BAK'AR GUGUWA

Chapter 26

*B̆ĂK̆'ĂR̆🤦🏻‍♀ĞŬĞŬW̆Ă*
🧶🧶🧶🧶🧶
       🧶🧶🧶🧶
   🧶🧶🧶
           🧶🧶
             🧶

S⃠t̾o̾r̾y̾ & W⃠r̾i̾t̾t̾e̾n̾
         *ცყ:✍🏻*
R⃠αвí'αt ѕвѕ
         *(ცıɠ ɠąι)*

*©-Aɴᴀ ᴛᴀʀᴇ Wʀɪᴛᴇʀs Assᴏᴄɪᴀᴛɪᴏɴ ✍🏻*
(wє ѧяє ṭһє ɞєśṭ ѧṃȏṅɢ ѧʟʟ wяıṭєяś)📚
https://m.facebook.com/Anatarewritersassocian/

Gaιѕυwa gareĸυ мaѕυ ĸaranтawa ιna ganιn ѕaĸ'on ĸυ nagode dan вa zan мanтa ĸυ вa. вan мanтa da ĸaιвa *Aтĸ*,  *Real ѕмaѕнer* ιna yιnĸι.

*fαδῖlα αlῖϒῠ ϻῠsα (ϻα δῖlαlα ) αshα kαrαtῠ lαfῖϒα ❤*

*P⃠age➡26*

       Safiya ce yayar Alh.Kabeer fuskarta a had'e babu alamar ko walwala cikinta, a hanzarce take isowa falon, Hajjiya Usaina na ganinta gabanta ya yanke ya fad'i, da sauri ta umarci su Zarah da su tashi su koma sashin su. Sai da suka gaida Safiya sannan suka wuce sashin su, Zarah kuwa yi tayi kamar bata gane ko wace ba, ita kuwa Hajjiya Usaina tayi hakan ne gudun kada ta janyo abinda zai b'atawa Zarah rai ganin halin data shiga a daren jiya, ace yanzu ma hakan ya kuma faruwa da ita abin ba dad'i, su kad'ai suka san irin wahalar da suka sha kafin ta farfad'o. Har ta k'araso tsakiyar falon fuskarta babu annuri ko kad'an, rai a b'ace take kallon Haj.Usaina, a sanyaye Haj.Usaina take kallonta ta mik'e daga kan kujerar dining d'in da take zaune ta k'araso tsakiyar falo ta gaida Safiya tare da yi mata nuni da wajen zama, k'in zama tayi ta hauta da masifa kamar ita ta haifeta, a hankali Haj.Usaina tace "haba Yaya, naga ai ban yi laifi ba dan na baki wajen zama, be kamata ace kin shigo ranki a b'ace ba, idan wani abun akai miki in kika zauna ai sai mu tattauna" wata iriyar tsawa ta dakawa Haj.Usaina tare da fad'in "tunda gidan ki ne ko na ubanki ba, ai dole kice haka. naga gidan d'an uwana ne, ke har kina da wannan matsayin da zan zauna na tattauna da ke?" Cikin tsananin mamaki Haj.Usaina ta runk'a kallon Safiya, magan-ganun da Safiya take fad'a mata sun mata zafi sosai, amma sai ta danne zuciyarta ta kuma cewa "me yayi zafi haka, daga magana sai cibi ya zama k'ari?" Jin hakan data fad'a ya k'ara bawa Safiya damar sake hasala, taci gaba da masifa ta inda take shiga ba tanan take futa ba, magan-ganu kala-kala na cin mutunci da zarafi su kad'ai take furtawa Haj.Usaina, haka ta ci gaba da danne zuciyarta ba tare data mayar mata ba, sai ma tsayawa da tayi tana kallonta. daga bisani kuma ta koma kan kujera three seaters ta zauna tare da d'aukar remote ta k'aro volume d'in Tv'n da take kunne, tsoron ta d'aya na kada Zarah ta jiyo sautin muryar Safiya na masifar da take yi, tunda shi daman Imraan sashin sa ba kusa da wajen yake ba balle ya jiyo. Duk da ta maida hankalinta ga kallon Tv'n da take kunne ta kuma maida Safiya kamar wata sha-sha-sha hakan besa ta daina fad'ar magan-ganun da take furtawa kanta Hajj.Usaina ba, ganin ba tada niyyar saurarawa yasa Haj.Usaina ta juyo inda take tsaye cikin zafin zuciya ta fara magana "Haba Yaya kina yi na miki shuru, amma ya gagara ki daina, ni ban san laifin da nayi miki ba kinzo kin hau ni da fad'a da masifa  kamar wata 'yar cikin ki da kika haifa, ai ko da 'yar cikin ki ce magan-ganun da kike fad'an na wuce ki fad'a mun su ko dan darajar