احببتها منذ الصغر ❤❤❤

الفصل العشرون

في الحوش حنان مشت لحمام خوتها خدت شفره متع الحلاقه و خشت لحمامها و سكرت الباب .
عبدالرحمن خش لحمامهم يدور في الشفره بيحلق وجهه ما لقاهاش : تو وينها هي اكيد الفرخ خالد واخدها حاطها في حمام حنان كالعاده يدير في روحه يمقلب .
مشي عبدالرحمن لحمام اخته و قعد يطق عليها : حنان بالله شوفيلي شفرة الحلاقه قاعده في حمامك و لا لا .
حنان : ......
عبدالرحمن : خيرها ما تردش البنت ترا نشوفها بالك في دارها و الحمام هي مسكراته .
مشي لدارها ما لقاهاش ، مشي لامه يسال فيها عليها : امي وين حنان ماهيش في دارها و الحمام مسكر نبي نشوف شفرتي بالك قاعده في حمامها .
عليا : كيف الحمام مسكر و اني شفتها خشتله من ربع ساعه .
عبدالرحمن 😨 : خبطت عالباب ما ردتش .
عليا : حي عليا بالك البنت داخت و لا صارلها شي و هي هاليومين لا ماكله لا شي موليه بتموت .
عبدالرحمن : تعالي معاي يا امي اني بنكسر الباب و انتي خشي استري عليها .
عليا : هي هي .
عبدالرحمن كسر الباب و خشت عليا شافت المنظر .
كانت حنان مقعمزه عالوطا و قاطعه الوريد و الحكايه كلها دم في دم .
عليا : ووووك عليا بنتي بنتي يا ناس 😭😭😭😭 😭 .
عبدالرحمن خش يجري من خوفه لقاها طايحه و غارقه في دمها .
عبدالرحمن : امي جيبيلها عبايه غطيها بيها بسرعه مش وقت بكي توا خلينا نلحقوها قبل تموت .
غطوها و عبدالرحمن طار بيها للمستشفى طوول .
دخلوها للطوارئ و خشولها دكتورين و طاقم ممرضات ، طبعا لحقهم بوها و خالد بعد خبرهم عبدالرحمن بالتلفون بحكم بوها كان بره و خالد حتى هو طالع مع المفرخ ، شويه و طلعت ممرضه نبو دم ضروري للمريضه .
خالد : اني دمي نفس فصيلتها .
عبدالرحمن : حتى اني .
تبرعو بالدم و قعدو يستنو ساعه و عليا مسكينه بتموت على كبدها .
عليا : كيف بنتي اللي قريب تكمل حفظ قران بنتي الا ما عمرها فاتها فرض بنتي اللي مش مقصره معانا في شي تدير في روحها هكي كيييف بس كيييييف يا ناس .
عبدالرحمن : خلاص اهدي امي تو توعى و تصح و نفهمو منها ادعيلها توا بس ما عندك ليها الا الدعاء .
عليا : ياااا رب صبرك .
احمد : متاكد و متيقن بنتي ما تديرهاش الا وراها شي .
عبدالرحمن : و الله ماني مسيبه يمشي هكي الموضوع هذا و رح نعرف من مضايقها و نعرف كيف نصرف اني بعدين .
احمد : ربيت و عرفت نربي البنت قريب تكمل حفظ كتاب الله و ما عمرنا رينا منها شي بره الطريق تجي هكي بين ليلة و تانيه تنتحر .
خالد : ان شاء الله ربي يشفيها و تطلع سالمه ، ما تضغطوش عليها بعد توعى خلوها براحتها .
عبدالرحمن مشي و شير لخوه الحقني ، طلعو بره قعمزو في الحديقه .
عبدالرحمن : صارحني خلوده تدخن انت .
خالد : شن تخرف عبدو .
عبدالرحمن : خلوده جيتك من الاخير و باسلوب حلو صارحني قلتلك .
خالد : لا  ما ندخنش و اعوذ بالله منه و عارفني ما نحبش ريحته بكل .
عبدالرحمن : ههههه و خيرها ريحتك دخان .
خالد : الجماعه اللي نتبع فيهم واحد منهم يدخن .
عبدالرحمن : يعني مصر انك ما تدخنش .
خالد : ابدا .
عبدالرحمن : تمام توا ما نبيش نضغط عليك و بنخليك براحتك بس يجيك يوم و تندم يا خلوده و اهي نصيحه من خوك الجاهل اللي حتى ابتدائي ما كملاش ، الدنيا ما تبيش الطيبه واجد و اعرف من تصاحب لان الصاحب ساحب و تفكر كلامي كويس ، و خودها مني كلمه و ربي يا خالد نلقا في جيبك دخان و لا نلقاك جايبه الحوش تشوف وجهي التاني و انت تعرفني وقت نفصل كيف نولي .
خالد : تمام عبدو .
خشو داخل و شويه طلع الدكتور .
احمد : طمنا يا دكتور .
الدكتور : الحمدلله لحقنا عليها ، بس توا لازمها رااااحه تامه لا تجو لمها لا حتى تسالوها خيرك خلوها اتريح بس .
عبدالرحمن : حاضر ؛ نقدرو نشوفوها دكتور .
الدكتور : خليها توعى و تقدرو تخشو .
______________________________________

