احببتها منذ الصغر ❤❤❤

الفصل التاسع و العشرون

كميله نوضت البنات و قالتلهن علي بيسافر ؛ مشن يجرن لعلي .
سهام 😢 : حق عليوه .
مرام 😢😢😢 : لالا ما تقولهاش .
علي : الله غالب ضروري نمشي .
مرام و سهام جن تعنقن علي مع بعض ، الشي هذا ذكر علي بأول مره بيمشي كيف كانن يبكن في حضنه و هو يسكت فيهن ، تعنقهن و قعد يبكي بالعبره .
ناضن وتن مع امهن الغدي و علي طلع للجنان ، جي قعمز حداه بوه .
عمر : صباح النور .
علي : صباح الورد .
عمر : مشيتك المفاجئه مش بلاش .
علي 😅 : شن بيكون وراها .
عمر : ولدي ونعرفك كويس .
علي : ههههه ربي يحفظك لينا يا تاج روسنا .
عمر : و يحفظك وليدي ؛ غير قولي موضوع حب صح .
علي 😨 تو كيف عرف هي : ااا لا لا عيب بويا .
عمر : هههه بلاش طروح اني اللي نفهم ره .
علي 😅 : مش هكي ربيتنا عاد .
عمر : هههههه خودني بلسان المصريين توا باهي .
علي : 😅😅😅😅 .
عمر : اسمعي مني هالكلمات سلم وليدي .
علي : تفضل بويا .
عمر : البنيه لو مزالت قاعده خلي نمشي لبوها .
علي : اااا لا لا مهناكش شي .
عمر 😑 : معاش تستعبط و احكي .
علي : انخطبت .
عمر : لا حول ولا قوة الا بالله ؛ من امتى تبيها .
علي : ههههه من زمااان .
عمر : معناها نعرفوهم .
علي : زييين يا بويا زييين .
عمر : قول من .
علي : ما نقدرش .
عمر : باهي اسمع .
علي : نعم .
عمر : ديما حط في بالك ان الشي اللي مش ليك و مش مكتوبلك مش رح تاخده و لو درت ما درت ، و الشي اللي ليك و ربي كاتبهلك و لو تباعد عليك سبعين سنه ربي رح يجيبهلك و بالسيف عليه .
علي : و نعم بالله .
عمر : ما نقولكش ما تاخدش بالاسباب و تسعى انك تحصل شن تبي بس في نفس الوقت ارضى بقسمتك و نصيبك .
علي : بس اني ما خديتش بالاسباب .
عمر : و شن اللي كان مانعك .
علي : خفت منك يا بويا عارف انك مش رح ترضى بجو علاقات و اني ما نبيش يصير بيني و بينك مشاكل .
عمر : و كنت جيت دويت نبي البنيه الفلانيه كنت وقفت معاك و كلمت بوها .
علي : و وين بنحطها 😁 .
عمر : مالك و مال الحط شن ليك علاقه بالموضوع هذا انت .
علي : هاذا تفكيركم كلكم و نبدو منك يا بويا .
عمر : هو صح تكون انت واتي خير و كلام الناس انت عارفه كويس .
علي : ما يهمووونيش يا بوي .
عمر : مش عايشين في كوكب بروحنا و بتخطب و انت مش واتي معاش بيهنو لساناتهم بكل .
علي تعصب واجد : شعب متخلف ربي يلطف بحاله .
عمر : خلاص اهدى و اسكت معاش تقرم الخلق ، عندك حسنات يكفنك توزعهن عالشعب كله .
علي : ما قلتش الا الحق .
عمر : عارفينه حق بس قرمه .
علي : استغفر الله العظيم و خلاص .
عمر : ما تحط شي في بالك كمل قرايتك و روحلي سالم ما نبي شي في هالدنيا الا سلامتك و سلامة خوتك و ربي رح يعوضك خير باذن الله تعالى .
علي : حاضر و ربي يقدرني على برك انت و امي .
عمر : ربي ينورلك طريقك وليدي و يكتبلك الخير .
علي : امين يا رب .
عمر : هي خش افطر معاي .
علي : حاضر هي .
علي خش مع بوه و فطر هو و امه و خواته ؛ بعدها ناض و طلع خذي سيارة بوه و مشي شور سليمه .
علي : الو دبدوبتنا .
سليمه : اهلين صباح العسل عليوه .
علي : ان شاااء الله مش راقده بس .
سليمه : لا لا من بكري نايضين .
علي : خلاص معناها جايك .
سليمه : تفضللل في اي وقت .
علي : الله يفضل عليك ؛ مسافة الطريق و نكون عندك .
سليمه : نستنا فيك .
علي : بالسلامه هي .
سليمه : سلامات .
مصطفى : عليوه منورنا شكله .
سليمه : اييه و يستر الله جيته مش بلاش .
مصطفى : ليش تقولي هكي تشائمي من خوك يا همي .
سليمه 😭 : خوي بيسافر يا مصطفى و لو مش اليوم غدوه .
مصطفى 😔 : معاش تبكي .
سليمه 😭😭😭 : كله منييي .
مصطفى خداها بالحضن و مش فاهم شي : اسسسس ليش البكي و ليش تلومي في نفسك و من قالك بيسافر .
سليمه 😭😭😭 : تو يجي و تفهم كل شي .
مصطفى : خلاص اسسسس اهدي سلم سلومه السمحه .
سليمه 😭😭😭😭 .
قعد يهدي فيها لين هدت شويه .
________________________________________

