♤حنين♤

حنين 14

رواية .. ♤ حنين ♤

بقلم .. كيمو 🍟

♤14♤

*ريان رجعت البيت دخلت غرفتها طوالي و بتبكي .. اول مرة في حياتها تبكي كثير كدة .. و م كانت عارفه تعمل شنو و م قادرة تفكر من الزعل في الاخر نامت و هي بتبكي ..*

*مصعب اتونس مع حنين شوية كدة الكهربا جات .. قالت ليهو انا لازم ادخل بعد كدة ناس ابوي كمان ممكن يجو في اي لحظة .. مصعب قال ليها طيب طيب راحتك .. قالت ليهو يلا و دخلت .. اول م دخلت لقت 3 مكالمات من ريان .. رجعت ليها بس تلفونها مقفول  .. قالت بتكون نامت و م ختت في راسها شي ..*

*بعد تلاته يوم .. ريان م كانت بترد على حنين و حنين لما تمشي ليها البيت .. ريان بتقول لي امها انها ماف .. حنين حست انه ريان فيها حاجه بس م عارفه شنو ..المهم في يوم كدة من الصباح شهد اتصلت على مصعب ..*

مصعب { اي ي شهد

شهد { م تمشي الجامعه الليله ..

مصعب { لي ؟

شهد { خليك جاهز بس اسي بتصل ليك

مصعب { دا شنو دا م فاهم شي انا ..

شهد { انت جهزتا خلاص ولا لسه ؟ مش عندك محاضرة الساعه 10

مصعب { اي خلاص طالع ..

شهد { خلاص م تمشي الجامعه تعال المول

مصعب { مول ؟

شهد { اي المول ي مصعب و لما تدخل تعال الكافيه الفي الطابق الاول ..

مصعب { في شنو ي شهد ؟

شهد { مفاجاءة بس ..

مصعب { انتي مش مفروض تجي البيت الليله ..

شهد { اي بس عمتي تشغيله انت عارفها

مصعب { طيب في شنو في المول ..

شهد { عاين انت تعال و بس ..

مصعب { طيب .. جاي ..

*مصعب استغرب شديد و م فاهم حاجه .. المهم ركب العربيه و طلع ماشي على المول ..*

*في المول و في الكافيه ..شهد قاعدة مع ريان .... شهد اتصلت على ريان من الصباح و قالت ليها تعالي الكافيه الفي المول .. و لما ريان جات .. شهد قالت ليها ح اجيب ليك مصعب و ح امشي اخليكم براكم ..شهد بعد م اتصلت على مصعب*

شهد { قال جاي ..

ريان { ح يتفاجئ طبعا

شهد { اكثر مفاجاءة ح يحبها لكن

ريان { بس ي شهد انا مصعب دا شافني مرة وحده ولا مرتين بالسرعه دي قدر يعجب بي ..

شهد { م عارفه والله ي ريان على حسب الكان بقولو لي انه معجب بيك شديد و كدة . المهم اسي هو ح يجي انتي اتونسي معاهو و اعرفي منه اي شي عنه و كدة

ريان { انا م عارفه اقول ليك شنو والله

شهد { لالا عادي ي بت انتو اصلا الاثنين كنتو معجبين بي بعض بس هو م كان عارف وانتي م كنتي عارفه و كان لازم زول في النص عشان يقدر يظبط بينكم..

ريان { اي اي صح ..

*🖊ريان فجاءة جاتها فكرة في راسها .. و الفكرة انها تتصل على حنين تجي المول و تشوف مصعب قاعد معاها عشان تثبت ليها انها عرفت الحركة البايخه ال عملتها فيها ..و انه مصعب دا حقها هي و بس ..المهم ريان اتصلت على حنين .. حنين اول م شافت المكالمه طوالي ردت .*

حنين { وين انتي ي ريان تلاته يوم م بتردي علي و لما امشي البيت امك تقولي لي انك ماف .. في حاجه ي ريان ؟

ريان { تعالي الكافيه الفي المول في حاجه عايزاك تشوفيها

حنين { اسي ؟ حاجه شنو ي ريان ؟ الو الو

*ريان قالت ليها كدة و قفلت الخط طوالي .. و رجعت قعدت جمب شهد*

ريان { اتاخر صح

شهد { بكون قرب ..

ريان { طيب ..

*شهد بدت تجيها مكالمات من العيادة و كدة ..و لازم تمشي ..*

شهد { انا مستعجله والله ي ريان ح اضطر اطلع اسي والله

ريان { طيب لكن مصعب ..

شهد { اسي بجي و انا بتصل ليهو بقول ليهو اني مشيت العيادة بس في زول منتظرك و  خش طوالي بس..

ريان { طيب

شهد { طيب يلا باي

ريان { باي ..

*حنين استغربت من ريان و م فهمت منها شي .. فكرت انها تلبس و تطلع تمشي ليها عشان تفهم في شنو و هي مالها..*

*صحي نرجع لي كوكي .. كوكي طبعا بقت احسن و طلعوها من المستشفى ليها يومين بس ادوها علاجات و ادوية و ح تكون راقدة بس في البيت اسبوع اقل شي.. و محمد طبعا م فارقاها نهائي و استغل فرصه المستشفى و اتعرف على امها و ابوها و كانو طيبين شديد و قدرو وقفتو معاهم ..*

*اما بالنسبه لي احمد لانو ريان م كان بترد عليهو نهائي و بعد الرسالة الرسلتا ليهو .. نساها خالص و كسر حنكها نهائي..و كمل حياته عادي و م كانت فارقة معاهو شديد*

*مصعب .. شهد اتصلت عليهو و قالت ليهو انها طلعت و ادخل بس الكافيه في زول منتظرك ..فعلا مصعب دخل الكافيه و اول م دخل شاف بس بت و معاها ولد و بت تانيه قاعدة براها بس م شايف وشها .. طبعا مصعب طوالي افتكر انها تكون حنين و مشى عليها و لما وصل ليها عايز يقول ليها حنين بس ريان عاينت ليهو كدة طوالي سكت .. ريان قامت و مدت ليهو يدها .. مصعب عاين ليها كدة اتزكر انه شافها قبل كدة مرتين .. مصعب عايز يسالها انتي منو ؟ ريان طوالي قالت ليها كيفك ي مصعب؟؟.. مصعب مد يدو سلم عليها  و مستغرب