♤حنين♤

حنين (6)

رواية .. ♤ حنين ♤

بقلم .. كيمو 🍟

♤6♤

حنين { اخوي محمد معجب بيك ..

*كوثر نططت عيونها و قلبها بقى يدق سريع و براحه كدة قالت لي حنين.. يعني شنو معجب بي ..حنين استغربت من ردها و قالت ليها انا عارفاك هبلة بس م لدرجه انك م فاهمه الاعجاب..كوكي قالت ليها .. لا لا يعني هو ياتو اعجاب م فاهمة ..*

حنين { الاعجاب الواحد دا ي كوكي .. قال انك من زمان عاجباهو

كوكي { وانتي عارفاني ي حنين م بتاعت كلام زي دا مش قلتي ليهو

حنين { لا م قلتا ليهو ... لو كان زول غريب كنتا ح اقول ليهو و م عشان اخوي ولا كدة .. لا والله بغض النظر عن انه اخوي بس بالجد محمد محترم و عمري م شوفتا منه حاجه غلط و هو اخوي قبل اي شي يعني لو فيهو اقل غلطة او حاجه اكيد بوريك لانك صحبتي و عندي بالدنيا كمان

كوكي متفاجئة من الكلام و م عارفة تقول شنو ..{  انا م عارفة ي حنين ولا فاهمة و

حنين { عايني انا ح اخليك تفكري براحتك .. م تستعجلي انا عارفه انا موضوع صعب و غريب بالنسبة ليك .. بس صدقيني محمد احسن من اي ولد و راجل بالجد و اضمنو ليك برقبتي .. انا ح امشي و انتي فكري و شوفي نفسك و بعداك اتصلي لي ..

كوكي { م عارفة والله بس طيب

حنين { طيب يلا

كوكي { يلا

*حنين طلت و كوكي لسة م مستوعبة و م عارفة و خايفة لانها م حصل جربت كدة .. في لحظة اتزكرت كلام ملاذ اختها القالتو ليها قبيل ..*

*حنين وصلت البيت و دخلت عايزة تطلع عبايتها كدة .. كوكي اتصلت ليها قالت ليها انها موافقة .. حنين فرحت شديد و قالت ليها طيب انتي  خلي الباقي كلو علي .. اوك؟ كوكي قالت ليها اوك ..*

*ريان كانت قاعدة و  بتتكلم مع الولد مكالمة ..قالت ليهو عليك الله م ح تقول لي اسمك منو .. م ممكن يعني لينا كم بنعرف بعض و بس بناديك بي حبيبي .. عايزة اناديك بي اسمك .. قال ليها اسمي احمد .. قالت ليهو احلى اسم والله .. ادلعك بشنو لكن .. قال ليها اي شي ..//*

*مر اسبوع ..و ريان و احمد دايما بتكلمو و احمد بحبها بالجد و ريان كمان و كل يوم حبهم بزيد و علاقتهم بتكبر .. اما بالنسبة لي محمد و كوكي .. حنين عرفت كيف توصل بينهم و الليله بعد المغرب ح يتلاقو هم التلاته في مكان ايسكريم كدة في الظلط يعني قريب منهم.. فعلا بعد المغرب محمد و حنين وصلو و قعدو منتظرين كوكي ..شوية كدة كوكي وصلت و قعدت ..*

حنين { ازيك ي كوكي

كوكي { كويسة وانتو

محمد { كويسين شديد نحنا

حنين ضربت محمد في رجلو تحت و قالت ليهو بصوت واطي { بطل خفة و خليك عادي

محمد { كويسين عادي نحنا

كوكي { وين ريان؟

محمد { ريان مشغولة م قدرت تجي

كوكي { اهاااا ..

حنين { طيب انا نسيت تلفوني في البيت بمشي بجيبو و بجي

كوكي { لي التعب دا

حنين { بمشي و بجي ي قلبي طيب

كوكي { طيب ..

*حنين قامت منهم .. محمد بعاين لي كوكي و هي خجلانه بتعاين في الارض*

محمد { ح اخليك بس المرة دي تعايني في الارض لانها اول مقابلة .. لكن بعد كدة ح تعايني لي في عيوني و م تقولي لي م بقدر و كدة .. لانه من اليلة انا ي كوكي ح اكون كل شي في حياتك و عيوني ال م قادرة تعايني فيهم اسي ديل ح يبقو امان بالنسبة ليك اوعدك .. و م تستغربي من البقولو بس انتي انتظري و ح تشوفي ..

*كوكي ساكتة و م عارفة تقول شنو ..*

*حنين داخله على الحله و قربت على البيت الكهربا قطعت و الشارع بقى مظلم شديد و في صوت كلاب و حنين اكتر شي بتكرهو الكلاب و الظلام .. و م عرفت ترجع و لا تمشي و تصل البيت و الحالتين صعبات بالنسبة ليها .. فجاءة حنين حست بي زول جمبها وقف قدامها خافت شديد لانها اول مرة تشوفو و م من الحلة .. بي خوف كدة ردت  قالت ليهو منو انت؟ ..*

*كوكي لسة ساكتة .. محمد قال ليها ح تكوني ساكتة كدة .. كوكي ردت و قالت ليهو .. انا م بفهم اي شي في الارتباط و خايفة اخسرك بي حركات غبية اكون م قاصداها .. محمد قال ليها اصلا م مشكلة انا عارف انك اول مرة تجربي حاجة زي دي و كونك وافقتي علي دي براها خطوة كبيرة بالنسبة لي .. كوكي طبعا م عرفت ترد ..قالت ليهو و انت جربت قبل كدة ؟ محمد رد و قال ليها لا .. كوكي عاينت ليهو في عيونو و قالت ليهو لا ؟ قال ليها اي لا م حصل .. كوكي قالت ليهو شكلك زيهم و م بتفرق عنهم شي كلكم كدة .. و قامت طلعت .. محمد استغرب شديد و م قدر يوقفها .. طوالي اتصل على حنين .. بس حنين م ردت عليهو ..*