احببتها منذ الصغر ❤❤❤

الفصل الثاني عشر

مشت حنان مع امها لعيت خالتهم و قعدت غير مقعمزه حدا امها و خلاص و سعاد تدير في روحها طيبه بيش حنان ما تشك في شي و بدت تهدرز على حنان و تحاول تصلح علاقتها بيها ، حنان كانت في المطبخ خشت عليها سعاد .
سعاد : حنونه .
حنان : نعم .
سعاد : بنقعدو هكي ديما .
حنان : قوليها لروحك .
سعاد : و الله خلاص معاد نبي مشاكل هي نبي نغير من نفسي معاش نبي نحقد على حد معاش نبي نكون عداوات كلهم كرهوني ، معاش بدا عندي صاحبات و انتي بنت خالتي الوحيده و كرهتك فيا ( بدت تدير في روحها تبكي و نزلن دموع التماسيح ).
حنان حضنتها : خلاص حبيبتي الله يسامحك مسامحتك دنيا و اخره .
سعاد باعدتها : بالحق حنونه .
حنان : ايه سعوده و سادك بكي هي .
سعاد حضنت بنت خالتها و قعدت ساكته و داخلها تقول ( هههههه شينك عبيطه البنت هذي تصدق في اللي يجي ، و اضرب يا هيثم اول خطوه مشت صح و الجايات زيها ) .
حنان : هي سعوده نمشو نقعمزو حداهم .
سعاد : حاضر هي .
قعدت حنان تهدرز مع بنت خالتها و مشي اليوم و روحو .
______________________________________

