احببتها منذ الصغر ❤❤❤

الفصل السادس و العشرون

طلعت سليمه و حنان لعلي اللي كان يستنى فيهم في السياره .
سليمه ركبت و بدت فيها بكي .
علي : اييييه علينا عاد خيرك يا دبه .
سليمه : ما دخلكش خليني نعبر عن شعوري .
حنان ركبت : السلام عليكم ، علي كيف حالك .
علي بدون ما يشبحلها : و عليكم السلام ، الحمدلله على كل حال .
حنان قعدت تشبحله في المرايه تبيه يشوفلها هو شي ما عبرهاش نزلت راسها و طاحت منها دمعه .
علي قعد يسرق في نظرات ليها و هي منزله راسها و واجعاته كيف يعامل فيها هكي ( انتي اللي خليتيني ندير هكي يا بنيت عمي انتي اللي كسرتيني لييييش بس لييييش وافقتي عليه لييييش ) شد روحه بالسيف بيش ما تنزلش منه دمعه وصلهن للمزين و مشي للبحر ، قعمز بروحه و قعد يصيح باعلى صوت : لييييييش بس لييييييش ليييييييش كسرتيني ليييييييش مش فاهمه يا عبيطه مش عارفه ان هذا يحبك ، قعد يخبط في صدره و يقول حرام عليك كسرتيني حنونه شن درتلك اني فهميني شن درتلك و توافقي على واحد كلب ما يسواش ، واحد وسخ متع فرخات ليييييش ؛ قعد يبكي لين هدي و بعدها اتصل بمصطفى نسيبهم .
علي : السلام عليكم .
مصطفى : و عليكم السلام .
علي : اني علي خو سليمه .
مصطفى : اوهو ابونسيب نورت .
علي : تسلم بنورك اصطوفه .
مصطفى : الله يسلمك .
علي : ما نبيش نطول عليك بس نبي نقولك كليمات و نبيك توعدني تنفذهم .
مصطفى : لو بيدي حاضر و وعد .
علي : بيدك اكيد ، احني سالنا عليك و قالو كويس و ما شاء الله عليه من كل النواحي و شكروك واجد و قالو ما كيفه حد و صيتك حلو و سمعتك طيبه ، و عز من نعطو باذن الله .
مصطفى : شهاده نعتز بيها .
علي : اوخيتي يا اصطوفه اوخيتي ، ما نبيش نقولك انها اغلى عندي من نفسي لانها بالنسبه ليا اغلى من كلللل شي في هالدنيا ، وخيتي لو بيدي تقعد طول العمر جنبي لاني نشوف فيها ما حد يستحق ياخدها ، ما نبيش تزعلها في يوم و لا تخليها تنزل منها دمعه ، سليمه و مش شكران فيها لانها اختي بس بنشكرها بحكم معرفتي بيها ، تخاف ربي و رح تعاملك احسن معامله بس في نفس الوقت رد بالك منها و ما تكسرهاش بكلمه لانها حساسه راعيها و وسع بالك عليها و خليك سند ليها .
مصطفى : في عيوني و الله و اني ما اخترتها و تقدمتلها الا لاخلاقها و تربيتها .
علي : رد بالك يا اصطوفه في يوم تهينها و تنسى ان وراها اهل لان وربي لو جت يوم شكتلي منك مش رح نرحمك و مش تفهم كلامي تهديد بس رد بالك تتقاوى على بنيه لانها اضعف منك راهو في وراها تريس يديرو حتى الحرب على شانها .
مصطفى : ههههه ما تخممش عليوه و مش اني اللي ندير حركات المفرخ .
علي : ربي يتمم عليكم عالخير و ربي يوفقكم و يرزقكم بالذريه الصالحه .
مصطفى : امين و عقبالك يا رب .
علي : ههههه اني يا ودي ما نندري ؛ هي نستاذنك توا و ربي يوفقك .
مصطفى : اذنك معاك عليوه و اجمعين .
علي : بالسلامه .
مصطفى : سلامات .
علي سكر الخط و تنهد من وسط قلبه تنهيده كلها وجع و الم و قال : ربي ارضني بما قسمت لي و اكتبلي خيرا .
ناض من عالشط و ولع سيارته و مشي للمزين و قعد يستنا في اخته و بنت عمه .
_______________________________________

