احببتها منذ الصغر ❤❤❤

الفصل الثالث و الثلاثون

عبدالرحمن كان سارح شويه و وعي بحد خبطه على كتفه تلفت لقاه علي ولد عمه .
علي : الراجل يعزي فيك .
شخص : عظم الله اجرك .
عبدالرحمن : اجرنا و اجرك على الله .
علي : لامتى بتقعد هكي ، لازم تكون اقوى راهو المسؤولية اكبر عليك توا و لازم تقوي امك و اختك و تكون ليهن سند بقربلك ليهن و توقف مع عمي اكثر و تسنده ، و ما نحكيش عالجانب المادي لاني نعرفك ما قصرتش و مش رح تقصر بس توا وقت تكون قريب ليهم اكثر من قبل ، و خلوده الله يرحمه في جنات النعيم باذن الله و اللي قتله ما عنده وين يهرب و عقوبته دنيا قبل اخره ، ادعيله بالرحمه و تصدق عليه تنفعه خير ما مداير في روحك هكي .
عبدالرحمن قعد يسمع في ولد عمه و منزل راسه لوطه و يبكي بدون صوت ، تلفت لعلي : كله مني ما كنتش راد بالي منه كنهاذا راهو ما صارش اللي صار .
علي : استغفر ربك يا راجل ، هكي ربي كاتبله و هاذا قدره و هكي نهايته و باذن الله توا في مكان خير عليك تدعيله بس .
عبدالرحمن : الله يغفرله و يرحمه و يسامحه .
علي : امين .
______________________________________

كانت حنان مش مصدقه الخبر اللي نزل عليهم زي الصاعقه و قعدت مسبوهه و خلاص لا تاكل و لا تشرب و لا تندري على روحها و حتى البكي ما بكتش يكلمو فيها كانها ما تسمع في حد و غير مفنصه عيونها و خلاص ، على ما درت فيها امها و سليمه ما بتش تسمع الكلام و قعدت على نفس الحال .
عليا بكت على ولدها بكي الفقد بس ربي صبرها و قعدت غير تدعيله بالرحمه و المغفره .
الحاج احمد بكي على ولده و حاط على روحه حمل قتلت ولده ، و كل ما يتفكره تخونه دمعته .
_______________________________________
علي خش هو و خوه بيعزو مرت عمهم و بنتها و في نفس الوقت خشو هيثم و حاتم .
علي : عظم الله اجرك خالتي .
عليا : اجرنا و اجرك على الله .
محمد : يخلفلكم البركه خالتي .
عليا : امين وليدي .
هيثم و حاتم عزو نفس الشي .
علي : وين حنان خويله نبو نعزوها .
هيثم شبح لعلي شبحت حقد بس ما بينش لحد .
عليا : البنت من يوم سمعت بالخبر و هي ما تندريش على روحها و فات مسبوهه و خلاص و لا تاكل و لا تشرب .
علي : جيبيها خالتي عندي ليها كلام بنقوله .
عليا : حاضر هي .
هيثم خلا خالته تطلع و : شن تبي من  خطيبتي انت .
علي : ما نبي شي من بنت عمي و توا بتجي و بتسمع شن بنقوللها ، و تاني شي امها ما رفضتش من انت بيش ترفض .
هيثم : خطيبها و حقي نرفض كيف ما نبي ، و الزم حدودك خير ما نمسح بيك الوطا .
حاتم : ساد انت و ياه الراجل ما ليشي يوم مدفون و انتم تتخابطو ، قدرو شعور هل الميت خيركم هكي الزفت .
علي : ما درت شي اني شوف خوك اللي والع .
هيثم : حسابي معاك بعدين مش وقتك توا .
خشت عليا و معاها حنان و قعمزت حدا امها .
هيثم : عظم الله اجرك .
حنان شبحتله و لا رد .
محمد و حاتم نفس الشي .
علي : عظم الله اجرك بنيت عمي .
حنان بعد سمعت كلمت علي قلبها قريب طار من مكانه و بدت تبكي بهستيريه ، تعنقتها امها و بدت تبكي معاها .
علي : ابكي ما تشديش شي في قلبك بيش ترتاحي و توا نبيك تسمعي شن بنقولك كويس .
حنان هزت راسها و هي في حضن امها .
علي : اول شي اللي تديري فيه في روحك حرام يا حنونه و مش اني اللي بنعلمك في شرع ربي ، و تاني شي خلوده الله يرحمه و الله ماهو راضي عالشي هذا ، تي هو ما يرضاش فيك طزت الشوكه مش بيرضا بوضعك هذا ، ثالث شي لو تحبي خلوده صح توا هو مشتحقلك تدعيله ربي يثبته في السؤال تصدقي عليه تديري عمل صالح يوصله في قبره ، رابع شي خلاص سادك نكد ارجعي حنونه اللس نعرفوها ارجعي حنونه اللي ابتسامتها ما تفارقش وجها حنونه اللي لما تلقى حد زعلانه ما تسيباش لين تقلبله مزاجه حنونه اللي ديما متفائله و تزرع في التفائل في الكل ، ارجعي ما تطوليش علينا بغيابك بنيت عمي ارجعي و فرحينا بيك ساد نكد و حزن .
حنان سيبت حضن امها و هزت راسها بمعنى ايه .
علي : ربي يغفرله و يجعل مثواه الجنه .
حنان بصوت مخنوق من البكي : امين .
علي : يالله نستأذنكم مرت عمي و ردو بالكم منها .
عليا : اذنك معاك وليدي و ربي يحفظك و يبارك فيك .
طلعو من عندهم و هيثم قريب ينفجر كيف حنان ما دوراتاش و ردت على علي و بكت لما عزاها ، الشي هذا خلا هيثم يحط علي في راسه .
______________________________________