aure, bare ko a haife baki isa ki haifen ba darajar d'an uwanki da nake aure ne yasa kawai nake raga miki amma ke bakya gani, to Idan ma wajen d'an uwan naki kika zo to baya nan dan ya juma da futa sai ki bishi can office d'insa ki k'arasa masifar acan, idan kuma gidan kika zo gani, to gaki ga gidan ni ba nida lokacin ki" ta kuma juyawa ga kallon da take, a zuciyarta tace wannan wacce iriyar mata ce masifaffiya? Ita kad'ai ma tana iya masifa ba tare da an kulata ba, to ma ni abinda ban san nayi ba menene amfanin ta zo ta balbale ni da masifa? Kai! mijinta ya shiga uku, Allah kad'ai yasan irin wahalar da yasha wajenta kafin ya rasu, ko ma masifar ta ce ta kashe shi oho, dangin miji baka iya musu ko iyayensa basa raye in wani nasa na raye ka shiga uku sai dai in ka samu masu kyan halin zuciya. Magan-ganun da Safiya take ci gaba da yi shi ya katse mata guntun tunanin da take akan Safiya ta tsaya sauraren abinda take fad'a "ina mai sanar da ke cewa idan ma ke kike zuga shi kada d'ana ya auri 'yarki to kinyi kad'an dan kuwa aure kamar anyi an gama, babu wanda ya isa ya hana yuwuwar wannan aure ki rubuta ki ajjiye na fad'a miki" wata iriyar shewa Haj.Usaina ta saki tare da fad'in "kice mun da abinda ya kawo ki, sai kice da abinda yake damunki a zuciya, daman akan wannan maganar ne kike ta tada jijiyoyin wuya? To bari kiji ni kuma na shaida miki muddin ina raye babu me aurawa Zarah d'an wajenki kema ki rubuta ki ajjiye", cikin zafin rai Safiya take magana" mu zuba d'an halak ka fasa,idan har kika ga ba aiba, to ba sunana Safiya ba, kisani mu muke da iko akan 'yar da kika haifa amma ke ba kida iko akanta" , wani guntun tsaki Haj.Usaina ta saki ta mik'e da sauri tare da fad'a mata cewa "to mu zuba mu gani idan tusa zata hura wuta". Daga nan tayi gaba tana magan-ganu "kullum ke ba kida aiki sai tashin hankali tun mutum yana baki girmanki yana danne zuciyarsa har sai kinsa ya daina to kya yi da filin wajen dan ni bani da lokacinki" ta shige d'aki ta barta nan a tsaye, wannan abun yayi matuk'ar k'onawa Safiya rai bata tab'a tsammanin Haj.Usaina zata iya fad'a mata bak'ak'en  magan-ganu haka ba, ganin ta kyaleta yasa taci gaba da masifa ita kad'ai kamar wata mahaukaciya tana gama masifar ta wuce ta tafi zuciyarta na zafi da rad'ad'i kai da ganin fuskarta kasan ranta a b'ace yake, duk abin nan da take Haj.Usaina na jiyo magan-ganun da take amma sai tayi kamar bata ji me take cewa ba a zuciyarta tace Allah ya fiki insha Allahu 'yata ba zata tab'a auran d'anki ba.
    Duk wannan abun da yake faruwa Zarah bata san ana yi ba hankalinta nakan wayarta inda taci gaba da neman wayar Najib cikin rashin sa'a bata samu wayar ba haka ta zauna tana faman tunani.
