♤حنين♤

حنين 23

رواية .. ♤ حنين ♤

بقلم .. كيمو 🍟

♤23♤

*بكرة عيد ميلاد حنين و كانت فرحانه شديد و زي كل سنه  ريان و كوكي و كم وحدة من صحباتهم بعملو لي حنين عيد ميلاد و كدة و بكونو مجهزين من بدري .. المرة دي حنين م اتزكرت انه عيد ميلادها قرب الا قبليها بي يوم .. المهم ثاني يوم جا و زي العصر كدة ريان اتصلت على حنين و قالت ليها اجهزي عشان طالعين .. حنين قالت ليهم وين ..ريان قالت ليها اجهزي بس برسل ليك اللوكيشن في الواتس و تعالي  ..و قفلت منها الخط ..*

كوكي { انا م عارفه ي ريان الولد الاسمو مصعب دا خليتي يتدخل معانا كدة

ريان { عادي يعني ساعدنا بس ي بت يعني جاب الكيكة و حجز المكان و تقريبا عمل اي شي ..

كوكي { انا م فاهمة انتي لي مصرة يعني انهم يرتبطو بي بعض

ريان { لانه مصعب بحبها ي كوكي

كوكي { و نحنا مالنا اصلااا

ريان { شنو يعني ي كوكي حنين ساعدتك انك ترتبطي مع محمد و انتي اصلا م كنتي خاته في راسك ترتبطي طول حياتك لكن في الاخر ارتبطي .. يعني اي زول فينا ممكن يغير رايو عادي يعني اسي حنين ممكن تغير رايها و تحب مصعب ..

كوكي { م ح تغير و ان شا الله م ح تحبو ..

ريان { غايتو ي كوكي م عارفاك كارهة الولد دا ليه ..

كوكي { خلاص بس

*حنين وصلت زي بعد المغرب كدة و صحباتها كلهم كانو قاعدين و فاجئوها و فرحت شديد و باركو ليها .. و اتونست معاهم كثير كدة و خلاص قالو يطفو الشمع بعد كدة ..بس ريان قالت دقيقه .. حنين قالت ليها دقيقة في شنو .. ريان قالت خش ي مصعب .. و فجاءة مصعب دخل .. حنين ردت فعلها كانت عاديه كدة يعني .. ريان قالت لي حنين م ممكن نطفي الشمع بدون الزول الجهز للعيد ميلاد دا كلو .. حنين عاينت لي ريان كدة ب استغراب .. ريان قالت ليها اي والله مصعب هو الجهز اي شي و لما عرف انه عيد ميلادك الليله من الصباح لافي والله م قعد .. و اسي عايز يقول ليك حاجة ..*

*♡مصعب بدا يتكلم و قال ليها .. ح احاول دايما اسعدك و اخليك فرحانه كدة لانك اهم شي في حياتي و قدام صحباتك ديل كلهم اوعدك اني م اخليك في يوم و اكون بحبك دايما .. حنين الموقف دا بالجد اثر فيها و خجلت شديد و م عرفت ترد تقول شنو .. كوكي طوالي قالت يلا يلا نطفي الشمع .. طوالي حنين وقفت ورة الكيكه و طفت الشمع و غنو ليها كمان ..♡*

*بعد م طفو الشمع مصعب طوالي طلع مشى .. حنين بدت تفتش فيهو م لقتو في المكان اتصلت عليهو رد عليها قالت ليهو وين مشيت انت؟ .. مصعب قال ليها ماشي شارع النيل تجي معاي ؟ .. حنين سكتت م ردت .. مصعب قال ليها خلاص يعني صحباتك احتفلو بيك و عادي بعد كدة تطلعي معاي لو عايزة يعني .. حنين قالت ليهو بس كدة بتاخر و ناس البيت .. قال ليها م بنقعد كثير بس و قولي لي صحباتك يكونو قاعدين في الكافيه لحدي م نرجع .. حنين سكتت شوية كدة و قالت ليهو طيب ..*