♤حنين♤

حنين 7

رواية .. ♤ حنين ♤

بقلم ..كيمو 🍟

♤ 7 ♤

*🖊بعد سؤال كوثر لي محمد وانه جرب ارتبط قبل كدة ولا لا و هو جاوب بي لا .. زي م شوفتو كوكي قالت ليهو انت م بتفرق عن باقي الاولاد حاجه و قامت طلعت منه .. كوثر قالت ليهو كدة لانه على حسب القالتو ليها حنين انه جرب ارتبط قبل كدة .. بس بصراحه محمد م ارتبط قبل كدة و زي م قال لي حنين انه البت الاسمها اسراء دي كانت جاريه وراهو و هو م كان جادي معاها في شي عشان كدة قال لي كوكي انه م ارتبط قبل كدة ... المهم دا سوء تفاهم بسيط .. بس هل ح يتحل ؟🖊*

*نرجع لي حنين و الموقف الصعب الكانت فيهو .. و في نص الظلام حست بي زول جمبها و لما قبلت عاينت ليهو م شايفة ملامحو زي الناس بس واضح انه م من الحلة و اول مرة تشوفو .. حنين ردت بي خوف و قالت ليهو منو انت .. رد عليها و قال ليها كنتا ماشي بي جمبك و لما الكهربا قطعت لاحظت انك خوفتي و كمان صوت الكلاب خلاك ترجفي و بقيتي تمشي براحة المهم يعني حسيتك خايفه .. حنين قلبها لسه داقي سريع و الخوفة م طلعت منها و نفسها شويه قايم .. الولد قال ليها على فكرة انا جيرانكم جديد بالحيطة كمان و شوفتك قبيل وانتي طالعه من بيتكم .. عشان كدة اسي حبيت اوصلك لاني بس جيت البقاله و راجع .. حنين بعد كلامو دا هدت شويه و قالت ليهو نورتو والله .. صح قبيل لاحظت للعربيه بتنزل في حاجاتكم ..طيب ممكن نمشي ؟ .. الولد قال ليها اكيد ..*

*بعد شارعين كدة كلها كم خطوة وصلو .. حنين قالت ليهو .. شكرا ليك ..الولد رد ليها و قال ليها لالا عادي ي .... حنين قالت ليهو اسمي حنين .. قال ليها وانا مصعب .. قالت ليهو تشرفنا و شكرا تاني و دخلت طوالي ..*

*🖊مصعب .. مصعب خريج طب السنه دي .. كلها شهرين كمان و يخلص .. مصعب حلو .. و طويل .. شعرو ظابط مسرحو حلو يعني  م زي شعر الاولاد حق الايام دي و لونو افتح من الاسمر كدة يعني اقل من الحلبي ..و دقنه حلو م كثير و اسلوبو راقي و مؤدب و اي حاجه سمحه و كويسة فيهو باختصار كدة ... رحلو هو و اختو اسمها ( شهد ).. و بما اني وصفت ليكم مصعب .. ف اكيد ح تعرفو انه شهد دي ح تكون مزة كيف بدون م اقول ولا اوصف .. شهد اكبر من مصعب بي ثلاثه سنة..يعني 27 سنة  دكتورة اسنان و عندها عيادة فتحها ليها ابوها قبل م يتوفى و امهم برضو متوفية .. المهم مصعب و شهد  ح يسكنو هنا  جيران حنين بالحيطة طوالي ..🖊*

*مصعب دخل البيت و شهد كانت قاعدة بتحضر في حاجه .. مصعب قفل التلفيزيون .. شهد قالت ليهو دا شنو ي مصعب مالك .. مصعب بي ابتسامة عريضة و فرح .. ليقتهاا .. شهد عاينت ليهو بي استغراب و قالت ليهو دي شنو ال لقيتها؟ ..*

مصعب { البفتش فيها من زمان

شهد { احللللللف ... لقيت الكاميرة حقتي الضايعة

مصعب { انعل ابو كاميرتك العزبتينا بيها .. كاميرة شنو ي شهد م تخليني ازهج

شهد { طيب شنو اها ي ود

مصعب { لقيت البت ال من زمان بفتش زيها

شهد { على فكرة يعني عادي .. انت في اليوم بتلاقي مليون بت و في مليون بت مكسرة فيك و تلفونك دا لحظة م بقيف

مصعب { لالا ي شهد ديل كلهم مكسرين فيني بس انا ماف وحدة فيهم شايفها تنفع معاي بس الليله انا شوفتا البتنفع معاي

شهد { دي منو طيب ؟

مصعب { اصبري م اسي .. لما السمكة تغمز

شهد { سمكة في عينك .. طايرة انوم انا .. الفلم م خليتني اتمو

*محمد رجع البيت و حكى لي حنين الحصل و انه كوكي مشت طوالي .. حنين قالت ليهو انا مش قلتا ليك ي محمد م تكذب .. محمد قال ليها ياخ انا مش فهمتك و قلتا ليك انه انا و  اسراء م كانت بينا علاقة اصلا ولاحاجة .. حنين قالت ليهو اي صح .. بس برضو انت كنت لازم تقول ليها كدة مش تقول ليها م جربت خالص ..*

محمد { يعني كدة الموضوع خلاص ؟ انتهى ولا كيف؟

حنين { م عارفه والله بس انت م بتسمع كلامي اعمل ليك شنو ..

محمد { و الحل .. ياخ 5 دقايق م قعدتهم معاها

حنين { كدي لي بكرة بنشوف

محمد { انتظر لي بكرة

حنين { يعني اقوم امشي للبت تاني اسي ي محمد م قلنا اصبر لي بكرة

محمد { خلاص طيب طيب

حنين { طيب

*حنين غيرت ملابسها و قعدت مسكت تلفونها و دخلت الواتس .. اول رسالة شافتها من كوكي و طوالي حنين ردت عليها و قالت ليها بكرة ح اجيك و بنتفاهم .. كوكي ردت ليها بي طيب ..  و بعدها لقت رسالة من ريان و بتقول ليها بكرة جاياك عندي ليك موضوع من الموت ... ردت ليها و قالت ليها طيب ي ريان بتصل ليك بكرة ..حنين قفلت الواتس و نامت لانها كانت تعبانه ..*

*تاني يوم الصباح كوكي اتصلت عليها .. حنين لسه م فتحت عيونها زي الناس ردت عليها ..{ اي ي كوكي..*

كوكي { انتي لسه نايمة.. قومي خلاص تعالي لي و على فكرة جيبي لي معاك كل الكتب و المزكرات حقتك بتاعت سنه ثامن عشان ملاذ ممتحنه السنه دي ..

حنين { طيب ..

*حنين عاينت للساعه لقتها 8 .. زهجت كيف و تاني م قدرت تنوم .. و طوالي قامت*