احببتها منذ الصغر ❤❤❤

الفصل السادس

مشت ايام و جت ايام و الوضع على حاله ، علي يكلم في اهله من كندا ، سليمه ماشيه امورها في قرايتها ، محمد دار كيف ما وعد خوه و قعد غير شن يبو اهله ، الفرخات التوأم قاعدات على وضعهن و كل يوم يزيد طول اللسان ، حنان وضعها ماشي و هلها امورهم تمام ، عبدالرحمن كل يوم يكبر محله و ربي يزيد يفتح عليه و حالته تحسنت واجد شري قطعة ارض قريبه من اهله و بيبدا يبني فيها .
بعد كم يوم سليمه كانت في ساحة الكليه مع صاحبتها يهدرزو يستنو في المحاضره اللي بعدها امتى تبدا ، شبحت على يمينها لقت زوز ولاد يهدرزو و يشبحولهم و واضح انهم كانو يهدرزو عليهم .
سليمه : فطومه شوفي غادي الزوز المفرخ كيف يشبحولنا .
فاطمه : حق و الله فوتيهم و ان شاء الله يقربو بس كان ما قلبت عليهم الدنيا .
سليمه: هههههه عارفاتك بتقلبي الدنيا .
فاطمه : هههههه شن تبيني ندير هكي يبو .
سليمه: و الله حق هي المشكله المفرخ اللي كيف هالشكل بدو يكثرو .
فاطمه : يكثرو و لا ينقصو اللي بيجي لمي بنمسح بيه الوطى و بنخليه عبره هههههه.
سليمه : ههههه و هاذا الصح .
نشوفو المفرخ اللي كانو يشبحولهم شن كانو يهدرزو .
مصطفى : هيا اللي دويتلك عليها امس .
احمد : قصدك سليمه ال.... .
مصطفى : وين نندري شن اسمها عاد كان هادا راهو قلتهلك من الاول .
احمد : تي باهي و انت ديما ناط فيا ، هذي يا صطوفه نجوم السمي اقربلك من انها تدير معاك علاقه .
مصطفى : و ليش يا بي .
احمد : اني جارهم و نعرفهم كويس ، اول شي ربي يبارك تربيه و اخلاق ، تاني شي راهي تقرا في الجامع و قريب تختم توا ، تالت شي ياما جربو قبلك و كلو طرايح هههههه ، رابع شي كانك تفكر في شي وسخ حوله من راسك لاني اول من بيوقف ضدك  بنت جاري و ما نرضالهاش .
مصطفى : و الله ما هو شي وسخ هي ، اني عاجبتني كيف لبسها محترم و ما تكلم في حد من المفرخ ، نبي نكلمها بيش لو تقدملها حد ترفضه و تراجيني ، لاني زي ما تعرف الظروف في الحضيض ، صح هي مزالت سنه بيش نتخرج و نبدا عمل طول بس اهو الواحد يحتاط .
احمد : لو ناوي الحلال امشي لبوها غيره ما تحاول شي .
مصطفى : تي كيف بنمشي لبوها ، بأي وجه بنقابله قولي هي ، تعرف ناسنا و لا ما تعرفهمش ، كان مش بحوشك بسيارتك بخدمتك تجي كانهادا تقلب وجهك طول .
احمد : و الله هذا الواقع توا ، البنت ما تحاولش معاها بكل لان اليوم بتدويلها نص كلمه غدوه بتلقى روحك واكل طريحه سمحه .
مصطفى : ربي يفرج و لو فيها خيرتي ربي يكتبهلي .
احمد : امين و ربي يكتبلي الخير 😁 .
مصطفى : امين و انت ما تمشيهاش بدون ما تجبد روحك 😑.
نعرفكم بمصطفى : عيلته مكونه من اربع أشخاص امه خيريه عندها عالخبث شوي ، و بوه اسماعيل طيب بس مشكلته ما عنداش كلمه مع مرته ، مصطفى الكبير مواليد 88 اسمر شوي و شعره اسود  و قصير شوي نقشه سمح جسمه رقيق و معضل شوي ، جوه سمح بس جدي شوي و نظامه نفس علي لو عصب معاش يشبح شي يقرا تقنية معلومات ، اللي بعده اخته الصغيره مواليد 94 اسمها ساره طيبه و ما تحبش المشاكل .
