احببتها منذ الصغر ❤❤❤

الفصل الحادي عشر

مصطفى مشي لداره و لحقاته اخته .
ساره : نعم صطوفه .
مصطفى : سريوه بالله عليك تقنعي امك ، تعرفيها وقت تسكر راسها خلاص ، تبيني ناخد بنت خالتك اللي لسانها اطول منها و راسها ايبس من الرشاده .
ساره : خلاص صطوفه خلي ماما عليا و فوته موضوعها و كان البنيه طلعت كويسه وعد مني ماك واخدها الا هي .
مصطفى : تسلميلي سريوه السمحه و البنيه نبصملكم بالعشره انها كويسه و لو مش كويسه ما اخترتهاش اني .
ساره : معناها كون هاني غالي .
مصطفى : ان شاء الله خير .
نمشو لسليمه .
كانت هي و فاطمة يوتن في مشروع التخرج متعهن .
فاطمه : ووووك تعبت اليوم واااجد .
سليمه : اييييه ما بعدنا ، لكن الحمدلله هانت يا فطومتي كلهن اسبوع و نسلمو و الاسبوع اللي بعده مناقشه و تمت القصه كلها .
فاطمه : اييييه و اخيراااا .
سليمه: حقااا ما قالوش امتى النتائج .
فاطمه : النتائج مزال عليهن تلات اسابيع.
سليمه : ربي يسهل .
فاطمه : تحسابي بعد تناقشي و يطلعن النتائج حزت 😂😂😂😂😂 .
سليمه: ليش شن مزال .
فاطمه : 😂😂😂😂 تشحوير افادة التخرج .
سليمه: مزال فيها تشحوير .
فاطمه : مالا كيف عاد الكليه وقت بتسجلي تشحوير و كل سمستر في التنزيل تشحوير و في الامتحانات تشحوير و بعد بتستعيري اكتاب تشحوير و بعد تبي شي من القسم تشحوير و بعد بتديري المشروع تشحوير و بعد بتسلميه تشحوير و بعد بيناقشوك تشحوير و بعد المناقشه تشحوير و بعد اتمي كل شي و تسلمي التعديلات تشحوير و بعد بتاخدي افادة التخرج تشحوير 😧 ، نحس في روحي دهشت من كثر ما قلت تشحوير هههههه .
سليمه : هههههههه اما انتي وووك و خلاص ، تعرفي ما بعدنا الحق هههههه هذا كله متحملينه و مارين بيه و ساكتين .
فاطمه : مالا كيف عاد شن سموه طلب العلم جهاد 😏 .
سليمه: هههههه صدقتي فيها .
اليوم اللي بعده العشيه .
رن الجرس على حوش الحاج عمر جت سهام بتفتح .
سهام : تي باهي باهي حرقتوه الجرس .
خيريه : السلام عليكم .
سهام : و عليكم السلام و رحمة الله ، تفضلي .
خيريه : حوش عمر ال....
سهام : ايه تفضلو تفضلو خالتي .
خيريه : يزيد فضلك شوفيلنا امك .
سهام : حاضر هي تفضلو للصاله .
دخلتهم للصاله و مشت لامها دوتلها .
كميله جتهم : السلام عليكم اهلا نورتو .
خيريه : بنورك ، احني عيت ...... جايين بنشوفو بنيتكم سليمه لولدنا .
كميله : اهلين بيكم نورتو و شرفتو .
خيريه : تسلمي لينا الشرف .
كميله : نستاذنكم دقيقه بس .
خيريه : اذنك معاك .
كميله ناضت خشت لداخل .
خيريه تدوي لبنتها : شكلهم شلافطيين .
ساره : حرام عليك يا ماما ما شاء الله ادب و اخلاق .
خيريه: تره سكري فمك انتي التانيه .
ساره : سكرت هي .
كميله مشت لبنتها : السلام عليكم ورحمة الله .
فاطمه و سليمه : و عليكم السلام ورحمة الله و بركاته .
كميله : اسلومه في خطابات شنو تطلعي و لا نوزعهن .
سليمه 😨😨😨 : شنو .
فاطمه : 😮 .
كميله : قلتلك خطابات .
سليمه : مش عارفا ماما .
فاطمه : اطلعي يا دبه .
سليمه : شن نطلع و قرايتي .
فاطمه : تو شن دخل القرايه و احني شبه كملنا .
سليمه : مش عارفه .
كميله : تو نطلع نوزعهن معناها .
سليمه : لا لا تو نجي و نجيب القهوه نبدل بس .
كميله : تمام هي ما تعطليش.