نشوفو مصطفى شن جوه من بداية اليوم :
طبعا من الليله اللي فاتت و هو بايت في الاستراحه هو و جماعته .
احمد ينوض في مصطفى : مصطفىىىىى .
مصطفى ناض مخلوع : يلعن فيتك رعشتني .
احمد : 😂😂😂😂😂 سامحني بس تعرفني نحب نخلع الراقدين .
مصطفى : جايك يووووم يا كلب .
زياد : اصطوفه بنقولك شي .
مصطفى : شن تبي يا ادراه الكبد .
محمد صاحب مصطفى : من الاخير احمد امس قاللنا على مكانك .
مصطفى شبح لاحمد و دار هكي 🙂 .
احمد : كذاب تصدق فيه انت .
عبدالله صاحب مصطفى : ترا احلف .
احمد : كثرت الحلف حرام .
علي صاحب مصطفى : تفلسف قالولك احلف لو صادق احلف .
احمد : و الله .
مصطفى : و الله شنو .
احمد تخزرط : 😅 ما فيش داعي للحلف شباب .
زياد طلع نقاله و مده لمصطفى : هاك اسمع صطوفه 😂 .
احمد 😨 : شن مسجل يا كلب .
زياد : اسسسس و خلي نسمعو واضح .
مصطفى ولع التسجيل و كان فيه :
احمد : الو زياد .
زياد : ايوه .
احمد : نقوللكم مكان مصطفى بس بشرط .
زياد : قول شن تبي و حااااضر .
احمد : اني ما دخلني بشي و لا قلتلكم شي و لا نندري على شي .
زياد : ادلل مش رح نقوله شي بعد نلبزه بس انت تباعد و ما تلبزش معانا .
احمد : تمام تلقوه في استراحتي .
زياد : جايين طيران .
مصطفى سكر التسجيل و شبح لاحمد : 🙂👍 منور يا رفيقي و تو تشبحو الانتقام يا كلاب 👌 .
احمد : عيل يا زياد و ربي عيل مش قلت مش رح نقوله .
زياد 😂😂😂 : قلتلك مش رح نقوله بعد نلبزه .
احمد : تفو طلعتو صغار .
عبدالله : كلنا نعرفو مصطفى بعد ينتقم لاباس ناكلوها بروحنا .
مشي جوهم سمح و مصطفى غير جوه معاهم و الشباب هيجو و دارو معاه جو لبسوه و اسقدو بيه جهة حوشه مكان العرس .
_______________________________________

كملت سليمه مكياجها هي و بنت عمها .
سليمه تبكي : خلاص يا حنونه بنسيبهم .
حنان : تسكت فيها خلاص سلومه تالت مره تواسيلك فيه المكياج .
المزينه : يا اختي حرام اللي تديري فيه في روحك مش هكي عاد و ساد ابكي و افرحي مليون في الميه هما فراحنينلك ليش تنكدي عليهم .
حنان : خلاص شدي روحك عالبكي و خلي المراه توسيلك مكياجك و هاتي تلفونك خلي نتصل بعلي بيش يجينا .
سليمه 😢 : باهي سكتت هي و هاك .
حنان اتصلت بعلي .
علي : ايوه يا بطه .
حنان : علي تجي تروح بينا كملنا .
علي 😨 : ق ق قاعد بره اني .
حنان : تمام هي .
علي سكر عليها .
حنان : هي سلومه البسي برنوصك علي بره يستنا .
سليمه : هي .
حنان لبست خمارها و طلعو .
يتبع............