عبدالرحمن ناض مخلوع و هو يرعش .
سميه ناضت بيه : بسم الله خيرك .
عبدالرحمن : لا لا شي كابوس .
سميه : تعوذ من الشيطان .
عبدالرحمن : اعوذ بالله منه الف مره .
سميه : شن شفت .
عبدالرحمن : حنان مقعمزه حدا شجره في الغابه بروحها و تبكي و دم مغطيها كلها ، جيتها بنكلمها ما وصلتش فيها كان بينا كيف الحاجز من القزاز انادي عليها ما تسمعش فيا قعدت نبي نكسره ما قدرتش ، شبحت خيال شخص وراها معرفتاش من قعد يضحك بصوت عالي و يشد فيها من شعرها و يضربلها راسها في الشجره لين بدا يطلع الدم من راسها و فقدتت الوعي قعدت اناادي و ما تسمعش فيا و هو يشبحلي و يضحك و اخر شي قال بصوت غليظ و ما عرفتاش لمن : اختك خديتها مستحيل تقدر تمنعني منها و رح نربيها من جديد هال@#$&& .
سميه : سلااام قولا من رب رحيم .
عبدالرحمن : لا حول ولا قوة الا بالله .
سميه ناضت جابت اميه لعبدالرحمن : هاك اشرب عبدو و هدي اعصابك و مهناك الا الخير باذن الله .
عبدالرحمن خدا منها الميه و شرب : تسلميلي ربي ما يحرمني منك ، خايف على اختي سوسو .
سميه : كلمها اطمن عليها و اليوم نمشولهم شوفها تبي شي ناقصها شي مرتاحه مش مرتاحه شن جوها .
عبدالرحمن : حاضر .
سميه : هي عاود ارقد امس سهرنا واجد .
عبدالرحمن : ههههه معروف من سهرنا .
سميه : ههههههه على اساس انت قصرت .
_______________________________________

علي رن الجرس على سليمه .
مصطفى : ححااضر هي ، فتحله الباب .
علي : صباحكم مبارك عريسنا .
مصطفى تعنقه : اهليين عليوه نورتنا .
علي : تسلم صطوفه و سامحوني عالازعاج مزلتو عرسان و جاي نتطفل عليكم .
مصطفى : عيب عليك الكلام اللي تقول فيه .
علي : هههههه هذا الحق .
مصطفى : لا حق لا شي و هي خش قعدت عالباب .
علي : تعال معاي للسياره في شوي حاجات يبو الجيب .
مصطفى : ليش اتعب في روحك .
علي : لا تعب لا شي تعال  .
جابو الدبش اللي جايبهلهم علي و خشو لداخل .
علي : دبدوبتنا .
سليمه تعنقاته 😭 : عليوه بتسافر صح .
علي : ههههه كيف عرفتي .
سليمه : 😭😭😭😭 .
علي قعد يطبط عليها : اسسس عاد خلاص .
سليمه : 😭😭😭😭 .
علي شبح لمصطفى : ربي يعينك عليها عياطه ره ههههه .
مصطفى : ههههههه .
سليمه : خزي عليك و اني نبكي على فراقك .
علي : قرصها من خدها وخيتي السمحه هما سنتين و نكون كملت ؛ نروحلكم نبيك تختاريلي عروس على ذوقك .
سليمه : تاخدها من عيوني احلى بنت و الله .
علي : شنو سمونيه ما فيش شي نشربه ههههه .
سليمه : حاااضر من عيوني .
مشت سليمه للمطبخ و علي قعمز هو و مصطفى .
علي : اصطوفه بالله عليك وخيتي ما تزعلها و رد بالك منها راهي حساسه و فيسع ما تزعل .
مصطفى : في عيوني و الله عليوه .
علي : وخيتي قلبها طيب و على نياتها و ما تحقد على حد و فيسع ما تسامح ما نبيكش تستغل الشي هذا و تقعد تزعل فيها و ترضي فيها بكلمه .
مصطفى : عيب عليك عليوه و الله مستحيل تصير هي .
علي : نعرفك و الله و عز من ناسبنا بس تعرف قلب الخو لازم يتهنى على وخياته و يوصي .
مصطفى : في عيوني سلومه و الله .
علي : يسلمو عيونك يا رب .
مصطفى : تسلم .
علي : الله يسلمك .
قعد حداهم ساعه و روح لامه و خواته هدرز عليهم لين طاب خاطره و بعدها تغدا و طلع صلى الظهر ودعهم و رفعه بوه للمطار ، ركب في طيارته و مشي .
يتبع.........