توالي المآسي

الجزء 14

《-هو لقط سميتو"سيزار" شبانلك؟》
[-ههه راك غريبة الأطوار دبصاح،سمية زوينة،بحال لي سماه.]
《-سلمت،يلاه زيد،راه تعطلنا،غانديك ترتاح،ونجي نطل عليك من بعد بقصص جداد》.
اختارت كرتون للقط سيزار،وحطاتو فيه تحت واحد الشجرة،وجابت ليه طريفة تالخبز وفرماجة،ودعوه بجوج،ودازت بعادل لبيتو،هبطات الريدوات،غطاتو وچلسات حداه كتكمل قصصها،دازت الأيام،وهي معاه ديما كتحكي ليه الروايات والقصص،وكتقراليه من كل نوع،ماكانش كيدوز نهار بلا مايشوفها،كانت بالنسبة ليه نافذة العالم الخارجي كتنبئو بآخر الأخبار وشنو كيطرا وكدا نكت وروايات،
،كان كيدوز معها الساعات الطوال،سوا فالبيت أو الحديقة،وكل مرة كطل عليه،ماعدا فساعات معينة كتخصصها لنفسها،ماباغيش يعترف،لكن حتما لامعنى للحياة فالمشفى بلابيها.
هاد النهار بعدما فاق تسناها شحال تجي تاليل وماجاتش،نعس وهو كيتسنى،تحل الباب ودخلات فرملية عطاتو دواه،خاب أملو يسحابليه هي لي جات،دازت ليلتو طويلة وهو كيتسنى لليوم الثاني،فالصباح بكري فاق على ضجة حداه،بانت ليه الفرملية كتحيد الورد ترميه،غوت عليها باش تخليه.
《ولكن أسيدي راه ذبل.》
[-ماكيهمش خليه أنا بغيتو هاكا].
انصاعت الممرضة وخرجات بعدما عطاتو له الفطور لي ماكلاهش،مايقدر ياكل والو ماحدو ماطمئنش على أمل،الورد الذابل بين يديه كيشبه لنفسو بلا بيها،كون جات كون جابت الورد،كيما كتجيب الآماني والسعادة لقلبو،ماتوقعش يفتقدها بهاد القد،العجب كي ولات جزء لا يتجزأ من نهارو،وشخص قريب لقلبو،ماكيديها فحد فالدنيا كيما كيهتم بيها دب.دخل الطبيب
《أهلا سي عادل كيوليتي لاباس؟》
[شوية أدكتور،الحمدلله]
《مزيان إيوا راك غادي وكتحسن،راه قررنا نديرو ليك العملية بعد غدا إنشالله،وخاص جسمك يكون مستعد ليها،وكذلك نفسيتك》
[بصاح أدكتور،واخا شكرا]
《العفو خليت ليك الراحة سي عادل》
يلاه بيخرج بيما ستوقفو عادل
[دكتور،فيناهيا أمل؟]
《د:(تنحنح)مشغولة اسي عادل،يلا خليتك على خير》
خرج وخلا العافية شاعلة فعادل،مستحيل تنشاغل بشيحاجة،وكوكان هكاك،كون سمع ضجتها وضحكتها فالأرجاء،الوضع ماكيطمنش،خصو يقلب عليها براسو،خرج دايز من الممر،وقلبو ماهانيش،حاس بالشر،القلق كلاه،كيتجول فالجناح ويحل بيت مورا خرى.
فجأة بانت ليه فرملية حدا واحد الباب  فآخر الرواق،غا شافتو جات ليه تحبسو لايقرب،ماداهاش فيها ومشا نيشان علاش هي بالضبط ماعرفش.
غادي كيقرب وكيسمع صوت مرتافع.