_________________★
    A gidan su Yesmin kuwa Haj.Saratu ce ta Kira Yesmin har d'akinta inda take tambayarta ta san d'an wajen k'awarta Hafsatu?, Yesmin tace sam! bata sanshi ba, babu irin kwatanta mata shi da bata yi ba amma Yesmin ta dage cewar bata gane shi ba, ganin Haj.Saratu ta matsanta da lallai sai ta ganeshi yasa Yesmin gane cewa akwai wani abu a k'asa a hankali ta tambayeta "Me ya faru da shi Mummy?"dariya Haj.Saratu tayi tace "babu abinda ya same shi daman muna so mu had'a ku aure ne in har kin amince shikkenan ba wai yanzu za'a fara maganar bikin ba a'a sai kin kammala karatunki sai a fara zancen auren" gaban Yesmin ne ya yanke ya fad'i ta maida kallonta ga wani wajen daban kamar ta fashe da kuka ta k'ura ido tana kallon wajen daga bisani kuma ta juyo a shagwab'ance tace "Aure kuma Mummy?" Haj.Saratu tace "Eh mana Yesmin in lokacin hakan yayi ai dole ayi" sai a lokacin tayi murmushi domin kuwa ta dad'e tana jiran lokacin,  ganin Yesmin tayi shuru na d'an wasu dak'ik'u daga bisani kuma taga tana murmushi yasa Haj.Saratu itama yin murmushin tare da fad'in "kin amince da shi kenan?" Da sauri Yesmin ta girgiza kanta tare da d'aure fuska "a'a Mummy" mamaki ne ya cika Zuciyar Haj.Saratu a ranta tace to kuma murmushin me tayi kenan?, Ta kalli Yesmin tace "ban fahimta ba" Yesmin dake zaune gefenta tace "mummy ina da wanda nake so" Haj.Saratu ta fidda kwayar idonta waje tace "wanene shi wanda kike so d'in" murmushi Yesmin tayi ta kasa cewa komai sabida kunya duk da Haj.Saratu bata so jin hakan ba amma sai tayi farin ciki da zab'in Yesmin fatanta Allah yasa ya zamo na gari wanda zai iya ruk'eta da mutunci, mik'ewa Yesmin tayi a guje ta koma d'akinta dan ba zata iya sake magana ba, Haj.Saratu ta kalleta tayi dariya tace "ai shikkenan".
_________________★
    Soyayyar Imran da Jamila ta fara k'arfin da har basa iya wuni ba tare da sunga juna ba, wannan yasa jamila daina zuwa gidansu Zarah koda yaushe, Koda ace taje ma sai dai ta tsaya daga waje ba dai ta shiga ciki ba sabida tsananin kunya da take ji, kowannen su yana farin ciki da kasan cewarsa tare da abokin soyayyarsa a yau ma Imran ne ya ziyarci Jamila a gidansu dake can babban layi, inda ta karb'e shi hannu bibbiyu cikin girmamawa da karramawa, gami da had'a masa goma ta arzik'i, girke-girke iri-iri wanda aka shirya su dominsa, tun kafin ta k'araso inda yake zaune k'amshim turaren ta ya mamaye ko Ina na wajen, tafe take cikin takun k'asaita da wata shiga me rikitarwa kaya ne irin na Larabawa riga da skirt wanda  suka dace da jikinta, ya zuba mata na mujiya yana kallo har sai da ta k'araso wajensa ta zauna, turaren da ta saka mai masifaffen k'amshi wanda k'amshinsa ya wuce misali shi yake k'ara rikita masa tunani, har yakan so ya manta inda yake, sai da suka fara gaisawa kafin su nutsa cikin hira.  Hira suke zubawa irin ta masoya wadda ba zata misaltuba suna yi suna satar kallon juna tare da bayyanar da ni'imtaccen murmushi wanda yake ratsa ko Ina na cikin jikin su, kowannen su ji yake kamar kar ya rabu da d'aya, musamman a duk lokacin da suke tare da juna, wasu kalamai masu sanyi suke jefawa junansu wanda shi ne yake k'ara tabbatar da in gancin soyayyarsu, suna yi Jamila na rufe ido dan kunya d'ai-d'ai lokacin da Imran yace da Jamila "naji tsoro a lokacin da naso sanar da ke abinda yake zuciyata a tunanina ba zaki tab'a amincewa da soyayyata ba, da ace baki amince ba tabbas da yanzu ina cikin wani mawuyacin hali amincewarki yasa kika ganni cikin k'oshin lafiya da farin ciki da annashuwa, ki sani ke d'in ta dabance a wajena kin ciri tuta naji dad'in kasancewa