بعد شهر في الليل :
كان علي مروح من صالة الحديد هو و احمد صاحبه درست قدامهم سيارة مظلمه نزلو منها اربعه ملثمين .
علي : تفضل شن تبي .
مجهول : وين علي .
علي : اني علي شن تبي .
مجهول : انزل من السياره .
علي نزل من السياره و قدم و احمد حتى هو نزل ، و هجمو عليهم المفرخ ، علي و احمد كانو صحاح مرسوهم طريحه باهيه و شاد واحد منهم و خلاه يقوله من بعثهم .
_______________________________________

نجو نشوفو عند باقي العيله شن جوهم .
احمد و عليا فاقدين ولدهم و حالهم حال من فقد كبده .
عبدالرحمن مزال يلوم في روحه عاللي صار لخوه بس مش مقصر معاه كل نعاية شهر يطلع صدقه على خوه .
حنان من يوم هدرزلها علي و هي تحسنت حالتها و بدت احسن بواجد و كل يوم احسن من يوم و شادتها دعاء لخوها ان ربي يغفرله و يجعل درجته في عليين .
______________________________________

عند هيثم :
كان حاتم راقد في القايله و هيثم طلع على اساس عنده عمل مشي لسيارة خوه .
هيثم : توا جي وقت انتقامي منك يا مريض 😈 .
ينزل تحت السيارة و يقص الطوبو متع زيت الفرينو .
هيثم : بيش تعرف مع من تلعب مره تانيه .
هيثم مشي لوحده من الاستراحات اللي يديرو فيها العار جاب فرخه من الفرخات المعفنات و بدو يديرو في الحرام ، من يوم عرف ان عنده المرض معاش بطل فاحشه لانه يشعر بالنقص و ما يبيش يموت بروحه لازم يرفع معاه اكبر قدر ممكن .
حاتم طلع العشيه عنده مشوار و كان مستعجل شوي ، فجاه قصت قدامه طانطه معبيه بضاعه حاول يشد فرينو ما لقاش شي خش في الطانطه بسرعته لين طلع من القزاز القدامي و راسه خبط في الطانطه ، الناس حاولو يسعفوه بس للاسف كان ميت .
يتبع...........