عند هيثم :
سعاد : سمعت شن دارت الفرخه حنان .
هيثم : شن دارت .
سعاد : قطعت الوريد .
هيثم : هههههه ، تحساب روحها بتريح بعد تموت .
سعاد : هيثم خلاص فوتها البنت .
هيثم : سكري فمك و ما دخلكش و ربي يا فرخه تديري حاجه هكي و لا هكي تعرفي شن يصيرلك .
سعاد : منيش مدخله بس حسيتها سخفتني .
هيثم : من امتى الطيابه هذي .
سعاد : لا طيابه لا شي .
هيثم : خلاص سكري فمك و امشي من زومتي .
سعاد طلعت من حداه ؛ هيثم  : ( توا جي دور الجزء الثاني من الخطه ) .
______________________________________

اليوم اللي بعده الصبح :
سمعو بيها كلهم و مشي الحاج عمر هو و مرته و حط سليمه و التوأم في حوش خوه بيش يوتوه للضيوف و هكي .
في دار حنان :
امها مقعمزه حداها شاده ايدها و تبكي و بوها مقعمز بعيد عليها شوي و حاط ايده على خده و يشبح لبنته و يفكر و عبدالرحمن مصبي في الباب و باين عليه التخميم و التعب و خالد اللي ما بطلش بكي على وخيته .
حنان : اخخخ راسي .
عليا 😢 : بنيتي الحمدلله على سلامتك .
حنان 😭😭 : ماما .
عليا : اسسسس خلاص بنيتي .
حنان 😭😭😭 : ليش ما خليتوني نموت يا ماما ليييش .
عليا : بعيد السو عليك بنتي بعيد السو عليك شن جاك حبيبتي ما كنتيش هكي .
حنان تعنقت امها و قعدت تبكي قعدت عليا تهدي فيها لين هدت و عاودت رقدت .
عبدالرحمن سخف على اخته و فهم ان في شي كبيير صاير .
بوها معاش قدر يتحمل و طلع مشي للاستعلامات تلاقى هو و خوه كيف خاش للمستشفى .
عمر : الحمدلله على سلامتها يا احميده .
احمد : الله يسلمك عموره بارك الله فيكم .
كميله : ان شاء الله هذا حد السو .
احمد : بارك الله فيك .
عمر : وين قاعده .
احمد : الدور التاني الغرفه 105 .
عمر : اركبي انتي تو نلحقك .
كميله : حاضر .
عمر : قولي ما فهمتوش ليش دارت هكي .
احمد : و الله ما فهمت يا خوي ، البنت ما كانتش هكي و لا هكي ربيتها .
عمر : لا حول ولا قوة الا بالله ، اكيد في شي كبير صاير يا احميده .
احمد : نبصم بالعشره ان في شي صاير ، تي بعد وعت قعدت تبكي و تقول ليش ما خليتوني نموت يا وخيي ، بنتي اللي قبل ضحكتها ما تفارقش وجها توا كارها الحياه بكل ، بنتي اللي تطمح تحفظ القران و تحفظ الناس ، بنتي اللي كانت تبي تولي دكتوره ، بنتي اللي كانت تقول بعد نكبر ما نبيش نزوج نبي نقعد خدامه ليكم ، بنتي يا عموره اللي ما عمرها فكرت تدير حاجه حرام توا تبي تقتل روحها و تمشي لربها بالجرم الكبير هذا .
عمر : صبر بالك يا احميده و كل شي ليه حل ، و باذن الله تعالى مش رح نخلوها لين نفهمو منها و نوصلو لحل للمشكله اللي هي فيها قديش ما كانت كبيره .
احمد : ربي يصبرني بس ربي يصبرني ، و الله عييت يا عموره انهد حيلي معاش عندي جهد للرعايش .
عمر : عيب عليك تقول الكلام هذا و اني حي ، خيرك نسيتني و لا شن يا احميده ، مش اني اللي نسيب خوي في مشاكله ، مش اني اللي نعطي بظهري لوخيي الوحيد ، لا هكي ربانا بوي الله يرحمه و لا هكي تعودت و لا هكي طبعي .
احمد : عارفك و الله يا عموره و حاشاك بس نحكي ان خلاص سادني من المشاكل معاش عندي ليهن جهد .
عمر : ان الله اذا احب عبدا ابتلاه اصبر يا خوي و احتسب اجرك .
احمد : و نعم بالله .
يتبع .....