عند سليمه تكلم في علي فيديو بعد كلماته امه و خواته و بوه .
علي : شنج يا مدرهبه .
سليمه : الحمدلله و انت يا مسلوع ههههه .
علي : هههههه خير منك مكركبه كيف الكوره .
سليمه : امشي اقلب و الله ماهو هتكي السمن هي وجهي مدور بس .
علي : ههههههه نعرف و هي فصلت .
سليمه : ايوه رد بالك 😏😏😏 .
علي : شن صايرلك وجهك مولي اصفر و عيونك باين فيهم التعب .
سليمه : اااااه يا وخيي شن بنقولك بس ، هذا سريب المشروع و الهم .
علي : هانت باذن الله معاش مزالك واجد .
سليمه : ايييه و اخيرا و ربي يسهل .
علي : شن تخبريني شن في جديد .
سليمه : هههههه امس جوني خطابه .
علي : بالله حق .
سليمه : و الله .
علي : لعيت من و شن اسمه و كيف صار .
سليمه : اسمه مصطفى قالو و لعيت ال..... و صار انهم اندلفو امس العشيه بدون سابق انذار هههههه .
علي : هههههههه ، شن يخدم الراجل .
سليمه : قالو مدير قسم في شركه و باني فوق اهله ، عنده وخيه وحيده قاعده في الحوش .
علي : ربي ييسر يا وخيتي و لو فيه خيرتك ربي يكتبهلك .
سليمه : امييين يا رب .
علي : ههههه مالا امين هي ، مفجوعه بيش تزوجي شكلك يا بنت .
سليمه : ههههههه مبردك .
علي : نعرف نعرف هههههه .
سليمه : شن صار في وراقك عليوه .
علي : مزالن و الله يا اسلومه ما صار شي .
سليمه : معناها مش رح تروح 😔 .
علي : لو قعد الوضع هكي ما يصيرش من المرواح .
سليمه : ربي يكتبلك الخير وخيي بس اهو نقولك من توا .
علي : قوليلي دبه .
سليمه : العرس مش رح نسامحك لو ما حضرتش .
علي : اكييييد و من غير ما تقولي دبه .
سليمه : ايوه احسب حسابك .
علي : حاضر و الله وخيتي و حتى انتم ديروه صيف بيش نقدر نروح .
سليمه : اكييد .
علي : هي توصي شي درهوبه .
سليمه : سلامتك بس غالي .
علي : هي بالسلامه تو .
سليمه : بالسلامات .
مشت ايام و الوضع طبيعي و عيلت مصطفى معاش ردو عليهم نشوفو شن صاير معاهم في الحوش .
مصطفى من المطبخ : يا امي وين غداي .
خيريه : تلقاه في المايكروويف .
مصطفى : لقيته لقيته يعطيك الصحه .
رن جرس حوشهم فتحت خيريه و كانت اختها و معاها بنتها .
اسراء قعدت تتعنق و حال : خالتي الغاليه .
خيريه : اهليين بنيتي السمحه نورتي .
سالمه اخت خيريه : خويره كيف حالك .
خيريه : اهلين وخيتي الحمدلله و انتي كيف حال ظهرك .
سالمه : الحمدلله اهو حال هالتعب لولا هالبنيه راهو ماني عارفه شن صاير فيا .
خيريه : ربي يحفظهلك .
سالمه : امين و يحفظلك صغيويرتك .
اسراء : وين ساره مالا خويله .
خيريه : تلقيها منكفخه في دارها .
اسراء : في اميه خويلتي .
خيريه : في المطبخ تفضلي الحوش حوشكم .
اسراء خشت للمطبخ و تلقى مصطفى جت خبطاته على كتفه : خير يا ولد الخاله شنج .
مصطفى تفاجأ لين شرق قعد يكح .
اسراء جابتله طاسه ميه .
مصطفى شرب منها : خلعتيني يخلع فرايسك و قايلك مليار مره معاش تمسيني حراااام بيش تفهمي .
اسراء : تي باهي و انت انفجرت فيا .
مصطفى : على قيس لبسك اللي يحشم و نص شعرك اللي بره لا تحجبتي و الله .
اسراء : مصطفىىىى ملياااار مره قايلتلك ما دخلكش فيا و لا في لبسي عندي ام مزالت حيه و هي اللي تحكم فيا .
مصطفى: وقت بتجي قدامي و لا بتجي لحوشنا استري روحك فاهمه و لا .
اسراء : منيش و مش عاجبك درق وجهك .
مصطفى : ريت و لا هي اللي جايتنا لحوشنا و هي اللي تلز فيا .
اسراء : جايه لحوش خالتي مش جاياتك .
مصطفى صبا و طلع و هي يقول : لا حول ولا قوة الا بالله .
طلع من المطبخ لقي خالته سلم عليها و طلع من الحوش بكل مشي بياكل في المطعم مسكين مزال جيعان ههههه .
اسراء : حقير مش عارفه خيره معاي بس شن مدايرتله اني بيش يبغ فيا هكي كان عندي خو راهو ما يقدر يحل فمه بكل ، ( شربت ميتها و ركبت لساره ) .
تعالو نحكيلكم شوي على عيلة خالت مصطفى :
بوها كان يخدم في الصحراء في الحقول النفطيه و مره كان مروح دار حادث توفى وقت مات اسراء كان عمرها يالا 5 سنين بعد توفى بوهم قعدو يصرفو على رواحهم من معاش الضمان ، اسراء مواليد ال 92 كيف ما شفنا لسانها طويل و دماغها يابس و ما تحبش من يتحكم فيها نقشها هادي و يجذب الانظار بس مزيته ههههه لبسها غير من السراويل المشحطات و البلوزات اللي يالا ساترات البطن  و الوشاح تحط فيه حطان مش حتى تدير فيه كويس تخصصها صيدله و واخده دورة تمريض و تخدم في مصحه خاصه قايمه امها و غير شن تبي و ممكن هذا الشي الوحيد الكويس فيها .
اسراء ركبت لساره لقتها مكسده : سريوه شنج .
ساره : سريييوه اهلا .
اسراء : اهلين بيك حبيبتي .
ساره : شنجك يا كلبه لا تدوري لا تسالي .
اسراء : و الله عمل و تعرفي وضع امي .
ساره : ربي يعاونك يا غاليه .
اسراء : امين يا رب ، تعرفي خوك مصطفى قريب يجلطني .
ساره : هههههه خيره و انتم تقول فار و قطوس .
اسراء : يتمودر عليا و يقولي لبسك و اشبح شنو .
ساره : ههههههه تو يتزوج و يبدا يتمودر على مرته .
اسراء : هههههههه بتخطبوله .
ساره : باذن الله اليومين الجايات بنتمو .
اسراء : مسكينه اللي حصلت فيه و خلاص ما عنده كان التكشيخ و التفنيص .
ساره : ههههههه حرام عليك خوي طيب بس ما يحبش العوج .
اسراء 😑😑😑 : شن قصدك .
ساره : هههههه تي شي و انتي تفنصي .
اسراء : نحسابك بس 😒 .
يتبع .....