سليمه : نوضي هي انتي وازي معاي لبسه حلوة و واسيلي شعري .
فاطمه : هي هي .
اختارتلها لبسه و حاستلها على شعرها و دارتلها مكياج خفيف .
سليمه : السلام عليكم ورحمة الله .
ساره و خيريه : و عليكم السلام ورحمة الله و بركاته .
ساره : ربي يبارك عالجمال .
سليمه : تسلمي .
سليمه قدمت القهوه و قعمزت حداهم .
خيريه قعدت تشبح من فوق للوطا مش عاجبتها .
ساره : عرفيني عليك غاليه .
سليمه : كبيرة العيله و الكبير الله قريب نتخرج ندير في المشروع توا و مناقشتي الاسبوعين الجايات مواليد 89 .
ساره : ربي يبارك ما شاء الله عليك .
خيريه : قالولنا حافظه قران .
سليمه : ايه خالتي ختمت قبل الثوره بسنه .
خيريه و ساره : ما شاء الله ربي يبارك .
قعدو يعرفو و يتعرفو و من السريب هذا و و و و .
خيريه : هي نستاذنو توا و لو في نصيب نكلموكم اعطيني رقمك يا كميله .
كميله : سجلي هي .
خيريه : هي بالسلامه تو .
ساره : بالسلامه خالتي بالسلامه سلومه و ربي يقدم اللي فيه الخير .
سليمه و كميله : بالسلامه .
طلعت خيريه و بنتها لمصطفى .
مصطفى : شنو بشروني امي عجبتكم و لا شنو .
خيريه : ماشيه حالها .
ساره : تهبل تعرف يا صطوفه خشت خاطري و حبيتها البنت .
خيريه 😒😒😒😒 .
مصطفى : ربي يقدم اللي فيه الخير .
عند سليمه :
كميله : تعرفي يا بنيتي البنت كويسه بس امها مش مطمنتني .
سليمه : حتى اني حسيت هكي .
كميله : ربي يقدم اللي فيه الخير و الكلمه الاولى و الاخيره ليك .
سليمه : مزال بكري عليه الكلام هذا ماما و ربي يكتب اللي فيه الخير .
كميله : امين .
سليمه مشت لفاطمه في دارها لقت حداها التوام .
سهام و مرام : شن صار .
فاطمه : شن صار سلومه .
سليمه : بالشويه انتي و ياها و ياها .
سهام : مشوقين بيش نعرفو .
مرام : تي هي قولي .
سليمه : قالو لعيت ال .... و تخصصه تقنية معلومات .
فاطمه : 😨 احلفي .
سليمه : تي ايه خيرك .
فاطمه : تي التخصص هذا في كليتنا يا همي .
سليمه : وين نندري ع جده اني عاد .
فاطمة : تو يطلع شابحك غادي .
سليمه: الله اعلم ، خليني نكمل .
فاطمه : كملي هي .
سليمه : امه ما تريحتلهاش تدوي من راس خشمها و كانها مش راضيه عالجيه بكل .
فاطمه : ايه و بنتها .
سليمه : تبي الحق البنيه كويسه تهدرز و جوها سمح .
سهام : اني فتحتلهم و العزوز باين من عيونها الشر .
سليمه : ههههههه انتي تقري فيهم العيون قرايه .
مرام : قصدك نقرو فيهم العيون قرايه .
سليمه و فاطمه : هههههههه تي انتي وياها واحد يا همي .
مرام و سهام : كيف عاد😏 .
_________________________________________

عند حنان مزالت تكافح في قراية القران و توا واصله للاعراف مزاللها ربع و تختم بعد بدت عطلة الصيف امها فاجاتها انها بتمشي لخالتها و تبيها تمشي معاها بالسيف .
حنان : و الله يا ماما ما خاطري هي .
عليا : شن ما خاطركش هذي امشي و انتي ساكته تره .
حنان : يا ماما سعاد لا نتقبلها و لا تتقبلني كرهتها من الايامات السود اللي قعدناهم حداهم و هي لابستني و خلاص حدا من بنقعد و لا على من بنهدرز .
عليا : خالتك متوحشاتك و تبي تشوفك امشي علشان خاطرها .
حنان : اففففف و خلاص ، باهي تو نمشي .
عليا : سلم بنيتي اللي تسمع في الكلام .
يتبع .....