مشت الايام و تمت السنه و مصطفى تخرج و بدا عمل و بيبدا بني فوق اهله و قرر يفتح سيرة سليمه مع امه .
مصطفى : امي بنقولك .
خيريه : قول وليدي .
مصطفى : في بنيه حاط عيني عليها .
خيريه : شن حاط عينك و انت حتى بني مزال ما بديت .
مصطفى : بنبدي نهاية الشهر ، الحمدلله المرتب قوي و نقدر نكمل بني بسرعه .
خيريه : ربي ييسرلك ، لكن اني نبيلك بنت خالتك ، بنيه يتيمه و تكسب فيها الاجر .
مصطفى : امي كم مره قلتلك معاش تجيبيلي سيرتها اسراء ، بنيه يتيمه و قايمه امها و تعاني فيها و بروحهم عايشين لكن اني ما نبيهاش .
خيريه : ما تبيهاش و ما فيش ايخاد غيرها ، و لو خديتها انسا ان عندك ام بكل .
مصطفى : لا حول ولا قوة الا بالله .
ناض طلع من حدا امه و هو واصلتله صفار .
عند سليمه :
طبعا ختمت الشهور اللي فاتن و بوها فرح بيها ، و جدها ذبحلها تنين قعدان وطنيات و دارو عشي كبير و عزمو فيه الاقارب و الجيران و ربخت الحكايه ، اتصل بيهم علي فيديو بعد هدرز على امه و بوه و خوه محمد و التوام جي دور سليمه .
علي : درهوبه مبارك عليك و ربي ينفعك بيه و يكون ذخر .
سليمه تبكي : تمنيتك حدايا عليوه وقت نختم و نتعنقك و ندير الجو متع الدراما .
علي 😂😂😂 : ختمتي قران ره مش تزوجتي .
سليمه : هههههه تاثرت باللحظه ، و تاني شي خيرك تستصغر فيها ختمت القرآن يا فرخ 😑 .
علي : حاشا و كلا و بالعكس و الله اعظم شي بس اللي يسمعك يقول بتطلعي من حوشنا و بتكوني حوش و معاش بنشبحوك زي قبل ههههه .
سليمه : هههههه يا رب ييسرلك و تكمل قرايتك و تجي و تحضر عرسي و نديرولك عرس مقوم مع اللي يتمنا فيها قلبك .
علي : اميييين يا رب يسمع منك ، كيف حال عمي و مرته و عبدالرحمن و حنان و خالد .
سليمه : الحمدلله و كلهم يسلمو عليك ره .
علي : سلميلي عليهم واجد بالذات حنان و قوليلها قالك علي توحشتك يا شينه .
سليمه تستعبط : عليوه كيف توحشتها .
علي : ههههه تي خيرك هي معزتها زيك فتوحشتها لاني ليا واجد ما هدرزتش معاها .
سليمه : ايه و يوصل عليوه .
علي : تسلمي دبدوبه ، توصي شي توا .
سليمه : سلامتك بس و ما تقطعناش .
علي : كيف عاد اني نقدر بلاكم ، اصلا شبه يومي نهدرز عليكم يا دبه .
سليمه : ههههه ايه حق و الله.
علي : ربي يثبت عليك العقل مزلتي مهبوله زي قبل و ما هو صاير منك هههههه.
سليمه: خزي على وجهك هي اقلب .
علي : هي درقي وجهك .
سليمه و هي تضحك: بالسلامه .
علي: بالسلامات .
تسريع الأحداث :
مشت عقاب السنه على سليمه عادي بدت تمشي تعاون في شيختها في التحفيظ و عقاب نهارها تركيز على قرايتها .
حنان لا جديد يذكر عندها و باقي العيلتين نفس الشي .
يتبع ....