tare da ke fatana Allah yasa soyayyar mu ta d'ore har auren mu" cikin salo na nuna so da k'auna tare da sarrafa harshe Jamila take magana "taya zank'i amincewa da Kai? Bayan zuciyata abinda take muradi kenan kuma ta samu, ta juma da k'ishirwar sanka sai gashi ta samu ruwan har ta fara sha fatanta Allah yasa kar ruwan ya kufce mata alhalin bata gama k'oshi ba, kayi mun alk'awari" murmushi yayi wanda ya ratsa har cikin jikinta ya kuma k'ara bayyanar da kyahun fuskarsa sannan yace "kece d'aya tilo wadda a kullum nake mafarkin samu ta zama mallakina kuma ba ni da tamkarki ki sani cewa kece uwar 'ya'ya na insha Allahu" dai-dai nan suka kafe junansu da ido ba tare da sun k'ifta ba, sun dad'e a haka kamar ba zasu bari ba, sai kuma suka sakarwa juna murmushi na musamman a lokaci guda wanda yasa Jamila k'ara jin kunya. A haka suka ci gaba da hira cikin farin ciki da walwala.
_________________★
    A daren wannan ranan ne Haj.Usaina da Zarah na zaune a falo suna kallon wani film me suna 'Gani da ido' jiyo muryar wani k'aramin yaro suka yi kamar daga sama yana cewa "Wai Zarah tazo ana kira" zaro idanuwa Zarah tayi gabanta ya yanke ya fad'i rass! ba tare data shirya jin hakan ba,akai-akai fad'uwar gaban ya runk'a zuwar mata, itama Haj.Usaina ta razana da jin muryar dan bata yi tsammani jin hakan ba tama rasa me zata ce wa yaron a hankali tace "Wai in ji wa?" Dai dai lokacin Mahaifin Zarah yake k'ok'arin shigowa kallon Zarah yayi yace "ki tashi kije ni na turo shi kuma shi ne zab'in da nayi miki" gaban Zarah ne ya k'ara yankewa ya fad'i k'irjinta yaci gaba da bugawa, itama Haj.Usaina da sauri ta kalli Alh.Kabeer fuskarta cike da mamaki yayin da suka yi kallon-kallo tsakanin Haj.Usaina da kuma Zarah, cikin mamakin jin abinda Alhaji ya fad'a suke kallon juna, ba komai ne ya k'ara bawa Haj.Usaina mamaki ba sai ganin yadda suka sha fama a daren jiya kan abinda ya faru da Zarah, amma Alh.Kabeer be tuna haka ba ya sake furta wannan magana, to wai me yake nufi da hakan? Kaddai ace Safiya ce taje wajensa ta same shi kan maganar d'anta shi ne ta tilasta masa lallai sai ya had'a auren Zarah da Nauman? Hmm wannan abu ne da ba zai tab'a sak'uwa ba, jin tsawar da Alhaji ya dokawa Zarah cewar ta mik'e ta tafi yasa Haj.Usaina saurin katse sak'e-sak'e da zancen zucin da take. Fuska d'aure Alh.Kabeer yake kallon Zarah, da sauri Zarah ta mik'e jikinta na tsuma ta wuce d'akinta d'auko mayafi, ganin hakan yasa Haj.Usaina kasa yin shuru da sauri tun kan Zarah ta k'arasa shiga d'akin tace "Amma Alhaji baka ganin hakan zai iya jawo mana wata matsalar fiye da wadda ta faru a jiya?, ko damuwa babu a fuskar Alh.Kabeer sai fushi da yake tattare da ita a hankali yace "na ruga dana gama yanke wukunci" babu yadda Zarah ta iya ala dole ta k'arasa cikin d'akinta a sanyayye kamar mara laka a jiki. Ta shiga ta d'auko mayafi tayi hanyar futa tana me tausayawa kanta irin halin da zata iya shiga tunda bata san zab'in mahaifin nata ba,tafe take tana wasi-wasi a hankali take tafiya cikin sand'a kamar wadda kwai ya fashewa a ciki a haka har ta k'arasa harabar gidan, tana futa taci karo da___________

*💅🏻B⃠ıɠ ɠąι ¢ɛ✍🏻*