحات

كلام عن لسان البطلة شهرزاد

السلام عليكم حبيت اشكر ست فاطمه ع سرد قصتي  بشكل راقي تسلم اناملها اللطيفه ..حبيت انقل الكم تفاصيل قصتي لان بيه عبر و تعلمت هواي ولحد هسه دتعلم ..اتمنى دوم تسعون للتحقيق الاحلام و ماكو ياس يدخل بحياتكم تحاربوه دوم وتخلون احلامكم رقم واحد بحياتكم و دائما تشكرون رب الكريم ع نعمه يرزقه النا بدون مندري ودائما يكتب النا الاشياء الي تكون بيه صالح النا  ودائما اهتموا بالناس الي يمكم محد يكدر يعوض غيابهم وشكرا للجميع ع حسن تعليقاتكم ولطفه دمتم ب سلامه ومحبه❤️🌼

الكاتبة فاطمة عادل

الى اللقاء في القصة القادمة حبايب 🌹🥰